[1] ཀྱེ་ལེ་བ་ནོན། མེ་ཡིས་ཁྱོད་ཀྱི་ཐང་ཤིང་བསྲེག་པའི་ཕྱིར་རང་གི་སྒོ་རྣམས་ཕྱེས་ཤིག
[2] ཀྱེ་གསོམ་ཤིང་ལགས། མྱ་ངན་བྱོས་ཤིག དེ་ཅིའི་ཕྱིར་ཞེ་ན། ཐང་ཤིང་རྣམས་ལོག་པ་དང་། རྔམ་བརྗིད་ཆེ་བའི་སྡོང་པོ་རྣམས་བརླགས་སོ།། ཀྱེ་པཱ་ཤན་གྱི་བེ་ཤིང་རྣམས། མྱ་ངན་བྱོས་ཤིག དེ་ཅིའི་ཕྱིར་ཞེ་ན། ནགས་ཚལ་སྟུག་པོ་དག་བཅད་པའི་ཕྱིར།
[3] ལུག་རྫི་རྣམས་ཀྱིས་མྱ་ངན་འདོན་པའི་སྐད་ལ་ཉོན་ཞིག་དང་། གང་ལ་ཞེ་ན། དེ་དག་གི་ཡིད་དུ་འོང་བའི་རྩྭ་ཐང་རྣམས་བརླགས་པའི་ཕྱིར། ཡང་དར་བབ་སེང་གེའི་ང་རོ་འདོན་པའི་སྒྲ་ལ་ཉོན་ཞིག གང་ལ་ཞེ་ན། ཡོར་དན་གཙང་འགྲམ་གྱི་ནགས་ཚལ་རྣམས་བརླགས་པའི་ཕྱིར།
[4] ཡ་ཝཱེ་ངའི་དཀོན་མཆོག་གིས་འདི་སྐད་དུ། ཁྱོད་རྣམས་ཀྱིས་བཤའ་བར་འགྱུར་བའི་ལུག་ཁྱུ་འདི་འཚོས་ཤིག
[5] ལུག་ཁྱུ་ཉོ་མཁན་དག་གིས་དེ་རྣམས་བཤས་ཀྱང་། སྡིག་པར་མི་བརྩི་ཞིང་། ལུག་ཁྱུ་བཙོང་མཁན་དག་གིས་ན་རེ། གཙོ་བོ་ཡ་ཝཱེ་ནི་བསྟོད་པར་འོས་ཏེ། གང་ལ་ཞེ་ན། ང་ནི་ཕྱུག་པོར་གྱུར་ཏོ།། ཞེས་ལུག་ཁྱུའི་ལུག་རྫི་ཡིས་དེ་ལ་སྙིང་མ་རྗེའོ།།
[6] དེ་བས་ངས་ཀྱང་གནས་འདིའི་མི་སྡེ་ལ་སྙིང་རྗེ་བར་མི་འགྱུར་རོ་ཞེས་གཙོ་བོ་ཡ་ཝཱེས་གསུངས། ལྟོས་ཤིག ངས་དེ་དག་རེ་རེ་ནི་དེའི་ཁྱིམ་མཚེས་དང་རྒྱལ་པོའི་ལག་ཏུ་གཏོད་ཅིང་། དེ་དག་གིས་གནས་འདི་བརླག་པར་འགྱུར་བ་དང་། ངས་ཀྱང་གནས་འདིའི་མི་སྡེ་ནི་དེ་དག་གི་ལག་ནས་ཐར་དུ་མི་སྐྱོབ་བོ།།
[7] དེ་ལྟར་ངས་བཤའ་ལུག་དེ་རྣམས་སམ། ལུག་ཁྱུ་ནང་གི་ཉམ་ཐག་པ་རྣམས་འཚོ་བར་ཁྱེར་ཏེ། ངས་དབྱུག་པ་གཉིས་བླངས་ནས། གཅིག་གི་མིང་ལ་དྲིན་གྱིས་སྐྱོང་བ་དང་། གཞན་དེ་ལ་ལྷན་འབྲེལ་ཞེས་བཏགས་ཤིང་། དེ་ནས་ངས་ལུག་ཁྱུ་འཚོས་པ་དང་།
[8] ཟླ་གཅིག་གི་ནང་དུ་ངས་ལུག་རྫི་གསུམ་གྱི་སྲོག་བཅད་དེ། ངའི་སེམས་ནས་དེ་དག་ལ་སུན་སྣང་སྐྱེ་ཞིང་། དེ་དག་གིས་ཀྱང་ང་ལ་ཞེན་ལོག་གོ །
[9] དེ་ནས་ངས་འདི་ལྟར་དུ། ངས་ཡང་བསྐྱར་ཁྱོད་རྣམས་འཚོ་བར་མི་འགྱུར་ཏེ། འཆི་བར་འགྱུར་བ་དེ་འཆི་བར་གྱུར་ཞིག མེད་པར་འགྱུར་བ་དེ་མེད་པར་གྱུར་ཞིག་དང་། ཕྱི་ལུས་རྣམས་ནི་གཅིག་ཤ་གཅིག་གིས་ཕན་ཚུན་ཟ་རུ་ཆུགས་ཤིག
[10] དེ་ནས་མི་རྒྱུད་ཐམས་ཅད་དང་བཞག་པའི་ཞལ་ཆད་དེ་གཅོག་པའི་ཕྱིར་དུ། ངས་རང་གི་དྲིན་གྱིས་སྐྱོང་བའི་དབྱུག་པ་ཞེས་པ་དེ་ཡར་བླངས་ནས་བཅག
[11] ཞལ་ཆད་དེ་ནི་ཉིན་མོ་དེར་སྤང་བ་དང་། དེ་ལྟར་ང་ལ་བསྒུག་པའི་ལུག་ཁྱུ་ཉམ་ཐག་པ་རྣམས་ཀྱིས་དེ་ནི་གཙོ་བོ་ཡ་ཝཱེའི་བཀའ་ཡིན་པ་རྟོགས་པར་འགྱུར།
[12] ངས་དེ་དག་ལ་འདི་ལྟར་དུ། ཁྱོད་རྣམས་ཀྱིས་ལེགས་པར་འདོད་ན། ང་ལ་གླ་ཕོག་བྱིན་ཞིག་ལ། དེ་ལྟར་མིན་ན་དོན་དེ་སྐྱུར་རོགས་ཞེས་སྨྲས་པ་ལས། དེ་དག་གི་ངའི་གླ་རུ་དངུལ་སུམ་བཅུ་བཅལ་ཏོ།།
[13] དུས་དེར། གཙོ་བོ་ཡ་ཝཱེས་ང་ལ་འདི་སྐད་དུ། ཁྱོད་ཀྱིས་དངུལ་དེ་དག་ནི་རྫ་བཟོ་ལ་སྤྲོད་ཅིག དངུལ་དེ་དག་ནི་ཁོ་ཚོས་ང་ལ་དབབ་བར་འོས་པར་འདོད་པའི་རིན་མཐོན་པོ་ལགས་ཅེས་གསུངས་པ་དང་། ངས་དངུལ་སུམ་ཅུ་དེ་ཁྱེར་ནས། གཙོ་བོ་ཡ་ཝཱེའི་ཕོ་བྲང་དུ་རྫ་བཟོ་ལ་སྤྲད་དོ།།
[14] ཡང་ཡ་ཧུ་དཱ་དང་ཡེས་ར་ཨེལ་གཉིས་ཀྱི་སྤུན་འབྲེལ་གཅོད་པའི་ཕྱིར་དུ། མིང་ལ་ལྷན་འབྲེལ་ཞེས་པའི་དབྱུག་པ་གཞན་དེ་ངས་བཅག་གོ །
[15] ཡང་གཙོ་བོ་ཡ་ཝཱེས་ང་ལ་འདི་སྐད་དུ། ཁྱོད་སོང་ནས་ལུག་རྫི་བླུན་རྨོངས་ཅན་གྱི་ལག་ཆ་ཁྱེར་ཤོག་ཅིག
[16] གང་ལ་ཞེ་ན། ངས་གནས་འདི་རུ་ལུག་རྫི་ཞིག་དར་བར་བྱ་སྟེ། འཆི་ཉེ་བ་དེ་དག་ལ་ཁོང་གིས་གཟིགས་སྐྱོང་མི་མཛད་ཅིང་། ཁ་འཐོར་དུ་སོང་བ་དེ་དག་ཁོང་གིས་མི་འཚོལ་ཞིང་། རྨས་པར་གྱུར་བ་དེ་དག་ཁོང་གིས་མི་གསོ་ཞིང་། སྟོབས་ཤུགས་ལྡན་པ་རྣམས་ཁོང་གིས་མི་འཚོ་ལ། ཡིན་ཡང་ཁོང་གིས་ལུག་ཤ་རྒྱགས་པོ་ཟ་ཞིང་། དེ་དག་གི་རྨིག་པ་བཤིག་པར་འགྱུར།
[17] ལུག་ཁྱུ་དོར་བ་དང་ཕན་མི་ཐོག་པའི་ལུག་རྫི་དེ་ནི་བཀྲ་མི་ཤིས། དེའི་དཔུང་པ་དང་མིག་གཡས་པའི་ཁར་རལ་གྲི་འཕོག་གྱུར་ཞིག དེའི་དཔུང་རྩ་བསྐམ་ཞིང་། མིག་གཡས་པ་དེ་ཡོངས་སུ་ལོང་བར་གྱུར་ཞིག་ཅེས་གསུངས་སོ།།