[1] Festus égé ahuhabang-gubernur kiri Kaisarea ékému okohoka, damu asu ukuma mohoka, yeya sawa égéki égé hori Yerusalem busu fikoyaha ékému ogoho.
[2] Damu hokumu ahu-imam yohona ahuhabang kumu Yahudi nahu yohona yeyoho matahai yoho kumu ememere ahuhabang-gubernur bake deri Paulus égé u degemu emoho ememere ditini yohona.
[3] Damu yoho ahuhabang-gubernur égé u fe emon niye égé bake u yahamu yori fisini yohona, "Nabo, gané tentara bake nouni, yoho Paulus yeri dakamu Yerusalem busu fikoyaha nokumu defenanéka, damu gusé nokumu éné u égéki efefeméri yori feyahafumoné." Yoho ememere yohona égéki mése fake ememere u kutumu yohona: Yoho yohonani ahu yahamuto yoho hori ahuhabang-gubernur éné tentara Paulus yeri yedi womu kumu defenané mahana ékému Paulus égéki funané akumoné ememere u kutumu yohona.
[4] Emohote, Festus utuhu hamoho, "Paulus égé uku damu Kaisarea busu kumu baha. Damu nu awe kakumu hokumu ahai.
[5] Emohoni, uku demoho, ahu asuféri beri ahu yohoki hafuféri bahana gugu kamukumamu nu kotoféri hokumu ahaiya. Emohoni, égé poréyahamu emoho égéki de éyongkumaka, yoho hokumu égé bake awe abubamenané," emiyoho.
[6] Damu Festus ememere uku damu Yerusalem busu fikoyaha ékému sawa birikuma-berahafi-ukumasiyo (8) baha rahamo sawa bibirikuma (10) rahamo ememere bahaka, damu égé dakumu Kaisarea busu ékému hoho. Hori yeya sawa kigini, égé u fe efefeméri yori inggemusumohoto ékému beri éné tentara yoho bake Paulus yeri égé bake defenan niye yoho.
[7] Damu sawa égéki Paulus afahang u kutumu yori inggemusumohoto ékému osugu égéki, Yahudi nahu Yerusalem busu fikoyaha ékému dahana yoho méséri aumukungguna. Damu yoho éné sama kumu u boduwe aburohomu ditini yohona. Emohote, yoho ukukuwoho makerahae gebuuri damu Paulus égé poréyahamu emoho égéki fani haiyangmu kubumahana deyoho.
[8] Emoho nemohoni, Paulus uku éniyoméri yori emiyoho, "Yahudi nahu yohona akiya yohona égéki nusé dari emesuméré. Damu nu Ala Éné Afahang ékému fani degemu poréyahamu eméré deyoho. Damu Roma nahu yohona ahuhabang-kaisar ahu hafuféri emoho égéki fani ansakuméri eméré deyoho."
[9] Emiyohote, Festus égé Yahudi nahu yohona modu afén niye égé Paulus bake abamu yoho, "Paulus, gu hanikéri dakumu Yerusalem busu fikoyaha ékému hori hokumu dukuméri u sisi emu-hori-daha ditini yohona égéki nusé efefeméri yori inggeme méré égéki hanikige?" ememere abamu yoho.
[10] Damu Paulus utuhu hamoho, "Emohote, nu fani Yerusalem busuyaha ékému ahai deyoho. Nu katugo méséri gané sama kumu bere. Damu Roma nahu yohona ahuhabang-kaisar guki kubumu yori gané na habigiyo kurohoni, nané u efefeméri égé. Gu nuki efefeméri yori inggemoné mohoto égéki nogo kéré. Nabo, nu fani Yahudi nahu yoho bake u koro waremu fe fani poréyahamu eméré deyoho ememere guku mése nafamoho.
[11] Gugu guguna kiyomu etahanani nu mése keiyongmu emekumaki, emohoni gugu Paulus égé esumu akumoné ememere nouwané. Nu awe aferahae. Mite, yoho nané u fani haiyangmu ditini yohonan dekumaki, ahu fe fani awe éné na habigiyo yeri nu yeri yoho bake kurohon deyoho. Emohoni, nu fisini yahaeni Roma nahu yohona ahuhabang-kaisar égésé nané u nogoki efefeméri yori inggemoné."
[12] Emiyohoni, Festus ahu akiya yosumahana yoho kumu kotoféri u nogoki kutumu yori feyahafunggunaka, damu égé utuhu hamoho, "Emohoni, guku yohoto hamemere Roma soho fikoyaha ékému hori ahuhabang-kaisar éné samamoné, nemohoni ahuhabang-kaisar égéte u nogoki efefeméri yori inggemoné," emiyoho.
[13] Asu yahamuto mohoka, ahuhabang-raja Agripa kumu énukuda yang éné fiki Bernike kumu ememere ahuhabang-gubernur Festus kageto fiyasumahana égéki gebuuri énaukumenan niye Kaisarea ékému ogohona.
[14] Ogori yoho hokumu bahana égéki asu yahamuto mahana. Damu Festus égé Paulus éné u égéki ahuhabang-raja bake ememere ayoméri yoho, "Nabo, nokumu Feliks égé ahuhabang-gubernur kiri baki égéki ahu fe bui womu kumu damu muwangki de baha.
[15] Nu damu Yerusalem busuyaha ékému hori bereké égéki, ahu-imam yohona ahuhabang yoho kumu Yahudi nahu yohona yeyoho matahai kumu ememere ahu nogoki Yahudi nahu yohona yahae akiya yoho égéki undoméri mése u keiyong aburohomu emoho ememere yohona. Emohoni, yoho nu bake yori emiyahana, 'Nabo, éné u efefeméri égé uri kufuna ememere yori inggenu.'
[16] Emohote, nu Yahudi nahu énéyuhuwoho bake utuhu ememere yoré, 'Roma nahu nugu ememere emesumériya: Ahu ditini yohonani baha égé fani homereyaha ahu ditini yohona yoho bake kurohowan deyoho. Dakasuhumu yohonani, ahu égé ahu fe ditini yohona yohona samaméri égé u feki emoho rahamo kara rahamo u égéki éniyomoné. Damu ahuhabang égé ahu éné u efefeméri yori inggemoné,' ememere Yahudi nahu yoho bake emiyoré.
[17] "Emohoni, Yahudi nahu Festus nané u égéki dagenaka, damu yoho nu kotoféri nokumu deriya. Emohoni, nu u nogoki yori feyahafumané mériya égéki fani yori undoméré deyoho. Damu yeya nu damu afahang u yori inggemusumahanato ékému osuri yoréni, nané tentara yoho Paulus égé yeri deri nané sama kumu kufiyahana.
[18] Emohote, Yahudi nahu énéyuhuwoho ahu égéki ditini yori yohonate, égé u keiyongkéri emoho égéki fani yohona deyoho. Nu fimiri égé ukukuwoho fani keiyongkéri emoho deyoho. Ememere fimiri hamemere égé u makerahae keiyongkéri emoho égéki fani égé deyoho.
[19] Emohote, éné u de ememere égena: Égé yohona yahae yokukubumahana égéki fani wayamu fimoho deyoho. Damu u feki ahu fe mése kunggu éné fiki Yesus Éné u kéré. Yesus Éné u égéki Paulus égésé yori emiyoho, 'Ahu égé dakumu dotoho.'
[20] Emoho nemohoni, u nogoki Yahudi nahu yohona u fe kéré, nemohoni Festus nu u nogoki makemere efefeme méré nogoki fani femu nafaméré deyoho. Emohoni, nu Paulus égé bake abamu emiyoré, 'Gu awe Yerusalem ékému ahainéka, damu hokumu gu ditini yohona égéki nusé efefeméri yori inggeme méré égéki hanikige?'
[21] Ememere abamu yoréte, Paulus égé u égéki undoméri fisini yoho, 'Karawoho, nu fani Yerusalem busuyaha ékému ahai deyoho. Dakasuhumu nu etori bunu. Damu nu bui womu kumu bahaeka, arohori ahuhabang-kaisar égé bahato ékému osuri égé bake atu. Atuka, égésé u nogoki efefeméri yori inggemoné,' emiyoho. Emohoni, nu yoréni bui kunggunani, etori bohonanéka, embahae nu awe égé kusumeni yeri ahuhabang-kaisar bake ahanané," ememere yori feyahafumoho.
[22] Damu Agripa égé dagika, Festus bake yori emiyoho, "Nu hate pumise Paulus éné u areye niye hanikéré." Emiyohoni, Festus égé utuhu hamoho, "Igirini, nabo gu awe éné u areyoné," emiyoho.
[23] Damu igirini, Agripa kumu énukuda Bernike kumu ememere afahang u efefeméri yori inggemusumahanato ékému dahanani, ahu yoho yohonaukumenan niye hanikéri wayamu emahana. Damu ahu-tentara asuféri bahana yoho kumu yeyoho matahai Kaisarea busuyaha ékému bahana yoho kumu kotoféri afahang u yori inggemusumahanato ékému osuguna. Ememere emahanaka, Festus égé ahu tentara tuhuremu yoho bake yohoni, yohote hori Paulus yeri afahang u efefeméri yori inggemenané mahanato ékému osuguna.
[24] Damu Festus yori emiyoho, "Nabo, ahuhabang-raja Agripa damu ahu tuhuremu nokumu deri dukumahana yohoniya, gugu ahu nogo etahané. Yahudi nahu Yerusalem busu bahana nahu kumu Kaisarea busu nokumu bahana yoho kumu ememere Yahudi nahu emu-hori-daha yoho kotoféri nu bake tinibiyakuni yori emiyahana, 'Ahu nogo fani modiyani uku damu bohon deyoho, esemu funané akumoné!'
[25] Emiyohonani, u fe keiyongmu emon kiyoho ememere fimiri ahu nogoki efefeméréte, u fe karawoho. Emohote, nu éné u efefeméré égéki, égé uku fisini yori emiyoho, 'Nané u nogoki Roma nahu yohona ahuhabang-kaisar égésé efefeméri yori inggemoné.' Ememere fisini yohoni, nu mése ahu-tentara yoho égé yeri ahuhabang-kaisar bake yeri ahanan niye yori inggeméré.
[26] Emohote, ahu nogo u fe fani keiyongmu emohoni, gebuuri ahuhabang-kaisar bake kara fani uni deyoho. Emohoni, nu yoréni, égé yeri dahanani, wadi damu nabo guguna sama kumu méséri égéni, damu gugu égé u yoho égéki narané. Nabo ahuhabang-raja Agripa gusé éné u nara. Nugu u abubaméri éné utuhu yohoné moho égéki areyowanéka, damu nu u makerahae awe ahuhabang-kaisar bake kara ungge méré égéki nafame.
[27] Damu nu fimiri ahu bui kuniya baha égé kusumeni ahuhabang-kaisar bake yeri ahanané mahana égéki, égé u fe keiyongmu emohoni ditini yohona égéki nusé fani kara uni kusumeni ahain dekumaka, u égéki fani haiyangmu égé deyoho."