[1] Efesus busu fikoyaha ékému ugahamahana égéki munggunaka, Paulus yohoni, ahu Yesus kotoféyahana emu-hori-daha yoho deri dukumahana. Damu égé yoho yoku damu Yesus Énini fimiri bohonan niye Yesus Éné sisi manggoho yokukubuméri yohona modu kemohoka, damu yoho bake "Fake bunané" ememere yohoka, damu kusumu Makedonia soho fikoyaha ékému ahana niye hoho.
[2] Hori Makedonia soho ékému ogori busu fe busu fe égena ékému ogori ahu Yesus kotoféyahana yoho bake tafe Yesus Éné sisi manggoho aburohomu bubutumu yori yohona modu kemoho. Emohoni, yoho Yesus Éné u égéki bubutumu fimiri bohonané. Damu égé yaki Yunani soho fikoyaha ékému ogoho.
[3] Ogori égé hokumu bahani, kamubégé ukumasiyo moho. Emohote, égé kapal oguri Siria soho fikoyaha ékému adun niye ememere éyaha. Emohote, égé dagini Yahudi nahu yoho égé ahaikumaka, mo hori uri kufiyonané ememere yohona. Emohoni, Paulus égé woféng kumu dakamu hori Makedonia soho fikoyaha nahangkuni Siria soho adunané ememere yori inggemoho.
[4] Damu ahu Paulus kotoféri Siria soho ékému onderi Yerusalem busu fikoyaha ékému ahanané mahana yohoki birikuma-berahafi-ukuma (7) ememere égena: Berea nahu Pirus énamu Sopater; Tesalonika nahu ukuma, Aristarkhus kumu Sekundus; Derbe nahu Gayus; Galatia soho nahu Timotius; Asia soho nahu ukuma, Tikhikus damu Trofimus yoho kéré.
[5] Damu ahu énéyuhuwoho mumangge musuri kapal oguri hori damu Troas busuyaha ékému Paulus damu Lukas nugu niye kidabahana.
[6] Damu ememere beriyaka, damu nugu woféng kumu bohori-bohori horiyaka, damu Yahudi nahu kubu geiri du-roti burahae énggena éné sawa feyahafumériyaka, damu Filipi busu fikoyaha ékému kapal oguri asu sanggere bohori-bohori yeya Troas busu fikoyaha ékému ogoriya. Ogori damu ahu birikuma-berahafi-ukuma (7) mumangge Troas busu deri nuguni kidabahana yohoki gebuuri yoho kumu kotoféri beriyani, asu ihoriya égéki birikumu-berahafi-ukuma (7) moho.
[7] Sawa minggu yaki asukigi égéki Troas busu nahu yoho besingna yangna mése Yesus Énini fimiri bahana yoho kumu nugu kumu ememere dukuméri beri Yesus kunggu égéki fifimiri du-roti ahahaméri ero-anggur noho kumu kotoféri éniya-mériya. Damu igirini mimi kini, yoho damu bohonanéte, Paulus kusumu musuri ahainé moho, nemohoni égé ahu Yesus Énini fimiri beriya nugu bake Yesus Éné sisi égéki kebemu yokukubumu éyahani, asu gugunukigi.
[8] Damu afahang womu abugemahana fe siyaha hosumu nugu emu-hori-daha dukuméri beriya égéki, siya-pelita aburoho uri kufiyahanani, hakidori bahana.
[9] Damu nugu beriya ékému ofo subang fe éné fiki Eutikus de baha. Égé afahang ernato gumahana ékému beri Paulus Yesus Éné sisi manggoho yokukubumoho égéki dagi. Ememere dagite, Paulus uku damu kebemu yokukubuméri éyahani, kiyo kunukigi etohoki afahang womu abugemahana siyaha ukumasiyomu égé ékému ernato gumahana ékému ogusuri beri kunu iri bikéri peroho miri ifiyoho. Emohoni, ahu miri yeri etahanate, égé mése kunggu.
[10] Damu Paulus hate fu ékému miri damu ofo subang éné ima ékému bukumu tini damu égéki berahae yeri damu égé yori emiyoho, "Fani gagitomenan deyoho. Égé de baha."
[11] Ememere yori Paulus damu ahu tuhuremu kotoféri dakumu afahang siyaha ékému osugunaka, damu égé hafuféri Yesus kunggu égéki fifimiri du-roti ahahaméri ero-anggur noho kotoféri énggena migina. Damu égé Yesus Éné sisi égéki dakumu yoho bake yokukubuméri éyahani sawa kigini, égé ahu yoho bake ememere yoho, "Fake bunané." Emiyohoka, damu musuri hoho.
[12] Damu ahu tuhuremu yoho Eutikus dakamu dotori baha égéki yeri kusumu éné afahang hohona. Damu ahu emu-hori-daha Yesus Énini fimiri ékému égena yoho etori yohona modu esemu hanikigina.
[13] Nugu mése u yori inggemériya hamemere Paulus égé pumise Troas busuyaha ékému woféng kumu hori Asos busuyaha ékému ahainé moho. Emohote, Lukas nuku damu ahu gogo tuhuremu moguri kapal oguri nokumu musuri hori Asos ékému ogori damu hokumu Paulus égéki kapal oguri kotoféri ahaya niye kidabohowané mériya.
[14] Damu nugu hori Paulus égé Asos busuyaha ékému gebuuriya. Gebuuriyaka, égé kapal nugu oguri beriya égéki oguguni, damu nugu kusumu Metilene busuyaha ékému bohoriya.
[15] Bohoriya yaki yeya nugu Metilene ékému ériyaka, damu hori soho fe soho dubuge Khios takenamu égé ékému ogoriya. Damu yeya nugu soho dubuge fe Samos etori nahangkuniya. Nahangkuni damu Efesus busu hate nahangkuni yeya nugu Miletus busuyaha ékému ogoriya. Ememere Paulus égé mése Efesus busu nahangkunggu égéki, moguri Paulus ememere fimiri yori inggemoho, "Nu awe kakumu Yerusalem busu fikoyaha ékému hori Sawa-Pentakosta égéki dukuméri Ala bake sembayang yeri kubu ainané mahana égéki kotoféye. Emohoni, nu fani Asia soho ékému mékéyahamu bahae deyoho," ememere fimiri mése yori inggemoho.
[17] Kapal égé Miletus ékému kimoho égéki, Paulus u yofiyohoni, ahu fe égé Efesus busuyaha ékému hoho. Hori yohoni, ahu-jemaat etori bahana nahu yoho deri Miletus ékému Paulus gebufunané.
[18] Damu ahu-jemaat etori bahana nahu yoho marahanani, Paulus yoho bake emiyoho, "Gugu nafamahanani nu makemere gugu kumu kotoféri beriya nogoki sawa nu Asia soho nokumu marari embahae damu niyaki.
[19] Damu nu nané modu amiféri guguki woruméri efe uri Nugunabo Yesus Éné furubo yaré. Nuku hate Yahudi nahu yoho nanahaisigina égéki emesuméri u kemesuméré.
[20] Ememere kugutoméri éréte, nu fani u fe wayamu égé égéki gugu bake muni deyoho. Ahu aburoho yoho dukumahana ékému yokukubuméré, damu hate afahang hamu osu-musuméri yokukubuméré.
[21] Nu asu-sawa haiyangmu yokukubuméré, uku Yahudi nahu yoho damu Yunani nahu yoho ememere yoho yohona dosa yahana égéki modinanéka, damu Ala bake deri Éné u dari Nugunabo Yesus Énini fimiri bohonan niye yoré," ememere hahareméri emiyoho.
[22] Damu Paulus tafe emiyoho, "Emohote, Ala Éné Ubana Hayo nu bake yohoni, nu dari esumu Yerusalem busu ahai. Emohote, Yerusalem busu fikoyaha ékému hori damu u makerahae hokumu nu wokumu ahaisiri éyoné moho égéki fani nafaméré deyoho.
[23] Emohote, kageto nogoki nu busu fikoyaha hamu osu-musuméri horé égéki, Ala Éné Ubana Hayo nu bake mése yobuwoméri yohoni embahae nu awe bui kumenané, damu awe kugutoméri bahae.
[24] Emohote, kamu fimiri Nugunabo Yesus nu bake yohoni furubo nogoki yeri embahae feyahafumekumaki, nu bere nogoki damu sifing féri bahae rahamo akume rahamo fani ememere butumu fimiri deyoho. Égé nuki kubumu yohoni, nute hori nugu fani haiyangmu beriya deyohote, Ala Éné modu kuyomu woruméri nugu niye emohoni, Ala nuguna dosa Yesus Éné gong féri tobunsuméri umburomoné moho éné sisi manggoho nogoki yobuwoméri yo ahai.
[25] "Damu nu mése posuyaha gugu emu-hori-daha bake sisi nogoki yokukubuméré: Gugu Yesus Énini fimiri bohonangkumaka, Ala Énahu kinané damu Ala guguki hafuféri etori bohoné. Ememere yokukubuméréte, nu nafaméré kageto nogoki sawa gugu nuki etohona éné sawa akimamaga kéré. Gugu nu tafe fani gebufunan deyoho.
[26] Emohoni, sawa nogoki nu gugu bake u hanggeramu niyahae: Nu hanikéri Ala ahu yoho niye Éné sifing fimiri u emu-hori-daha emoné moho égéki mése u yori yokukubuméré. Emohoni, gugu égena nogoki fe indo fani bunéri égé de éné busu ékému atungkumaki, u nogoki Ala nu bake fani awe pepekuni yohon deyoho.
[28] Emohoni, gugu guku damu Ala Éné u esumu dari haiyangne ememere fimiri bunané. Damu Ala Éné Ubana Hayo mése guguki kubumu yohoni, gugute ahu asuféri ahu-jemaat hafuféri bahana nahu kiri bahana. Emohoni, ahu wi-domba etori baha nahu wi-domba gogoyaha wayamu hafuféri etori baha hamemere gugu ahu-jemaat yohoki hafuféri etori bunané. Ahu-jemaat yohoki Nugunabo Yesus debahae-abufiya ékému kuni éné gong migi, nemohoni Ala Énamu Yesus Éné gong féri yohona dosa kemahana égéki tobunsumoho. Emohoni, yohote Ala Énahu kiri bahana kéré.
[29] Nu mése nafaméréni ememere nu kusumu ahaite, ahu keiyongkéri bahana yoho guguna womu kumu deri u degemu yahamu yokukubumenané, damu ahu Yesus Énini fimiri bahana yoho bake poréyahamu emenané. Ahu énéyuhuwoho anggi keiyong égé wi-domba uguna gahakumu beri ahu Yesus Énini fimiri bahana yoho bake poréyahamu emenané.
[30] Damu hate gugu égena nokumu ahu yahamuto awe musuri u haiyangmu yokukubumériya égéki yohote esemu u degemu yahamu yori yokukubumenané. Emohoni, ahu-jemaat tuhuremu mése Yesus kotoféyahana yoho haiyangne ememere fimiri yoho kotoféyonané.
[31] Emoho nemohoni, femu etotoméri enané! Hate nafanané nu mése sufébégé ukumasiyo méré égéki asuwa sawawa guguni efesésébuméré, damu nu fani muni deyohote, gugu ahu fe ahu fe akiya damu yori yokukubuméri éyaré.
[32] "Kageto nu ahai beméréni, Ala guguki etori bohon niye Ala bake yahae. Damu Ala Éné u nugu bake kubumohoni, Ala Éné modu kuyoméri woruméri emoho égéki gugu butumu fimiri bohonan niye Ala bake yahae. Ala Éné u égéki haiyangne ememere fimiri damu bohonangkumaka, gugu awe esumu habigiyoméri bohonané. Damu Ala ukukuwoho wayamu égé Énahu yoho bake kurohoné ememere u yahamaki égéki gugu bake kurohoné afénané," emiyoho.
[33] Damu Paulus tafe yori emiyoho, "Nu fani guguna aneséyang rahamo ifita rahamo ememere hanikéri kemesuméré deyoho.
[34] Damu gugu mése nafamahanani nuku habigiyoméri nané bero ukuma féri tenda-saka gesiri aneséyang yeri nané kukuwoho damu nohogigiyoho yohona toto kotoféri tokunsuméré.
[35] Nu ememere emesuméri kubuméréni, gugu etori nafamahanani nugu furubo mekenahae habigiyoméri aféyanéka, damu aneséyang yeri ahu wakigi yoho toto karakigina bahanani, yoho fe kurohowané. Nugu hate fima Nugunabo Yesus mése emiyoho, 'Ahu yoho gugu bake kukuwoho fimahana kurohonangkumaka, ahu kukuwoho yahana guguki Alasé yahamutomu wayamu emoné. Emohote, ahu gugu bake kukuwoho kurohona yohoki Alasé esemu aburohomu wayamu emoné,' " emiyoho.
[36] Paulus u ememere yohoka, damu égé yoho kotoféri hafuféri éri bukumu tini damu Ala bake u yohona.
[37] Damu yoho Paulus bake berahae yeri damu efe unugoméri wofungguna.
[38] Damu Paulus moguri yoho bake ememere yoho, "Gugu nu tafe fani gebufunan deyoho." Ememere yohoni, yoho yohona modu esumu budiyahangféri butumu fimahana. Damu yoho Paulus kotoféri ikiya ékému ukuri égena.