[1] Damu nu hou harahai damu soho harahai etoré. Damu hou mumangge égé damu soho mumangge égé égéki mése anigigi, damu kiyohouyaha tafe fani éyon deyoho.
[2] Damu nu etoréni Ala Éné busu mene bahato ékému Ala Éné busu fikoyaha, uku Yerusalem busu fikoyaha harahai égéki kusumoho monu migi. Yang hu aféné moho égé énuhu niye kukuwoho gaguma asugu gahakumu Ala Énahu yoho niye Yerusalem busu fikoyaha harahai égéki kukuwoho gaguma asuri fengféyoho.
[3] Damu nu daréni Ahuhabang Éné abuge-kursi ita kumu u hanggeramu yoho, "U nogoki femu nara! Katugo nogo Ala awe ahu yoho kumu kotoféri bohonané. Égé yoho bahana womu ékému kotoféri bohonané. Ahu yoho Ala Énahu kiri bohonané, damu Égé Uku yohona Ala kiri bohoné.
[4] Damu Égé awe ahu yohona kenoho emu-hori-daha afusumoné. Damu soho mumangge beri kugutomusuméri bahana égéki awe karakiné, emohoni ahu fe fani akumon deyoho; ahu fe berosi beri budiyahangféri efe aun deyoho. Damu ahu fe fani efe uri bohon deyoho, damu ahu fe fani tafe wiyahakéri kugutoméri bohon deyoho," emiyoho.
[5] Damu Ala Ahuhabang kiri Éné abuge-kursi ékému baha Égésé emiyoho, "U nogoki femu nara! Nu katugo nogoki ukukuwoho emu-hori-daha égéki harahaimu eméré!" Damu Égé tafe nu bake emiyoho, "Nu gu bake katugo u emu-hori-daha yoré égéki kara nou. Nu u yoré égéki haiyangmu égé, emohoni gu awe haiyangne ememere finu," emiyoho.
[6] Damu Égé tafe nu bake yoho, "U emu-hori-daha égéki Nusé mése feyahafuméré. Nu Mumangge De Bereké damu Embahae Akimamaga De Bahae: U feki Nusé mumangge kukuwoho emu-hori-daha égéki eméréké, damu embahae sawa akimamaga égéki Nusé kukuwoho emu-hori-daha égéki awe yori feyahafume. Ahu menohosé oho yakingkumaki, Nu homereyaha ahu égé bake ohogunto énoho awe kurahae. Ahu menohosé ohogunto noho amingkumaki, ahu égé Ala kumu bohoné embahae posu-posukiné.
[7] Hohoi yohona ahuhabang Iblis wakigite, ahu menohosé habigiyomongkumaki, Nu awe ukukuwoho wayamu égena moguri siyaha hosumu yoré nogoki égé bake kurahae. Damu Nu awe ahu éné Ala kiri bahae, damu égéte Nesiyo kiri bohoné.
[8] Emohote, ahu emu-hori-daha ememere bahana yoho kiyohouyaha indo damu iyobégé hakiboroho damu éné gobo esumu pahafumoho ékému pemoné otohonané. Kiyohouyaha indo hakiboroho ékému ahu yoho ukumamu akumenané. Ahu énéyuhuwoho yoho ememere bahana: " 'Ahu Nanini fimiri bohonané mahana égéki mokigina; ahu Nanini fimiri bahana égéki muni undomahana; Nusé etoréni ukukuwoho esumu hakereméré égéki emesumahana; ahu ahu fe uri kufiyahana; ahu kutumu hahafemahana; ahu wou féri emesumahana; ahu kukuwoho ala kusi gahakumu emahana yoho bake sembayang yeri yohonaukungguna; ahu yahamu yosumahana.' "
[9] Damu hate malaikat fe nu bake maraha. Uku malaikat birikuma-berahafi-ukuma (7) yoho akimamaga ahu yohona ha kumenan niye biyahae birikuma-berahafi-ukuma (7) hamu yeri égena yaki fe kéré. Égé nu bake deri emiyoho, "Nokumu maro! Nu awe gu bake Wi-Domba Amuke yang aféné moho égéki kubume. Yang aféné moho égéki ahu Yesus kumu kotoféri arari bohonané embahae posu-posukiné mahana yoho kéré," emiyoho.
[10] Damu Ala Éné Ubana Hayo nuki afuri égéni, malaikat égé nuki yeri soho haibe siyaha esemu fikoyaha damu siyahakigi ékému yeri osugu. Ékému busu fikoyaha harahai Ala Éné busu égéki nu bake kubumoho. Busu égéki uku Yerusalem busu fikoyaha harahai Ala Éné busu mene bahato ékému kusumoho monu migi.
[11] Busu égéki Ala esemu kakani hori égé égéki afuri égéni kakani hori égé. Damu busuyaha kakani hori égé égéki iyobégé éné ka siyaha esumu wanesuméri égé gahakumu wanesuméri égé, damu iyobégé ohousi awokigi gahakumu égé, damu iyobégé hijau damu kanggo kotoféri sesebuméri wanesuméri égena gahakumu wanesuméri égé.
[12] Yerusalem busu fikoyaha harahai égé éné hai fiko damu esemu siyahakigi égéki awiwiméri égé. Damu hai égé éné afite kayaha bibirikuma-ketahafi-ukuma (12) égena. Damu afite kayaha ukumasiyo éné ita hamu égena; afite ukumasiyo sawa musuguto kumu égena. Damu afite ukumasiyo sawa musuguto afi ye negemoho kumu égena, damu afite ukumasiyo sawa oguguto kumu égena, damu afite ukumasiyo sawa oguguto afi ye negemoho kumu égena. Damu afite hamu égena égéki malaikat isige-isige hamu etori bahana. Damu afite hamu égena égéki uku Israel éné go isige go isige ememere bibirikuma-ketahafi-ukuma (12) yohona fi kamisigemu hamu ungguna baha.
[14] Busuyaha éné hai iyobégé gogofumu osuguna éné fu kumu iyobégé fikoyaha bibirikuma-ketahafi-ukuma (12) debahae kane gahakumu égena. Damu iyobégé fikoyaha debahae kane gahakumu hamu égena ékému Wi-Domba Amuke Égésé kubumu yohoni ahu-rasul kiri bahana bibirikuma-ketahafi-ukuma (12) yohona fi hamu ungguna baha.
[15] Damu malaikat nu kumu u yoriya égésé yangge bago kukuwoho-haméri-inahamona iyobégé-emas féri emahana égéki yeri égé. Emohoni, égé awe Yerusalem busu fikoyaha harahai égéki haméri inahamoné. Damu éné afite fikoyaha bibirikuma-ketahafi-ukuma (12), damu éné hai iyobégé gogofumu osuguna égéki haméri inahamoné.
[16] Busu éné kibi égéki uwo ugu ototomoho égéki sanggeremu égena, damu éné piyaha, damu éné kayaha hamu hanéri égé. Damu malaikat égé yangge bago kukuwoho-haméri-inahamona iyobégé emas féri emahana égé féri haméri inahamohoni, éné piyaha égéki 2.400 kilometer moho. Damu ememere éné piyaha damu éné kayaha damu éné siyaha égéki hamu hanigi.
[17] Damu malaikat égé hate hai iyobégé gogofumu osuguna éné kayaha égéki haméri inahamohoni, 66 meter moho. Malaikat égé hamoho, damu hate ahu soho nokumu bahana yoho hamahana égéki fani degemu égena deyoho, esemu hamu hanigi.
[18] Damu Yerusalem busu fikoyaha harahai éné hai iyobégé éné ka siyahakigi kanggo damu hijau kotoféri sesebuméri wanesuméri égé égé féri gogofumahana. Damu afahang emu-hori-daha busu fikoyaha ékému sigina égéki iyobégé-emas esemu ohousi awokéri égé gahakumu égé égé féri afahang gesigina.
[19] Damu busu égéki hai iyobégé gogofuméri sigina éné fu kumu iyobégé fikoyaha debahae kane gahakumu bibirikuma-ketahafi-ukuma (12) égena. Iyobégé fikoyaha debahae kane gahakumu égena égéki iyobégé éné ka siyahakigi emu-hori-daha deregemu égena égé féri kufiyo hohona. Damu hate iyobégé esemu fikoyaha isige-isige debahae kane gahakumu égé égéki kamisigemu ememere kufiyo hohona, Iyobégé fikoyaha debahae kane gahakumu mumangge kufiyoho égéki iyobégé éné ka siyahakigi kamisige kanggo damu hijau kotoféri sesebuméri wanesuméri égé kéré, damu iyobégé fikoyaha ukumamu égé égéki biru esumu si kiri wanesuméri égé kéré, damu iyobégé fikoyaha ukumasiyomu égé égéki hijau yahamutomu si kiri wanesuméri égé kéré. Damu iyobégé fikoyaha éné ka siyahakigi sanggeremu égé égéki hijau esemu si kiri wanesuméri égé kéré.
[20] Damu iyobégé fikoyaha birikumamu (5) égé égéki kanggo kiri wanesuméri égé, damu hate iyobégé fikoyaha birikuma-berahafi-kamisigemu (6) égé égéki esemu kanggo kiri wanesuméri égé kéré. Damu hate iyobégé fikoyaha éné ka siyahakigi birikuma-berahafi-ukumamu (7) égé égéki teyakéri wanesuméri égé, damu hate iyobégé fikoyaha birikuma-berahafi-ukumasiyomu (8) égé égéki biru damu hijau kotoféri sesebuméri wanesuméri égé, damu iyobégé fikoyaha birikuma-berahafi-sanggremu (9) égé égéki teya awokéri wanesuméri égé. Damu iyobégé éné ka siyahakigi bibirikuma (10) égé égéki hijaukéri wanesuméri égé, damu hate iyobégé fikoyaha bibirikumu-ketahafi-kamisigemu (11) égé égéki biru si kiri wanesuméri égé, damu hate iyobégé fikoyaha bibirikumu-ketahafi-ukumamu (12) égé égéki ungukéri wanesuméri égé égé kéré.
[21] Damu afite fikoyaha bibirikuma-ketahafi-ukuma (12) égena égéki afite isige-isige hamu mani éné ka esumu siyahakigi éné fi mutiara kamisige féri emahana. Damu busu fikoyaha éné yedi kayaha égena égéki iyobégé-emas pu karakigi damu ohousi esumu awokigi gahakumu égé égé féri emahana.
[22] Damu nu Yerusalem busu fikoyaha harahai ékému Ala Éné Sunafahang fani etoré deyoho. Nugunabo Ala esumu habigiyoméri baha Uku damu Wi-Domba Amuke Uku Yesus Égé kotoféri busu ékému bahana, emohoni Ala Éné Sunafahang fani égé deyoho.
[23] Damu Ala Éné kakani hori égé égéki sawa gahakumu busu fikoyaha égéki bumusumoho hori égé. Damu Wi-Domba Amuke, Uku Yesus Égésé siya-pelita gahakumu kakani hori égé. Emohoni, busu fikoyaha ékému sawa damu kamu fani kakani hori éyonané ememere fani fimenan deyoho.
[24] Ahu gogoyaha emu-hori-daha yoho busu fikoyaha éné kakani hori égé ékému kotoféri bohonané. Damu ahuhabang-raja soho nokumu bahana yoho Ala damu Wi-Domba Amuke, Uku Yesus Égé bake Yohonaukumenan niye busu fikoyaha ékému yohona toto kufiyahana égéki aguto gahakumu yeri defenané.
[25] Busu fikoyaha ékému asu fe fani éyon deyoho. Emohoni, busu fikoyaha éné afite fikoyaha fani hate ketamenan deyoho.
[26] Damu ahu yoho hate soho nokumu bahana yoho Ala damu Wi-Domba Amuke Égé bake Yohonaukumenan niye busu fikoyaha ékému yohona toto kufiyahana égéki aguto gahakumu yeri defenané.
[27] Emohote, ahu fe éné aduwosoho féri dosa kemesumoho égé fani busu ékému atun deyoho, damu ahu ukukuwoho Ala hakeremoho égéki emesumoho égé busu ékému fani atun deyoho, ahu yahamu yori kukuwoho éné kusi Ala kéré ememere yori sembayang yeri énaukunggu égé busu ékému fani atun deyoho. Emohote, Wi-Domba Amuke Égé ahu Buku Ala kumu bohonané embahae posu-posukiné mahana ékému yohona fi kara uni bahanani, ahu énéyuhuwoho yohote awe busu fikoyaha ékému atunané.