[1] Damu Ala Éné habigiyo féri ukukuwoho-mujizat ahu fani emesumahana de égéki hou siyaha ékému kibikubumoho. Nu etoréni yang kamisige esumu manggohokigi égé hou ékému égé. Égé ifita hayo sawa kakani hori égé gahakumu égé égéki kunggu. Damu éné bégé kamu ékému asiri égé. Damu égé ahuhabang kiri baha éné habanghauwo mi bibirikuma-ketahafi-ukuma (12) égena égéki kunggu.
[2] Emohote, égé ofo modu baha, damu égé mése ofo asufiyoné moho égéki hawokigi. Emoho nemohoni, égé haha haimohoni, boyahahanigi.
[3] Damu Ala Éné habigiyo féri ukukuwoho-mujizat fe ahu fani emesumahana de égéki hate hou siyaha hosumu kibikubumoho. Maha femu narané! Égé uku usi-naga kamisige fiko kanggo kiri éné habang birikuma-berahafi-ukuma (7) damu éné auwo bibirikuma (10) égena. Éné habang hamu ahuhabang éné habanghauwo égena.
[4] Damu usi-naga éné wobu adibiméri woumohoni, mi éné gogo ukumasiyomu hou siyaha égena ékému gogo kamisige woumohoni, soho nokumu peroho migi. Damu usi-naga égé yang ofo modu baha éné sama kumu méséri égé. Emohoni, yang égé ofo asufiyongkumaki, ofo égéki kakumu uri mikumoné moho.
[5] Damu yang égé ofo besing asufiyoho. Ofo égéki embahae Égé awe esemu habigiyoméri ahu emu-hori-daha soho nokumu bahana yohoki hafuféri éyoné moho Égé séré. Damu Égé Éné na habigiyo féri Éné kufe yohoki abutakumoné. Damu Ala yohoni Ala Éné malaikat kakumu Ofo égéki yeri Ala bake hohona. Damu Égé Ala Ahuhabang kiri Éné abuge-kursi baha ékému Ala kumu kotoféri Énahu yoho hafuféri bohonan niye Ala bake hohona.
[6] Emohote, yang égé temukuri siyanto soho ékému hoho. Damu soho égéki Ala mése énéné fengféyoho. Soho ékému malaikat yoho égéki etori bohonané embahae sawa 1.260 moné.
[7] Ememere égena égéki, hou siyaha ékému malaikat yoho kutumu taki aragena. Malaikat Mikhael asuféri malaikat tuhuremu yohoki hafuféri baha égé kumu éné matahai yoho kumu kotoféri usi-naga kumu kutumu taki aragena. Usi-naga kumu éné matahai kotoféyahana yoho kumu kotoféri Mikhael damu éné matahai yoho kumu kotoféri kutumu taki aragena.
[8] Emohote, usi-naga damu éné matahai yoho wakigina. Emohoni, Ala usi-naga damu éné matahai yoho fani Ala Éné busu mene ékému bohonané mahana égéki fani "yahae" emiyoho deyoho.
[9] Emohoni, Mikhael damu éné matahai malaikat tuhuremu yoho usi-naga esumu fikokigi égé damu éné matahai yoho hou siyaha ékému pemahanani soho nokumu migina. Usi-naga égé hohoi yohona ahuhabang Iblis éné fi Satan kéré. Damu égé anggo posuyahaki usi posuyahakéri kibikubuméri giyong Eden ékému yahamu yaki égé kéré. Damu égé ahu emu-hori-daha soho nokumu bahana yoho dosa afénan niye yahamu yori hafuféri égé égé séré.
[10] Damu nu daréni Ala Éné busu mene ékému ememere u hanggeramu yoho, "Katugo nogoki Nugunabo Ala Éné habigiyo féri Énahu yohoki umburomoho, damu Énahu emu-hori-daha yohoki hafuféri etori baha égéki haiyangmu égé. Damu katugo nogoki Ala kubumu yohoni Ahuhabang kiri baha, Uku Kristus esumu habigiyoméri égé. Damu Égé Éné na yeri Énahu emu-hori-daha yohoki hafuféri etori baha. Nugunabo Ala emohoni usi-naga nuguna matahai Yesus Énini fimiri bahana yohoki ditini yosumoho égéki mése hou siyaha ékému pemahanani migi. Usi-naga, uku hohoi yohona ahuhabang Iblis asu-sawa Ala Éné sama kumu nuguna matahai yohona u égéki ememere ditini yosumoho, 'Nabo Ala, ahu yoho dosa yahana, emohoni yoho bake poréyahamu enu,' emiyosumoho.
[11] Nuguna matahai yangna besingna Yesus Énini fimiri bahana yoho fani mungguna de, damu Yesus Éné sisi yosuméri bahana. Damu yoho Wi-Domba Amuke Égéki yohona dosa tobunsumon niye ugunani Éné gong miri kunggu égéki haiyangne ememere fimiri bahana. Emoho nemohoni, nuguna matahai yangna besingna Yesus Énini fimiri bahana yoho habigiyomahanate, hohoi yohona ahuhabang Iblis wakigi. Ahu yoho Yesus Énini fimiri bahana yohoki ifiyo-tifiyomahana, damu funané mahanate, yoho fani undomahana de, damu Yesus Énini kirimu fimiri bahana.
[12] Emoho nemohoni, malaikat Ala Éné busu mene bahana yohoniya, hanikinané! Emohote, ahu soho nokumu bahana, damu ahu kiyohouyaha ékému bahana yohoniya, guguna ha kumenané! Hohoi yohona ahuhabang Iblis mése gugu bahanato ékému monu migi. Emohoni, guguna ha kumenané! Égé nafamohoni égé awe gugu bake poréyahamu emoné moho éné sawa fani aburohomu égena de kamu yahamutomu égena. Emohoni, égé esumu ufuyori modu kimoho."
[13] Damu usi-naga fiko égé ukuni nafamohoni malaikat yoho égéki mése kusumohoni soho nokumu penoho migi. Damu égé yang fe ofo besing asuféri baha égéki ifiyo-tifiyomon niye dafunggu.
[14] Emohote, Ala Égé tefiyo ukuma é gegang fiko éné tefiyo ukuma gahakumu égé égéki yang égé bake kuroho. Emohoni, yang égé siyanto soho Ala yang énéné fengféyoho hokumu bung hoho. Damu égé usi-naga égé ékému musuri hori bohoné embahae sufébégé ukumasiyo mohoka, damu sufébégé kokumu ogohoiné. Emohoni, usi-naga égé yang égé bahato ékému fani hori yang égé bake poréyahamu emoho deyoho.
[15] Damu usi-naga égé éné boto féri hasefeyamu uguni, oho uré fikoyaha gahakumu yang égé ékému yeyamukuni hoho. Emohoni, yang égéki uri afomukumon niye yeyamukuni ahainé moho.
[16] Emohote, Ala yohoni soho yang égé mahamu emon niye sohoto afite abuwomohoni, égé usi-naga hasefeyamu ugu uré kiri daha égéki afumukunggu.
[17] Ememere égéni, usi-naga égé esemu yang égé bake hakeremoho. Damu égé hori yang éné go tuhuremu yoho kumu kutumu taki arufomoné moho. Yang éné go tuhuremu yoho yoku ahu Ala Éné u dari emesumahana, damu yoho Yesus Éné sisi égéki ahu fe yoho bake yosuméri bahana yoho kéré.
[18] Damu usi-naga égé kiyohouyaha haisa ékému damu méséri égé.