[1] Damu malaikat birikumu-berahafi-ukuma (7) yohona biyahae yeri égena ékému malaikat fe nu bake deri yori emiyoho, "Nokumu do. Ala yang fe hu kei osusumoho égé bake esumu hakereméri poréyahamu emoné moho égéki gu bake kubumeni, etohoné. Yang hu kei osusumoho, uku busu fikoyaha oho yeyamukuni uwohoho ita kumu uguna égéki kubumoho.
[2] Damu ahuhabang-raja soho nokumu bahana yoho mése yang égé kumu kotoféri hahafemahana. Damu yang hu kei osusumoho égé ahu emu-hori-daha soho nokumu bahana yoho bake yokungguni, yoho kotoféri anggur noho miri wambuméri hahafemahana."
[3] Damu hakureyaha Ala Éné Ubana Hayo nu afuri égé. Damu malaikat égé nu yeri siyanto soho kumu hoho. Ékému nu etoréni yang fe ohoru base ha kanggo kigi éné mobigi teyo ékému ogusuri baha. Damu ohoru base ha ékému ka Ala inani kara ungguna égéki aburohomu égenani, ha égéki ketanggena. Ohoru base égé habang birikuma-berahafi-ukuma (7) baha, damu auwo bibirikuma (10) baha.
[4] Damu yang égé ifita ungu damu kanggo ememere égena égéki kunggu. Damu égé iyobégé-emas, damu iyobégé-perak, damu iyobégé fe éné ka esumu siyahakigi deregemu égena égéki, damu mani éné ka esumu siyahakigi éné fi mutiara égéki ememere gaguma asugunani égena. Damu égé biyahae iyobégé-emas féri emoho éné ka esumu siyahakigi fe yeri égé. Biyahae égé oho bong baha. Oho égéki yang égé kukuwoho ala éné kusi gahakumu égena yoho bake sembayang yeri yohonaukungguna, damu hu kei yeri hahafeméri modu poréyahamu égé égéki kubumoho.
[5] Damu éné habang sama ékému éné fi fake unggu baha égéki ememere ayoméri kubumoho: "Yang nogoki busu fikoyaha keiyongkéri égé éné fi Babel. Damu égé yang soho nokumu yang hu kei osusumahana yohonéni gahakumu baha. Damu égé yoho bake yohona aduwosoho féri dosa yahana damu kukuwoho ala éné kusi gahakumu égena yoho bake sembayang yeri yohonaukungguna égéki yokukubumoho kéré," ememere égé.
[6] Ememere etoréka, damu nu hate etoréni yang égé gong miri wambumoho gahakumu égé. Égé ahu Yesus Énini fimiri bahana yohoki uri kufiyoho. Damu ahu Yesus Énini fimiri bahana yoho Yesus Éné sisi yobuwoméri yo hohonani, yang égé yohoki homuugu. Damu nu yang égéki etori fani wayamu nafaméré deyoho, emohoni mokéri hakuruméré.
[7] Emohote, malaikat égé nu bake yori emiyoho, "Gu fani mokéri hakurumon deyoho. Nu awe yang hu hahafemoho éné u awisamoho égéki ayoméri yahae. Damu ohoru base éné habang birikuma-berahafi-ukuma (7) damu éné auwo bibirikuma (10) baha égé éné teyo kumu yang égéki yeri hoho-daha éné u awisamoho égéki gu bake ayoméri yahae.
[8] Ohoru base gu etoho égé anggo posuyaha soho nokumu baki. Damu égé kungguni, katugo fani baha deyoho. Damu embahae égé awe dakumu dotori hate ahuhabang kiri bohon niye bui-sohoto esumu kurukigini bégé asinané mahanato karakigi ékému marefené. Égé ememere marari kibikubumohoni, ahu tuhuremu soho nokumu bahana yoho etori mokéri hakurumenané. Ala soho damu hou yori emaki égé féri Yesus Uku Buku fe ékému ahu Ala kumu bohonané embahae posu-posukiné mahana yohona fi kara unggu baha. Buku ékému ahu énéyuhuwoho yohona fi karawoho. Damu embahae Ala ohoru base égé bake hakereméri poréyahamu emoné embahae posu-posukiné.
[9] "Damu ahu wayamu fimiri bohongkumaka, égé wayamu nafaméri u aseméri yoho égéki femu wayamu nafamoné: Damu ohoru base éné habang birikuma-berahafi-ukuma (7) égena égéki soho haibe siyaha birikuma-berahafi-ukuma (7) busu fikoyaha ékému égena égéki kubumoho.
[10] Damu habang birikuma-berahafi-ukuma (7) égena égéki uku hate ahuhabang-raja birikuma-berahafi-ukuma (7) yohoki kubumoho. Damu ahuhabang-raja égena ékému birikuma mése kungguna. Damu ahuhabang-raja kamisige kageto hafuféri égé, damu feki fani maraha deyoho. Damu ahuhabang-raja fe marari égé awe hafuféri éyoné, mite égé hawomu hafuféri éyoné.
[11] Damu ohoru base anggo posuyaha soho nokumu baki, damu kageto fani baha de égé ahuhabang-raja birikuma-berahafi-ukumasiyomu (8) éyoné moho égé séré. Ahuhabang-raja birikuma-berahafi-ukuma (7) bahana yoho keiyongmu emesuméri bakena hamemere égé keiyongmu bohoné. Emohote, Ala awe ohoru base égé bake hakereméri poréyahamu emoné embahae posu-posukiné.
[12] "Damu auwo bibirikuma (10) gu mése etoho égéki hate ahuhabang-raja bibirikuma fani yohona na yeri ahu yoho fani hafuféri etori bahana de yohoki kubumoho. Yoho awe yohona na afénanéka, damu sawakiyo kamisige gahakumu bagumu ohoru base kotoféri ahuhabang-raja kiri ahu yoho hafuféri bohonané.
[13] Damu ahuhabang-raja énéyuhuwoho awe u yori kutumu dari modu kamisigemu inggemenané. Yoho inggemenanéka, damu yohona na yeri ahu yoho hafuféri bahana égéki damu yohona habigiyo égéki ohoru base égé bake kurohonané.
[14] Damu ahuhabang-raja yoho kumu ohoru base égé kumu kotoféri Wi-Domba Amuke Égéki ansakuméri taki arufonané. Emohote, Wi-Domba Amuke, Uku Yesus Égésé awe emoné yoho wakinané, mite Wi-Domba Amuke Égé habigiyomoné. Égé habigiyomoho égéki Égé esumu asuféri bahani, yohonabo emu-hori-daha égena ékému Yohonabo kiri baha, damu ahuhabang-raja emu-hori-daha égena ékému yohona Ahuhabang-Raja kiri yohoki hafuféri baha kéré. Damu ahu Wi-Domba Amuke Égé kotoféyahana yoho Wi-Domba Amuke Égé kumu kotoféri habigiyomahana. Ala ahu énéyuhuwoho yohona fi iri kubumu yohoni, yohote Wi-Domba Amuke kotoféyahana, damu Ala Éné u dari bahana, damu Wi-Domba Amuke Éné furubo kotoféri yeri Égéki mahamu emahana. Emohoni, yoho habigiyomahana kéré," emiyoho.
[15] Damu malaikat égé nu bake emiyoho, "Gu oho emu-hori-daha égéki etoho, u feki oho emu-hori-daha ékému yang hu kei osusumoho égé baha égéki, ahu gogoyaha soho hamu bahana yohoki kubumoho.
[16] Damu auwo bibirikuma (10) gu etoho égéki ahuhabang-raja yohoki kubumoho. Damu ahuhabang-raja yoho damu ohoru base égé esumu yang égéki hakeremenané. Damu yoho yang hu kei osusumoho éné toto damu éné ifita emu-hori-daha keméri ahanané, emohoni yang égé awe monuwekiné. Damu yoho yang éné koru arenané, damu éné wosoho ganggise duri unggusamenané.
[17] Yoho ememere emenané mahana égéki Ala ahuhabang-raja bibirikuma yohona modu kemohoni Ala Éné sifing fimoho égéki hamemere emahana. Emohoni, ahuhabang-raja énéyuhuwoho yoho u yori kutumu dari modu kamisigemu inggeméri yohona na, uku ahu yoho hafuféri bahana égéki ohoru base égé bake kurohonané. Emohoni, ohoru base égéte ahu yohoki hafuféri etori bohoné, embahae Ala u emu-hori-daha yaki égéki awe hamu hanéri haiyangmu éyoné.
[18] Damu yang gu etoho égé uku busu fikoyaha ahuhabang-raja soho nokumu égena yoho hafuféri bahana égéki kubumoho," emiyoho.