[1] Buku Kara nogoki Yesus Kristus u yobuwoméri yoho égé kiye. U yobuwoméri yoho égéki Ala Uku mése yori inggemaki, damu mumangge Égé mése Yesus Kristus bake yobuwoméri yaki, nemohoni Yesus Kristus Égéte Énahu Éné u dari Éné furubo yahana yoho bake embahae ukukuwoho awe kakumu éyonané mahana égéki kubumu yohoné. Damu Yesus Kristus Égé u égéki nu bake yohon niye Éné malaikat kubumu yohoni, malaikat égéte deri Yohanes nu bake yobuwoméri yoho. Nu Nabo Yesus Kristus Éné u dari Éné furubo yeri baméré.
[2] Damu Buku womu nokumu Yohanes nusé nané kiyomu etori daré égéki kara uni. Nané kiyomu etori dari kara uni égéki Ala Éné u emu-hori-daha égéki Yesus Kristus bake yohoni, Égéte Ala Éné u égéki nu bake yobuwoméri yoho égé kéré.
[3] Ahu mekenohosé nu Buku Kara nokumu ukukuwoho awe éyonané mahana kara uni nogoki ahu-jemaat yoho bake etori yohongkumaki, éné modu hanikiné. Damu hate ahu mekenohosé u emu-hori-daha Buku Kara womu kumu kara uni baha nogoki wayamu dari u yohoto hamemere emesuméri bohongkumaki, emohoni éné modu esemu hanikiné. Yesus Kristus Égé ukukuwoho kakumu éyonané mahana égéki yobuwoméri yoho égéki mése hawokigi.
[4] Yohanes nusé u fe de égéni, ahu-jemaat birikumu-berahafi-ukuma (7) Asia Ware Soho ékému beri Yesus Énini fimiri bahana yoho niye kara nogoki uni. Damu nu Ala bake fisini yahae, "Nabo Ala, Nabo Yesus Kristus, damu Ala Éné Ubana Hayo, Gugu awe ahu énéyuhuwoho Yesus Énini fimiri bahana yoho bake Guguna modu kuyomu woruméri enané. Damu Gugu wayamu enané, nemohoni yohona modu gemu wayamu bohonané. Nabo Ala, Gusé de mumangge baki damu de baha damu awe defené moho. Damu Ala Éné Ubana Hayo Éné habigiyo emu-hori-daha égé Égésé Ala Ahuhabang kiri Éné abuge-kursi baha Éné sama ékému égé.
[5] Damu Nabo Yesus Kristus, Ala Gu bake u yohoni, Gute Éné u égéki fani munggu de habigiyoméri yobuwoméri yosumoho. Nabo Yesus, Gusé ahu honubakiginani soho kukumahana ékému mumangge dakamu dotoho, damu Gusé esemu asuféri Ahuhabang kiri ahuhabang-raja soho nokumu bahana yohoki hafuféri baha," ememere Ala bake u fisini yoré. Damu Yesus Kristus nuguki esumu worumoho, damu Égé debahae-abufiya ékému kungguni, dosa nuguki hafuféri égé ékému umburomoho.
[6] Damu Yesus Kristus emohoni nugu Ala Énahu kiri beriyani, Ala nuguki hafuféri etori baha. Damu Yesus Kristus Égé emohoni ahu Énini fimiri beriya nugu ahu-imam kiri awe Énabo Ala Éné furubo yeri Égéki mahamu emowané. Ememere Égé emoho égéki nafaméri Égé bake fisini yahae, "Nabo Yesus, Gusé Ala kiri asuféri baha, damu Gusé habigiyoméri nuguki hafuféri etori bohoné embahae posu-posukiné. Amin," ememere fisini yoré.
[7] Damu Ala Éné Buku kumu ahu-nabi yoho Yesus Kristus Éné u ememere kara uwangkena: "Maha femu wayamu narané! Égé houaku awiwiméri awe dakumu soho nokumu defené. Damu ahu emu-hori-daha yohona kiyo féri Égéki awe etohonané. Damu ahu mése hase féri Égéki uguna yohosé hate Égéki etohonané. Damu Égé ahu gogoyaha soho hamu bahana yohona u efefeméri poréyahamu emoné mohoni, ahu yohote esumu hanggeramu efe aunané. Amin."
[8] Nugunabo Ala Égé de mumangge baki damu de baha damu awe defené moho. Ala esemu habigiyoméri baha Égésé ememere yoho, "Nu Mumangge De Bereké damu Embahae Akimamaga De Bahae," emiyoho.
[9] Yohanes nusé nané matahai Yesus Énini fimiri bahana guguna matahai fe kéré. Damu gugu Yesus kumu kotoféri arari égenani, ifiyo-tifiyomahana égéki hamemere nuki ifiyo-tifiyomahana. Damu Yesus nuguna Ahuhabang kiri nugu sifing féri beriya égéki hafuféri etori baha. Damu Yesus kumu kotoféri arari ériyani, nugu nuguna modu dongkuni kugutoméri beriya. Damu nu Ala Éné u damu Yesus Éné sisi nané kiyomu etoréké égéki ahu yoho bake yosuméréni, Roma nahu yohona ahuhabang-kaisar yohoni, nuki berahae yeri soho dubuge Patmos ékému bui kungguna.
[10] Damu Nugunabo Yesus Éné sawa, u feki sawa Minggu feki Ala Éné Ubana Hayo nuki afuri égé. Damu nané mo kumu ba-trompet ugu gahakumu u hanggeramu nu bake yoho égéki daré.
[11] Damu u ememere yori emiyoho, "Ukukuwoho emu-hori-daha gu bake kubuméré etohoné moho égéki buku kara ékému kara nou, damu buku kara égéki ahu-jemaat birikumu-berahafi-ukuma (7) yoho bake kusunu ahainé. Jemaat Efesus, Smirna, Pergamus, Tiatira, Sardis, Filadelfia, damu hate Laodikia busuyaha Asia Ware Soho ékému bahana yoho bake kusunu ahainé," emiyoho.
[12] Damu nu fani kunu iri de ahasu gahakumu etoré égéki, ahu menohosé u yoho égéki etahae niye abuméré. Abuméri etoréni, siya-pelita kufiyosumahana birikumu-berahafi-ukuma (7) kemisahagenani égena égéki etoré. Damu siya-pelita kufiyosumahana égena égéki iyobégé-emas féri emahana.
[13] Damu siya-pelita kufiyosumahana birikumu-berahafi-ukuma (7) kemisahagenani égena womu ékému etoréni, Ahu fe Ala bahato ékému daha gahakumu égé. Égé ifita-mamana piyaha kungguni miri bégé gong kumu égé. Égé hate toung iyobégé-emas féri emahana égéki Éné béng bégé kumu awiwiméri aragenani égé.
[14] Éné habang kumu habangyong é yahayo éné yong hayokéri égé gahakumu esumu hayo guhukéri égé. Damu Éné kiyo indo hakiboroho gahakumu waneri baha.
[15] Damu Éné bégé besi-tembaga indo dugunani, éné pu karakigini esemu mibobosangkigi gahakumu mibobosangkéri égé. Éné u yoho égéki oho fikomu boyeyamoho gahakumu yoho.
[16] Damu Éné bero auwa mene mi birikuma-berahafi-ukuma (7) yaha. Éné hato ékému tahae piyaha éné yegi afifiye késéngkéri égé gahakumu u habigiyoméri égé égéki kusumoho musugu. Damu Éné ketobégé égéki sawa kokumu bahani esumu kakani hori baha gahakumu kakani hori égé.
[17] Nu Égé etoré égéki, Éné bégé fu kumu kakumu bukumu tini uhung horé. Bukumu tini uhung horé égéki, ahu kunggu gahakumu fani mimiri deyoho. Emohote, Égé Éné bero auwa mene nané aduwosoho gohoméri yori emiyoho, "Yohanes, gu fani mokin deyoho. Nusé mumangge kukuwoho emu-hori-daha égéki eméréké, damu embahae sawa akimamaga égéki Nusé kukuwoho emu-hori-daha égéki awe yori feyahafume," emiyoho.
[18] Damu tafe emiyoho, "Nu asu-sawa de baméré égéki Nu séré. Maha femu nara! Nu mése kunite, Ala emohoni dakamu dotori bere, damu de bahae embahae posu-posukiné. Damu Nusé esumu habigiyo de égéni, Nu yahaeni ahu akumoné, damu Nusé yahaeni ahu hosanggigina yoho hori kidabahanato ékému dakumu dotohonané.
[19] Emohoni, gu kageto dotori baha nogoki ahasu gahakumu ukukuwoho emu-hori-daha etoho nogoki kara nou. Ukukuwoho ahasu gahakumu etoho égéki ukukuwoho katugo égena nogoki kubumoho, damu embahae ukukuwoho éyonané mahana égéki kubumoho. Emoho nemohoni, kara nou.
[20] Damu Nu katugo gu u ukuma etoho yaki égéki awe ayoméri yahae: Mi birikumu-berahafi-ukuma (7) Nané bero auwa mene kumu égé égéki ahu asuféri ahu-jemaat yoho hafuféri etori bahana yohoki kubumoho. Damu siya-pelita kufiyosumahana iyobégé-emas féri emahana birikumu-berahafi-ukuma (7) kemisahagenani égena égéki ahu-jemaat, ahu dukuméri Nanini fimiri bahana éné gogo birikumu-berahafi-ukuma (7) yohoki kubumoho."