[1] དེ་ནས་རྒྱལ་པོ་དར་ཡཱའི་ལོ་བཞི་པའི་ཟླ་དགུ་པ་སྟེ། གེ་སཱི་ལེ་བྱ་བའི་ཟླ་དགུ་པའི་ཚེ་བཞི་པ་ལ་གཙོ་བོ་ཡ་ཝཱེའི་བཀའ་ནི་ཟཱ་ཀར་ཡ་ལ་བྱུང་སྟེ།
[2] དུས་དེར་པེད་ཨེལ་པས་ཤར་ཨེ་ཟེར་དང་། རེ་གེམ་མེ་ལེག་དང་དེའི་རྗེས་འབྲངས་པ་རྣམས་ནི། གཙོ་བོ་ཡ་ཝཱེས་བྱིན་རླབས་གནང་བར་ཞུ་བར་མངགས་ཤིང་།
[3] དེ་དག་གིས་དཔུང་ཚོགས་ཀྱི་ཡ་ཝཱེའི་ཕོ་བྲང་གི་མཆོད་དཔོན་རྣམས་ལ་དྲིས་ཤིང་། ད་དུང་མཆོད་དཔོན་དག་གིས་ན་རེ། ངེད་ཅག་གིས་ཟླ་ལྔ་པར་མྱ་ངན་བྱས་ཏེ་སྨྱུང་གནས་བསྲུངས་པ་དང་། ལོ་འདི་མང་པོ་བཞིན་ངེད་རྣམས་ཀྱིས་སྤྱད་པ་བཞིན་བྱེད་དམ།
[4] དཔུང་ཚོགས་ཀྱི་ཡ་ཝཱེའི་བཀའ་ནི་ང་ལ་བྱུང་སྟེ་འདི་སྐད་དུ།
[5] ཁྱོད་ཀྱིས་ཡུལ་འདིའི་མི་ཀུན་དང་མཆོད་དཔོན་རྣམས་ལ་འདི་ལྟར་སྦྲོན་ཞིག ལོ་བདུན་ཅུའི་རིང་ལ། ཁྱོད་རྣམས་ཀྱིས་ཟླ་ལྔ་པ་དང་བདུན་པའི་ནང་དུ་མྱ་ངན་བྱས་ཏེ་སྨྱུང་གནས་བསྲུངས་པ་དེ་ནི། དངོས་ནས་ངའི་ཆེད་དུ་སྨྱུང་གནས་བསྲུངས་པ་ཡིན་ནམ།
[6] ཁྱོད་རྣམས་ཀྱིས་ཟ་ཞིང་། ཁྱོད་རྣམས་ཀྱིས་འཐུངས་པ་ནི། ཁྱོད་རྣམས་རང་གི་ཕྱིར་ཟ་བ་དང་། ཁྱོད་རྣམས་རང་གི་ཕྱིར་དུ་འཐུངས་པ་མ་ཡིན་ནམ།
[7] གཏམ་འདི་དག་ནི་གཙོ་བོ་ཡ་ཝཱེས་སྔ་མའི་ལུང་སྟོན་པ་དག་རྒྱུ་སྟེ་བསྒྲགས་པ་མ་ཡིན་ནམ། དུས་དེར། ཡེ་རུ་སཱ་ལེམ་དང་མཐའ་འཁོར་གྱི་གྲོང་ཁྱེར་རྣམས་སུ་མི་གནས་ཤིང་ཤིན་ཏུ་དར་བ་དང་། ནེ་གུབ་ཡུལ་དང་མཐོ་སར་ཡང་གནས་མཁན་ཡོད་དོ་ཅེས་གསུངས་སོ།།
[8] ཡང་གཙོ་བོ་ཡ་ཝཱེའི་བཀའ་ནི་ཟཱ་ཀར་ཡ་ལ་བྱུང་སྟེ་འདི་སྐད་དུ།
[9] སྔོན་ན་དཔུང་ཚོགས་ཀྱི་ཡ་ཝཱེས་ཁྱོད་ཅག་གི་མེས་པོ་དག་ལ་འདི་སྐད་དུ། ཁྱོད་རྣམས་ཀྱིས་ཁྲིམས་དྲང་པོར་སྤྱོད་ཅིག མི་རེ་རེས་རང་གི་སྤུན་ཟླ་ལ་བྱམས་དང་སྙིང་རྗེ་ཡིས་སྐྱོངས་ཤིག
[10] ཡུགས་མོ་དང་། དྭ་ཕྲུག་དང་། བྱེས་སུ་སྡོད་པའི་མི་དང་དབུལ་པོ་དག་ལ། ཁྱོད་རྣམས་ཀྱིས་བརྙམ་བཅོས་དང་གཉའ་གནོན་བྱེད་མི་རུང་ལ། ཡང་རེ་རེའི་སེམས་སུ་དོན་ངན་སྤྱོད་པར་ལྐོག་ཇུས་བྱས་ནས། རང་གི་སྤུན་ཟླར་ཉེས་འགེལ་མ་བྱེད་ཅིག་ཅེས་གསུངས་སོ།།
[11] ཡིན་ཡང་དེ་དག་གིས་མི་ཉན་པ་ལས། ད་དུང་རེངས་པོར་བྱས་ཏེ། རྣ་བ་བཀག་ནས་མི་ཉན་པ་དང་།
[12] དེ་དག་གིས་རང་གི་སེམས་རྒྱུད་ནི་རྡོ་རྗེ་ཕ་ལམ་ལྟར་སྲ་བར་བྱས་ཤིང་། བཀའ་ཁྲིམས་དང་དཔུང་ཚོགས་ཀྱི་ཡ་ཝཱེས་ཉིད་ཀྱི་ཐུགས་ཉིད་དང་། སྔ་མའི་ལུང་སྟོན་པ་དག་རྒྱུ་ནས་གསུངས་པའི་བཀའ་ལ་མ་ཉན་པས། དཔུང་ཚོགས་ཀྱི་ཡ་ཝཱེའི་ཐུགས་ཤིན་ཏུ་ཁྲོས་པར་གྱུར་ཏོ།།
[13] སྔོན་ན་ངས་དེ་དག་བོས་ཀྱང་། དེ་དག་གིས་མི་ཉན་པ་བཞིན་དུ། མ་འོངས་པར་དེ་དག་གིས་ང་ལ་ཞུའང་། ངས་ཀྱང་མི་ཉན་ཏོ་ཞེས་དཔུང་ཚོགས་ཀྱི་ཡ་ཝཱེས་གསུངས་སོ།།
[14] ངས་འཁྱིལ་རླུང་གིས་དེ་དག་ནི་ཁོ་ཚོས་ངོ་མི་ཤེས་པའི་ཡུལ་ཁམས་ཀུན་ཏུ་གཏོར་ཞིང་། དེ་དག་གིས་ལུས་པའི་ཡུལ་ནི་སྟོངས་སུ་གྱུར་ཏེ། ཐ་ན་སུའང་འགྲོ་འོང་བྱས་ཏེ་མི་རྒྱུ་པ་དང་། དེ་ཅིའི་ཕྱིར་ཞེ་ན། དེ་དག་གིས་ཡིད་དུ་འོང་བའི་ཡུལ་དེ་སྟོངས་སུ་བཅུག་པའི་ཕྱིར་རོ།།