[1] དཔུང་ཚོགས་ཀྱི་ཡ་ཝཱེའི་བཀའ་ནི་ང་ལ་བྱུང་སྟེ་འདི་སྐད་དུ་གསུངས།
[2] དཔུང་ཚོགས་ཀྱི་ཡ་ཝཱེས་འདི་སྐད་དུ། ངས་ཛ་ཡན་ལ་ཤིན་ཏུ་གཅེས་ཤིང་། ང་ནི་ཛ་ཡན་གྱི་ཕྱིར་དུ་ཐུགས་ཁྲོ་ཆེན་པོ་ལངས་སོ་ཞེས་གསུངས།
[3] གཙོ་བོ་ཡ་ཝཱེས་འདི་སྐད་དུ། ང་ནི་ཛ་ཡན་དུ་ཕྱིར་ལོག་ཅིང་། ཡེ་རུ་སཱ་ལེམ་གྱི་ནང་དུ་བཞུགས་པས། ཡེ་རུ་སཱ་ལེམ་གྱི་མཚན་དུ་དྲང་བ་ཉིད་ཀྱི་གྲོང་ཁྱེར་དང་། དཔུང་ཚོགས་ཀྱི་ཡ་ཝཱེའི་རི་བོ་ལ་དམ་པ་ཞེས་གསོལ་བར་འགྱུར།
[4] དཔུང་ཚོགས་ཀྱི་ཡ་ཝཱེས་འདི་སྐད་དུ། ད་དུང་ཡང་རྒན་པོ་དང་རྒན་མོ་རྣམས་ཡེ་རུ་སཱ་ལེམ་གྱི་སྲང་ལམ་དུ་སྡོད་ཅིང་། དེ་དག་ནི་ལོ་ན་བགྲེས་པས། རེ་རེའི་ལག་ཏུ་དབྱུག་པ་བཟུང་སྟེ།
[5] གྲོང་ཁྱེར་གྱི་སྲང་ལམ་ནང་དུ་བུ་ཆུང་དང་བུ་མོས་ཁེངས་ཏེ། སྲང་ལམ་དུ་རྩེད་མོར་རོལ་བཞིན་འདུག་ཅེས་གསུངས་སོ།།
[6] ཡང་དཔུང་ཚོགས་ཀྱི་ཡ་ཝཱེས་འདི་སྐད་དུ། དུས་དེ་རྣམས་སུ། དོན་འདི་ནི་མི་རྒྱུད་ལྷག་མ་དེ་རྣམས་ཀྱི་མིག་ནང་དུ་འབྱུང་མི་སྲིད་པའི་དོན་ཡ་མཚན་ཅན་དུ་བརྩིས་པས། ངའི་གཟིགས་སྣང་ལའང་དོན་ཡ་མཚན་ཅན་དུ་སྣང་བར་འགྱུར་བ་ཡིན་ནམ། ཞེས་དཔུང་ཚོགས་ཀྱི་ཡ་ཝཱེས་གསུངས།
[7] དཔུང་ཚོགས་ཀྱི་ཡ་ཝཱེས་འདི་སྐད་དུ། ལྟོས་ཤིག ངའི་རང་གི་མི་སྡེ་ནི་ཤར་ཕྱོགས་དང་ནུབ་ཕྱོགས་ནས་བསྐྱབ་པར་འགྱུར་ལ།
[8] ངས་དེ་དག་ཕྱིར་འཁྲིད་འོངས་ནས། དེ་དག་ནི་ཡེ་རུ་སཱ་ལེམ་དུ་སྡོད་པར་འཇུག་པ་དང་། ཡང་དེ་དག་ནི་ངའི་མི་སྡེ་རུ་འགྱུར་ཞིང་། ངས་ཀྱང་བདེན་པ་ཉིད་དང་དྲང་པ་ཉིད་ལ་བརྟེན་ནས་ཁོ་རྣམས་ཀྱི་དཀོན་མཆོག་ཏུ་འགྱུར་ཏོ་ཞེས་གསུངས།
[9] དཔུང་ཚོགས་ཀྱི་ཡ་ཝཱེས་འདི་སྐད་དུ། དཔུང་ཚོགས་ཀྱི་ཡ་ཝཱེའི་ཕོ་བྲང་གི་རྨང་གཞི་བཏིངས་པ་དང་། བཞེང་བར་གྲ་སྒྲིག་བྱེད་པའི་ཉིན་མོར། སྔོན་ན་ལུང་སྟོན་པ་རྣམས་ཀྱིས་དངོས་སུ་བསྒྲགས་པའི་གཏམ་ཐོས་པ་ཁྱོད་ཅག་གིས། ད་ལྟ་ཁྱོད་ཚོའི་ལག་པ་ནི་ངེས་པར་དུ་བརྟན་པོར་གྱུར་ཞིག
[10] དེ་ཅིའི་ཕྱིར་ཞེ་ན། དུས་དེའི་སྔོན་ན་མིས་ལས་བྱས་པ་ལ་གླ་མེད་དེ། དུད་འགྲོ་ཡང་དེ་བཞིན་ནོ།། ད་དུང་དགྲ་པོ་ཡོད་པའི་རྐྱེན་གྱིས། མི་འགྲོ་འོངས་བྱས་ན་ཞི་བདེ་མེད་དེ། གང་ལ་ཞེ་ན། ངས་མི་ཐམས་ཅད་ཕན་ཚུན་རྒོལ་བར་བཅུག་པའི་ཕྱིར་ཏོ།།
[11] ཡིན་ཡང་ད་ལྟ་ངས་མི་སྡེ་ལྷག་མ་འདི་དག་ལ་སྔོན་གྱི་དུས་དེ་བཞིན་དུ་མི་སྤྱད་དོ་ཅེས་དཔུང་ཚོགས་ཀྱི་ཡ་ཝཱེས་འདི་སྐད་དུ་གསུངས།
[12] དེ་ཅིའི་ཕྱིར་ཞེ་ན། འབྲུ་རིགས་སྣ་ལྔར་ལོ་ལེགས་འབྱུང་སྟེ། རྒུན་འབྲུམ་ཤིང་ལ་འབྲས་བུ་གདགས་པར་འགྱུར། ས་ཡིས་ཐོན་རྫས་སྦྱིན་ཞིང་། གནམ་གྱིས་ཆར་བ་དབབ་བར་འཇུག་པས། ངས་མི་སྡེ་ལྷག་མ་འདི་ལ་དེ་ཐམས་ཅད་ཐོབ་པར་མཛད་དེ།
[13] ཀྱེ་ཡ་ཧུ་དཱ་དང་ཡེས་ར་ཨེལ་གྱི་ཁྱིམ་རྒྱུད་ལགས། ཇི་ལྟར་ཁྱོད་ཅག་ཡུལ་ཁམས་རྣམས་ཀྱི་ཁྲོད་དུ་དམོད་མོར་གྱུར་བ་བཞིན། མ་འོངས་པར་ངས་ཁྱོད་ཅག་དེ་བཞིན་བསྐྱབ་པར་འགྱུར་ཏེ། ཁྱོད་ཅག་ནི་བྱིན་རླབས་སུ་འགྱུར་ཞིང་། ཁྱོད་ཅག་དཔའ་མི་ཞུམ་པར་རང་གི་ལག་པ་བརྟན་པོར་གྱུར་ཞིག་ཅེས་གསུངས་སོ།།
[14] དཔུང་ཚོགས་ཀྱི་ཡ་ཝཱེས་འདི་སྐད་དུ། ཁྱོད་ཀྱི་ཕ་མེས་རྣམས་ཀྱིས་ངའི་ཐུགས་ཁྲོ་དཀྲུག་པའི་ཚེ། ངས་ཁྱོད་ཅག་གི་ཐོག་ཏུ་གནོད་འཚེ་འབྱུང་འཇུག་པར་ཐུགས་ཐག་བཅད་པ་ལས། དགོངས་པ་མ་བསྒྱུར་ཞེས་གསུངས།
[15] དེ་དང་དེ་བཞིན་དུ། ཉིན་མོ་འདི་དག་གི་ནང་དུ། ངས་ཡེ་རུ་སཱ་ལེམ་དང་ཡ་ཧུ་དཱའི་ཁྱིམ་རྒྱུད་ལ་དྲིན་གྱིས་བསྐྱང་བར་ཐུགས་ཐག་བཅད་པས། ཁྱོད་རྣམས་ནི་མ་འཇིགས་ཤིག
[16] ཁྱོད་ཅག་གིས་དོན་འདི་དག་སྤྱད་དགོས་ཏེ། མི་རེ་རེས་རང་གི་ཁྱིམ་མཚེས་ལ་ཚིག་དྲང་པོ་སྨྲོས་ཤིག རང་གི་མཁར་སྒོ་རུ་དྲང་བདེན་སྤྱད་དེ། ཞི་བདེ་ངང་ཁྲིམས་ཆོད་ཅིག
[17] ཡང་ཁྱོད་རེ་རེའི་སེམས་སུ་དོན་ངན་སྤྱོད་པར་ལྐོག་ཇུས་བྱས་ནས། ཕན་ཚུན་ཉེས་འགེལ་མ་བྱེད་ཅིག རྫུན་གྱི་མནའ་བསྐྱལ་བར་མ་དགའ་དང་། གང་ལ་ཞེ་ན། དོན་འདི་དག་ལ་ང་མི་དགའོ་ཞེས་གཙོ་བོ་ཡ་ཝཱེས་གསུངས་སོ།།
[18] དཔུང་ཚོགས་ཀྱི་ཡ་ཝཱེའི་བཀའ་ནི་ང་ལ་བྱུང་སྟེ་འདི་སྐད་དུ་གསུངས།
[19] དཔུང་ཚོགས་ཀྱི་ཡ་ཝཱེས་འདི་སྐད་དུ། ཟླ་བཞི་པའི་སྨྱུང་གནས་དང་། ཟླ་ལྔ་པའི་སྨྱུང་གནས་དང་། ཟླ་བདུན་པའི་སྨྱུང་གནས་དང་། ཟླ་བཅུ་པའི་སྨྱུང་གནས་རྣམས་ནི། ཡ་ཧུ་དཱའི་ཁྱིམ་རྒྱུད་དགའ་ཞིང་མགུ་བའི་དུས་དང་། དགའ་སྤྲོའི་དུས་ཆེན་དུ་འགྱུར་བས། ཁྱོད་ཅག་ནི་དྲང་པ་ཉིད་དང་བདེན་པ་ཉིད་ལ་དགའ་བར་གྱིས་ཤིག་ཅེས་གསུངས།
[20] དཔུང་ཚོགས་ཀྱི་ཡ་ཝཱེས་འདི་སྐད་དུ། མ་འོངས་པར་མི་རིགས་ཀུན་དང་གྲོང་ཁྱེར་མང་པོའི་མི་སྡེ་དག་འོང་སྟེ།
[21] གྲོང་ཁྱེར་གཅིག་གི་མི་གྲོང་ཁྱེར་གཞན་དུ་ཆས་ནས་དེ་དག་ལ་ན་རེ། ངེད་རྣམས་མྱུར་དུ་གཙོ་བོ་ཡ་ཝཱེས་བྱིན་རླབས་གནང་བར་ཞུ་རུ་འགྲོ་སྟེ། དཔུང་ཚོགས་ཀྱི་ཡ་ཝཱེ་ལ་ཞུ་བའི་ཕྱིར་དུ། ང་རང་ཉིད་ཀྱང་འགྲོ་ཞེས་སྨྲ་བར་འགྱུར།
[22] མི་རིགས་མང་པོ་དང་སྟོབས་འབྱོར་ལྡན་པའི་རྒྱལ་ཁམས་རྣམས་འོངས་ཏེ། ཡེ་རུ་སཱ་ལེམ་དུ་དཔུང་ཚོགས་ཀྱི་ཡ་ཝཱེ་འཚོལ་ཞིང་། ཁོང་གིས་བྱིན་རླབས་གནང་བར་ཞུ་བར་འགྱུར་ཏོ།།
[23] དཔུང་ཚོགས་ཀྱི་ཡ་ཝཱེས་འདི་སྐད་དུ། ཉིན་མོ་དེ་རྣམས་ཀྱི་ནང་དུ་མི་རྒྱུད་ཐམས་ཅད་ཀྱི་ནང་ནས་སྐད་རིགས་བཅུ་བཤད་པ་དང་། ཡུལ་ཁམས་རེ་རེ་ནས་འོངས་པའི་མི་རྣམས་ཀྱིས་ཡ་ཧུ་དཱ་པའི་མི་ཞིག་གི་ལྭའི་ཐུ་བ་ལ་འཇུས་ནས་འདི་ལྟར་དུ། ངེད་ཅག་ནི་ཁྱོད་རྣམས་དང་མཉམ་དུ་འགྲོ་རུ་ཆུགས་ཤིག དེ་ཅིའི་ཕྱིར་ཞེ་ན། ངེད་ཅག་གིས་དཀོན་མཆོག་ནི་ཁྱེད་དང་མཉམ་དུ་བཞུགས་པ་ཐོས་སོ་ཞེས་ཞུ་བར་འགྱུར།