[1] ལྟོས་ཤིག་དང་། གཙོ་བོ་ཡ་ཝཱེའི ཉིན་མོ་ནི་ཐོན་ལ་ཉེ་སྟེ། མི་ཡིས་ཁྱོད་ཀྱི་ནང་དུ་ཁྱོད་ཀྱི་བཅོམ་ནོར་བགོ་བར་འགྱུར་ཏེ།
[2] དེ་ཅིའི་ཕྱིར་ཞེ་ན། ཡེ་རུ་སཱ་ལེམ་དང་འཐབ་པའི་ཕྱིར་ངས་མི་རྒྱུད་ཐམས་ཅད་བསྡུ་བ་དང་། གྲོང་ཁྱེར་ནི་བཙན་གཟུང་བྱེད་པ་དང་། ཁང་པ་དག་ནི་འཕྲོག་པར་འགྱུར་ལ། བུད་མེད་རྣམས་ལ་བཙན་གཡེམ་བྱེད་པར་འགྱུར། ཡང་གྲོང་ཁྱེར་ནང་གི་མི་གྲངས་ཕྱེད་ཀ་ནི་བཙན་འཛིན་བྱེད་པར་འགྱུར་ལ། ཕྱི་ལུས་པ་དག་ནི་གྲོང་ཁྱེར་འདི་ནས་མེད་པར་མི་བྱའོ།།
[3] དུས་དེར་གཙོ་བོ་ཡ་ཝཱེ་ཕྱིར་ཕེབས་ཏེ། སྔོན་དམག་འཁྲུག་གི་དུས་ལ་ཁོང་གིས་འཐབ་པ་བཞིན་དུ། མི་རྒྱུད་དེ་རྣམས་དང་འཐབ་པར་འགྱུར།
[4] ཉིན་མོ་དེར། ཁོང་གི་ཞབས་ཡེ་རུ་སཱ་ལེམ་གྱི་ཁ་གཏད་ས་སྟེ། ཤར་ཕྱོགས་ཀྱི་སྐྱུ་རུ་ཤིང་གི་རི་བོ་རུ་བཞེངས་ནས། སྐྱུ་རུ་ཤིང་གི་རོ་བོ་འདི་དཀྱིལ་ནས་གས་ཤིང་། ཤར་ཕྱོགས་ནས་ནུབ་ཕྱོགས་བར་དུ་རབ་ཏུ་ཆེ་བའི་ལུང་པ་ཞིག་འཐོན་པར་འགྱུར། ཡང་རི་བོའི་ཕྱེད་ཀ་ནི་བྱང་ཕྱོགས་སུ་སྤོ་བ་དང་། ཕྱེད་ཀ་ལྷོ་ཕྱོགས་སུ་སྤོའོ།།
[5] ཡང་ཁྱོད་རྣམས་ནི་ངའི་ལུང་པ་རྒྱུ་ནས་བྲོས་ཤིག་དང་། དེ་ཅིའི་ཕྱིར་ཞེ་ན། ལུང་པ་དེ་ནི་ཨ་ཙེལ་བར་དུ་ཐོན་པ་དང་། ཇི་ལྟར་ཡ་ཧུ་དཱའི་རྒྱལ་པོ་ཨུ་ཟི་ཡཱའི་དུས་སུ་ས་འགུལ་ཆེན་པོ་ལས་བྲོས་པ་བཞིན་ཁྱོད་རྣམས་ནི་བྲོས་ཤིག་དང་། ཡང་ཡ་ཝཱེ་ངའི་དཀོན་མཆོག་ནི་ཕེབས་པར་འགྱུར་ལ། དམ་པ་ཀུན་ནི་ཁྱེད་དང་མཉམ་དུ་ཕེབས་པར་འགྱུར་རོ།།
[6] ཉིན་མོ་དེར། འོད་མེད་པ་དང་། གྲང་བ་དང་བ་མོ་ཡང་མེད་དེ།
[7] ཉིན་མོ་དེ་ནི་ཁྱད་པར་ཅན་གྱི་ཉིན་མོ་ཞིག་སྟེ། གཙོ་བོ་ཡ་ཝཱེས་མཁྱེན་ནོ།། ཉིན་མོ་དེ་ལ་ཉིན་དཀར་དང་མཚན་མོ་ཞེས་མི་བཀར་ཞིང་། གང་ལ་ཞེ་ན། མཚན་མོའི་དུས་སུ་འོད་དང་ལྡན་པར་འགྱུར་བའི་ཕྱིར།
[8] ཉིན་མོ་དེར། ཡེ་རུ་སཱ་ལེམ་ནས་གསོན་པོའི་ཆུ་ཐོན་ནས། དེའི་ཕྱེད་ནི་ཤར་རྒྱ་མཚོའི་ཕྱོགས་དང་ཕྱེད་ནི་ནུབ་རྒྱ་མཚོའི་ཕྱོགས་སུ་བཞུར་ཏེ་དབྱར་དགུན་གཉིས་པོར་དེ་ལྟར་རོ།།
[9] ཡང་གཙོ་བོ་ཡ་ཝཱེ་ནི་ས་གཞི་ཡོངས་ཀྱི་རྒྱལ་པོར་འགྱུར་ཞིང་། ཉིན་མོ་དེར་གཙོ་བོ་ཡ་ཝཱེ་ནི་ཁོ་ན་ཉིད་ཡིན་པ་དང་། ཁོང་གི་མཚན་ཡང་ཁོ་ན་ཉིད་ཡིན་པ་མི་ཐམས་ཅད་ཀྱིས་ཁས་ལེན་པར་འགྱུར།
[10] ཡུལ་ཐམས་ཅད་དེ། གེ་བཱ་ནས་ཡེ་རུ་སཱ་ལེམ་གྱི་ལྷོ་ན་ཡོད་པའི་མཁར་སྒོ་དང་ཉེ་བའི་བར་དུ། ཡོད་ཚད་ཐང་བདེ་རུ་འགྱུར་ཡང་། ཡེ་རུ་སཱ་ལེམ་ནི་ད་དུང་འགྱེང་ངེར་ལངས་པ་དང་། པེན་ཡཱ་མེན་གྱི་མཁར་སྒོ་ནས་རྒྱ་སྒོ་དང་པོའི་བར་དང་། གྲུ་གའི་རྒྱ་སྒོའི་བར་དུ་དང་། ཡང་ཧ་ནན་ཨེལ་གྱི་ཐོག་ཁང་ནས་རྒྱལ་པོའི་ཆང་གཞོང་བར་དུ་ཐམས་ཅད་རང་གནས་སུ་བསྡད་དོ།།
[11] གྲོང་ཁྱེར་ནང་དུ་ད་དུང་མི་འདུག་མཁན་ཡོད་པ་དང་། སླར་དེ་གཏོར་བའི་དམོད་མོ་མི་ཐེབས་པ་དང་། ཡེ་རུ་སཱ་ལེམ་གྱི་མི་སྡེ་ནི་བདེ་བླག་ངང་གནས་པར་འགྱུར།
[12] གཙོ་བོ་ཡ་ཝཱེས་ཡེ་རུ་སཱ་ལེམ་ལ་དམག་འདྲེན་པའི་མི་རྒྱུད་དག་ལ་རྡུང་བརྡེག་བྱེད་དུ་གནོད་འཚེ་དང་རིམས་ནད་མཛད་པ་ནི་འདི་སྟེ། དེ་དག་གི་རྐང་པ་གཉིས་ད་དུང་ས་ལ་འཛུགས་པའི་དུས་སུ་ཁོ་རྣམས་ཀྱི་ཤ་རུལ་བར་འགྱུར་ལ། དེ་དག་གི་མིག་རིལ་ཡང་མིག་ཁུང་དུ་རུལ་བར་འགྱུར་བ་དང་། དེ་དག་གི་ལྕེ་ཡང་ཁ་ནང་ནས་རུལ་བར་འགྱུར།
[13] དུས་དེར། གཙོ་བོ་ཡ་ཝཱེས་དེ་རྣམས་ལ་འཇིགས་སྣང་ཆེན་པོ་ཞིག་འབབ་པར་མཛད་དེ། ཁོ་རྣམས་རེ་རེས་ཕན་ཚུན་གྱི་ལག་པ་ནས་འཇུས་ཏེ། ལག་པ་ཡར་བཀྱགས་ནས་ཕན་ཚུན་ལ་རྒོལ་བར་འགྱུར།
[14] ཡ་ཧུ་དཱ་ཡང་ཡེ་རུ་སཱ་ལེམ་དུ་འཐབ་པར་འགྱུར་ཞིང་། མཐའ་འཁོར་གྱི་ཡུལ་ཁམས་ཀྱི་རྒྱུ་ནོར་ཐམས་ཅད་བསྡུས་ཏེ། གསེར་དང་། དངུལ་དང་། གོས་བཅས་ཤིན་ཏུ་མང་ངོ་།
[15] དེ་དང་དེ་བཞིན་དུ། གནོད་འཚེ་དང་རིམས་ནད་འདི་ལྟ་བུ་ནི་རྟ་དང་། དྲེའུ་དང་། རྔ་མོང་དང་། བོང་བུ་དང་དམག་སྒར་ན་ཡོད་པའི་དུད་འགྲོ་ཐམས་ཅད་ཀྱི་ཐོག་ཏུ་འཕོག་པར་འགྱུར།
[16] དེ་ནས་མི་རྒྱུད་ཐམས་ཅད་ཀྱི་ནང་ནས་ཡེ་རུ་སཱ་ལེམ་ལ་དམག་དྲངས་ནས་ཐར་བ་རྣམས། ལོ་རེ་རེ་བཞིན་དཔུང་ཚོགས་ཀྱི་ཡ་ཝཱེ་སྟེ་རྒྱལ་པོ་ལ་ཕྱག་འཚལ་བ་དང་། སྤྱིལ་བུའི་དུས་ཆེན་བསྲུང་དུ་ཡར་འོངས་སོ།།
[17] ཡང་ས་གཞིའི་མི་སྡེ་ཐམས་ཅད་ལས་སུ་ཞིག་གིས་དཔུང་ཚོགས་ཀྱི་ཡ་ཝཱེ་སྟེ་རྒྱལ་པོར་ཕྱག་འཚལ་དུ་ཡེ་རུ་སཱ་ལེམ་ལ་མི་འོང་བ་ཀུན་ལ་ཆར་ཆུ་མི་འབབ།
[18] གལ་ཏེ་ཨེ་ཅིབ་ཀྱི་མི་རིགས་རྣམས་ཡར་འོངས་ནས་དེར་མ་ཞུགས་ན། དེ་ནས་དེ་དག་ལའང་ཆར་བ་མི་འབབ་ཀྱི། འདི་ནི་གཙོ་བོ་ཡ་ཝཱེས་སྤྱིལ་བུའི་དུས་ཆེན་བསྲུང་དུ་མི་འོང་བའི་མི་རྒྱུད་རྣམས་ལ་བརྡེག་ནས་ཐེབས་པར་མཛད་པའི་གནོད་འཚེ་དང་རིམས་ནད་དོ།།
[19] འདི་ནི་ཨེ་ཅིབ་ཀྱི་ཆད་པ་དང་། སྤྱིལ་བུའི་དུས་ཆེན་བསྲུང་དུ་ཡར་མི་འོང་བའི་མི་སྡེ་ཐམས་ཅད་ཀྱི་ཆད་པའོ།།
[20] དུས་དེར། རྟ་རྣམས་ཀྱི་དྲིལ་བུའི་ཁར་ཡང་གཙོ་བོ་ཡ་ཝཱེ་ནི་དམ་པ་ལགས་ཞེས་པའི་ཡི་གེ་དང་། གཙོ་བོ་ཡ་ཝཱེའི་ཕོ་བྲང་གི་སླ་ང་དག་ནི་མཆོད་ཁྲིའི་མདུན་གྱི་མཆོད་པ་འབུལ་བྱེད་ཀྱི་ཕོར་བ་དང་འདྲ་སྟེ།
[21] དཔུང་ཚོགས་ཀྱི་ཡ་ཝཱེ་ནི་དམ་པ་ལགས་ཞེས་བརྗོད་ཕྱིར། ཡེ་རུ་སཱ་ལེམ་དང་ཡ་ཧུ་དཱའི་སླ་ང་ཐམས་ཅད་ཀྱང་བཀོལ་བར་འགྱུར་ཞིང་། མཆོད་པ་འབུལ་མཁན་ཐམས་ཅད་འོངས་ནས། སླ་ང་འདི་དག་བླངས་ནས། དེའི་ནང་དུ་མཆོད་བྱེད་ཀྱི་ཤ་བཙོའོ།། ཡང་ཉིན་མོ་དེར་དཔུང་ཚོགས་ཀྱི་ཡ་ཝཱེའི་ཕོ་བྲང་ནང་ན་ཚོང་པ་གང་ཡང་ཡོད་པར་མི་འགྱུར་རོ།།