[1] གཙོ་བོ་ཡ་ཝཱེས་ཟུར་དུ་འདི་ལྟར་བསྟན་ཏེ། ཡེས་ར་ཨེལ་གྱི་སྐོར་དུ་གཙོ་བོ་ཡ་ཝཱེས་འདི་སྐད་དུ། ཁོང་གིས་ནམ་མཁའ་རྣམས་བཏིངས་པ་དང་། ས་གཞིའི་རྨང་གཞི་བཙུགས་ཏེ། མིའི་ནང་གི་སེམས་ཉིད་སྐྱེད་པར་མཛད་ཅེས་གསུངས་སོ།།
[2] ལྟོས་ཤིག ངས་ཡེ་རུ་སཱ་ལེམ་ནི་མཐའི་མི་རྒྱུད་ཐམས་ཅད་བཟི་བར་འགྱུར་བའི་ཕོར་བ་རུ་བྱ་སྟེ། ཡེ་རུ་སཱ་ལེམ་ལ་བསྐོར་བའི་ཚེ། ཡ་ཧུ་དཱ་ལའང་རྒོལ་བར་འགྱུར།
[3] ཉིན་མོ་དེར། མི་རྒྱུད་ཐམས་ཅད་ལ་མཚོན་ན་ངས་ཡེ་རུ་སཱ་ལེམ་ནི་ཤིན་ཏུ་ལྕི་བའི་རྡོ་ལྟ་བུ་བྱས་ནས། དེ་ཡར་འདེགས་མཁན་ལ་རྨས་སྐྱོན་ཚབས་ཆེན་བྱུང་བར་འགྱུར་བ་དང་། ས་གཞིའི་མི་རིགས་ཐམས་ཅད་ཕྱོགས་གཅིག་ཏུ་བསྡུས་ནས་ཡེ་རུ་སཱ་ལེམ་ལ་རྒོལ་བར་འགྱུར་རོ།།
[4] ཡང་གཙོ་བོ་ཡ་ཝཱེས་འདི་སྐད་དུ་གསུངས། ཉིན་མོ་དེར། ངས་རྟ་ཡོངས་ལ་བརྒྱབ་ནས། དེ་དག་འདྲོག་ཏུ་འཇུག་པ་དང་། རྟ་ཞོན་མཁན་རྣམས་ལ་བརྒྱབ་ནས་དེ་དག་སྨྱོ་བར་འགྱུར་ཏོ།། ཡང་ངས་མིག་ཕྱེས་ནས་ཡ་ཧུ་དཱའི་ཁྱིམ་རྒྱུད་དག་ལ་གཟིགས་སྐྱོང་མཛད་ཅིང་། ངས་མི་རྒྱུད་རྣམས་ཀྱི་རྟ་ཐམས་ཅད་ལ་བརྡུང་སྟེ་དེ་དག་ལོང་བར་མཛད་དོ།།
[5] དུས་དེར་ཡ་ཧུ་དཱའི་རུས་བདག་གིས་སེམས་སུ་འདི་ལྟར་དུ། ཡེ་རུ་སཱ་ལེམ་གྱི་མི་སྡེ་ཡིས། དཔུང་ཚོགས་ཀྱི་ཡ་ཝཱེ་སྟེ་རང་གི་དཀོན་མཆོག་ལ་བརྟེན་ནས་སྟོབས་ཤུགས་ཐོབ་ཅེས་སྨྲས་ཤིང་།
[6] དུས་དེར། ངས་ཡ་ཧུ་དཱའི་རུས་བདག་རྣམས་ནི་ཤིང་གི་དཀྱིལ་ན་ཡོད་པའི་མེ་ཕོར་དང་། སྙེ་མའི་གཞུང་ན་ཡོད་པའི་མེ་འབར་བཞིན་དུ་བྱ་སྟེ། དེ་དག་གིས་གཡས་གཡོན་དང་མཐའ་འཁོར་ན་ཡོད་པའི་མི་རྒྱུད་ཐམས་ཅད་ཁྱུར་མིད་དུ་གཏོང་བར་འགྱུར་རོ།། ཡིན་ཡང་ཡེ་རུ་སཱ་ལེམ་གྱི་མི་རྒྱུད་དག་ནི་གྲོང་ཁྱེར་ནང་གི་སྔར་གནས་སུ་ཆགས་པར་འགྱུར།
[7] དཱ་བིད་ཀྱི་མི་རྒྱུད་དང་ཡེ་རུ་སཱ་ལེམ་གྱི་མི་རྒྱུད་ཀྱི་གཟི་བརྗིད་རྣམས་ཡ་ཧུ་དཱ་པ་ལས་ཆེ་བར་མི་བྱེད་པའི་ཕྱིར་དུ། གཙོ་བོ་ཡ་ཝཱེས་ཡ་ཧུ་དཱའི་གུར་རྣམས་སྔོན་ན་སྐྱོབ་པར་འགྱུར།
[8] དུས་དེར། གཙོ་བོ་ཡ་ཝཱེས་ཡེ་རུ་སཱ་ལེམ་གྱི་མི་སྡེ་རྣམས་བསྲུང་བར་མཛད་ཅིང་། དེ་དག་གི་ནང་ནས་ཉམ་ཐག་པ་རྣམས་ནི་ཉིན་དེར་དཱ་བིད་དང་འདྲ་ཞིང་། དཱ་བིད་ཀྱི་མི་རྒྱུད་ནི་དཀོན་མཆོག་དང་འདྲ་ཞིང་། དེ་དག་གི་མདུན་དུ་སྐྱོད་པའི་གཙོ་བོ་ཡ་ཝཱེའི་ཕོ་ཉ་དང་འདྲ་བར་འགྱུར།
[9] ཉིན་མོ་དེར། ངས་ཡེ་རུ་སཱ་ལེམ་ལ་རྒོལ་དུ་འོངས་བའི་མི་རྒྱུད་རྣམས་ནི་སྲོག་དང་བྲལ་བར་བྱའོ།།
[10] ཡང་ངས་དཱ་བིད་ཀྱི་མི་རྒྱུད་དང་ཡེ་རུ་སཱ་ལེམ་གྱི་མི་སྡེའི་ཐོག་ཏུ་ཐུགས་རྗེ་དང་གསོལ་འདེབས་ཀྱི་སེམས་ཉིད་བླུག་པར་བྱ་ཞིང་། དེ་དག་གིས་བསྣུན་པར་བྱས་བའི་བདག་ལ་རེ་ཞིང་། རང་གི་བུ་གཅིག་པོ་ཤོར་བ་བཞིན་དུ། དེ་དག་གིས་དེའི་དོན་དུ་མྱ་ངན་བྱ་ཞིང་། ཡང་རང་གི་བུ་སྔོན་སྐྱེས་ཤོར་བ་བཞིན་དུ། དེ་དག་གིས་དེའི་ཕྱིར་མྱ་ངན་བྱའོ།།
[11] ཉིན་མོ་དེར། མེ་གིད་དོ་ཐང་ཆེན་གྱི་ཧ་དད་རིམ་མོན་གྱི་མྱ་ངན་དང་འདྲ་བའི་མྱ་ངན་ཆེན་པོ་ཞིག་ཡེ་རུ་སཱ་ལེམ་དུ་འབྱུང་བར་འགྱུར་ཏེ།
[12] ས་གཞི་ཐམས་ཅད་ཀྱིས་མྱ་ངན་བྱ་སྟེ། ཁྱིམ་གཅིག་དང་ཁྱིམ་གཅིག་རེ་རེས་མྱ་ངན་བྱ་ཞིང་། དཱ་བིད་ཀྱི་ཁྱིམ་རྒྱུད་སོ་སོར་སྡོད་པ་དང་། དེའི་བུད་མེད་དག་སོ་སོར་སྡོད་པ། ནཱ་ཐན་གྱི་ཁྱིམ་རྒྱུད་སོ་སོར་སྡོད་པ་དང་། དེའི་བུད་མེད་རྣམས་སོ་སོར་སྡོད་པ།
[13] ལེ་ཝིའི་ཁྱིམ་རྒྱུད་སོ་སོར་སྡོད་པ་དང་། དེའི་བུད་མེད་དག་སོ་སོར་སྡོད་པ། ཤི་མེ་ཨིའི་ཁྱིམ་རྒྱུད་སོ་སོར་སྡོད་པ་དང་། དེའི་བུད་མེད་རྣམས་ཀྱང་སོ་སོར་སྡོད་པ།
[14] ལྷག་མའི་ཁྱིམ་རྒྱུད་རྣམས་ཀྱང་རེ་རེ་སྡོད་པ་དང་། དེ་དག་གི་བུད་མེད་རྣམས་ཀྱང་སོ་སོར་སྡོད་དོ།།