[1] Damu Yesus Yohanes nu bake emiyoho, "Ukukuwoho égena nogoki kara nouka, damu ahu asuféri ahu-jemaat Efesus busuyaha ékému bahana yoho hafuféri etori baha égé bake kusunu ahainé: 'Nu gugu bake Nané u éyoré. Nusé Nané bero auwa mene féri mi birikuma-berahafi-ukuma (7) yeri éré. Damu Nusé siya-pelita kufiyosumahana iyobégé-emas féri emahana birikumu-berahafi-ukuma (7) kemisahagenani égena égéki etori éré.
[2] Gugu Efesus busuyaha ékému beri Nané u dari wayamu emesuméri bahana damu poréyahamu emesuméri bahana égéki Nute nafaméré: Sawa gugu ifiyo-tifiyomahana égéki, gugu damu modu dongkuni kugutoméri Nu kotoféyahana. Nute nafaméréni gugu Nanini fimiri dukumusuméri bahana ékému ahu tuhuremu Nané sisi yahamu yokukubumahana égéki dari kotoféyahana yohoki uwahafungguna, emohoni Nu hanikéré. Damu Nu nafaméréni bafa-guru yahamu yokukubumahana marari gugure emiyohona, "Nugu ahu-rasul kéré." Ememere yohonani, gugu yohona u efefeméri nafamahanani yoho yoku yahamu yohona.
[3] Damu Nu nafaméréni gugu guguna modu dongkuni bahana. Damu ahu yoho guguki ifiyo-tifiyomahanate, guguna modu habigiyoméri Nu kotoféyahana. Gugu Nu kotoféyahana égéki fani mungguna deyoho.
[4] Emohote, u feki de égéni, Nané modu ugu. Gugu mumangge Nuki worumahana damu gugu kutumu worumahana, emohote katugo nogoki fani hamemere worumahana deyoho.
[5] Emohoni, gugu mése esemu Nuki hamuyahamu bahana égéki dakamu fifinané! Gugu Nuki worumahana deyoho damu fani kutumu worumahana deyoho ememere dosa yahana égéki ukuni nafanané. Damu fani tafe emenan deyoho, damu gugu mumangge bakena égéki hamemere woruméri bunané. Mite, fani ukuni bohonan dekumaka, Nu awe deri gané siya-pelita iyobégé-emas féri emahana égé égéki Nané sama kumu yeri degemu kufiye.
[6] Emohote, gugu bahana ékému Nikolaus éné matahai yoho degemu yokukubumahana. Emohote, gugu ememere degemu yokukubumahana égéki hakeremahana. Emohoni, gugu esumu wayamu emahana kéré. Nu hate yoho keiyongmu emahana égéki hakereméré.
[7] Ahu menohosé sunto de bohongkumaki, Ala Éné Ubana Hayo ahu-jemaat birikumu-berahafi-ukuma (7) yoho bake u yoho nogoki femu wayamu nara! Hohoi yohona ahuhabang Iblis égé wakigite, ahu menohosé habigiyomongkumaki, Nu égé bake éné na kurahae, emohoni égé Ala Éné Giyong esumu manggohokigi ékému debahae éné ero égéki awe aféné. Debahae éné ero égéki ahu yoho arenangkumaka, awe Ala kumu bohonané embahae posu-posukiné.'"
[8] Damu Yesus Yohanes nu bake tafe emiyoho, "Ukukuwoho égena nogoki kara nouka, damu ahu asuféri ahu-jemaat Smirna busuyaha ékému bahana yoho hafuféri etori baha égé bake kusunu ahainé: 'Nu ahu Nanini fimiri Smirna busu bahana gugu bake Nané u éyoré. Nusé mumangge kukuwoho emu-hori-daha égéki eméréké, damu embahae sawa akimamaga Nusé kukuwoho emu-hori-daha égéki awe yori feyahafume. Damu Nu mése kunite, dakamu dotoréké Nu séré:
[9] Nu nafaméréni gugu ifiyo-tifiyomahanani, kugutoméri bahana. Damu hate kukuwoho karakiginani bahana. Emohote, gugu esumu habigiyoméri Nu kotoféyahanani, ahu toto aburoho bahana gahakumu bahana. Damu Nu hate nafaméréni ahu guguna u yahamu yori hahafeyohona. Ememere gugu dirimeféri yohona yoho yoku yohore emiyohona, "Nugu Yahudi nahu we," ememere yohona. Yoho Yahudi nahu kiginate, fani Ala Énahu kiri bahana deyoho. Emohoni, yoku hohoi yohona ahuhabang Iblis énahu kiri bahana.
[10] Ahu yoho gugu ifiyo-tifiyomenanéka, damu gugute kugutoméri bohonané mahana égéki fani mokinan deyoho. Nu katugo u yahae méré nogoki haiyangne, femu wayamu narané: Hohoi yohona ahuhabang Iblis gugu égena ékému ahu yahamuto yohoki berahae yeri bui kumu kukumenané. Iblis égé ememere eméri gugu Nanini fimiri bahana égéki amageimenan niye ikuhamenané. Ahu yoho guguki sawa bibirikuma ememere ifiyo-tifiyomenané esumu kugutoméri bohonané. Gugu Nuki fimiri bahanani, ahu yoho guguki uri kufiyonané akumenané mahanate, gugu damu Nanini fimiri bahana égéki fani modinan deyoho, meneféyané. Ememere bohonangkumaka, Nu awe gugu bake habanghauwo éné ka esumu siyahakigi égéki kurahae. Habanghauwo égéki gugu awe Nu kumu kotoféri bohonané embahae posu-posukiné moho égé kéré.
[11] Ahu mekenohosé sunto de bohongkumaki, Ala Éné Ubana Hayo ahu-jemaat birikumu-berahafi-ukuma (7) yoho bake u yoho nogoki femu wayamu nara. Hohoi yohona ahuhabang Iblis égé wakigite, ahu menohosé habigiyomongkumaki, Nu ahu égé bake éné na kemerahae, emohoni égé fani tafe ukumamu akumon deyoho.'"
[12] Damu Yesus Yohanes nu baki tafe emiyoho, "Ukukuwoho égena nogoki kara nouka, damu ahu asuféri ahu-jemaat Pergamus busuyaha ékému bahana yoho hafuféri etori baha égé bake kusunu ahainé: 'Nu ahu Nanini fimiri Pergamus busu ékému bahana gugu bake Nané u éyoré. Nu Nané u égéki tahae piyaha éné yegi afifiye késéngkéri égé gahakumu habigiyoméri égé Nu séré.
[13] Nu nafaméréni guguna busu égéki esemu keiyongkigina. Hohoi yohona ahuhabang Iblis guguna busu ékému ahuhabang kiri ahu guguna busu ékému bahana yohoki hafuféri égé. Emohote, gugu damu Nu kotoféyahana. Damu Antipas Nanini fimiri Nané sisi yosumoho égéki ahu guguna busu kumu beri Iblis éné u dari bahana yohosé uguna kunggu. Ememere égena égéki, gugu Nanini fimiri bahana égéki fani amageimahana deyoho.
[14] Emohote, u fe yahamuto de égenani, Nané modu ugu. Anggo posuyaha Bileam égé wou féri yosuméri baha damu degemu yokukubumaki. Moab nahu yohona ahuhabang-raja Balak égé Bileam bake yokukubumohoni, Bileam égéte Israel nahu yoho dosa afénan niye yokuni yoho: Uku Israel nahu yoho kukuwoho ala éné kusi gahakumu emahana yoho bake sembayang yeri aguto kemahana égéki yeri énggena, damu kutumu hahafemenan niye yokukubumaki. Ememere Bileam degemu yokukubumaki hamemere yokukubumahana égéki ahu kamukumamu guguna busu kumu bahana yoho kotoféyahana.
[15] Bileam degemu yokukubumaki hamu hanéri Nikolaus éné matahai yoho yokukubumoho. Emohoni, guguna jemaat égena ékému ahu tuhuremu yoho kotoféyahana.
[16] Emohoni, ememere dosa guku damu kemesumahana égéki ukuni fani tafe afénan deyoho, meneféyané! Emohote, gugu fani emenan dekumaka, Nu kakumu deri ahu yahamu yokukubumahana yoho kotoféyahana yoho kumu Nané u féri taki arufowané. Damu Nané u tahae piyaha éné yegi afifiye késéngkéri égé gahakumu habigiyoméri égéni, Nané u féri yahae, ahu énéyuhuwoho yohote awe esemu poréyahamu bohonané.
[17] Ahu mekenohosé sunto de bohongkumaki, Ala Éné Ubana Hayo ahu-jemaat birikumu-berahafi-ukuma (7) yoho bake u yoho nogoki femu wayamu narané. Hohoi yohona ahuhabang Iblis égé wakigite, ahu menohosé habigiyomongkumaki, Nu awe ahu égé bake yahaeni, ahu égé ohoru-manna kasuni égé gahakumu kukuwoho wayamu égena égéki awe arené. Damu Nu awe iyobégé hayo égé bake kurahae, damu iyobégé hayo éné teyo ékému éné fi harahai uni égé égéki égé bake kurahaeni, ahu fe fani nafamon deyoho, uku nafamoné.'"
[18] Damu Yesus Yohanes nu bake tafe yoho: "Ukukuwoho égena nogoki kara nouka, damu ahu asuféri ahu-jemaat Tiatira busuyaha ékému bahana yoho hafuféri etori baha égé bake kusunu ahainé: 'Ala Énamu Nusé ahu Nanini fimiri Tiatira busuyaha ékému bahana gugu bake Nané u éyoré. Nusé Nané kiyo indo hakiboroho gahakumu waneri baha, damu Nané bégé besi-tembaga indo dugunani, éné pu karakigini esemu mibobosangkigi gahakumu esumu mibobosangkigi.
[19] Nu gugu Nané u dari wayamu emesuméri bahana damu poréyahamu emesuméri bahana égéki Nute nafaméré: Nu nafaméréni gugu yangna besingna Nuki worumahana, damu gugu kutumu woruméri bahana. Nu hate nafaméréni gugu Nanini fimiri bahana, damu ahu Nanini fimiri bahana yohona furubo kotoféri yeri mahamu emesumahana. Damu ahu yoho guguki ifiyo-tifiyomenané mahana damu poréyahamu emenané mahana égéki, modu dongkuni kugutoméri bahana égéki Nute nafaméré. Damu anggo feki gugu wayamu emesumakena égéki fani aburohomu emakena deyoho, mite katugo nogoki gugu esumu aburohomu wayamu emesumahana.
[20] Emohote, u feki de égéni, Nu Nané modu ugu. Katugo gugu bahana ékému yang kamisige keiyongkéri de baha. Gugu yang égéki etori fani mungguna deyoho. Yang éné fi Izebel égé égére emiyoho, "Nu yang-nabi, Ala Éné u dari yosuméré." Emiyohote, égé ahu Nanini fimiri bahana yoho bake degemu yahamu yokukubumoho. Emohoni, ahu Nanini fimiri bahana yohote kukuwoho ala éné kusi gahakumu égé égé bake sembayang yeri énaukunggunaka, damu ohoru aguto duri kukuwoho ala éné kusi gahakumu égé égé bake kuroho égéki énggena, damu yang égé kumu kutumu hahafemahana.
[21] Yang égé ememere dosa kemoho égéki muni dakamu abuméri Nu bake deri Nané u dari bohon niye sawa kirimu kuroré, mite égé damu kutumu hahafeméri kukuwoho ala éné kusi gahakumu égé égé bake sembayang yaha égéki fani muni ukunggu deyoho.
[22] Maha femu narané! Nu awe égé bake poréyahamu emeni, égé awe hahafemahanato ékému wiyahakiné, damu haha hahaimoné aiyoné. Damu ahu emu-hori-daha yang égé kumu kotoféri hahafemahana yoho yang égé kumu kotoféri emesumahana égéki fani muni dakamu abuméri Nu bake deri Nané u dari bohonan dekumaka, Nu awe emeni, yoho esumu poréyahamu kugutoméri bohonané.
[23] Damu Nu ahu tuhuremu yang égé keiyongmu yokukubumohoni kotoféyahana yohoki esumu homufuni honubakenané. Damu ememere emeni, ahu-jemaat emu-hori-daha yoho awe nafamenané Nu ahu yohona sifing damu modu égéki etori nafaméré Nu séré. Nu awe ahu isige-isige emesumahana hamu hanéri ahu Nané u dari wayamu bahana yoho bake esumu wayamu eme, damu hate ahu Nané u fani dari bahana de yoho bake esumu poréyahamu eme.
[24] Emohote, ahu tuhuremu Tiatira busuyaha ékému bahana yoho keiyongmu yokukubumoho égéki fani kotoféyahana deyoho. Keiyongmu yokukubumoho égéki ememere égé; hohoi yohona ahuhabang Iblis éné sifing ahu yoho bake kurohoni, ahu yohote fake-fakemu emesumahana égé kéré. Emohote, ahu tuhuremu, gugu u nogoki undoméri ansakuméri fani kotoféyahana deyoho. Emohoni, Nu katugo gugu bake yahae: U fe rahamo akiya fe rahamo fani tafe yahae deyoho, emohoni gugu fani butumu fifimiri emenan deyoho.
[25] Emohote, guku damu kirimu Nanini fimiri Nané u dari u yoréto hamemere emesuméri bahana embahae niyaki kamu égé remu habigiyoméri hamemere énané. Emohoni, embahae Nu awe dakumu soho nokumu defe.
[26] Damu hohoi yohona ahuhabang Iblis wakigite, ahu Nanini fimiri bahana yoho habigiyomahana, damu yoho Nu u yoré égéki damu esumu dari hamemere emesuméri bohonané embahae sawa akimamaga kiné. Ala Nu bake Nané na kuroho hamemere ahu ememere bahana yoho bake Nané na habigiyo kurahae, emohoni yoho habigiyoméri ahu emu-hori-daha soho nokumu beri Ala Éné u fani dagena de yohoki hafuféri éyonané.
[27] Damu ahu habigiyomahana yoho yangge bago besi féri emoho égé féri ifiyohona hamemere yoho esumu hanggeramu ahu Ala Éné u fani dagena de yohoki hafuféri emoné. Damu ahu habigiyomahana yoho kukuwoho soho magiyo féri emahana égéki unggusaméri uwahahamahana hamemere yoho ahu Ala Éné u fani dagena de yohoki unggusaméri abutakumenané.
[28] Damu hohoi yohona ahuhabang wakigite, ahu menohosé habigiyomongkumaki, bosawakigini, mi fiko sawa musuguto kakani hori égé gahakumu ahu égé kakani hori éyoné.
[29] Ahu mekenohosé sunto de bohongkumaki, Ala Éné Ubana Hayo ahu-jemaat birikumu-berahafi-ukuma (7) yoho bake u yoho nogoki femu wayamu narané.'"