[1] Apolos damu Korintus busuyaha ékému baha égéki, Paulus hori Galatia damu Frigia soho fikoyaha ékému soho siyaha busu yahamuto égena ékému osu-musuméri hoho. Osu-musuméri hori yakiya, damu Asia soho fikoyaha ékému osuri busu fe busu fe osu-musumohoka, damu égé dakamu Efesus busu ékému ogoho. Oguri ékému ahu yahamuto gebuugu. Gebuuri dagini ahu énéyuhuwoho hate Yesus Éné murid kiri Égé kotoféyahana.
[2] Damu égé yoho bake abamu yoho, "Gugu Yesus Éné sisi dari haiyangne ememere fimahana égéki, Ala Éné Ubana Hayo mése guguna modu oguri bahae?" Ememere abamu yohoni, yoho dari utuhu hamahana, "Karawoho. Nugu fani dariyani Ala Éné Ubana Hayo de baha," emiyahana.
[3] Damu Paulus égé tafe abamu yoho, "Ememere égéni, gugu ahu menohosé yokukubumoho égé hamu hanéri baptismahanae?" Damu yoho dari emiyahana, "Yohanes yokukubumoho égéki hamu hanéri baptismériya," emiyahana.
[4] Damu Paulus yori emiyoho, "Ahu baptismusumoho nahu Yohanes ahu yoho dosa kemahana égéki ukuni modinanéka, Ala Éné u dari bohonangkumaki, yoho bake baptismoho. Damu égé hate ahu énéyuhuwoho bake emiyoho, 'Ahu fe awe nané mo defené. Éné fiki Yesus. Emohoni, gugu Énini fimiri bunané,' ememere Yohanes yoho."
[5] Damu Paulus u yoho égéki ahu ékému égena yoho dagenaka, yoho Nugunabo Yesus Égé kotoféyahana ememere kubumenan niye baptismahana
[6] Damu Paulus égé éné bero féri yohona habang teyo kumu kufiyohoni, Ala Éné Ubana Hayo monu miri yohona teyo kumu ogusugu. Damu Ala Éné Ubana Hayo habigiyoméri emohoni, ahu énéyuhuwoho ahu busu-busu deregemu bahana yohona u égéki éyohona, mite u éyohona égéki fani yokukubumahanani nafamahana deyoho. Damu Ala Éné Ubana Hayo yoho bake Ala Éné u yohoni, yohote Ala Éné u dari hamemere yohona.
[7] Yoho égena ékému ahu besing hamu inahamahanani bibirikuma-ketahafi-ukuma (12) moho rahamoho.
[8] Damu Paulus égé damu Efesus busu fikoyaha ékému bahani, kamubégé ukumasiyo moho. Damu ememere baha égéki, égé Yahudi nahu yohona sunafahang ékému osuri habigiyoméri u ememere yokuni yori yokukubumoho: "Ala Yesus Égéki kubumu yohoni Égéte Ahuhabang kiri baha. Damu gugu Yesus Énini fimiri bohonangkumaka, Ala Énahu kinané, damu Ala guguki hafuféri etori bohoné," ememere yokukubumoho.
[9] Emohote, ahu yahamuto yohona modu botokéri damu ahu dukuméri égena yohona sama kumu undoméri Paulus Ala Éné u yoho égéki fani haiyangne ememere fimahana deyoho. Damu yoho Nugunabo Yesus u yokukubumaki égéki dirimeféri yohona. Yoho ememere emahanani, Paulus égé Yahudi nahu yohona sunafahang égéki mungguka, damu égé ahu Yesus Éné murid kiri Égé kotoféyaha yohoki yeri sekolah yokukubumsumahanato degemu égé ékému hori yokukubumoho. Égé asu-sawa sekolah yokukubumsumahanato éné fiki Tiranus ékému yokukumoho.
[10] Damu Paulus ememere uku damu yokukubuméri bahani, sufébégé ukuma moho. Emohoni, Yahudi nahu damu Yunani nahu aburoho yoho Asia soho fikoyaha ékému bahana yoho Nugunabo Yesus Éné sisi égéki dagena.
[11] Paulus égé Efesus busu ékému baha égéki, Ala Paulus bake habigiyo kurohoni, égéte ukukuwoho-mujizat égéki emesumoho.
[12] Damu ahu esemu wowiyo kesemahanani, fani Paulus bake dahana de égéki, Paulus éné tahano bero afu-afumona damu ifita kukumoho égéki yeri ahu wiyaha keseméri bahana yohona haha teyo kumu kufiyongkumaki, emohoni yoho gogeriméri haniyakigina. Damu hate ahu hohoi osuri bahana yohoki musuri hohona.
[13] Emohote, Yahudi nahu ahu tuhuremu wou nafamahana yoho musuri busu fe busu fe hori damu ahu hohoi osuri bahana yohoki wou yori uwahafungguna. Yoho bahana ékému ahu yahamuto yoho hate Nugunabo Yesus Éné fi iri Éné habigiyo féri ahu hohoi osuri bahana yohoki maha uwahafumenan néré. Yoho emiyohona, "Yesus Paulus yokukubumoho Éné habigiyo féri yohowané hohoi, gu ahu afuri baha ékému musuri nohoi," emiyohona.
[14] Ememere emahana ékému Skewa énamu ofo besing birikumu-berahafi-ukuma (7) de bahana. Yohonabo Skewa égé Yahudi nahu yohona ahu-imam yohona ahuhabang kiri baha.
[15] Emohote, sawa fe kigini, yoho ememere emahana égéki, ahu hohoi afuri baha égé fani musuri hoho deyoho. Damu égé utuhu hamoho, "Nu mése Yesus nafaméré, damu Paulus éné sisi égéki awe daramusuméré. Emohote, menoho gugu sere?"
[16] Abamu yohoka, damu ahu hohoi afuri baha égéte womusumoho yohona haha kumu oguri asisiméri ufiyohoni, yohona haha peso bahana. Damu égé yohona ifita agebahaméri habigiyomohoni, afahang ékému musuri monuwe féri boniri hohona.
[17] Ememere emohoni, ahu emu-hori-daha Efesus busu fikoyaha ékému bahana nahu yoho u égéki dagenaka, damu Yahudi nahu yoho kumu Yunani nahu yoho kumu ememere yoho esemu mokéri Yesus Égé esumu habigiyoméri baha ememere fimiri Énaukungguna.
[18] Damu ahu aburoho mése Yesus Énini fimiri bahana yoho deri damu ahu dukuméri égena yohona sama kumu ukukuwoho keiyongkéri emesumahana égéki yobuwoméri yohona.
[19] Damu ahu aburoho wou yori emesumahana ékému ahu aburoho yoho yohona buku wou kara ungguna baha égéki ahu emu-hori-daha yohona sama kumu gogokunggunaka, damu indo kungguna doho. Damu buku wou unggasumahana bahani tokunsumahana éné ka égéki inahamahanani aneséyang-iyobégé-perak 50.000 moho rahamoho.
[20] Ememere emahanani, ahu aburoho yoho Nugunabo Yesus Éné sisi égéki dagenaka, damu haiyangne ememere fimiri bahana. Damu u dagena égéki yohona modu degemu emohoni, yoho habigiyoméri degemu wayamu bahana, damu yoho tafe esemu habigiyoméri wayamu bahana.
[21] Ukukuwoho emu-hori-daha égéki ememere feyahafunggunana, Paulus égé mumangge Makedonia damu Akhaya soho fikoyaha ékému ahainéka, damu Yerusalem busuyaha ékému ahainé ememere fimiri inggeméri emiyoho, "Damu nu ememere hokumu ahaika, damu nu esemu Roma busu fikoyaha ékému ahai," emiyoho.
[22] Ememere Paulus yohoni, ahu ukuma Paulus mahamu emahana yoho, Timotius damu Erastus yoho mumangge Makedonia soho fikoyaha ékému hohona. Emohote, Paulus uku pumise damu Asia soho fikoyaha ékému kebemu baha.
[23] Ememere baha égéki, Paulus égé Nugunabo Yesus u yokukubumaki égéki yokukubumohoni dagenaka, damu ahu tuhuremu hagiyakéri ugahamahana.
[24] Damu Efesus busuyaha ékému ahu fe éné fi Demetrius de baha. Égé iyobégé-perak féri kukuwoho yohona kusi unawaremu emoho nahu kéré. Damu busu ékému ala yang kusi gahakumu égé éné fi Artemis éné sunafahang fikoyaha de égéni, Demetrius damu énohogigiyoho kotoféri furubo éyahana yoho iyobégé-perak féri Artemis éné sunafahang esemu unaware aburohomu emahanaka, damu ahu Artemis bake sembayang yeri énaukungguna yoho bake aneséyang tokunsumahana, nemohoni ahu énéyuhuwoho aneséyang aburohomu kemesumahana.
[25] Damu Demetrius yohoni, ahu égé kotoféri furubo yahana yoho deri dukumahanani, égé yoho bake yori emiyoho, "Nané matahai yohoniya, gugu mése nafamahanani nugu nuguna furubo aneséyang aburoho kemesumériya nogoki de kamu ala yang kusi Artemis éné sunafahang esemu unaware emériyaka, damu aneséyang tokunsumériya nogo kéré.
[26] Emohoni, maha guku etori damu narané. Paulus mése Efesus nahu damu ahu Asia soho fikoyaha emu-hori-daha ékému bahana yoho bake ememere yokukubumoho, 'Ala kusi ahu bero féri emahana égé fani sifing fiyoho deyoho, damu égé fani habigiyomoho deyoho. Emohoni, gugu fani ala yang kusi Artemis bake sembayang afénan deyoho.' Ememere habigiyoméri yori mése ahu aburoho yohona sifing degemu emoho.
[27] Damu ememere ahu yoho Paulus éné u dari bohonangkumaka, fani kamu nuguna furubo Artemis éné sunafahang esemu unaware eméri aneséyang tokunsumériya nogo remu poréyahamu éyon deyoho. Emohote, ala yang kusi Artemis uku hate fani wayamu égé deyoho, nemohoni ahu Asia soho bahana yoho damu ahu soho emu-hori-daha ékému bahana yoho fani sembayang yeri énaukumenan niye Artemis éné sunafahang ékému defenan deyoho. Damu ahu yoho hate Artemis égé habigiyomoho fani ememere fimenan deyoho," emiyoho.
[28] Damu Demetrius ememere yohoni, ahu yoho dagenaka, damu yohona modu hakeremahana. Damu yoho u hanggeramu yori emiyahana, "Efesus nahu nuguna ala yang kusi Artemis égé esumu habigiyomoho!"
[29] Ememere busu fikoyaha égéki esumu abutakuni damu ahu ukuma Paulus kotoféyahana yohoki berahae yeri ahu aburoho gigiyo kuni boniri hori ahu kumukunggunato ékému osuguna. Damu ahu ukuma yoho Makedonia nahu kéré, damu yohona fi Gayus damu Aristarkhus.
[30] Damu Paulus égé kotoféri ahu kumukunggunato womu kumu osuri ahu aburoho yoho bake u yohoné bemohote, éné matahai Yesus kotoféyahana yoho fani égé bake "yahae" ememere yohona deyoho.
[31] Damu Paulus énohogigiyoho kamukumamu asuféri Asia soho fikoyaha ékému hafuféri bahana yoho u yofiyahanani daha. U égéki égé ahu kumukunggunato ékému fani atun deyoho.
[32] Damu ahu kumukunggunato womu égé esemu u yori abutakungguna. Ahu tuhuremu yoku u fe yori ugahamahana. Damu tuhuremu hate u fe degemu yori ugahamahana. Emohoni, yoho makemoho niye dukumahana égéki ahu aburoho yoho fani nafamahana deyoho.
[33] Ememere égenaka, damu Yahudi nahu yahamuto yoho ahu feki awe abemahanani, ogoho. Yoho ememahanani égé ahu kumukunggunato sama kumu éri u égéki ayoméri yohon néré. Éné fiki Aleksander. Damu égé u yoho niye éné bero féri usuwamohoni, yoho u modinané. Damu égé Yahudi nahu yoho u nogoki fani emahana deyoho ememere yori yohoniyomoné moho.
[34] Emohote, Yahudi nahu de yoho aburoho Aleksander etori Yahudi nahu ré emiyohona. Yoho nafamahanani Yahudi nahu yoho fani Artemis égé bake sembayang yeri énaukungguna deyoho. Emohoni, yoho u hanggeramu yori emiyohona, "Efesus nahu nuguna ala yang Artemis égé esumu habigiyomoho!" Yoho ememere ugahamahana égéki yaki sawakiyo ukuma nahangkungguna rahamoho.
[35] Ememere emahanani, ahu busu ékému kara unggamsumoho nahu égé yohoni, ahu aburoho yoho ugahamahana égéki modinan niye égé yori emiyoho, "Ha Efesus nahu yohoniya, fani ugahamenan de meneféyané! Ahu soho beriya emu-hori-daha mése nafamahanani Efesus nahu nugusé sunafahang fiko siri ala yang kusi Artemis esumu habigiyomoho éné sunafahang womu kumu égé égéki damu etori ériya. Damu ahu énéyuhuwoho hate nafamahanani nugu Artemis éné kusi iyobégé féri emoho égé hou siyaha hosumu peroho migini, etori beriya.
[36] Damu u nogoki ahu fe fani ufuyohon deyoho. Emoho nemohoni, nugu fake gemu bohowa. Fani kakumu hanggerakéri yohowan deyoho.
[37] Damu ahu ukuma yoho kukuwoho fe fani ala yang kusi gahakumu baha éné sunafahang ékému kei yahana deyoho. Damu yoho Artemis bake fani dirimeféri yohonan deyoho. Emohote, gugu homereyaha ahu ukuma yoho yeri nokumu dahana.
[38] Emohoni, Demetrius damu énohogigiyoho ahu fe bake u fe de éyongkumaka, yoho u nogoki ahuhabang u efefeméri yori inggemusumohoto ékému yeri nohoyané. Ékému ahuhabang-gubernur éné sama kumu gogo ukumamu degemu beri u égéki kutumu abamu yori efefemenané, damu ahuhabang égé haiyangmu yori inggemoné.
[39] Ememere emohote, gugu ukukuwoho fe damu éyongkumaka, u égéki Efesus nahu nugu kumu nuguna ahuhabang kumu ememere kotoféri aburohomu dukuméri efefeméri wayamu yori feyahafuma.
[40] Nugu ememere ugahaméri emowangkumaka, Roma nahu asuféri beri nugu hafuféri égena yoho nugu sawa nogoki degemu emériya égéki dari nugu bake ememere yori tinibiyakumenané, 'Makemoho niye u égéki degemu poréyahamu emahanae?' Mite, nugu utuhu fani wayamu haiyangmu yohowan deyoho," emiyoho. U égéki ememere yohoka, égé yoho bake yori emiyoho, "Gugu wahaméri nohoyané." Emiyohoni, yoho hamemere wayamu hohona.