[1] ཡང་གཙོ་བོ་ཡ་ཝཱེས་མཆོད་དཔོན་ཆེན་པོ་ཡོ་ཤུ་ཨ་ནི་གཙོ་བོ་ཡ་ཝཱེའི་ཕོ་ཉའི་མདུན་དུ་མཆིས་པ་ང་ལ་བསྟན་ཏེ། ས་ཏན་ཡང་ཡོ་ཤུ་ཨའི་གཡས་སུ་ལངས་ནས་དེ་ལ་གྱོད་གཏུག་བཞིན་འདུག
[2] གཙོ་བོ་ཡ་ཝཱེས་ས་ཏན་ལ་འདི་སྐད་དུ། ཀྱེ་ས་ཏན། གཙོ་བོ་ཡ་ཝཱེས་ཁྱོད་ལ་གཤེ་གཤེ་གཏོང་བར་མཛོད་ཅིག་དང་། ཡེ་རུ་སཱ་ལེམ་བདམས་པའི་གཙོ་བོ་ཡ་ཝཱེས་ཁྱོད་ལ་གཤེ་གཤེ་གཏོང་བར་མཛོད་ཅིག མི་འདི་ནི་མིའི་ནང་ནས་ཕྱུང་བའི་བུད་ཤིང་ཞིག་མ་ཡིན་ནམ་ཞེས་གསུངས་པ་དང་།
[3] དུས་དེར་ཡོ་ཤུ་ཨ་ཡིས་གོས་བཙོག་པོ་གྱོན་ནས་ཕོ་ཉའི་དྲུང་དུ་ལངས་ནས་བསྡད་དོ།།
[4] ཡང་ཕོ་ཉ་དེས་རང་གི་མདུན་དུ་ལངས་པའི་ཞབས་ཏོག་པ་རྣམས་ལ་འདི་སྐད་དུ། ཁྱོད་ཅག་གིས་དེའི་གོས་བཙོག་པོ་དག་ཕུད་ཅིག་ཅེས་བསྒོས་པ་དང་། ཡང་ཡོ་ཤུ་ཨ་ལ་འདི་སྐད་དུ། ལྟོས་ཤིག ངས་ཁྱོད་ཀྱི་ཉེས་པ་རྣམས་བསལ་ཏེ། ཁྱོད་ལ་མཛེས་ཤིང་ཡིད་དུ་འོང་བའི་གཟབ་གོས་གྱོན་པར་བྱའོ་ཞེས་གསུངས་སོ།།
[5] ཡང་ངས་འདི་ལྟར་དུ། ཁྱོད་ཅག་གིས་གཙང་དག་གི་ཅོད་པན་དེའི་མགོ་ལ་སྐོན་ཞིག་ཅེས་གསུངས་པས། དེ་དག་གིས་མཛེས་ཤིང་ཡིད་དུ་འོང་བའི་ཅོད་པན་དེའི་མགོ་ལ་བསྐོན་ཏེ། ཡང་དེ་ལ་གཟབ་གོས་ཡིད་དུ་འོང་བ་ཞིག་གྱོན་པ་དང་། དུས་དེར་གཙོ་བོ་ཡ་ཝཱེའི་ཕོ་ཉ་ནི་དེའི་འགྲམ་དུ་ལངས་ནས་འདུག
[6] གཙོ་བོ་ཡ་ཝཱེའི་ཕོ་ཉ་ཡིས་ཡོ་ཤུ་ཨ་ལ་བསླབ་བྱ་གནང་སྟེ་འདི་སྐད་དུ།
[7] དཔུང་ཚོགས་ཀྱི་ཡ་ཝཱེས་འདི་སྐད་དུ། གལ་ཏེ་ཁྱོད་ནི་ངའི་ལམ་ནང་འགྲུལ་ཞིང་། ངའི་བཀའ་བསྲུང་ན། ཁྱོད་ཀྱིས་ངའི་ཡུལ་ཁམས་བསྐྱང་བར་འགྱུར་བ་དང་། ངའི་ར་བ་རྣམས་ལ་ལྟ་སྲུང་བྱེད་པར་འགྱུར་ཏེ། ངས་ཀྱང་ཁྱོད་ལ་དབང་གནང་སྟེ། ངའི་དྲུང་དུ་ཞབས་ཏོག་སྒྲུབ་པའི་ཕོ་ཉ་འདི་དག་གི་ནང་དུ་རང་དབང་ངང་རྒྱུ་བར་འཇུག་སྟེ།
[8] ཀྱེ་མཆོད་དཔོན་ཆེན་པོ་ཡོ་ཤུ་ཨ་ལགས། ཁྱོད་དང་ཁྱོད་ཀྱི་མདུན་དུ་ཡོད་པའི་རོགས་པ་ཐམས་ཅད་ཀྱིས་གསོན་ཞིག་དང་། དེ་དག་ནི་དོན་ངོ་མཚར་ཅན་ལ་མ་འོངས་ལུང་སྟོན་བྱེད་མཁན་དང་། ངས་རང་གི་བྲན་པོ་སྟེ། དཱ་བིད་ཀྱི་བུ་རྒྱུད་ནི་རྒྱས་པར་འགྱུར་རོ།།
[9] དེ་ཅིའི་ཕྱིར་ཞེ་ན། ངས་ཡོ་ཤུ་ཨའི་མདུན་དུ་བཙུགས་པའི་རྡོ་རིང་དེ་ལ་ལྟོས་ཤིག རྡོ་འདིའི་སྟེང་དུ་སྤྱན་བདུན་ཡོད་དེ། ལྟོས་ཤིག ངས་རྡོ་འདི་རང་ཉིད་ཀྱིས་དངོས་སུ་རྐོ་བར་བྱའོ།། ཞེས་དཔུང་ཚོགས་ཀྱི་ཡ་ཝཱེས་གསུངས་སོ།། ཡང་ངའི་ཡུལ་ཁམས་འདིའི་ཉེས་པ་ནི་ཉིན་གཅིག་གི་ནང་བསལ་བར་བྱའོ།།
[10] ཡང་དཔུང་ཚོགས་ཀྱི་ཡ་ཝཱེས་འདི་སྐད་དུ། ཉིན་དེར། ཁྱོད་ཅག་རེ་རེ་ཡིས་རང་གི་ཁྱིམ་མཚེས་རྣམས་གདན་འདྲེན་ཞུས་ཏེ། རྒུན་ཤིང་དང་སེ་ཡབ་ཤིང་གི་འོག་ཏུ་སྡོད་དུ་ཆུགས་ཤེས་གསུངས་སོ།།