[1] Damu Yohanes nusé kibikubumoho égéki damu etori éréni, Wi-Domba Amuke soho haibe siyaha éné fi Sion ékému méséri égé. Damu Égé kumu ahu 144.000 bahana yoho kumu kotoféri méséri égena. Damu ahu énéyuhuwoho mése yohona habang sama ékému Wi-Domba Amuke Éné fi kaungguni égé, emohoni yoho Yesus Énahu kéré ememere kubumoho. Damu hate Énabo Ala Éné fi kotoféri kara ungguni baha, emohoni yoho Ala Énahu kéré ememere kubumoho.
[2] Damu Ala Éné busu mene bahato ékému pou migini daré. Pou daré égéki oho fikoyahamu boyeyamoho gahakumu yoho, damu hou hanggeramu bukumoho gahakumu yoho. Damu pou daré égéki hate ahu kukuwoho-tari guma asuri uguna éné pou gahakumu yoho.
[3] Damu ahu 144.000 yoho Ala Ahuhabang kiri Éné abuge-kursi baha Éné sama kumu hate kukuwoho-sifing-féri-bahana sanggere yohona sama kumu hate ahu yeyoho 24 yohona sama kumu ememere éri kubu harahai igina. Damu ahu 144.000 soho nokumu bahana yohona dosa kemahana égéki Wi-Domba Amuke Uku Yesus Égésé mése tobunsumoho yoho séré. Emohoni, ahu énéyuhuwoho yohosé kubu harahai égéki igina, mite ahu fe fani kubu harahai nogoki ainan deyoho.
[4] Damu ahu 144.000 yoho fani dosa yahana de esumu manggohomu bahana. Damu besing fani yang kumu kotoféri hahafemahana deyoho hamemere yoho fani kukuwoho ala éné kusi gahakumu égena yoho bake sembayang yeri yohonaukuni yoku yohoki poréyahamu emahana deyoho. Damu yoho bahana égéki fani yahamu yosumahana deyoho, damu yoho fe fani poréyahamu emahana deyoho. Damu Wi-Domba Amuke Égé makumakumu hoho ékému yoho kotoféri hohona, damu Wi-Domba Amuke mése ahu emu-hori-daha bahana yohona dosa égéki tobunsumoho. Emohoni, ahu 144.000 yoho Ala Énahu kiri bahana, damu Wi-Domba Amuke, Uku Yesus Énahu kiri bahana: Yoho du-gandum rahamo ero rahamo ememere yohona yo mumangge giyomahana égéki Ala bake aguto kiri kurohona gahakumu bahana.
[6] Damu nu etoréni malaikat fe hou siyaha womu kumu hosumu bung hoho-daha. Damu égé Yesus Éné sisi manggoho de éyoné embahae posu-posukiné moho égéki dari ahu soho nokumu bahana yoho bake yo ahain niye yeri daha: Égé u nogoki ahu gogoyaha soho hamu bahana yoho bake yobuwoméri yohoné.
[7] Damu égé u yeri daha égéki hanggeramu emiyoho," Embahae sawa akimamaga Ala ahu soho hamu bahana yoho dukumahana ékému yohona u emu-hori-daha efefeméri yori inggeméri feyahafumoné moho éné sawa égéki mése hamu hanigi. Emohoni, Alaki mokéri Ala asuféri baha ememere yori Énaukunané. Damu Ala Égé hou damu soho damu kiyohouyaha damu ohogunto emu-hori-daha yori emakini, gugu Ala bake sembayang yeri Énaukunané," emiyoho.
[8] Damu malaikat mumangge maraha égé hohoka, damu malaikat ukumamu égé égéte maraha, damu égé u hanggeramu emiyoho, "Babel busu fikoyaha mése unggusaméri abutakunggu! Mése unggusaméri abutakunggu! Yang hu kei osusuméri bahana yoho besing yoho bake yokuni ero-anggur noho miri wambuméri kutumu hahafemahana. Hamemere ahu Babel busu fikoyaha bahana yoho ahu gogoyaha soho nokumu hamu égena yoho bake Alaki modinan niye yokungguna. Emohoni, Ala ahu énéyuhuwoho bake hakereméri Babel busu fikoyaha égéki unggusaméri abutakunggu," emiyoho.
[9] Damu malaikat égé hohonaka, damu malaikat fe, uku malaikat ukumasiyomu égé égéte maraha. Damu égé u hanggeramu emiyoho, "Ahu yoho ohoru base moguri maraha égé damu Ala Éné kusi gahakumu ohoru base éné kusi eméri kufuri égé égé bake sembayang yeri énaukungguna. Damu ahu yoho ohoru base éné bang fe fiyoho égéki habang sama rahamo bero rahamo ememere ékému umpohomahana. Ahu menohosé ememere emenangkumaka,
[10] Ala esemu ahu énéyuhuwoho bake hakereméri damu unggusaméri abutakumoné. Damu Ala emoné, Ala Éné malaikat yohona sama kumu damu Wi-Domba Amuke Éné sama kumu indo damu iyobégé hakiborohoni éné gobo esumu pahafumoho ékému yohote esumu kugutomenané.
[11] Damu ahu yoho indo damu iyobégé éné gobo esumu pahafumoho ékému indo doho kugutoméri bahana éné noku musugu, damu uku damu batuni embahae posu-posukiné. Ala ahu énéyuhuwoho bake asu-sawa ememere damu mungguni, yohote esumu kugutomenané. Ahu énéyuhuwoho ohoru base moguri maraha égé damu éné kusi bake sembayang yeri énaukungguna, damu ohoru éné fi kubumoho éné bang fe fiyoho égéki yohona habang rahamo yohona bero rahamo ememere ékému umpohomahanani, Ala ememere poréyahamu emoho kéré," emiyoho.
[12] Emoho nemohoni, ahu Yesus Énini fimiri bahana yohoniya, gugu Ala Éné u dari u yohoto hamemahana, damu guku Yesus Égéki fani modinan de damu fimiri bahana. Gugu ememere bahana égéki esumu asu-sawa guguna modu dongkuni guku damu hamemere bunané.
[13] Damu nu daréni Ala Éné busu mene ékému u yosumoho migi, "U yahae méré nogoki kara nou: Ahu Nugunabo Yesus kumu kotoféri arari beri kungguna yoho yohona modu hanikinané," emiyoho. Damu Ala Éné Ubana Hayo emiyoho, "Yahae haiyangne. Ahu ememere kungguna énéyuhuwoho fani tafe yohona furubo afénan de yoku awe gemu wayamu bohonané. Damu yoho soho nokumu bahana égéki, Ala Éné u dari wayamu emesumahanani, Ala kukuwoho wayamu égena égéki awe kurohoné afénané," emiyoho.
[14] Damu nuku damu ukukuwoho égena égéki etori éréni, nu hou hayo etoré. Damu hou hayo teyo etoréni Ahu Ala bahato ékému daha gahakumu baha Égé ahuhabang éné habanghauwo iyobégé-emas féri emoho égéki Éné habang teyo kumu kuni baha. Damu Égé tahae kamu baga gahakumu késéngkigi kamisige yeri égé.
[15] Damu malaikat fe Ala Éné busu mene bahato ékému Ala Éné Afahang ékému musuri dahaka, damu Ahu Ala bahato ékému daha gahakumu baha hou hayo ékému baha Égé bake u hanggeramu yoho. Sawa Ala ahu soho hamu bahana yohona u efefeméri yori inggemoné mohoni, Ahu Ala bahato ékému daha gahakumu baha Égése emoné ahu énéyuhuwoho dukumenan niye u aseméri ememere hanggeramu emiyoho, "Gané tahae kamu baga gahakumu késéngkigi égéki yeri du-gandum emu-hori-daha soho nokumu bahana égéki mése tangkigini, damu sawa giyomenané mahana égéki mése hawokigini, wanahaméri inggiyoméri giyonu," emiyoho.
[16] Damu giyong nesi éné tahae kamu baga gahakumu késéngkigi égé féri yo inggiyoméri damu giyoméri gogokunggu. Hamemere Ahu Ala bahato ékému daha gahakumu hou hayo ékému baha Égésé ahu soho nokumu hamu bahana yoho bake tinibiyakuni yohoni, yohote kotoféri dukumahana.
[17] Damu malaikat fe égé Ala Éné busu mene ékému Ala Éné Afahang ékému musuri daha. Damu malaikat égé hate tahae kamu baga gahakumu késéngkéri égé égéki yeri égé.
[18] Damu malaikat fe égé hate abuge-aguto duri Ala bake kurosumahanato ékému musuri daha. Égé abuge-aguto duri Ala bake kurosumahanato ékému indo etori baha nesi kéré. Égé malaikat tahae kamu baga gahakumu késéngkéri égé égéki yeri baha égé bake u ememere aseméri hanggeramu yoho, "Ero-anggur yomukigini, gu tahae kamu baga késéngkéri égé égéki yeri ero-anggur yohona gogo soho nokumu hamu égena égéki inggibahamu gogokunu," emiyoho. U feki Ahu keiyongkéri bahana yoho dukumenanéka, Ala yohona u efefeméri yori inggeméri poréyahamu emoné moho égéki aseméri yoho kéré.
[19] Damu ahu fe éné tahae kamu baga gahakumu égé égéki yeri ero-anggur gogo égena égéki inggemoho. Hamemere malaikat égé tinibiyakungguni, ahu keiyongmu soho nokumu hamu bahana yohote dukumahana. Damu malaikat égé ahu keiyongmu bahana yohoki Ala esemu hakereméri yoho poréyahamu emoné mohoto, uku kukuwoho anggur noho hounginggungguna esumu fikoyahakigi ékému pemohoni otahana.
[20] Damu kukuwoho anggur noho hounginggungguna égé busu fikoyaha pama kumu égé. Anggur noho hounginggungguna gahakumu ahu keiyongmu bahana yoho ékému hounginggungguna. Emohoni, anggur noho uré kékéhoho gahakumu ahu gong égé kékéhoho. Damu ahu gong kékéhori égé égéki fu kumu kufuri haiméri osugunani ukuma meter rahamo ememere égé. Damu ahu gong kékéhori égé yaki 300 kilometer moho.