[1] Asu feki sawa mingkiméri gifukéri bahani sawakiyo ukumasiyo moho égéki, Petrus kumu Yohanes kumu Ala Éné Afahang bootohona. Sawakiyo ememere baha égéki, Yahudi nahu yoho Ala Éné fi iri Ala bake u yosumahana égé kéré.
[2] Ahu uku énéni koku womu kumu darukigini, énéni asufiyoho égé de baha. Ahu darukigi égéki ahu yoho abuge uni yeri hori Ala Éné Afahang iyobégé féri hai siri afiteto gagumahana éné yedito fe Ala Éné Afahang pama kumu osuguna-musuguna mahana ékému kufiyahana. Ahu yoho afite éné fiki Afite Manggoho ememere iri yohona. Asu-sawa ahu yoho ahu darukigi égéki ékému kufiyahanani, beri ahu Ala Éné Afahang pama kumu osuguna-musuguna mahana yoho bake aneséyangni yori baha.
[3] Ememere égé etori baha égéki, Petrus damu Yohanes Ala Éné Afahang pama kumu atunané mahanani, etohoka, yoho bake aneséyangni béyoho.
[4] Petrus damu Yohanes ahu égéki kerohori etori ogahanaka, damu Petrus ahu égé bake yori emiyoho, "Kiyo kusunu nokumu defené! Nugu butumu eta!"
[5] Emohoni, ahu égé fisini ememere fimoho, "Yoho nu bake aneséyang awe kurohonané." Ememere fimiri yoho bake kerohori butumu etori baha.
[6] Damu Petrus ahu égé bake emiyoho, "Nu kumu Yohanes kumu aneséyang karawoho. Mite, nu awe kukuwoho yeri éré nogoki gu bake kurahae. Ala Énamu kubumu yohoni Ahuhabang kiri baha Yesus, Nazaret nahu, Égésé nu bake Éné habigiyo kurohoni, Éné habigiyo féri gu bake yahae, 'Méséréya damu nohoi!' "
[7] Petrus ahu éné bero auwa mene kumu yeri mahamu emohoni, méségé. Ahu éné bégé kumu bégékéng age kufiyohoni kakumu habigiyomu asigi.
[8] Damu égé yahamutomu penosori peroho migi damu ogoho-maraha moho. Ememere emohoka, ahu égé Petrus kumu Yohanes kumu Ala Éné Afahang pama kumu osuguna. Osuguna égéki, ahu égé penosori peroho migi ememere ahu emu-hori-daha ékému égena yoho bake emiyoho, "Ala esumu manggohokigi," ememere Énaukunggu.
[9] Damu ahu énéyuhuwoho ahu égé bohori Ala Énaukunggu égéki etori dagena. Ememere etori dagenaka, yoho ukuni nafamahanani, égésé ahu Afite Manggoho Ala Éné Afahang pama kumu égé ékému beri aneséyangni yori baha égé séré. Emoho nemohoni, ahu ékému bahana énéyuhuwoho esumu mokéri habang gugubemahana, damu Ala ahu égé bake makenahare emohoni, égé ememere baha égéki fani wayamu nafamahana deyoho.
[11] Ememere ahu darukigi mése gogeriméri haniyakigini, égé esumu hanikéri Petrus kumu Yohanes kumu butumu yeri kotoféri hohona. Ahu emu-hori-daha ékému égena yoho ahu darukigite mése gogeriméri haniyakigi égé kumu Petrus kumu Yohanes kumu ememere égena yohoki etori hakurumahana. Damu yoho ahu darukigi égé mése gogeriméri haniyakigi nogoki fani femu nafamahana deyoho. Emohoni, ahu énéyuhuwoho kotoféri yoho bake buni hori bereme fe éné fi Ahuhabang-raja Salomo éné Bereme ememere iri yohona ékému hohona. Damu Bereme égéki Ala Éné Afahang pama kumu égé.
[12] Damu Petrus ahu yohoki etohoka, damu yoho bake u hanggeramu yoho, "Nané matahai Israel nahu yohoniya! Gugu ahu nogoki etori fani mokéri guguna habang gonggongmenan deyoho. Damu gugu fani nugu keroderi etori ememere fifimenan deyoho, 'Nugu nuguna habigiyo féri ahu égé ahafu yariya. Damu nugu Ala Éné u dari Éné modu hanikiné moho égéki emesumériyani, Ala Éné modu hanikigini, ahu égé méséri hoho,' fani ememere fifimenan deyoho.
[13] Damu nu awe u makerahae égé nogoki katugo nogo gugu bake yahae: Gugu Yesus Égéki yeri hori Roma nahu yohona ahuhabang-gubernur Pilatus bake kurohona. Damu Pilatus Yesus Égéki efefemohote, Yesus fani u fe wamu emoho deyoho, nemohoni u kutumu yori Yesus Égéki modini ahainé ememere inggemoho. Emohote, Israel nahu gugu ahuhabang-gubernur Pilatus éné sama kumu méséri emiyohona, 'Yesus égéki fani nuguna ahuhabang kiri nugu hafuféri éyon deyoho,' ememere mungguna. Damu hate égé bake ditini yori emiyohona, 'Nugu Yesus suhungfiyoné ahainé moho égéki modiyanéte, nugunahu fe ahu homusumoho nesi bui kumu baha égéki suhungféna musuri ahainé,' ememere ditini yohona. Gugu undomahana égéki, Yesus Ala u yohoto égéki fani munggu de u yoho égéki dari hamemere emesumoho, damu kirimu haiyangmu baha Égé séré. Damu Yesus Égésé ahu yohoki wayamu emoné, emohoni ahu yohote Ala kotoféri bohonané embahae posu-posukiné. Emohote, gugu Yesus Égéki uri kufiyohona. Damu Égé kunggute, Ala emohoni dakumu dotoho. Anggo posuyahaki nuguna yahae Abraham, Ishak, Yakub, damu nuguna yahae fe yohona Ala Égésé emohoni Yesus dakumu dotohoka, damu busu Ala bahato ékému osugu. Ememere Ala emohoni Énamu Yesus asuféri baha. Égé dotoho égéki nugu ahu ukuma mése nuguna kiyomu kukuuri etorékang égéki yoriya. Emoho nemohoni, u nogoki gugu bake niyohowangki.
[16] Damu gugu ahu darukigi égéki mése nafamahanate, etahanani ahu darukigi égé mése habigiyoméri guguna sama kumu méséri égé. Nugu ahu ukuma damu ahu darukigi égé ememere butumu fimiriya, 'Haiyangne, Yesus Égé Éné habigiyo féri ahu darukigi égéki ahafu aféné.' Emohoni, Yesus emohoni ahu darukigi gugu etori nafamahana égéki mése gogeriméri haniyakigini, habigiyoméri égé. Yahae, haiyangne. Nugu ememere Yesus Énéni fimiriyani, Yesus ahu nogoki gugu emu-hori-daha esumu etohonan niye ememere kirimu wayamu ahafu yaha.
[17] "Damu nané matahai yohoniya, nu nafaméréni Ala Yesus Égéki kubumohoni Égéte Ahuhabang kiri baha éné u égéki gugu damu guguna ahuhabang yohosé fani nafamahana deyoho. Emohoni, gugu damu yoho kotoféri Yesus Égéki uri kufiyahana.
[18] Emohote, gugu emahana wogoki Ala mungguni gugu homereyaha emahana. Gugu homereyaha emahana égéki anggo posuyahaki ahu-nabi yohosé ememere u yakena, 'Embahae Kristus Égé bake ukukuwoho poréyahamu emenané, wowiyokéri akumoné.' Nugu beriya nogoki Ala anggo posuyahaki u yaki égéki hamu hanéri haiyangmu égé.
[19] Ememere gugu dosa yahanani, Ala Égé guguna dosa yahana égéki tobunsumon niye Ala bake nouwané, 'Nugu nuguna dosa yariya égéki ukuni tafe dosa aféyan de modiyanéka, damu Ala Yesus Égéki kubumu yohoni Égéte Ahuhabang kiri baha éné u nogoki haiyangne ememere degemu wayamu fimiri Ala Gané u dari bohowané,' ememere nouwané. Ememere emenangkumaka, Ala Égé guguna dosa esumu tobunsumoné, fe fani damu éyon deyoho.
[20] Gugu ememere emenangkumaka, Nugunabo Ala gugu kotoféri éri damu gugu awe habigiyoméri bohonan niye mahamu emesumoné. Damu hate Kristus Égéki Alasé kusumoné tafe dakamu soho nokumu defené. Kristus Égé Uku Yesus Égé séré. Yesus Égé awe nuguna dosa tobunsuméri umburomoné, damu Égésé gugu damu nuguki hafuféri éyoné.
[21] Mite, Yesus Égé dakumu soho nokumu defen de, dakasuhumu Égé Ala Éné busu mene kumu awe bohoné, embahae Ala awe emoné soho kumu hou kumu damu kukuwoho emu-hori-daha Ala mése emaki égéki awe dakumu wayamu éyonané. Ala ememere wayamu emonéka, Yesus soho nokumu tafe defené. Ala u ememere emoné moho égéki anggo posuyahaki mése u yahamaki, damu u yahamaki égéki Énahu ahu-nabi yoho bake u yohoni, yohote ahu yoho bake u yakena.
[22] Nuguna yahae Musa égé ahu-nabi, Ala Éné u dari ahu yoho bake yosumoho nahu kéré. Kristus Éné sisi égéki Musa égésé Yahudi nahu yoho bake ememere u yaki, 'Nugunabo Ala gugunahu bahana ékému ahu fe kubumu yohoné, ahu égé ahu-nabi kiri bohoné. Damu Ahu Égéte Musa nu gahakumu beri damu Égé awe guguna gogo bahana ékému marefené. Damu Égé Ala Éné uki dari gugu bake yohoné. Gugu Éné u emu-hori-daha égéki esumu dari etori enané.
[23] Emohote, ahu menohosé Éné u fani dari etori éyon de kumaka, Ala ahu égéki fani Énahu kiri afén deyoho, damu Ala ahu égéki hakereméri poréyahamu emoné, damu ahu égé akumoné.' Nuguna yahae Musa Kristus Éné sisi égéki ememere yaki."
[24] Damu Petrus tafe u yoho, "Anggo posuyahaki ahu-nabi nuguna yahae Samuel damu ahu-nabi tuhuremu emu-hori-daha yoho kotoféri nugu katugo beriya nogoki ukukuwoho éyoné moho égéki u yakena.
[25] Damu Ala nuguna yahae Abraham bake emiyoho, 'Gané go yoho Nané u dari wayamu emahanani, Ala emoné ahu yoho gogoyahamu dukuméri soho emu-hori-daha bahana yoho hate wayamu bohonané.' Ala nuguna yahae Abraham bake u yahamaki égéki nuguna yahae damu nugu niye u yahamaki égé kéré. Gugu nuguna yahae ahu-nabi énéyuhuwoho yohona go kéré. Damu gugu nuguna yahae Ala nuguna yahae bake u yahamaki yohona go kéré. Emohoni, Ala awe emoné nuguna yahae wayamu bohonané ememere u kutumu kirimu u yahahamaki égéki Ala Égé hate gugu damu nugu niye emoné wayamu éyowané. Emohoni, Ala awe emoné gugu kumu nugu kumu ememere awe wayamu bohowané," emiyoho.
[26] Petrus u yori emoho égéki tafe ukuné sifingmu fimiri bagomu yori ememere sobu sohunggu, "Ala Égésé nuguna yahae yoho bake u yahahamaki hamemere Ala Égé Énamu Yesus kubumu yoho Égéki kusumohoni mumangge gugu damu nugu bake deri wayamu emoné, nugu femu wayamu bohowané: Égé emoné nugu awe keiyongmu emowané mériya égéki modiyané, damu Ala kubumu yohoni Yesus Égé Ahuhabang kiri daha éné u nogoki haiyangne ememere fimiri bunané." U ememere yoho égéki Petrus yoho bake Ala Éné u éyoho égé kéré.