[1] Damu ahu-jemaat Antiokhia busu ékému ahu-nabi yoho kumu bafa-guru Yesus Éné sisi manggoho yokukubumahana yoho yahamuto de bahana. Yohoki Barnabas, Saulus, damu Simeon. Simeon uku hate Ahu Ha Sikigi ememere iri yohona. Damu Kirene nahu Lukius, damu ahuhabang-raja Herodes énohogi Menahen. Menahen égéki ahuhabang-raja Herodes kumu kotoféri unaware beri ahuyaha kiginaré.
[2] Damu yoho dukuméri damu Nugunabo Ala bake sembayang yeri ohoru fani énggena de égéki, Ala Éné Ubana Hayo Égésé yoho bake emiyoho, "Barnabas damu Saulus yohoki Nané niye kubuméri nouwané. Yohona furubo afénané mahana égéki Nusé mése fengféyoré," emiyoho.
[3] Emoho nemohoni, yoho ohoru fani énggena de, damu Nugunabo Ala bake u yohona. Ememere emahanaka, yoho yohona bero Barnabas damu Saulus yohona habang teyo kumu kufiyori Ala bake u yohona. U yohonaka, kusumahanani hohona.
[4] Damu Ala Éné Ubana Hayo Barnabas damu Saulus bake kubumu yohoni, yoho Selukia busu fiko kiyohouyaha haisa kumu égé ékému ogahana. Damu ékému kapal oguri Siprus soho dubuge ékému hohona.
[5] Hori yakenana Salamis busu fikoyaha ékému ogori Yahudi nahu yohona sunafahang osuri ékému Ala Yesus Éné sisi manggoho yofiyoho daha égéki yo hohona. Damu Yohanes éné fi feki Markus ememere iri yohona égéki yeri hohona, damu égéte yohona furubo yeri mahamu emesuméri baha.
[6] Damu yoho soho dubuge busu-busu hamu osu-musuméri hohona. Hori yakenana, Pafos busu fikoyaha ékému ogahana. Ogahanaka, ékému yoho Yahudi nahu fe wou féri ukukuwoho ahu fani emesumahana de égéki emesumoho nahu égéki gebuuguna. Damu égé hate uku ahu-nabi ememere yahamu yoho. Damu éné fiki Bar-Yesus.
[7] Damu éné fi feki Yunani nahu yohona u féri Elimas ememere iri yohona. Damu égé mése soho dubuge ékému ahuhabang-gubernur énohogi kiri baha. Ahuhabang-gubernur éné fiki Sergius Paulus. Égé ukukuwoho esemu wayamu nafaméri baha. Damu égé Ala Yesus Éné sisi manggoho yofiyoho daha égéki dari nafamoné moho. Emohoni, égé yohoni, Barnabas damu Saulus yoho deri Yesus Éné sisi manggoho égéki yokukubumahana. Emohote, Elimas égé ahu ukuma yoho bake kefasuméri ansakuméri undoméri yoho. Damu ahuhabang-gubernur Yesus Éné sisi manggoho égéki dari nafaméri Yesus Énini fimiri bohon kiyoho ememere fimiriye bubutumu yori abusahagiyomoho.
[9] Emohote, Saulus éné fi feki katugo Paulus ememere iri yohona égé Ala Éné Ubana Hayo égéki ahukuni éri Elimas keroho etori éri
[10] égé bake utuhu haméri yoho, "Elimas, gu hohoi yohona ahuhabang Iblis gahakumu baha. Damu gu hanikéri ahu yoho bake yahamu yosumohoni ahu fe yoho haiyangne ememere fimiri kotoféyahana, damu keiyongkéri emesumoho. Damu ukukuwoho emu-hori-daha haiyangmu égena égéki abusahagiyomoho. Damu Nabo Yesus Éné sisi haiyangmu yokukubumériya égéki degemu yahamu yoho. Gu ememere yahamu yoho égéki menefé!
[11] Maha eta! Katugo nogoki Nugunabo Ala gu bake poréyahamu emoné. Damu gu kiyo posukiné. Emohoni, dakasuhumu gu sawa bumoho éné bung fani etohon deyoho," emiyoho. Damu hou aku sifuhuni Elimas éné kiyo ketanggini asukigi. Damu égé bero fefeyoméri hoho. Damu ahu éné bero tuhumu yeri ahanaméri aguguméri éyaha.
[12] Damu ahuhabang-gubernur Elimas égé ememere égé égéki etohoni, Saulus damu Barnabas yoho égé bake Nugunabo Yesus Éné sisi manggoho yokukubumahana égéki dari mokéri hanikéri éhéng ememere yori habang gonggongmoho. Emohoni, Yesus Énini fimiri baha.
[13] Damu Pafos ékému Paulus kumu énohogigiyoho kumu kotoféri kapal oguri Perga busu Pamfilia soho fikoyaha égé ékému hohona. Emohote, ékému Yohanes éné fi feki Markus égé yohoki mungguka, dakamu Yerusalem busu fikoyaha kumu hoho.
[14] Damu Perga ékému Paulus damu Barnabas musuri hori Antiokhia busu fikoyaha Pisidia soho égé ékému hohona. Damu Sawa-Sabat, Yahudi nahu gemu bahana éné sawa égéki yoho hori Yahudi nahu yohona sunafahang ékému osuri bahana.
[15] Damu ahu dukuméri bahana ékému ahu fe Musa Éné Buku ékému kara uwangki égéki etori u fikomu yohoni dagenaka, damu ahu fe ahu-nabi Ala Éné buku kara uwangkena égéki etori hamemere u fikomu yohoni dagena. Ememere yori feyahafunggunaka, ahuhabang Yahudi nahu yohona sunafahang ékému hafuféri etori bahana yoho ahu fe bake yohonani, égéte ogori Paulus damu Barnabas bake emiyoho, "Nabo, Paulus damu Barnabas, gugu akiya fe de éyongkumaka, nuguna akiya yori nuguna modu neriyané," ememere yoho.
[16] U ememere yoho égéki dagenaka, damu Paulus égésé méséri yoho u fani yohonan de éné akiya areyonan niye bero féri usuwamohoka, damu yori emiyoho, "Nané matahai Israel nahu yoho damu Yahudi nahu de yohote Ala Éné u dari Égé bake sembayang yeri Énaukungguna yohoniya, nané u narané!
[17] Anggo posuyahaki Israel nahu nuguna Ala mése nuguna yahae yohona fi iri kubumu yohoni, yohote Énahu kiri bakena. Damu yoho Mesir soho fikoyaha ékému ahu kefo kiri bahana égéki, Ala emohoni yoho gogo fikoyaha kiri bahana. Damu ékému bahana égéki Ala Éné habigiyo féri yohoki mahamu emoho, damu Égé emohoni yoho Mesir soho fikoyaha ékému musuri dahana.
[18] Damu yoho siyanto soho kumu sufébégé 40mu Ala Éné u fani darasumahana de poréyahamu bahana. Emohote, Ala Égé Éné modu dongkuni yohoki etori baha.
[19] Damu Ala ahu gogo fikoyaha birikuma-berahafi-ukuma (7) Kanaan soho kumu bahana yohoki homuuri uwahafungguka, soho égéki Israel nahu yoho bake kurohoni agiyoméri yakena. Ememere emakena soho égéki yohona soho kigi.
[20] Damu yohona soho kiri bahanani embahae sufébégé 450 moho. "Ememereya Kanaan soho agiyoméri feyahafunggunaka, Ala ahuhabang-hakim u efefeméri yori inggemusumahana yohoki kubumu yohoni, yohote Israel nahu yohoki hafuféri etori bahana. Ememereya embahae Ala ahu-nabi Samuel égéki kubumu yohoni, égéte ahu-nabi kiri Israel nahu yohoki hafuféri etori baha.
[21] Damu Samuel égé ememere baha égéki, Israel nahu yoho ahuhabang-raja yohoki hafuféri bohon niye Ala bake yosumahana. Emohoni, Ala Benyamin éné go bahana ékému Kis énamu Saul kubumu yohoni, Saul égéte ahuhabang-raja kiri bahani, embahae sufébégé 40 moho.
[22] Damu Ala yohoni Saul munggute, Daud égésé ahuhabang-raja kiri baha. Damu Ala Daud éné sisi égéki ememere yoho, 'Nu mése etori nafaméré Isai énamu Daud égé Nané modu hanikéré égéki emesuméri baha, damu Nané sifing fimiri égéki hamemere emesumoné,' emiyoho.
[23] "Damu nané matahai yohoniya, Ala mése Daud bake u yahamaki hamemere Daud éné go yoho égena ékému Ala Ahu fe Israel nahu nugu niye kubumu yohoni, Égéte deri nuguna dosa kemesumériya égéki tobunsuméri umburomoné. Damu Ahu nuguki umburomoné moho Égésé Yesus kéré.
[24] Damu Yesus Égé furubo fani yaha de égéki, ahu baptismusumoho nahu Yohanes mése Israel nahu emu-hori-daha yoho bake ememere yokukubumoho, 'Gugu dosa yahana égéki ukuni meneféyanéka, damu abuméri Ala bake deri Éné u dari bunané. Damu oho féri baptisnané,' ememere yokukubumoho.
[25] Ememere Yohanes éné furubo égéki age bofeyahafumoné moho égéki, égé ahu yoho bake abubamu yori emiyoho, 'Gugu fimahanani nusé menohosé re? Ala kubumu yohoni Ahuhabang kiri daha Égéki gugu kidabahanate, nu Égé deyoho. Égé awe nané mo defené. Égé esumu Éné habigiyo asuféri baha. Nu fani habigiyoméri Éné bégésabo yuhu fani abuwome deyoho,' emiyoho.
[26] "Nané matahai Israel nahu yohoniya, gugu nuguna yahae Abraham éné go kéré. Damu ahu fani Yahudi nahu de yohoniya, gugu fani Yesus Énini fimiri bahana deyohote, kamu Alani fimiri Éné u dari bahana. Gugu femu narané. Ala nuguna dosa tobunsuméri umburomoné moho éné u égéki Alasé ahu yoho bake yohoni, ahu yohote mése dagena.
[27] Emohote, Yerusalem nahu yoho damu yohona ahuhabang asuféri bahana yoho kotoféri Ala Yesus Égéki kubumu yohoni, Égéte Ahuhabang kiri deri nuguna dosa tobunsuméri umburomoné moho égéki fani nafamahana deyoho. Damu Sawa-Sabat hamu égena égéki ahu-nabi yoho Ahuhabang kiri deri nuguna dosa tobunsuméri umburomoné moho Éné sisi égéki kara uwangkena égéki ahu yohosé etori yohonate, yoho fani nafamahana deyoho. Ememere u emuméri bahanani, ahu énéyuhuwoho Yesus Égéki ugunani kunggu. U égéki ahu-nabi yoho mése u yakena hamemere katugo nogoki hamu hanéri haiyangmu égé.
[28] Damu yoho Éné u fe fani gebuuri Égé fani funané akumon deyohote, yoho Égé funané akumon niye esemu ahuhabang-gubernur Pilatus bake pempekungguna.
[29] "Damu ememere anggo posuyahaki ahu-nabi yoho kara uwangkena hamemere yoho Yesus bake emahanaka, damu ahu fe yoho Éné wosoho debahae-abufiya kumu aroméri damu Éné wosoho iyobégéto ékému asuri kufiyahanani égé.
[30] Ememere Égé kunggute, Ala emohoni Égé dakumu dotoho.
[31] Dakamu dotohoka, asu ihoho égéki Uku Éné murid Égé kotoféyahana yoho bake kibikukubumoho. Éné murid yohoki anggo feki Égé kotoféri Galilea soho fikoyaha ékému musuri bohori-bohori Yerusalem busu fikoyaha ékému ogakena yoho kéré. Damu Éné murid Yesus kibikukubumohoni yohona kiyomu etakena énéyuhuwoho katugo nogoki Yahudi nahu yoho bake Éné sisi égéki yosumahana.
[32] "Emohoni, katugo nogoki Barnabas kumu Paulus nu kumu u manggoho nogoki gugu bake éyoriya: Uku Ala mése Yahudi nahu nuguna yahae bake u yahamakiye.
[33] U yahamaki égéki Ala Yahudi nahu yohona go yoho kumu Yahudi nahu de yoho kumu ememere beriya nugu niye emohoni Yesus kuni dakamu dotoho kéré. Damu Ala u yahamaki égéki katugo hamu hanéri haiyangmu égé. Damu Ala Énamu bake u yoho nogoki Ala Éné Buku Mazmur ukumamu égé ékému Daud dari ememere kara uwangki: " 'Guki Namu kéré. Sawa nogoki ahu emu-hori-daha etori nafamahanani, Nu esumu Gabo kéré.' "
[34] Damu Ala yohoni Ahuhabang kiri daha Yesus Égé mése kuni ahu honubakigina ékému dakamu dotoho yaki, damu Éné aduwosoho sohoto womu kumu fani pahakigi deyoho. Ememere Ala Yesus bake emoho égéki anggo posuyaha nuguna yahae Yahudi nahu bake ememere yaki: " 'Nu gugu bake ukukuwoho esumu manggohokigi égéki kurahae, emohoni gugu etori nafaméri haiyangne ememere fimiri bohonané. Ukukuwoho esemu manggohokigi nogoki Nu mése ahuhabang-raja Daud bake u yahaméréké égé kéré.' "
[35] Damu Ala Éné Buku Mazmur fe ékému Ala kubumu yohoni Ahuhabang kiri daha Égé Ala bake u yoho égéki Daud égésé dari ememere kara uwangki: " 'Nu Gané furubo yeri Gané u dari emesuméré. Emohoni, Gu fani Nané aduwosoho fani modini ahu hosanggigina yoho hori kidabahanato ékému pahakin deyoho.'
[36] Damu Daud akumon de damu baki égé Ala Éné sifing fimiri emoné moho égéki hamemere emohoka, damu égé kuwangki. Damu égé soho kungguna égéki éné yahae soho kuwangkena ékému soho kungguna. Emohoni, éné wosoho ékému pahakigi.
[37] Emohote, Yesus Égé mése kunggute, Ala emohoni, Égé mése dakamu dotoho. Damu Éné wosoho sohoto womu kumu fani pahakigi deyoho.
[38] "Emohoni, nané matahai yohoniya, nugu gugu bake u yobuwoméri yohowané mériya égéki hate esumu nafanané: De kamu Yesus Égé kuni dakamu dotoho, nemohoni Ala nuguna dosa kemesumériya égéki tobunsumoho. Damu u égéki nugu gugu bake yobuwoméri yoriya:
[39] Yesus Égé emohoni, Ala ahu emu-hori-daha Yesus Énini fimiri bahana yohoki etori Nu awe yohona dosa tobunsuméri Nanahu kiri afe ememere fimoho. Emohote, ahu yoho pafufoméri Musa éné hukum dari hukum yohoto hamemere emesumahanani, Ala ahu énéyuhuwoho etori yohona dosa tobunsuméri Nanahu kiri afe fani ememere fimoho deyoho.
[40] Emoho nemohoni, gugu femu wayamu etohonané, nemohoni bagumu Ala ahu-nabi égena ékému fe bake u yoho égéki fani gugu wokumu éyon deyoho:
[41] Ahu-nabi Ala Éné u dari ememere kara uwangki: " 'Femu wayamu etohonané. Gugu Nané kara dari dirimeféri yohona nahu yohoniya, Gugu bahana nogoki Nu ukukuwoho fe gugu bake esumu eme. Damu Nu awe eme méré égéki, ahu yoho gugu bake ayoméri yohonate gugu fani haiyangne ememere fimahana deyoho. Emohoni, gugu awe habang gugubeméri damu soho nokumu aniginané.' "
[42] Ememere Paulus u yori feyahafungguka, damu Paulus kumu Barnabas kumu kotoféri Yahudi nahu yohona sunafahang ékému musuri ahanané bemahana égéki, ahu aburoho yoho yoho bake butumu tafe yori emiyohona, "Sawa-Sabat feniki, gugu u tomusu égéki dakumu yokukubunané," emiyohona.
[43] Damu yoho Yahudi nahu yohona sunafahang ékému musuri hohona égéki, Yahudi nahu aburoho yoho damu Yahudi nahu de yoho Yahudi nahu yoho Alani fimiri bahana égéki yoku hate hamemere Ala Éné modu hanikigi égéki emesumahana yoho Paulus kumu Barnabas kumu kotoféri hohona. Damu ahu-rasul ukuma yoho ahu énéyuhuwoho bake yokukubuméri damu hanggeramu emiyohona, "Gugu, Yesus emohoni, Ala Éné modu kuyomu woruméri nuguna dosa tobunsumoho égéki haiyangne ememere fimiri bunané," emiyohona.
[44] Sawa-Sabat feki mése daha. Sawa égéki mése ahu esumu aburoho busu fikoyaha ékému bahana yoho Nugunabo Yesus Éné sisi manggoho égéki areyonan niye deri dukumahana.
[45] Emohote, Yahudi nahu tuhuremu Yesus Énini fani fimiri bahana de yoho etahanani ahu aburoho yoho Paulus u yoho égéki areyonan niye dahana. Emohoni, yoho esumu modu kimahana. Damu Paulus yokukubumoho égéki yohosé ufuyori dirimeféri yohona.
[46] Emohote, Paulus damu Barnabas fani mokigina deyoho. Yoho habigiyoméri ahu énéyuhuwoho bake yori emiyahana, "Nugu Ala Yesus Éné sisi yofiyoho daha égéki Yahudi nahu gugu bake esumu yo horiya. Esumu yoriyate, gugu katugo nogoki Ala Yesus Éné sisi u yofiyoho daha égéki undomahana. Gugu ememere yori undomahana égéki guku guguki kubumahanani gugu fani habigiyoméri Ala kumu bohonané embahae posu-posukin deyoho. Emohoni, kageto nogoki guku damu bohonanéte, nugu kusumu musuri Yahudi nahu de yoho bake hori Yesus Éné sisi égéki yoho bake yohowané.
[47] Ala mése nugu bake yori emiyoho: " 'Nu guguki kubumu yoréni, gugu Nané sisi égéki awe Yahudi nahu de yoho bake yobuwoméri yohonané. Damu Nu ahu yohona dosa tobunsuméri umburome méré Nané sisi égéki gugusé ahu emu-hori-daha yoho bake soho tuhu ékému yo hori soho tuhu ékému yo ahanané.' "
[48] Sawa égéki Yahudi nahu de yoho u égéki dagenaka, yoho esemu hanikéri damu Nugunabo Yesus Éné sisi égéki dariyani esumu manggohokigi ememere aukungguna. Damu Ala ahu yoho Égé kumu bohonané embahae posu-posukéri bohonané mahana ememere yori inggemoho yohosé Nugunabo Yesus Éné sisi égéki dari haiyangne ememere fimiri bahana.
[49] Ememere ahu aburoho Yesus Énini fimiri bahana yoho yohona soho fikoyaha hamu égena ékému hohona. Damu yoho hohona égéki, Nugunabo Yesus Éné sisi égéki yo hohona.
[50] Emohote, Yahudi nahu asuféri bahana yoho Paulus damu Barnabas bake fani hanikigina deyoho. Emohoni, yoho ahu besing asuféri Antiokhia busu ékému bahana yoho bake yokungguna, damu hate yang asuféri beri fani Yesus Énini fimiri bahana deyohote, kamu Alani fimiri Éné u dari bahana yoho bake hate yokungguna. Yokunggunani, ahu énéyuhuwoho Yahudi nahu de yohote Paulus damu Barnabas bake poréyahamu emahanaka, damu soho ékému uwahafungguna.
[51] Emohoni, Paulus damu Barnabas yoho hohona égéki, yohona bégé féri soho égéki femusumahanani, Yahudi nahu asuféri bahana yoho awe etori ememere nafamenané: Yoho fani Ala Éné u hanikéri dagena deyoho, emohoni embahae Ala u nogoki efefeméri yoho bake poréyahamu emoné. Ememere Paulus damu Barnabas yoho yohona bégé féri soho égéki femusumahanaka, damu kusumu Ikonium busu fikoyaha ékému hohona.
[52] Damu ahu ukuma yoho busu fe hohonate, ahu Yesus Éné murid kiri Antiokhia ékému bahana yoho damu hanikéri bahana, damu Ala Éné Ubana Hayo yohoki damu afuri etori baha.