[1] ངས་སླར་ཡང་མིག་བཏེག་ནས་བལྟས་པ་ན། རི་གཉིས་ཀྱི་བར་ནས་ཤིང་རྟ་བཞི་འཐོན་པ་མཐོང་སྟེ། རི་དེ་གཉིས་ནི་ལི་ཀྱི་རིའོ།།
[2] ཤིང་རྟ་དང་པོ་རྟ་སྐྱང་པོ་དང་། ཤིང་རྟ་གཉིས་པ་རྟ་ནག་པོ་དང་།
[3] ཤིང་རྟ་གསུམ་པ་རྟ་དཀར་པོ་དང་། ཤིང་རྟ་བཞི་པར་རྟ་ཁྲ་ཐིག་ཅན་རྣམས་སྒྲོག་སྟེ།
[4] ང་དང་གཏམ་བྱས་པའི་ཕོ་ཉ་དེ་ལ་ངས་འདི་ལྟར་དུ། ངའི་གཙོ་བོ་ལགས། འདི་དག་ཅི་ཡིན་ནམ་ཞེས་ཞུས་པ་དང་།
[5] ཕོ་ཉ་དེས་ངའི་ལན་དུ་འདི་སྐད་དུ། འདི་དག་ནི་གནམ་གྱི་རླུང་བཞི་པོ་དང་ཡང་ན་ཐུགས་ཉིད་བཞི་པོ་ཡིན་ཏེ། ས་གཞི་ཡོངས་ཀྱི་གཙོ་བོར་ཞབས་ཏོག་སྒྲུབ་པའི་དྲུང་ནས་ཐོན་པ་ཡིན།
[6] འཁོར་ལོ་སྒྲོག་པའི་རྟ་ནག་པོ་ཕྱིར་འཐོན་ནས་བྱང་ཕྱོགས་ཡུལ་དུ་འགྲོ་བ་དང་།འཁོར་ལོ་སྒྲོག་པའི་རྟ་དཀར་པོ་ཕྱིར་འཐོན་ནས་དེའི་རྗེས་དེད་ནས་ནུབ་ཕྱོགས་སུ་འགྲོ་བ་དང་། འཁོར་ལོ་སྒྲོག་པའི་རྟ་ཁྲ་ཐིག་ཅན་ཕྱིར་འཐོན་ནས་ལྷོ་ཕྱོགས་ཡུལ་དུ་འགྲོའོ།།
[7] རྔམ་བརྗིད་ཆེ་བའི་རྟ་འདི་རྣམས་ཕྱིར་ཐོན་ཏེ། ས་གཞི་ཡོངས་སུ་ཕྱིན་པར་རེ་བས། ཕོ་ཉ་དེས་འདི་སྐད་དུ། ཁྱོད་རྣམས་སོང་དང་། ས་གཞི་ཡོངས་སུ་ཕྱིན་ཞིག་ཅེས་གསུངས་པ་ན། དེ་རྣམས་ས་གཞི་ཡོངས་སུ་ཕྱིན་ནོ།།
[8] ཡང་ཁོང་གིས་ང་བོས་ཏེ་ང་ལ་འདི་སྐད་དུ། ལྟོས་ཤིག ཕྱིར་ཐོན་ཏེ་བྱང་ཕྱོགས་སུ་ཕྱིན་པ་དེ་དག་གིས། བྱང་ཕྱོགས་ཀྱི་གནས་སུ་ངའི་སེམས་ཀྱི་ཁྲོ་གཏུམ་ཆེན་པོ་ཞུ་བར་མཛད་ཅེས་གསུངས་སོ།།
[9] གཙོ་བོ་ཡ་ཝཱེའི་བཀའ་ནི་ང་ལ་བྱུང་སྟེ་འདི་སྐད་དུ།
[10] ཁྱོད་ཀྱིས་ཧེལ་དཱ་ཨི་དང་། ཏོ་བི་ཡཱ་དང་། ཡེ་དཱ་ཡའི་ལག་ནས་བཙོན་དུ་ཁྲིད་པའི་མི་རྣམས་ཀྱིས་ཕུལ་བའི་གསེར་དངུལ་དག་ལོངས་ཤིག་དང་། མི་དེ་དག་པཱ་པིས་ལུན་ནས་ཕྱིར་ལོག་གོ ། ཁྱོད་ནི་དེ་རིང་སོང་ནས། ཟེ་ཕན་ཡཱའི་བུ་ཡོ་ཤི་ཡཱའི་ཁྱིམ་དུ་ཞུགས་ཏེ།
[11] ཁྱོད་ཀྱིས་གསེར་དངུལ་འདི་དག་གིས་ཅོད་པན་ཞིག་བཟོས་ནས། ཡེ་ཧོ་ཙ་དག་གི་བུ་སྟེ་མཆོད་དཔོན་ཆེན་པོ་ཡོ་ཤུ་ཨའི་མགོར་སྐོན་ཤིག་དང་།
[12] དེ་ལ་འདི་སྐད་དུ་སྨྲོས་ཤིག དཔུང་ཚོགས་ཀྱི་ཡ་ཝཱེས་འདི་སྐད་དུ། ལྟོས་ཤིག མིང་ལ་དཱ་བིད་ཅེས་པའི་བུ་རྒྱུད་ཅིག་ཡོད་པ་དང་། དེ་ནི་རང་གི་གནས་ནས་དར་བར་འགྱུར་ལ། གཙོ་བོ་ཡ་ཝཱེའི་མཆོད་ཁང་ནི་བཞེང་བར་འགྱུར་བ་དང་།
[13] དེས་གཙོ་བོ་ཡ་ཝཱེའི་མཆོད་ཁང་བཞེངས་ཏེ། གཟི་བརྗིད་ཐོབ་པ་དང་། དེ་རྒྱལ་ཁྲིར་བཞུགས་ནས་རྒྱལ་སྲིད་སྐྱོང་ཞིང་། ཡང་རང་གི་རྒྱལ་ཁྲིར་མཆོད་དཔོན་དུ་འགྱུར་ཏེ། དེ་གཉིས་ཀྱི་ནང་དུ་ཞི་བདེའི་བཀའ་གྲོས་འབྱུང་བར་འགྱུར།
[14] ཅོད་པན་དེ་རྣམས་ནི་གཙོ་བོ་ཡ་ཝཱེའི་མཆོད་ཁང་ནང་གི་ཧེལ་དཱ་ཨི་དང་། ཏོ་བི་ཡཱ་དང་། ཡེ་དཱ་ཡ་དང་། ཟེ་ཕན་ཡཱའི་བུ་ཧེན་བཅས་ལ་དྲན་རྟེན་དུ་སྟེར་རོ།།
[15] ཡང་གཙོ་བོ་ཡ་ཝཱེའི་མཆོད་ཁང་བཞེང་དུ་རྒྱང་རིང་གི་མི་རྣམས་འོངས་ན། དེ་ནས་ཁྱོད་ཅག་གིས་ང་ནི་དཔུང་ཚོགས་ཀྱི་ཡ་ཝཱེས་ཁྱོད་རྣམས་ཀྱི་རྩར་མངགས་པ་རྟོགས་པར་འགྱུར་ལ། ཇི་སྟེ་ཁྱོད་ཅག་གིས་ཡ་ཝཱེ་ཁྱོད་ཀྱི་དཀོན་མཆོག་གི་གསུངས་ལ་གཟབ་གཟབ་ངང་ཉན་ན། དེ་བཞིན་དུ་འགྲུབ་པར་འགྱུར་ཞེས་གསུངས་སོ།།