[1] Ememere etoréka, malaikat fe yangge bago kukuwoho-haméri-inahamona égéki nu bake kurori yori emiyoho, "Kristus emiyoho, 'Hori Ala Éné sunafahang damu ékému abuge-aguto debahae anggong gobona duri Ala bake kurosumahanato égéki kotoféri haméri inahanu. Damu ahu dukuméri Ala bake sembayang yeri Énaukungguna yohoki inahanu.
[2] Emohote, Ala Éné sunafahang pama égéki fani haméri inahamon deyoho. Ala Éné sunafahang pama égéki Alasé ahu fani Nanini fimiri bahana de yoho bake kuroho. Emohoni, ahu fani Nanini fimiri bahana de yoho busuyaha Ala kubumohoto ékému deri ahu ékému bahana yohoki hafuféri poréyahamu emenané embahae kamubégé 42 moné.
[3] Damu Nu awe ahu ukuma yoho kubumeni, yohote Nu yoho bake u yobuwoméri yoré égéki ahu tuhuremu bake u yohonané embahae sawa 1.260 moné. Ememere yoho u yo hohona égéki, asu-sawa hamu ahu kungguni insuwe kinggina gahakumu ifita si kukumenané, nemohoni ahu yoho dosa yahana égéki etori yohona modu budiyahangféri égena égéki kubumon niye.'"
[4] Ahu ukuma yoho ememere égena: Nugunabo Yesus soho emu-hori-daha hafuféri baha Éné sama kumu debahae-minyak Zaitun ukuma égena gahakumu égena. Damu hate Éné sama kumu siya-pelita kufiyosumahana ukuma kemisahagenani égena gahakumu méséri égena.
[5] Damu ahu menohosé ahu ukuma yohoki ifiyo-tifiyomenangkumaka, ahu ukuma yohona hato ékému indo musuri damu yohona kufe yoho indo doremoné. Damu ahu yoho ahu ukuma yoho bake hanikéri ifiyo-tifiyomenangkumaka, hamemere ahu énéyuhuwoho esumu honubakenané.
[6] Damu ahu ukuma Yesus Éné u yobuwoméri yosumahana égéki, yoho yoku habigiyo de égenani, hou égéki ketamenané, emohoni a fani akin deyoho. Damu hate ahu ukuma yoho yohona habigiyo de égéni, yoho oho emu-hori-daha égéki emoné oho égena égéki gong kiri éyonané. Damu yoho yohona na féri ahu soho nokumu hamu bahana yoho bake yohona ha kumenané mahana deregemu égena égéki emenané. Yoho ememere ahu yohona ha kumenané mahana égéki sawa makuma kumu emenané ememere fimenangkumaka, yoho awe emenané.
[7] Emohote, ahu ukuma yoho Yesus Éné u yori sawa Ala yori inggemoho hamu hanéri feyahafumenané. Ememere feyahafumahana égéki, ohoru base bui-sohoto asiyonané mahanato karakigi ékému musuri marari ahu ukuma yohoki taki arufonané. Damu ahu ukuma yoho wakiginate, ohoru base égé habigiyoméri yoho homuuri kufiyoné.
[8] Damu yohona wosoho égéki busu fikoyaha ahu dukumusumahanato éné yedi kayaha ita ékému awe uri kufiyonané. Damu busu fikoyaha égéki anggo posuyahaki Yohonabo Yesus debahae-abufiya kumu uguna kuwangki éné busu égé kéré. Damu anggo posuyahaki ahu Sodom damu Mesir soho ékému keiyongkéri bakena hamemere ahu busu fikoyaha ékému bahana yoho keiyongkéri bahanani, yohona busu fikoyaha égéki Sodom damu Mesir ememere aseméri kubumu iri yohona.
[9] Damu ahu gogoyaha soho hamu bahana yoho awe ahu ukuma yohona wosoho égéki etohonané. Damu ahu ukuma yoho sifing féri soho nokumu bakena égéki, yoho Ala Éné habigiyo féri ukukuwoho-mujizat eméri ahu soho nokumu beri fani Ala Éné u dari bahana de yoho bake poréyahamu emakenani, ahu nonéyuhuwoho yohote kugutoméri bakena. Emohoni, ahu nonéyuhuwoho ahu ukuma kungguna égéki etori hanikéri kubu geiri kukuwoho éné ka esumu siyahakigi égéki kutumu kemerohonané. Damu ahu nonéyuhuwoho ahu ukuma yohona wosoho soho kumenané mahana égéki fani hanikéri "yahae" emiyohonan deyoho. Emohoni, asu ukumasiyo mohoni, sawa fe yaki sawa mingkimoho.
[11] Emohote, asu ukumasiyo mohoni sawa fe yaki sawa mingkimohoka, Ala ahu ukuma Yesus Éné sisi yosumahana yoho bake sifing kurohoni, sifing féri bahana. Damu yoho dotohonani, ahu emu-hori-daha ahu ukuma yohoki etahana yoho esumu mokigina.
[12] Damu ahu ukuma yoho awe Ala Éné busu mene bahato ékému u hanggeramu yosumoho migini dagena. "Marari nokumu notuwané," ememere yosumoho migi. Emohoni, hou hayo ahu ukuma yohoki kemaafuguni damu Ala busu mene bahato ékému osuguna. Damu ahu yohona kufe kiri ékému égena yoho ukukuwoho degemu égé égéki yoku yohona kiyomu etohona.
[13] Sawa ememere égé égéki yei kirimu daha. Yei daha égéki busu fikoyaha afahang éné gogo bibirikuma (10) égena ékému gogo fe subakéri abutakunggu, damu ahu 7.000mu hosanggigina. Damu ahu tuhuremu damu bahana yoho esemu mokéri damu u kutumu ememere yori emiyahana, "Haiyangne, Ala Éné busu mene bahato ékému Énahu yohoki hafuféri baha Égésé esemu asuféri habigiyoméri baha," ememere yori Énaukungguna.
[14] Nogoki é gegang u yoho kiye: Ukukuwoho guguna ha kumenané mahana ukumasiyo égena ékému ukumamu égé égéki mése nahangkunggu, mite kamisige fe égéki awe kakumu marefené.
[15] Damu malaikat fe birikuma-berahafi-ukumamu (7) égé égésé ba-trompet ugu. Damu nu daréni u aburoho Ala Éné busu mene bahato ékému u hanggeramu emiyohona, "Nugunabo Ala katugo nogo féri ahu soho hamu bahana yohoki hafuféri etori bohoné embahae posu-posukiné. Damu Ala kubumu yohoni Ahuhabang kiri baha, Uku Kristus Égé hate Ala kumu kotoféri sawa nogo féri hafuféri bohoné embahae posu-posukiné!"
[16] Damu Ala Éné sama kumu ahu yeyoho 24 yoho ahuhabang kiri yohona abuge-kursi bahana yoho yoku isige-isige ememere Ala bake bukumu tini uhung hohona. Uhung hohonaka, damu Égé bake sembayang yeri Énaukungguna.
[17] Damu yori emiyahana, "Nabo Ala, Gu esemu habigiyoméri baha. Damu Gu katugo de baha, damu hate Gu de mumangge baki. Gusé Gané habigiyo féri Gané kufe yoho mése undoméri uwahafunggu. Damu Gu katugo nogoki age Ganahu yohoki hafuféri etori baha. Emohoni, nugu Gu bake degi kuroho ememere yoriya.
[18] Ahu soho emu-hori-daha fani Ganéné fimiri bahana de yoho Gu bake esemu ufuyori bahana. Emohoni, Gu yoho bake esemu hakereméri baha. Damu Gu mése sawakiyo yori inggemoho égéki hamu hanigini, Gusé ahu emu-hori-daha mése kungguna yohona u efefeméri yori poréyahamu emoné. Damu Gu hate mése sawakiyo yori inggemoho égéki hamu hanigini, Gusé ahu Gané u dari furubo yeri bahana yoho bake kukuwoho wayamu égé égéki kemerohoné. Gané furubo yahana yohoki ahu-nabi yoho rahamo ahu Yesus Énini fimiri bahana yoho rahamo, ahu asuféri bahana yoho rahamo, ahu amiféri bahana yoho rahamo, ahu Guki mokéri bahana yoho rahamo, ememere bahana yoho kéré. Damu Gu mése sawakiyo yori inggemoho égéki hamu hanigini, ahu soho nokumu beri ahu fe yohoki abutakuni damu soho nogoki inani bahana yohoki Ala Gusé awe emoné, ahu yohote honubakenané."
[19] Ememere yohoka, damu Ala Éné busu mene ékému Ala Éné Afahang afite abuwomohoni, nu etoréni Ala Éné Afahang womu kumu Peti-U yahamaki de égé. Damu Peti-U yahamaki ékému anggo posuyahaki iyobégé ékému Ala u yahamaki kara uni égé égéki kokuwangki égé. Damu soho nogoki bang fikomu wimoho, damu hou hanggeramu bukumoho, damu yei fiko daha, a iyobégé-es gahakumu égé égéki esumu fikoyaha kiri hanggeramu monu migina.