[1] གཙོ་བོ་ཡ་ཝཱེས་ཟུར་དུ་འདི་ལྟར་བསྟན་པས། གཙོ་བོ་ཡ་ཝཱེའི་བཀའ་མཆིད་དེ་ཧད་རག་ཡུལ་གྱི་དཱ་མེ་སེག་ལ་བྱུང་སྟེ། མིའི་བུ་རྣམས་དང་ཡེས་ར་ཨེལ་གྱི་མི་སྡེ་ཀུན་གྱི་མིག་གཙོ་བོ་ཡ་ཝཱེའི་ཕྱོགས་སུ་བལྟས་སོ།།
[2] ཡང་དཱ་མེ་སེག་གི་ས་མཚམས་ཀྱི་ཧ་མཱད་དང་། ཐཱར་དང་། ཚི་ཏུན་གསུམ་པོ་ཤིན་ཏུ་མཁས་ཀྱང་དེ་དག་གི་ཐོག་ཏུ་བྱུང་སྟེ།
[3] ཐཱར་གྱིས་རང་གི་ཕྱིར་དུ་མཁར་བཙན་པོ་བརྩིགས་ཏེ། བྱེ་མ་བཞིན་དུ་དངུལ་སྤུངས་ཏེ། སྲང་ལམ་གྱི་ས་འདམ་བཞིན་དུ་གསེར་བཙོ་མ་ཉར་ཚགས་བྱས་སོ།།
[4] ཡིན་ཡང་ལྟོས་ཤིག གཙོ་བོས་དེའི་ཡོད་ཚད་བཅོམ་ནས། དེའི་རྒྱ་མཚོའི་སྟེང་གི་སྟོབས་ཤུགས་གཏོར་བ་དང་། དེ་ནི་མེ་ཡིས་ཁྱུར་མིད་དུ་གཏོང་བར་འགྱུར།
[5] ཨས་ཀ་ལོན་གྱིས་དེ་མཐོང་ན་དངང་སྐྲག་ཅིང་། གཱ་ཟཱས་དེ་མཐོང་ནས་རབ་ཏུ་སྡུག་བསྔལ་ཞིང་། ཨེག་རོན་གྱིས་རེ་བ་ཤོར་ནས་ངོ་ཚ་བར་འགྱུར་ཏེ། གཱ་ཟཱའི་རྒྱལ་རྒྱུད་ཆད་པར་འགྱུར་ལ། ཨ་ཤཱ་ཀེ་ལོན་དུ་མི་འདུག་མཁན་མེད།
[6] དེ་ནས་འདྲེས་པའི་མི་རིགས་དག་ཨ་སི་དོད་ཏུ་གནས་པར་འགྱུར་བ་དང་། ཡང་ངས་ཕེ་ལེ་ཤེད་པའི་ང་རྒྱལ་མེད་པར་བྱའོ།།
[7] ངས་དེའི་ཁ་ནང་གི་ཁྲག་དང་། དེའི་སོ་བར་གྱི་ཞེན་ལོག་གི་རྫས་ཐམས་ཅད་མེད་པར་བྱ་སྟེ། ལྷག་པར་གྱུར་བའི་མི་ནི་ངེད་ཀྱི་དཀོན་མཆོག་ལ་གཏོགས་ཤིང་། དེ་ནི་ཡ་ཧུ་དཱའི་མི་རིགས་ཞིག་དང་འདྲ་བར་འགྱུར་ལ། ཨེག་རོན་ནི་ཡེ་བུ་སི་པ་དང་འདྲ་བར་འགྱུར།
[8] ངས་རང་གི་ཡུལ་གྱི་མཐའ་འཁོར་དུ་དམག་སྒར་བཙུགས་ཏེ། དགྲ་པོའི་དམག་ནི་ཕར་ཚུར་རྒྱུ་བ་དང་། བརྙས་བཅོས་དང་གཉའ་གནོན་བྱེད་མཁན་གྱིས་ངའི་མི་སྡེ་ལ་བཙན་གནོད་བྱ་བར་མི་འཇུག་གོ ། དེ་ཅིའི་ཕྱིར་ཞེ་ན། ད་ངས་དེ་དག་ལ་དངོས་སུ་གཟིགས་པའི་ཕྱིར།
[9] ཀྱེ་ཛ་ཡན་གྱི་བུ་མོ་ལགས་རབ་ཏུ་དགའ་ཞིག ཀྱེ་ཡེ་རུ་སཱ་ལེམ་གྱི་བུ་མོ་ལགས་དགའ་འབོད་བྱོས་དང་། ལྟོས་ཤིག ཁྱོད་ཀྱི་རྒྱལ་པོ་ཁྱོད་ཀྱི་དྲུང་དུ་འོངས་ཏེ། ཁོང་ནི་བདེན་པ་ཉིད་དང་། རྒྱལ་ཁ་ཐོབ་པ་དེ་ལགས། ཡང་ཁོང་ནི་ཞི་འཇམ་པ་དང་། ཁོང་ནི་བོང་བུར་བཞོན་ནས། བོང་ཕྲུག་ཅིག་ལ་བཞོན་ནོ།།
[10] ངས་ཨེ་ཕཱར་ཡིམ་ལས་ཤིང་རྟ་དང་། ཡེ་རུ་སཱ་ལེམ་ལས་དམག་རྟ་མེད་པར་བྱ་སྟེ། དམག་གཞུ་གཅག་པར་འགྱུར་བ་དང་། ཁོང་གིས་མི་སྡེ་རྣམས་ལ་ཞི་བདེ་བསྒྲག་ཤིང་། ཁོང་གི་སྲིད་དབང་ནི་རྒྱ་མཚོ་འདི་ལས་རྒྱ་མཚོ་གཞན་བར་དུ་དང་། ཕ་རཱད་གཙང་པོ་ནས་ས་མཐའི་བར་དུ་འཐོན་པར་འགྱུར།
[11] ཀྱེ་ཛ་ཡན་ལགས། ཁྱོད་རང་ནི། ངས་ཁྱོད་དང་བཞག་པའི་ཞལ་ཆད་ཀྱི་ཁྲག་ལ་བརྟེན་ནས། ཁྱོད་ཀྱི་བཙོན་པ་རྣམས་ཆུ་མེད་པའི་དོང་ལས་ངས་བསྒྲལ་ཏོ།།
[12] ཀྱེ་ཁྱོད་ཅག་བཙོན་ལ་ཁྲིད་ཀྱང་ད་དུང་རེ་བ་ཡོད་པའི་མི་རྣམས་ལགས། མཁར་བཙན་པོའི་ཕྱོགས་སུ་ལོག་ཅིག དེ་རིང་ཁྱོད་ལ་ལྡབ་ཀྱིས་ཁ་གསབ་གཏོང་བར་འགྱུར་ཞེས་ངས་བསྒྲགས་སོ།།
[13] ངས་ཡ་ཧུ་དཱ་ནི་ངའི་ལག་གི་འཐེན་པའི་གཞུ་བྱ་སྟེ། ཨེ་ཕཱར་ཡིམ་ནི་ངའི་གཞུ་ནང་གི་མདའ་བྱའོ།། ཀྱེ་ཛ་ཡན་ལགས། ངས་ཁྱོད་ཀྱི་བུ་དག་སློང་བར་བྱས་ཏེ། གྷི་རི་སི་ཡི་བུ་རྣམས་རྒོལ་བར་འགྲོ་ཞིང་། ངས་ཀྱང་ཁྱོད་ནི་དཔའ་པོའི་རལ་གྲི་བཞིན་འགྱུར་བར་བྱའོ།།
[14] གཙོ་བོ་ཡ་ཝཱེ་ནི་ཉིད་ཀྱི་མི་སྡེ་སྟེང་དུ་མངོན་པར་འགྱུར་ལ། ཁོང་གི་མདའ་ནི་གློག་འཁྱུག་པ་བཞིན་ཕྱིར་འཐོན་པར་འགྱུར་ཞིང་། གཙོ་བོ་ཡ་ཝཱེས་རྒྱ་དུང་འབུད་ཅིང་། ལྷོ་ཕྱོགས་ཀྱི་དྲག་རླུང་དང་བཅས་གཤེགས་པར་འགྱུར།
[15] དཔུང་ཚོགས་ཀྱི་ཡ་ཝཱེས་དེ་རྣམས་བསྲུངས་ཏེ། དེ་རྣམས་ཀྱིས་འུར་རྡོ་ཡིས་ཁྱུར་མིད་འཕངས་ཏེ་དགྲ་པོ་འདུལ་བ་དང་། དེ་དག་གིས་ཁྲག་འཐུང་ཞིང་། ཀུ་ཅོ་སྒྲོག་པ་ནི་ཆང་གིས་བཟི་བ་དང་འདྲ། དེ་དག་ནི་མཆོད་པ་འབུལ་དུས་ཀྱི་ཕོར་བ་ནང་ལ་ཁྲག་གིས་བཀང་བ་བཞིན། ཡང་མཆོད་ཁྲིའི་གྲུ་ལ་ཁྲག་གིས་བཀང་བ་བཞིན།
[16] ཉིན་དེར། ཡ་ཝཱེ་སྟེ་ཁོ་ཚོའི་དཀོན་མཆོག་གིས་ལུག་ཁྱུ་བཞིན་དུ་ཁོང་གི་མི་སྡེ་སྐྱོབ་ཅིང་། དེ་ཅིའི་ཕྱིར་ཞེ་ན། དེ་དག་ནི་ཅོད་པན་ཐོག་གི་ནོར་རྡོ་བཞིན་ཁོང་གི་ས་གཞི་རུ་འོད་འཕྲོས་པར་འགྱུར།
[17] དེ་དག་ནི་ཅི་འདྲའི་ལེགས་ཤིང་། ཅི་འདྲའི་ཡིད་དུ་འོང་བ་ཡིན་ནམ། འབྲུ་རིགས་སྣ་ལྔ་དང་ཆང་གསར་གྱིས་བུ་མོ་དང་གཞོན་ནུ་རྣམས་ལ་དཔལ་ཡོན་རྒྱས་པར་གྱུར་ཏོ།།