[1] Emohote, ahu Yesus Énini fimiri bahana ékému ahu fe éné fi Ananias damu énahamo Safira de bahana. Damu sawa feki yoho yohona soho tuhuremu ageméri aneséyang tokumahana.
[2] Damu Ananias soho tokunggu éné aneséyang tuhuremu éné niye yaha. Damu kamu ganggene égéki ahu-rasul yoho bake kuroho. Damu égé ahu-rasul yoho bake aneséyang kuroho égéki soho tokunggu éné aneséyang emu-hori-daha esumu kuroho gahakumu emoho. Égé aneséyang tuhuremu égé niye yaha égéki fani yoho deyoho. Ememere emoho égéki énahamo Safira hate nafamoho.
[3] Emohote, Petrus égé Ananias bake emiyoho, "Ananias, gu fani hohoi yohona ahuhabang Iblis gané modu afuri baha égé fani munggu de eméri emohoni, gu Ala Éné Ubana Hayo damu nugu bake yahamu yoho wogo kéré. Gu soho tukunggu éné aneséyang tuhuremu yahate, nugu bake soho tukunggu éné aneséyang emu-hori-daha égéki esumu kuroho gahakumu yahamu emoho.
[4] Gu soho nogoki fani tukunggu de égéki, soho nogoki gané soho kéré. Damu soho nogoki tokungguka, soho tokunggu éné aneséyang awe yeri guku aféngkumaki, demoho. Aneséyang égéki gané aneséyang kéré. Emohote, gu soho tukunggu éné aneséyang tuhuremu yahate, gu soho tukunggu éné aneséyang emu-hori-daha esumu kuroho gahakumu yahamu yoho. Gu ememere yahamu yoho égéki poréyahamu emoho kéré. Ememere gu esumu poréyahamu emoho égéki gané sifing fimiri inggeméri emoho égéki esumu keiyongkigi. Gu fani nugu remu yahamu yoho deyoho. Hate Ala bake kotoféri yahamu yoho," emiyoho.
[5] Ememere Ananias u égéki dagika, kuni éné wosoho pemoho hori budomoho. Ememere kungguni, ofo subang yahamuto yoho deri éné wosoho égéki tahano féri fohunggunaka, damu ahu wosoho égéki yeri hori soho kungguna. Emohoni, ahu emu-hori-daha Ananias kunggu éné sisi dagenaka, esumu mokigina.
[7] Damu Ananias kungguka, damu sawakiyo ukumasiyomu nahangkunggu rahamoho. Damu Ananias énahamo Safira égé Petrus afahang baha ékému hori osugu. Emohote, énuhu kunggu égéki fani nafamoho deyoho.
[8] Emohoni, Petrus égé Ananias égé aneséyang yeri kuroho égéki énahamo Safira bake abamu yoho, "Nosubang Safira, nu bake nou! Gonuhu nu bake aneséyang kuroho égéki gu kumu gonuhu kumu soho tokungguna éné aneséyang emu-hori-daha égéki esumu kurohonare?" Abamu yohote, Safira égéte utuhu yahamu haméri emiyoho, "Yahae, haiyangne," ememere utuhu yahamu hamoho.
[9] Emohoni, Petrus Safira égé bake emiyoho, "Makemohore gu kumu gonuhu kumu mése u kutumu yori inggeméri yahamu yori Ala Éné Ubana Hayo Égéki ikuhamahanae? Gugu fani ememere ikuhamenan deyoho, meneféyané! Maha Eta! Ahu gonuhu soho kungguna énéyuhuwoho marari afite sama kumu niyonangki. Damu yoho gané wosoho yeri osuri arohori soho kumenané," emiyoho.
[10] Damu ememere dagika, Ananias énahamo égé kuni éné wosoho Petrus éné bégé fu kumu budomoho. Ememere ahu Ananias soho kungguna énéyuhuwoho afahang osuri etahanani, Ananias énahamo mése kuni baha. Emohoni, yoho éné wosoho yeri musuri arohori énuhu éné wosoho kufiyahana éné béng égé ita ékému soho kungguna.
[11] Yerusalem busu éné jemaat yoho Ala Ananias damu Safira bake poréyahamu emoho égéki etori esumu mokigina. Damu ahu fe emu-hori-daha yoho sisi nogoki dagenaka, hate esumu mokigina.
[12] Ala ahu-rasul yoho bake habigiyo kuroho. Emohoni, yohote Ala Éné habigiyo féri ukukuwoho-mujizat aburohomu emahana. Ukukuwoho-mujisat ememere emahana égéki ahu yoho etori nafamahanani Ala habigiyoméri baha. Damu ahu Yesus Énini fimiri bahana emu-hori-daha yoho kotoféri arari éri sifing kamisigemu fimiri dukusumahana. Damu yoho Ala Éné Afahang pama kumu Salomo éné Bereme ememere iri yohona ékému dukumusumaha.
[13] Ahu emu-hori-daha fani Yesus Énini fimiri bahana de yoho fani habigiyoméri ahu Yesus Énini fimiri bahana yoho kumu fani kotoféri égena deyoho. Emohote, ahu énéyuhuwoho ahu Yesus Énini fimiri bahana yoho bake yori emiyohona, "Ahu yoho manggohokigi," ememere yori hanikéri yohonaukungguna.
[14] Damu ahu aburoho yoho Nugunabo Yesus Énini fimiri bahana yoho kotoféyahanaka, damu ahu aburoho yoho tafe kotoféyahana. Ememere kotoféyahanani, ahu Yesus Énini fimiri bahana, yangna besingna, yoho age gogoyaha kiri dukumusuméri kotoféyahana.
[15] Damu ahu-rasul yoho ukukuwoho-mujizat Ala Éné habigiyo féri emesumahamana. Emohoni, ahu yoho ahu wiyahakesemahana yohoki yeri osuri yedi ékému kifang damu abuge teyo kumu kufiyahana. Ememere kufiyahana égéki yoho fisini fimahanani ahu-rasul Petrus égé deri nahangkuni ahainé moho égéki, éné usubang ahu wiyahakesemahana yohoki buméri homufuni karakiné ememere fimiri emahana kéré.
[16] Damu ahu esumu aburoho busuyaha fe busuyaha fe Yerusalem busu fikoyaha ita égena ékému bahana yoho hate ahu-rasul yoho bake dahana. Yoho dahana égéki, ahu wiyahakesemahana yoho damu ahu hohoi keiyong afuri bahana yohoki yeri dahana. Emohoni, Ala ahu énéyuhuwohoki ahafu kemoho.
[17] Damu ahu aburoho yoho kamu ahu-rasul yohoki hanikéri yoho bake hohona. Ememere emahanani, ahu-imam yohona ahuhabang esumu asuféri baha égé damu éné matahai Saduki nahu yoho etahanaka, damu yohona modu kimiri ahu-rasul yohoki ansakumahana.
[18] Emohoni, yoho ahu-tentara Ala Éné Afahang etori bahana yoho bake yohoni, ahu-tentara yohote hori ahu-rasul yohoki berahae yeri arohori ahu bui kukumusumahana ékému kusumahanani oguguna.
[19] Emohote, asu égéki Nugunabo Ala yohoni, Éné malaikat égé miri bui afite abuwomohoka, damu ahu-rasul yoho bui kumu yeri musuri pama kumu kufiyahana. Ememere kufiyahanate, ahu bui éné afite etori égena yohosé fani nafamahana deyoho. Damu malaikat égé ahu rasul yoho bake yori emiyoho,
[20] "Musuri Ala Éné Afahang pama kumu hori ékému méséri ahu ékému égena yoho bake Yesus Éné sisi emu-hori-daha égéki ememere nouwané: Yesus gugu damu yohoki umburomoné, nemohoni gugu damu yohote Ala kumu bohonané embahae posu-posukiné," ememere ahu-rasul yoho bake emiyoho.
[21] Damu ahu-rasul yoho u égéki dagenaka, damu hamemere emahana: Yeya mimi asituhu égéki yoho Ala Éné Afahang pama ékému hohona. Damu hori osuri Yesus Éné sisi ahu yoho bake yokukubumahana. Sawa ahu-rasul yoho ememere Yesus Éné sisi yokukubumahana égéki, ahu-imam yohona ahuhabang esumu asuféri baha égé damu éné matahai égé kotoféyahana yoho dahana. Deri yohoni, Yahudi nahu gogo hamu deregemu égena yohona yeyoho matahai deri u kutumu yori inggemenané mahana. Ememere Israel nahu emu-hori-daha asuféri bahana yoho deri dukumahanaka, damu ahu-tentara yoho bake emiyohona, "Gugu hori ahu-rasul yohoki bui womu kumu yeri musuri hafuyeri dohoné."
[22] Emiyohonani, ahu-tentara Ala Éné Afahang etori bahana yoho dari hori yakenani bui kumu oguri etahana. Etahanate, ahu-rasul yoho fani égena deyoho. Emohoni, yoho dakumu hori u égéki Yahudi nahu asuféri bahana yoho bake ememere yohona,
[23] "Nugu bui kumu oguri etoriyani, haiyangne bui afite égena égéki kirimu ketanggena. Ahu afite etori bahana nahu yoho de afite étori égena. Emohote, nugu afite égéki abuwomériyaka, damu osuri etoriyani ahu fe fani bui womu kumu baha deyoho," ememere emiyohona.
[24] Ahu-tentara Ala Éné Afahang etori bahana yohona ahuhabang damu ahu-imam yohona ahuhabang yoho u nogoki dagenaka, yoho yohona modu gagitomahana. Damu énaki u makemere éyoné moho rahamo ememere fimiri abubaméri yohona.
[25] Emohote, ahu fe Ala Éné Afahang pama kumu deri yoho bake mokéri emiyoho, "U nogo narané! Gugu ahu bui kokunggunani bahana yoho musuri hori Ala Éné Afahang pama kumu méséri ahu aburoho yoho bake Yesus Éné sisi yokukubuméri éyahana," emiyoho.
[26] Damu ahu-tentara yohona ahuhabang kumu éné tentara kumu ememere kotoféri Ala Éné Afahang pama kumu hohona. Hohonaka, damu ahu-rasul yohona berotuhumu yeri Yahudi nahu asuféri bahana yoho dukumahanato ékému dakamu dahana. Emohote, yoho fani hanggeramu berotuhumu yeri hohona deyoho. Yoho ahu-rasul yohoki hanggeramu yeri ahanangkumaka, ahu tuhuremu dukuméri égena yohote yoho bake iyobégé féri uwomenané defen kiyoho méréye mokigina.
[27] Damu yoho ahu-rasul yohoki yeri deri Yahudi nahu gogo hamu deregemu égena yohona yeyoho matahai dukumahana yohona sama kumu kufiyohonani, ahu-rasul yohote méséri égena. Damu ahu-imam yohona ahuhabang esumu asuféri baha égésé ahu-rasul yoho bake abubamu yoho,
[28] "Nugu mése gugu bake u hanggeramu yoriyani, gugu tafe Yesus Éné sisi fani yokukubumenan deyoho. Emohote, gugu fani nuguna u égéki dagena deyoho. Guku ahu emu-hori-daha Yerusalem busuyaha ékému bahana yoho bake damu Yesus Éné sisi yokukubumahana. Damu gugu hanikéri ememere nugu bake dirimeféri yohona, 'Gugu emeriyani Yesus kunggu,'" emiyohona.
[29] Emohote, Petrus damu éné matahai ahu-rasul yoho utuhu hamahana, "Nugu awe Ala nugu bake u yoho yaki égéki esumu dari emowané. Mite, gugu nugu bake u yoho yaki égéki fani esumu dari eman deyoho," emiyohona.
[30] Damu Petrus kumu éné matahai yoho kumu tafe utuhu hamahana, "Nané matahai yohoniya, gugu ahu yoho ditini égenani, Yesus Égéki debahae-abufiya kumu pakuméri uri kufiyahana. Emohote, nuguna yahae yohona Ala Égésé emohoni Yesus Égé kungguka, damu dakamu dotoho.
[31] Damu Ala emohoni Énamu Yesus Ala Éné busu mene ékému osugu. Damu Ala emiyoho, 'Namuwa, Gusé Ahuhabang kiri ahu yoho hafuféri etori ena. Damu Gusé ahu yohona dosa tobunsuméri umburonu,' emiyoho. Emohoni, Israel nahu nugu awe dosa yariya égéki ukuni tafe fani aféyan de modiyanéka, damu Ala Éné u dari bohowané. Ememere emowangkumaka, Ala Égé Israel nahu nuguna dosa yariya égéki tobunsumoné.
[32] Nugu mése ukukuwoho emu-hori-daha Yesus Égé emesumaki égéki nuguna kiyomu kukuuri etori ahu yoho bake yoriya. Damu nugu ukukuwoho emesumériya damu Yesus Éné sisi yosumériya égéki Ala Éné Ubana Hayo hate haiyangne ememere ahu yoho bake kubumu yoho. Damu Ala Éné Ubana Hayo Égéki Alasé kusumohoni ahu Ala Éné u dari u yohoto hamemahana yoho bake daha kéré," emiyohona.
[33] Damu Yahudi nahu asuféri bahana yoho u égéki dagenaka, yoho esumu hakereméri emiyahana, "Nugu ahu-rasul yohoki homufuwané, akumenané," ememere yori inggemahana.
[34] Emohote, Yahudi nahu gogo hamu deregemu égena yohona yeyoho matahai égena ékému Farisi nahu fe de baha. Éné fiki Gamaliel. Égé bafa-guru Musa éné hukum yokukubumoho nahu kéré. Damu Yahudi nahu emu-hori-daha yoho hanikéri énaukungguna. Damu égé Yahudi nahu asuféri bahana yoho égena ékému méséri ahu-tentara yoho bake yohoni, ahu-tentara yohote ahu-rasul yoho yeri pama kumu osuri kebemu égena.
[35] Ememere emahanaka, égé Yahudi nahu asuféri bahana yoho bake emiyoho, "Nané matahai Israel nahu yohoniya, gugu yoho bake emenané mahana égéki wayamu fimiri enané. Damu nu guguna akiya yahae méri nogoki femu wayamu dari fifinané.
[36] Anggo feki ahu fe Roma nahu yoho bake agebahaméri uma kemahana. Éné fiki Teudas. Égé emiyoho, 'Nuki ahuyaha kiri habigiyoméri bere,' emiyoho. Emoho nemohoni, ahu 400 rahamo ememere dukuméri éné gogo kotoféyahana. Emohote, Roma nahu yohona tentara yoho Teudas égé uri kufiyahanani, ahu égé kotoféyahana yoho bibitakéri ahahamahana. Emohoni, yoho fimiri emenané mahana égéki fani hamemere égé deyoho.
[37] Ememere emahanaka, damu Roma nahu yohona tentara yoho Yahudi nahu yoho Roma nahu yohona ahuhabang-kaisar bake yohona aneséyang kemerohonan niye Yahudi nahu yohona fi kara ungguna. Ememere bahana égéki, Galilea nahu fe Roma nahu yoho bake agebahaméri uma kemahana. Ahu éné fiki Yudas. Égé ahu aburoho bake u yokuni yoho, 'Menefeyané, gugu nu kotoféna! Agebahaméri Roma nahu yoho kotoféri uma aféya.' Emiyohoni, ahu aburoho yoho égé kotoféyahana. Emohote, Roma nahu yohona tentara yoho égéki tini kufiyahanani, ahu égé kotoféyahana emu-hori-daha yoho bibitakéri ahahamahana.
[38] Emoho nemohoni, katugo Yesus Éné murid yohona u fe nogoki nu guguna akiya yahae. Ahu nogo yoho eméri égena nogoki fani modinan deyoho. Meneféyané. Yoho yokukubumenané mahana damu yoho emenané mahana égéki kamu ahu yoho yoku yohona sifing fimiri emenangkumaka, fani haiyangmu éyonan deyoho.
[39] Emohote, Ala yoho bake u yohoni ahu-rasul yoho ahu yoho bake Yesus Éné sisi égéki yokukubumenangkumaka, gugu yoho emahana égéki fani abusahagiyomenan deyoho. Gugu awe nafamenané gugu Ala Éné sifingmu fimiri yoho égéki mungguna," emiyoho. Damu Yahudi nahu asuféri bahana yoho Gamaliel égé ahu-rasul yoho fani homufunan deyoho ememere u yoho égéki dagenaka, damu hanikéri "yahae" ememere yohona.
[40] Damu ememere yohonaka, yoho ahu-tentara yoho bake yohonani, ahu-tentara yohote ahu-rasul yohoki dakumu yeri osuguna. Osugunaka, damu yangge bago ohoru ha féri gaguma asuguna égé féri ufuri adibimahanani, haha koru giyakigina. Ememere emahanaka, Yahudi nahu asuféri bahana yoho ahu-rasul yoho bake emiyohona, "Gugu ahu fe yoho bake Yesus Éné sisi fani yohonan deyoho, meneféyané!" Ememere yohonaka, damu ahu-rasul yohoki munggunani, kusumu hohona.
[41] Damu ahu-rasul yoho Yahudi nahu gogo hamu deregemu égena yohona yeyoho matahai dukuméri égenato ékému munggunaka, hanikéri hohona. Yoho hanikéri u kutumu yori emiyahana, "Yesus niye emériyani, ahu fe yoho nugu bake poréyahamu emahana. Damu Ala fimohoni nugu habigiyoméri ukukuwoho égéki feyahafuniya. Emohoni, nugu hanikiriya," emiyahana.
[42] Damu asuwa sawawa ahu-rasul yoho Ala Éné Afahang pama damu ahu yohona afahang hamu osu-musuméri ahu fe yoho bake Yesus Égé Kristus, u feki Ala kubumu yohoni Ahuhabang kiri baha ememere Yesus Éné sisi manggoho yokukubuméri yo hohona.