[1] Damu nu etoréni malaikat fe Ala Éné busu mene ékému monu migi. Égé kukuwoho bui-sohoto asiyonané mahanato karakigi éné afite abuwomona égéki yeri égé, damu éné bero kumu yuhu-rantai fikoyaha égéki yeri égé.
[2] Damu malaikat égé usi-naga fikoyaha égéki berahae yeri yuhu-rantai féri aragi. Usi-naga égé hohoi yohona ahuhabang Iblis éné fi Satan kéré. Damu égé anggo posuyahaki giyong Eden ékému yahamu yaki usi posuyaha égé kéré. Damu malaikat égé usi-naga égéki yuhu-rantai féri arari kufiyohoni, sufébégé seribu (1.000) moné.
[3] Damu malaikat égé usi-naga égéki pemohoni bui-sohoto asiyonané mahanato karakigi ékému oguguka, damu afite égéki ketanggi. Damu hate afite égéki kukuwoho fe féri umpohomoho, emohoni Iblis égé fani ahu gogoyaha soho hamu bahana yoho bake dosa afénan niye yahamu yori hafuféri éyon deyoho, damu bohoné embahae sufébégé seribu (1.000) moné. Ememere bahaka, damu Ala yoho niye malaikat fe emoné usi-naga égé bui ékému suhungfiyoné, sawa méké kebemu bohoné.
[4] Damu nu etoréni, ahuhabang éné abuge-kursi égena, damu ahu yoho ékému bahana. Damu Ala yoho bake yohona na kurohoni, yohote ahu fe yohona u efefeméri yori inggemusuméri bahana. Nu hate etoréni ahu yohona ubana de égena. Ahu yohona ubana yoho soho nokumu bakena égéki, yoho Ala Éné u yobuwoméri yohona, damu Yesus Éné sisi ahu yoho bake yobuwoméri yo hohomusumahanani, ahu fe yoho yohoki habang inggibahaméri homuuguna. Damu ahu énéyuhuwoho ohoru base damu ala kusi gahakumu ohoru base éné kusi emahana égé bake sembayang yeri bahana égéki muwangkena. Damu yoho yohona bero damu yohona habang sama kumu ohoru base éné bang fani umpohomakena deyoho. Ememere beri kuwangkena yoho dakamu dotori Kristus kumu kotoféri ahuhabang kiri hafuféri bohonané embahae sufébégé seribu (1.000) moné.
[5] Ala emohoni ahu énéyuhuwoho yohosé ahu honubakigina ékému mumangge dakamu dotohona. Emohote, ahu honubakigina tuhuremu fani dotohonan deyoho, dakasuhumu sufébégé seribu égéki feyahafumoné.
[6] Damu ahu isige-isige mumangge dakamu dotohona yoho yohona modu hanikinané. Ala fimohoni yoho dosa karawohote esumu manggohomu bahana. Yoho fani tafe ukumamu akumenan deyoho. Emohote, yoho awe ahu-imam kiri Ala damu Kristus Yohona furubo yeri Yohoki mahamu emenané, damu yoho Kristus kumu kotoféri hafuféri éyonané embahae sufébégé seribu (1.000) moné.
[7] Damu sufébégé seribu (1.000) feyahafumonéka, Ala Éné malaikat awe hohoi yohona ahuhabang Iblis égéki bui-sohoto ékému suhungfiyoné.
[8] Damu égé hori ahu gogoyaha soho emu-hori-daha nokumu fani Yesus Énini fimiri bahana de yoho bake yahamu yori hafuféri emoné. Ememere hohoi yohona ahuhabang Iblis kotoféyahana yoho anggo posuyahaki ahu-nabi Yehezkiel ahuhabang-raja Gog damu éné gogoyaha Magog ememere yoho yoho séré. Damu hohoi yohona ahuhabang Iblis égé yohoni ahu énéyuhuwoho yoho dukuméri Ala Énahu yoho kumu kutumu taki arufonané. Kiyohouyaha soho gesing aburoho égenani ahu fe fani inahamon deyoho, hamemere yoho esumu aburohomu dukuméri taki arufonané.
[9] Damu hohoi yohona ahuhabang Iblis éné tentara yoho soho hamu bahana ékému deri Ala busu fikoyaha worumoho ékému awiwimenané. Damu yoho hate busu fikoyaha ékému ahu Yesus Énini fimiri bahana yohona tentara yohona tenda-saka siri bahana égéki awiwimenané. Emohote, Ala emoné indo awe hou hosumu miri yohoki doremoné.
[10] Damu Ala Éné malaikat égé hohoi yohona ahuhabang Iblis ahu énéyuhuwoho bake yahamu yori hafuféri baha égéki kiyohouyaha indo damu iyobégé hakiboroho damu éné gobo esumu pahafumoho ékému pemoné otohonané. Damu kiyohouyaha égéki ohoru base moguri maraha damu ohoru base mo maraha yohoki mése pemohoni otahana égé kéré. Emohoni, hokumu yoho asu-sawa kugutoméri bohonané embahae posu-posukiné.
[11] Damu nu etoréni Ahuhabang Éné abuge-kursi esumu fiko hayokéri égé ékému Ala de baha. Damu Ahuhabang Éné abuge-kursi éné sama kumu hou damu soho anigigini, fani tafe etohowan deyoho.
[12] Damu nu etoréni ahu honubakiyakena yoho katugo dakamu dotori Ahuhabang Éné abuge-kursi éné sama kumu dukuméri égena. Ahu dukuméri égena yoho: Ahu asuféri bahana rahamo ahu amiféri bahana rahamo ememere ahu emu-hori-daha yoho Ahuhabang Éné abuge-kursi éné sama kumu dukuméri égena. Damu Ala Éné Buku emu-hori-daha abubuwomahanani égena. Buku égena égéki Ala ahu énéyuhuwoho soho nokumu u emu-hori-daha wayamu emesumahana damu poréyahamu emesumahana ememere égena égéki kara uwangki bahana kéré. Damu Buku kamisige ahu Ala kumu bohonané embahae posu-posukiné mahana yohona fi kara uwangki baha égéki hate abuwoméri égé. Ala Éné Buku égena égéki ahu énéyuhuwoho soho nokumu wayamu emesumahana damu poréyahamu emesumahana ememere unggu baha ékému etori efefeméri hamu hanéri yori inggemoho.
[13] Ahu yoho kiyohouyaha kumu oho oguguméri honubakiyakena yoho dakamu dotohona. Damu ahu kuni ahu hosanggigina yoho hori kidabahanato ékému hori kidabakena yoho dakamu dotohona. Ememere dotohona yoho Ahuhabang Éné abuge-kursi Éné sama kumu méséri égena. Ala ahu énéyuhuwoho soho nokumu beri emesumakena égé féri ahu isige-isige yohona u efefeméri yori inggemoho.
[14] Damu ahu hamu yohona fi buku ahu Ala kumu bohonané embahae posu-posukiné mahana ékému fani kara ungguna bahana de yoho kiyohouyaha indo hakiboroho ékému pemohoni otahana. Emohoni, ahu fani tafe akumenan deyoho, damu ahu énéyuhuwoho ahu hosanggiyakena yoho hori kidabahanato tafe éyon deyoho. Ememere égéni, kiyohouyaha indo hakiboroho égéki ahu ukumamu tafe kunggunani hori bahana éné busu kéré.