[1] དེའང་རྒྱལ་པོ་དར་ཡཱའི་ལོ་གཉིས་པའི་ཟླ་བརྒྱད་པར་གཙོ་བོ་ཡ་ཝཱེའི་བཀའ་ནི། ཨིད་དོའི་ཚ་བོའམ་པེ་རེག་ཡཱའི་བུ་ཡིན་པའི་ལུང་སྟོན་པ་ཟཱ་ཀར་ཡ་ལ་བྱུང་སྟེ་འདི་སྐད་དུ།
[2] སྔོན་ཁྱོད་ཅག་གི་ཕ་མེས་རྣམས་ཀྱི་ཐོག་ཏུ་གཙོ་བོ་ཡ་ཝཱེ་ཐུགས་རབ་ཏུ་ཁྲོས་སོ།།
[3] དེ་བས་ཁྱོད་ཀྱིས་མི་སྡེ་དག་ལ་འདི་ལྟར་སྨྲོས་ཤིག དཔུང་ཚོགས་ཀྱི་ཡ་ཝཱེས་འདི་སྐད་དུ། ཁྱོད་ཅག་བདག་གི་ཕྱོགས་སུ་འཁོར་ན། བདག་ཀྱང་ཁྱོད་ཅག་གི་ཕྱོགས་སུ་ལོག་པར་འགྱུར་ཏེ།
[4] ཁྱོད་ཅག་རང་གི་ཕ་མེས་རྣམས་དང་འདྲ་བར་མ་འགྱུར་ཞིག སྔ་མའི་ལུང་སྟོན་པ་རྣམས་ཀྱིས་དེ་དག་ལ་འདི་ལྟར་དུ། དཔུང་ཚོགས་ཀྱི་ཡ་ཝཱེས་འདི་སྐད་དུ། ཁྱོད་རྣམས་ཕྱིར་ལོག་པར་གྱུར་ཞིག་དང་། རང་ཉིད་ཀྱི་ངན་ལམ་དང་ངན་སྤྱོད་ལས་བྲལ་བར་གྱུར་ཞིག་ཅེས་བོས་ཀྱང་། དེ་དག་གིས་མ་ཉན་ལ། བདག་ལ་ཁ་ཡ་མ་བྱས་སོ་ཞེས་གསུངས་སོ།།
[5] ཁྱོད་ཅག་གི་ཕ་མེས་རྣམས་གང་དུ་ཡོད་དམ། ལུང་སྟོན་པ་རྣམས་ནམ་ཡང་གསོན་པོར་འདུག་གམ།
[6] འོན་ཀྱང་ངས་བདག་གི་ཞབས་ཕྱི་པའི་ལུང་སྟོན་པ་རྣམས་ལ་བསྒོས་པའི་བཀའ་དང་། བཀའ་ཁྲིམས་དེ་རྣམས་བཞིན་དུ་ཁྱོད་ཅག་གི་ཕ་མེས་རྣམས་ཀྱི་ཐོག་ཏུ་མ་བྱུང་ངམ། དེ་བས་དེ་དག་ཕྱིར་ལོག་པར་གྱུར་ཏེ་ན་རེ། དཔུང་ཚོགས་ཀྱི་ཡ་ཝཱེའི་ཐུགས་དགོངས་ནི་ངེད་ཀྱི་སྤྱོད་པ་བཞིན་དུ་ངེད་ཅག་ལ་མཛད་པ་དང་། ཁོང་གིས་དེ་བཞིན་ཡང་མཛད་པར་གྱུར་ཞེས་སྨྲས་སོ།།
[7] དེའང་རྒྱལ་པོ་དར་ཡཱའི་ལོ་གཉིས་པའི་ཟླ་བ་ཤེ་བད་བྱ་བའི་ཟླ་བཅུ་གཅིག་པའི་ཚེས་ཉེར་བཞི་ལ་གཙོ་བོ་ཡ་ཝཱེའི་བཀའ་ནི། ཨིད་དོའི་ཚ་བོའམ་པེ་རེག་ཡཱའི་བུ་ཡིན་པའི་ལུང་སྟོན་པ་ཟཱ་ཀར་ཡ་ལ་བྱུང་སྟེ་འདི་སྐད་དུ།
[8] ངས་མཚན་མོར་བལྟས་པ་ན། མི་ཞིག་རྟ་སྐྱང་དམར་ཞིག་ལ་ཞོན་ནས། གཤོང་སའི་སྟེང་གི་པ་སངས་མེ་ཏོག་གི་དཀྱིལ་ན་ལངས་ཏེ། དེའི་རྒྱབ་ན་རྟ་སྐྱང་དམར་དང་། རྟ་རག་པ་དང་། རྟ་དཀར་པོ་རྣམས་ཡོད་དོ་ཅེས་གསུངས་པ་ན།
[9] ངས་ཀྱེ་ངའི་གཙོ་བོ་ལགས། འདི་རྣམས་ཅི་ལགས་ཞེས་ཞུས་པ་དང་། བདག་དང་གཏམ་བཤད་པའི་ཕོ་ཉ་དེས་ང་ལ་འདི་སྐད་དུ། འདི་རྣམས་ཅི་ཡིན་པ་ངས་ཁྱོད་ལ་སྟོན་པར་བྱའོ་ཞེས་གསུངས།
[10] པ་སངས་མེ་ཏོག་གི་དཀྱིལ་དུ་ལངས་པའི་མི་དེས་ང་ལ་ལན་དུ་ན་རེ། འདི་དག་ནི་གཙོ་བོ་ཡ་ཝཱེས་ས་གཞི་ཀུན་ལ་གཟིགས་པའི་ཕྱིར་མངགས་པ་རྣམས་ཡིན་ནོ་ཞེས་སྨྲས་སོ།།
[11] ཡང་རྟ་པ་དེ་དག་གིས་པ་སངས་མེ་ཏོག་གི་དཀྱིལ་ན་ལངས་བསྡད་པའི་གཙོ་བོ་ཡ་ཝཱེའི་ཕོ་ཉ་དེ་ལ་ལན་དུ་འདི་ལྟར་དུ། ངེད་ཅག་གིས་ས་གཞི་ཀུན་ལ་བལྟས་ཟིན་ཏེ། ས་གཞི་ཡོངས་སུ་ལྷིང་འཇགས་ངང་ཞི་བདེ་བར་གནས་འདུག་ཅེས་ཞུས་པ་དང་།
[12] དེ་ནས་གཙོ་བོ་ཡ་ཝཱེའི་ཕོ་ཉ་དེས་འདི་སྐད་དུ། ཀྱེ་དཔུང་ཚོགས་ཀྱི་ཡ་ཝཱེ་ལགས། ཁྱེད་ཀྱིས་དུས་ནམ་གྱི་བར་དུ། ཡེ་རུ་སཱ་ལེམ་དང་ཡ་ཧུ་དཱའི་གྲོང་ཁྱེར་ལ་ཐུགས་བརྩེ་ཡིས་མི་བསྐྱང་ངམ། ལོ་བདུན་ཅུ་འདི་རིང་ལ་ཁྱེད་ཀྱིས་དེ་དག་གི་ཐོག་ལ་ཐུགས་ཁྲོས་སོ་ཞེས་ཞུས་པ་ན།
[13] གཙོ་བོ་ཡ་ཝཱེས་བྱམས་པ་དང་སེམས་གསོའི་གསུངས་ཀྱིས་བདག་དང་གཏམ་བྱས་པའི་ཕོ་ཉ་དེ་ལ་བཀའ་ལན་གནང་ངོ་།
[14] ཡང་བདག་དང་གཏམ་བྱས་པའི་ཕོ་ཉ་དེས་ང་ལ་འདི་སྐད་དུ། ཁྱོད་ཀྱིས་འདི་ལྟར་སྒྲོགས་ཤིག དཔུང་ཚོགས་ཀྱི་ཡ་ཝཱེས་འདི་སྐད་དུ་གསུངས་ཏེ། བདག་ནི་ཡེ་རུ་སཱ་ལེམ་དང་ཛ་ཡན་གྱི་ཕྱིར་དུ་སེམས་སུ་ཕྲག་དོག་དང་ཞེ་སྡང་གིས་ཁེངས་ཏེ།
[15] བློ་བདེ་བག་ཕེབས་ངང་གནས་པའི་མི་རྒྱུད་རྣམས་ཀྱི་ཕྱིར་ང་རབ་ཏུ་ཁྲོས་སོ།། དེ་ཅིའི་ཕྱིར་ཞེ་ན། ང་ནི་ངའི་མི་སྡེ་ཐོག་ཏུ་ཅུང་ཙམ་ཁྲོས་ཀྱང་། དེ་དག་གིས་ངའི་མི་སྡེའི་སྡུག་བསྔལ་ཆེ་བར་བྱས་སོ།།
[16] དེ་བས་གཙོ་བོ་ཡ་ཝཱེས་འདི་སྐད་དུ། ངས་ནི་ཐུགས་བརྩེ་དགོངས་ཏེ་ཡེ་རུ་སཱ་ལེམ་དུ་ཕྱིན་ཏེ། དེར་ངའི་ཕོ་བྲང་ནི་ཡང་བསྐྱར་གྲོང་ཁྱེར་ནང་དུ་བཞེང་བར་འགྱུར་ལ། ཐག་པ་ནི་ཡེ་རུ་སཱ་ལེམ་ཐོག་ཏུ་འཐེན་པར་འགྱུར་ཞེས་དཔུང་ཚོགས་ཀྱི་ཡ་ཝཱེས་གསུངས་སོ།།
[17] ཡང་ཁྱོད་ཀྱིས་སྒྲོགས་ཤིག་དང་། དཔུང་ཚོགས་ཀྱི་ཡ་ཝཱེས་འདི་སྐད་དུ། ངའི་གྲོང་ཁྱེར་རྣམས་སླར་ཡང་དར་ཞིང་རྒྱས་པར་འགྱུར་ཏེ། གཙོ་བོ་ཡ་ཝཱེས་ད་དུང་ཡང་ཛ་ཡན་ལ་ཐུགས་བརྩེས་བསྐྱང་ཞིང་། ཡེ་རུ་སཱ་ལེམ་གདམ་པར་འགྱུར་རོ་ཞེས་གསུངས་སོ།།
[18] ཡང་ངས་རང་གི་མིག་བཏེག་ནས་བལྟས་པ་ན། རྭ་ཅོ་བཞི་མཐོང་སྟེ།
[19] ངས་བདག་དང་གཏམ་བྱས་པའི་ཕོ་ཉ་དེ་ལ་འདི་ལྟར་དུ། འདི་དག་ཅི་ལགས་ཞུས་པའི་ལན་དུ་ཁོང་གིས་ང་ལ་འདི་སྐད་དུ། འདི་དག་ནི་ཡ་ཧུ་དཱ་དང་། ཡེས་ར་ཨེལ་དང་། ཡེ་རུ་སཱ་ལེམ་ཐོར་བར་བཅུག་པའི་རྭ་ཅོ་དེ་རྣམས་སོ་ཞེས་གསུངས་སོ།།
[20] ཡང་གཙོ་བོ་ཡ་ཝཱེས་ང་ལ་མགར་བ་བཞི་བསྟན་ཞིང་།
[21] དེ་ནས་ངས་མི་འདི་དག་ཅི་བྱེད་དུ་འོངས་པ་ལགས་ཞེས་ཞུས་པས། ཕོ་ཉ་དེས་ངའི་ལན་དུ་འདི་སྐད་དུ། དེ་དག་ནི་ཡ་ཧུ་དཱ་གཏོར་མཁན་གྱི་རྭ་ཅོ་སྟེ། ཐ་ན་རང་གི་མགོ་བོ་ཡར་འདེགས་ནུས་མཁན་གཅིག་ཀྱང་མེད་དོ།། ཡིན་ཡང་མགར་བ་འདི་དག་ནི་མི་རྒྱུད་རྣམས་ལ་འཇིགས་སྐུལ་བར་འོངས་ནས། དེ་དག་གི་རྭ་ཅོ་དག་གཅོག་པའི་ཕྱིར་ཡིན་པ་དང་། དེ་ཅིའི་ཕྱིར་ཞེ་ན། སྔོན་ན་མི་རྒྱུད་འདི་དག་གིས་རང་གི་རྭ་ཅོ་ཡར་བཀྱགས་ཏེ་ཡ་ཧུ་དཱ་ལ་རྒོལ་བ་དང་། ཡ་ཧུ་དཱ་ཡུལ་གྱི་མི་སྡེ་རྣམས་གཏོར་མཁན་ཡིན་ཞེས་གསུངས་སོ།།