[1] Damu Yohanes nu Babel busu fikoyaha gensemoho égéki etoréka, damu daréni ahu aburoho yoho dukuméri gogoyahakéri Ala Éné busu mene bahato ékému hou bukumoho gahakumu u hanggeramu yohonani daré, "Haleluya, Nugunabo Ala Énaukumowa! Égé nuguna dosa tobunsuméri nuguki umburomoho! Égé habigiyoméri emesumoho. Nugu Égé asuféri baha ememere yori Éaukumériya.
[2] Égé Éné sifing haiyangmu fimiri ahu yohona u efefeméri yori inggemoho égéki haiyangne. Ala yang hu kei osusumoho gahakumu busu fikoyaha esemu keiyongmu égé égé bake poréyahamu emoho. Ahu busu fikoyaha ékému bahana yoho ahu tuhuremu soho nokumu hamu bahana yoho bake yokungguni, ahu yohote hanikéri yohona aduwosoho féri keiyongmu emesuméri bakena, damu kukuwoho ala kusi gahakumu emahana yoho bake sembayang yeri yohonaukuwangkena. Damu yoho Ala Éné u dari furubo yeri bahana yohoki homuugunani honubakigina. Emohoni, Ala égé bake hamemere poréyahamu emoho," emiyohona.
[3] Damu ahu énéyuhuwoho tafe u hanggeramu yori emiyahana, "Haleluya, Ala Énaukumowa! Busu fikoyaha égé indo dori gensemoho éné noku awe musuri siyaha kumu atuné embahae posu-posukiné!"
[4] Damu ahu yeyoho 24 yoho kumu kukuwoho-sifing-féri-bahana sanggere yoho kumu kotoféri Ala Ahuhabang kiri Éné abuge-kursi ékému baha Égé bake bukumu tini uhung hori Énaukuni u hanggeramu emiyohona, "Amin! Haleluya, Ala Énaukumowa," emiyohona.
[5] Damu ememere égena égéki, Yohanes nu daréni Ahuhabang Éné abuge-kursi ékému u hanggerakéri yoho, "Hai, ahu Ala Éné u dari Éné furubo yahana emu-hori-daha yohoniya, gugu Ala Énaukunané! Ahu Alani mokéri bahana yohoniya, gugu, ahu asuféri bahana rahamo, ahu amiféri bahana rahamo Ala Énaukunané."
[6] Damu nu daréni ahu gogoyaha yoho hanggeramu u yohona. Yoho u hanggeramu yohona éné pou égéki oho boyeyamoho gahakumu u yohona rahamo hou hanggeramu bukumoho gahakumu u yohona: "Haleluya, Ala Énaukumowa! Nugunabo Ala esumu habigiyoméri baha Égésé mése Ahuhabang kiri baki.
[7] Damu marohoné! Nugu hanikéri bero popohoméri kubu aiya! Marohoné, Ala esemu asuféri habigiyoméri baha ememere yori Énaukumowa! Besing yang aféné moho gahakumu Wi-Domba Amuke Uku Yesus Égésé ahu Énini fimiri bahana yoho kumu kotoféri kamisigemu arari bohonané mahana éné sawa égéki mése maraha, damu ahu Yesus Énini fimiri bahana yoho Égé kumu kotoféri arari bohonan niye mése fengféyahana.
[8] Damu Ala 'yahae' emiyohoni, ahu Yesus Énini fimiri bahana yoho yang hu aféné moho éné ifita hayo esumu waneri éri pu karakigi égéki kukumahana." Damu ifita-mamana piyaha hayo waneri éri pu karakigi égéki ahu Yesus Énini fimiri bahana yoho Ala Éné u dari haiyangmu emesumahana égéki kubumoho.
[9] Damu malaikat égé ukukuwoho emu-hori-daha égéki Yohanes nu bake kubuméri yohoka, damu nu bake tafe yori emiyoho, "U nogoki kara nou. Ala yohoni Wi-Domba Amuke, Uku Yesus Égé Énahu yoho kumu kotoféri arari bohonan niye éné kubu iri gong akinané mahana ékému dahana yoho yohona modu esumu hanikinané," emiyoho. Égé tafe nu bake emiyoho, "U nogoki Ala u yoho égéki haiyangmu égé égé kéré."
[10] Damu nu malaikat éné bégé fu kumu énaukume niye bukumu tini damu uhung hori habang gonggongme beméré. Emohote, malaikat égé nu bake emiyoho, "Gu fani ememere emon deyoho. Nu hate Ala Éné u dari Éné furubo yeri bere. Gu damu gané matahai yoho Yesus Éné u dari furubo yahana hamemere nu hate emesuméré. Damu gané matahai Yesus Énini fimiri bahana yoho Yesus Éné sisi yobuwoméri yosumahana hamemere nu eméré. Ala Éné Ubana Hayo ahu yoho bake habigiyo kurohoni, ahu yohote Yesus Éné sisi ahu fe yoho bake yobuwoméri yosumenané. Emohoni, Ala bake sembayang yeri Énaukunu," emiyoho.
[11] Damu nu etoréni Ala Éné busu mene ékému afite abuwoméri égé. Ékému wi-kuda hayo kamisige de baha. Damu Yesus Égé wi-kuda hayo ékému ogusuri maraha. Éné fi ememere égé, "Égé u yahamaki égéki fani munggu de esumu emesumoho, damu Égé haiyangmu emesumoho," ememere Éné fi iri yohona. Égé ahu emu-hori-daha yohona u efefeméri yori inggemoho égéki haiyangmu emoho, damu Égé Éné kufe kumu taki arari haiyangmu emoho.
[12] Damu Éné kiyo indo hakiboroho gahakumu waneri baha, damu Égé Ahuhabang kiri baha ememere kubumoho éné habanghauwo aburoho kunggu. Damu Éné haha kumu Éné fi fe kara unggu baha, emohote fi égé ahu fe fani nafamoho deyoho, Uku Égésé nafamoho.
[13] Égé ifita-mamana piyaha gong ékému uroho kungguka, damu kuni baha! Damu Éné fi feki "Ala Éné U" ememere iri yohona.
[14] Damu Égé Éné mo kumu Éné tentara Ala Éné Busu mene bahana yoho wi-kuda hayo ogusuri kotoféri marahana. Yoho ifita hayo kuyomu waneri éri pu karakigi égéki kukumahana.
[15] Damu Égé u yoho égéki tahae késéngkigi féri ahu gogoyaha soho hamu beri Ala Éné u fani dagena de yoho ufiyoné honubakenané gahakumu égé. Égé besi bago botokigi égéki yeri égé gahakumu habigiyoméri ahu gogoyaha soho hamu bahana yohoki hafuféri bohoné. Ahu kukuwoho anggur noho hounginggungguna ékému ero-anggur unggusaméri hounginggungguna hamemere Égé Éné kufe yohoki awe hounginggumoné. Égé ememere emoho égéki Éné kufe yoho dosa kemahanani Ala esumu habigiyoméri baha Égésé esumu hakeremoho égéki kubumoho.
[16] Éné ifita-mamana piyaha Éné miribégé ketanggi ékému Éné fi ememere kara uni égé, "Égé ahuhabang-raja emu-hori-daha égena ékému Yohona Ahuhabang-Raja kéré, damu yohonabo emu-hori-daha égena ékému Yohonabo kiri baha."
[17] Damu nu hou hosumu etoréni, malaikat fe sawa ékému asiri égé. Damu égé é emu-hori-daha siyaha kumu busanggigina yoho bake u hanggeramu yoho, "Nokumu marohoné! Marari dukuméri Ala gugu niye ohoru aburohomu fengféyoho égéki nané!
[18] Emohoni, Ala Éné kufe emu-hori-daha mése kungguna yohona koru nané, damu ahuhabang-raja yohona koru damu ahu-tentara yohona koru damu ahu habigiyoméri bahana yohona koru damu wi-kuda yohona koru damu ahu wi-kuda ogususuméri bahana yohona koru ememere égena emu-hori-daha égéki nané. Damu ahu yohona koru emu-hori-daha égéki nané: Ahu yoho yoku yoho niye furubo yeri bahana yoho, damu ahu yohonabo yohona u dari furubo yahana yoho, damu ahu asuféri bahana damu ahu amiféri bahana yohona koru égéki nané," emiyoho.
[19] Damu nu etoréni ohoru base damu ahuhabang-raja soho nokumu bahana yoho damu yohona tentara yoho kotoféri Yesus wi-kuda hayo teyo kumu ogusuri baha Égé kumu Éné tentara yoho kumu taki arufonan niye dukuméri égena.
[20] Emohote, Égé ohoru base moguri maraha égéki berahae yahaka, damu hate ohoru base mo maraha égé kumu kotoféri berahae yaha. Ohoru base mo maraha égé "nu ahu-nabi kéré" ememere yahamu yori ahu yohoki degemu poréyahamu hafuféri égé. Damu ohoru égé ohoru moguri maraha éné sama kumu ukukuwoho-mujizat ahu fani emesumahana de égéki emesumoho. Égé ememere eméri ahu ohoru base moguri maraha éné bang fiyoho égéki umpohomahana, damu Ala gahakumu ohoru base éné kusi bake sembayang yeri énaukungguna yoho bake yahamu yori degemu poréyahamu hafuféri baha. Emohoni, Yesus Égé ohoru base moguri maraha damu ohoru base mo maraha yohoki yeri kiyohou indo damu iyobégé hakiboroho damu éné gobo esumu pahafumoho ékému pemoho otahana.
[21] Damu Yesus wi-kuda hayo ogusuri baha Égé Éné u yori ahu tuhuremu emu-hori-daha yohoki homuugu. Éné u égéki tahae Éné hato kumu musuri ahu homuugu gahakumu égé. Damu é emu-hori-daha yoho yohona koru énggena yaki, kudukigina.