[1] Nabo Teofilus, anggo feki nu mése gu bake buku fe moguri kara uniké. Buku ékému Yesus soho nokumu baki égéki Égé age Éné furubo yeri ukukuwoho emu-hori-daha emesumaki damu ahu yoho bake yokukubumaki éné sisi emu-hori-daha égéki mése kara uni.
[2] Damu Yesus ememere emesuméri arohoriya embahae Ala emohoni Ala Éné busu mene ékému osugu ememere kara uni kéré. Damu Égé fani osugu de, dakasuhumu Ala Éné Ubana Hayo Yesus bake yoho. Emohoni, Égéte ahu yohona fi iri kubumu yohoni ahu-rasul kiri bahana yoho bake emiyoho, "Gugu guguna akiya kamukumamu Nu yoré nogoki esumu enané," emiyoho.
[3] Yesus Égéki soho nokumu kugutoméri bahaka, damu debahae-abufiya kumu kungguka, damu Ala emohoni dakumu dotoho. Dakumu dotohoka, Égé sawa 40 méri baha. Ememere baha égéki, ahu-rasul yoho bake aburohomu Ukuné kibi kukubumohoni, yoho yoku Égéki etosumahana. Damu yohote fimahanani haiyangne Égé mése dotoho. Damu Yesus ahu-rasul yoho bake ememere yokukubumoho: Ala Ahuhabang kiri Énahu yohoki hafuféri etori bohoné.
[4] Damu Yesus dotori baha égéki, sawa feki Égé ahu-rasul yoho kumu kotoféri dukuméri yoho bake u égéki ememere yoho, "Guku damu Yerusalem busu fikoyaha kumu bunané. Nokumu kidabohonanéka, fani kebekin de embahae Nabo Ala u yahamaki égéki Nu mése yoré dagena ememere Ala Éné Ubana Hayo kusumoné gugu bake defené.
[5] U feki ahu baptismusumoho nahu Yohanes oho féri ahu baptismusumoho. Emohote, fani kebekin de Ala guguki Ala Éné Ubana Hayo féri baptismoné: U feki Ala Éné Ubana Hayo kusumoné Égéte deri guguna modu osuri bohoné, gugu awe harahaimu bohonané," emiyoho.
[6] Damu sawa feki ahu-rasul yoho tafe soho buniyahang ékému dukumahana. Dukumahana égéki, yoho Yesus bake abamu yohona, "Nabo, Gu emoné Roma nahu yohona ahuhabang-kaisar monu miyonéte, Gusé Israel nahu nuguna ahuhabang kiri nuguki hafuféri bohoné. U égéki katugo éyon rahamo nugu kidabohowan rahamohoe?"
[7] Damu Yesus yoho bake utuhu hamoho, "Nabo Ala Uku embahae sawa égena égéki rahamo sawa feniki rahamo emoné Nute Ahuhabang kiri bahae. Damu Nabo Ala Éné na féri Uku pumise yori inggemohoni, gugu fani nafamenan deyoho.
[8] Emohote, gugu nafanané fani kebekin de Ala kusumoné Ala Éné Ubana Hayo deri guguna modu kumu bohonané. Damu Égé gugu bake habigiyo kurohoni habigiyomenané. Emohoni, gugu Yerusalem busu fikoyaha kumu Yudea soho kumu Samaria soho kumu soho tuhuremu emu-hori-daha ékému hori guguna kiyomu Nuki etahana égéki ahu fe yoho bake habigiyoméri yo ahanané!"
[9] Damu Égé sisi ememere yori feyahafungguka, ahu yoho etori égenani, Ala emohoni Yesus Ala Éné busu mene ékému osugu. Damu hou hayo ketanggini yoho Yesus fani tafe etahana deyoho.
[10] Damu Yesus boosugu égéki, yoho damu kero osuri hou etori égena. Damu ahu ukuma ifita hayo kunggunaka, yoho égena ita ékému fake marari égena. Ahu yohoki malaikat, Ala Éné u yeri deri ahu yoho bake yosumahana yoho kéré.
[11] Damu ahu ukuma égena égéki ahu fe emiyoho, "Galilea nahu yohoniya, gugu makemohore nokumu damu éri kero osuri hou damu etori égenae? Menefeyané! Embahae anggo feniki Ala emohoni Yesus Ala Éné busu mene kumu osugu égéki hamu hanéri awe dakumu soho nokumu defené. Damu gugu etori égena osuguto hamemere Égéte defené," emiyoho.
[12] Malaikat ukuma énéyuhuwoho musuri hohonaka, ahu-rasul yoho Soho Haibe Siyaha Debahae-Zaitun ememere iri yohona ékému miri kusumu Yerusalem busu dahana. Soho buniyahang ékému musuri Yerusalam busu fikoyaha ogohona égéki fani hamuyahakigi deyoho, mite kamu kilometer kamisige moho.
[13] Yoho busu fikoyaha nokumu dakumu dahanaka, damu afahang yoho bahana ékému osuri afite kumu osuri afahang womu abugemahana fe siyaha hosumu osuguna. Katugo ahu-rasul yoho ememere égena: Petrus, Yohanes, Yakobus, Andreas, Filipus, Tomas, Bartolomeus, Matius, Alfeus énamu Yakobus, ahu fe éné fi Yakobus énamu Yudas, damu Simon. Simon uku Zelot nahu fe kéré.
[14] Damu ahu énéyuhuwoho hanikéri dukuméri bamahanaka, damu yohona sifing kamisigemu fimiri Ala bake sembayang yeri Égé bake u yosuméri bahana. Ahu fe hate yoho kotoféri Ala bake u yosumahana yoho ememere de bahana: Yesus baki égéki, yang yoho Égé bake ohoru kurakena damu ukukuwoho fe mahamu emakena yoho kotoféri dukuméri bahana. Damu Yesus Énéni Maria, damu Énukudagiyoho, damu ahu Yesus Énini fimiri bahana tuhuremu yoho kotoféri dukuméri bahana.
[15] Dukukusuméri ememere bahana égéki, sawa feki ahu Yesus Énini fimiri bahana yoho dukumahanani, yoho dukuméri égena égéki ahu 120mu dukuméri gogo kamisige gahakumu égé. Yoho égena ékému Petrus méséri emiyoho,
[16] "Nané matahai Yesus Énini fimiri bahana yohoniya, u fe de égéni, awe yahae. Anggo posuyahaki Ala Éné Ubana Hayo nuguna yahae ahuhabang-raja Daud égéki afuyeri égéni, égéte embahae sisi Yudas emoné moho égéki mése u yaki. Ememere sisi yaki égéki Ala Éné Buku kumu kara uwangkini, katugo mése esumu hamu hanéri haiyangmu égé. "Damu Yudas égéki nuguna matahai fe kéré: Yesus Yudas kubumu yohoni, nugu kumu kotoféri furubo yariya. Mite, égé ahu asuféri Yesus berahae afénané mahana yohoki hafuyeri daha.
[18] Moguri Yudas Yahudi nahu asuféri bahana yoho bake Yesus kurohoné ememere u yahamakini, yohote Yudas bake aneséyang kurohona. Damu emahanaka, Yudas yoho bake aneséyang yaha yaki égéki dakamu kurohoka, égé kunggu. Damu égé kunggu égéki, égé habang namu peroho miri koku wahamohoni o kosanggi miyaki. Emohoni, Yahudi nahu asuféri bahana yoho Yudas éné aneséyang nogo féri soho fe éné na kiri tokumahana.
[19] Ahu emu-hori-daha Yerusalem busu fikoyaha ékému bahana yoho Yudas ememere kuwangki éné u égéki esumu dari nafamahana. Emohoni, soho égéki yoku yohona u féri Hakal-Dama ememere iri yohona. U feki soho égé ahu éné gong féri yeyemoho migi ememere iri yohona."
[20] Damu Petrus tafe emiyoho, "Ala Éné Buku fe éné fi Mazmur ékému nuguna yahae ahuhabang-raja Daud Yudas éné sisi égéki yoho. Mumangge égé Ala bake Yudas égéki poréyahamu emon niye emiyoho, " 'Nabo Gusé enu! Emohoni, égé bahato égé fengkiné, damu ahu fe yoho fani égé bahato ékému bohonan deyoho.' Damu ayat fe ékému ahuhabang-raja Daud Ala bake tafe u ememere yoho, 'Ememere ahu fete asukuni éné furubo yaki égéki aféné,' ememere kara uwangki.
[21] Emoho nemohoni, nugu ahu fe etori kubumu yohowané, égéte Yudas éné furubo asukuni éyoné. Ahu égéki mumangge Nugunabo Yesus kotoféri busu fe busu fe horiya-deriya mérékang égéki uku hate nugu kotoféri horiya-deriya mérékang.
[22] U feki ahu égéki Yohanes Yesus Égéki baptismoho égéki age etakika, damu embahae Ala emohoni Yesus Ala Éné busu mene ékému osugu égéki etaki égé kéré. Damu hate ahu égéki Yesus emesumoho égéki éné kiyomu etosumaki égé kéré. Ahu égé ememere de bohongkumaki, nugu ahu éné fi iri égéki kubumu yohowa. Égésé Yesus kubumu yoho nahu fe kiné. Damu égéte Yesus mése kunggute Ala emohoni dakumu dotoho Éné sisi égéki nugu kotoféri ahu fe yoho bake yo ahayané," emiyoho.
[23] Emoho nemohoni, ahu-rasul yoho damu ahu Yesus Énini fimiri bahana yoho ahu fi ukuma iri yohona. Ahu ukuma yohona fiki Matias damu Yusuf. Yusuf éné fi feki Barsabas, damu éné fi feki Roma nahu yohona u féri Yustus ememere iri yohona.
[24] Damu yoho Ala bake u ememere yohona, "Nabo Ala, Gu ahu emu-hori-daha yoho fimahana nogoki esumu nafamoho. Fake nugu bake wayamu kubunu! Gu ahu ukuma égena nokumu éné fi iri fe kiné ememere kubumu nouni, nugu femu nafamané. Damu égésé Yudas asukuni éyoné. Damu ahu-rasul fe kiri Gané niye furubo yeri éyoné. Anggo feki Yudas égé ahu-rasul kiri bakite, Gané niye furubo yaha égéki muwangki. Emohoni, égé kungguka, damu ahu Yesus Énini fani fimiri bahana de yoho kuni bahanato kumu hoho," emiyoho.
[26] Ememere u yohonaka, yoho ahu fe awe kubumoné nafamenan niye ukukuwoho fe emahana: Yoho iyobégé unaware ékému ahu-rasul kiné ememere kara uni kokunggunanéka, damu dakamu iyobégé égéki keméri etahana. Ememere emahanaka, Matias égé kara égéki yahani, égéte ahu-rasul kiri bohoné. Emohoni, ahu yoho emahanani Matias égé ahu-rasul bibirikumu-ketahafi-woro yoho (11) kotoféyohoka, damu Yesus Éné sisi égéki ahu fe yoho bake yo ahanané.