[1] དེ་ནས་ངས་སླར་ཡང་མིག་བཏེག་ནས་བལྟས་པ་ན། འཕུར་སྐྱོད་བྱེད་པའི་ཤོག་དྲིལ་ཞིག་མཐོང་།
[2] ཁོང་གིས་ང་ལ་འདི་སྐད་དུ། ཁྱོད་ཀྱིས་ཅི་ཞིག་མཐོང་ངམ་ཞེས་དྲིས་པ་ན། ངས་ཁོང་གི་ལན་དུ་ན་རེ། ངས་འཕུར་སྐྱོད་བྱེད་པའི་ཤོག་དྲིལ་ཞིག་མཐོང་སྟེ། དེའི་རིང་ཚད་ལ་ཁྲུ་ཉི་ཤུ་ཡོད་དེ། ཞེང་དུ་ཁྲུ་བཅུ་ཡོད་ཅེས་ཞུས་པ་དང་།
[3] ཁོང་གིས་ང་ལ་འདི་སྐད་དུ། འདི་ནི་ས་གཞི་ཡོངས་ལ་བཏང་བའི་བྱད་སྟེམས་ཏེ། རྐུ་མཁན་ཐམས་ཅད་ཤོག་དྲིལ་གྱི་ཕྱོགས་འདི་སྟེང་བཀོད་པ་བཞིན་ཚར་དུ་གཅད་པར་འགྱུར་ལ། ཡང་མནའ་རྫུན་མ་སྐྱེལ་མཁན་དག་ནི་ཤོག་དྲིལ་གྱི་ཕྱོགས་གཞན་པར་བཀོད་པ་བཞིན་ཚར་དུ་གཅད་པར་འགྱུར་རོ་ཞེས་གསུངས།
[4] དཔུང་ཚོགས་ཀྱི་ཡ་ཝཱེས་འདི་སྐད་དུ། ངས་ཤོག་དྲིལ་འདི་ནི་ཕྱིར་འདོན་ཏེ། རྐུ་མཁན་གྱི་ཁྱིམ་དང་ངའི་མཚན་བརྗོད་ནས་མནའ་རྫུན་མ་སྐྱེལ་མཁན་གྱི་ཁྱིམ་ནང་དུ་སོང་ནས། ཤོག་དྲིལ་ནི་དེའི་ཁྱིམ་དུ་ལུས་པར་འགྱུར་ལ། དེའི་ཁྱིམ་ནང་གི་ཤིང་ཆ་དང་རྡོ་རྣམས་བརླག་པར་འགྱུར་རོ་ཞེས་དཔུང་ཚོགས་ཀྱི་ཡ་ཝཱེས་གསུངས་སོ།།
[5] བདག་དང་གཏམ་བྱས་པའི་ཕོ་ཉ་དེ་ཕྱིར་ཐོན་ཏེ་ང་ལ་འདི་སྐད་དུ། ཁྱོད་ཀྱིས་མིག་ཐེགས་ཏེ་ལྟོས་ཤིག་དང་། ཕྱིར་ཐོན་པ་དེ་ཅི་ཡིན་ལ་ལྟོས་ཤིག་ཅེས་གསུངས་པས།
[6] ངས་ན་རེ། འདི་ནི་ཅི་ཡིན་ནམ་ཞེས་ཞུས་པ་ན། ཁོང་གིས་ལན་དུ་འདི་སྐད་དུ། ཕྱིར་ཐོན་པ་འདི་ནི་འཇལ་ཆས་ཤིག་ཡིན་ཞེས་གསུངས་པ་དང་། ཡང་ཁོང་གིས་འདི་སྐད་དུ། འདི་ནི་དེ་དག་གི་ས་གཞི་ཡོངས་ཀྱི་སྡིག་པ་ལགས་ཏེ།
[7] ལྟོས་ཤིག ཞ་ཉེས་གྲུབ་པའི་འཇལ་ཆས་ཀྱི་ཁ་ལེབ་ཟླུམ་པོའི་ཁ་འབྱེད་དེ། བུད་མེད་ཅིག་འཇལ་ཆས་ནང་དུ་བསྡད་འདུག་ཅེས་གསུངས།
[8] ཕོ་ཉ་དེས་འདི་སྐད་དུ། འདི་ནི་སྡིག་པའོ་གསུངས་པ་དང་། དེ་ནས་ཁོང་གིས་བུད་མེད་དེ་འཇལ་ཆས་ནང་དུ་འཕངས་ཏེ། ཡང་ཞ་ཉེའི་ཁ་ལེབ་དེ་འཇལ་ཆས་ཀྱི་ཁ་རུ་གཡུགས་སོ།།
[9] ངས་སླར་ཡང་མིག་བཏེགས་ཏེ་བལྟས་པ་ན། བུད་མེད་གཉིས་ཕྱིར་ཐོན་པ་མཐོང་སྟེ། ཁོ་མོ་གཉིས་ལ་གཤོག་པ་ཡོད་པ་དང་། དེ་ནི་ཁྲུང་ཁྲུང་ཡི་གཤོག་པ་དང་འདྲ་ཞིང་། ཁོ་མོའི་གཤོག་པའི་འོག་ཏུ་རླུང་ཡོད་དེ། ཁོ་མོ་གཉིས་ཀྱིས་འཇལ་ཆས་དེ་ཡར་བཀྱགས་ནས། གནམ་ས་གཉིས་ཀྱི་བར་དུ་བཀྱགས་སོ།།
[10] ཡང་ངས་ང་དང་གཏམ་བྱས་པའི་ཕོ་ཉ་དེ་ལ་འདི་ལྟར་དུ། ཁོ་མོ་གཉིས་ཀྱིས་འཇལ་ཆས་གང་དུ་འཁྱེར་རམ་ཞེས་ཞུས་པ་ན།
[11] ཁོང་གིས་ངའི་ལན་དུ་འདི་སྐད་དུ། ཤིན་ཨར་དུ་འཇལ་ཆས་དོན་དུ་ཁྱིམ་ཞིག་བརྩིག་པ་དང་། ཁང་པ་གྲ་སྒྲིག་བྱས་རྗེས། གནས་དེ་རུ་འཇལ་ཆས་རང་གི་གནས་སུ་འཇོག་པར་འགྱུར་རོ་ཞེས་གསུངས་སོ།།