[1] དེའང་ཟླ་བདུན་པའི་ཚེས་ཉེར་གཅིག་ལ་གཙོ་བོ་ཡ་ཝཱེའི་བཀའ་ནི་ལུང་སྟོན་པ་ཧག་གཱ་ཨི་ལ་བྱུང་སྟེ་འདི་སྐད་དུ།
[2] ཁྱོད་ཀྱིས་ཞིད་ཨལ་ཐེ་ཨེལ་གྱི་བུ་སྟེ་ཡ་ཧུ་དཱའི་མགོ་དཔོན་ཟེ་རུ་པཱ་པེལ་དང་། ཡེ་ཧོ་ཙ་དག་གི་བུ་སྟེ་མཆོད་དཔོན་ཆེན་པོ་ཡོ་ཤུ་ཨའི་དང་། མི་ཕྱི་ལུས་ཐམས་ཅད་འདི་ལྟར་དུ།
[3] ཁྱོད་མི་ཕྱི་ལུས་རྣམས་ལས་སུ་ཞིག་གིས་ཕོ་བྲང་འདིའི་སྔ་མའི་གཟི་བརྗིད་མཐོང་ངམ། ད་ལྟ་ཁྱོད་རྣམས་ཀྱིས་བལྟས་ན་འདི་ཅི་འདྲ་འདུག དེ་དང་བསྡུར་ན་འདི་ཅིའང་མིན་པ་མ་ཡིན་ནམ་ཞེས་སྨྲོས་ཤིག་ཅེས་གསུངས་པ་དང་།
[4] ཀྱེ་ཟེ་རུ་པཱ་པེལ་ད་ལྟ་ཁྱོད་ནི་སྟོབས་དང་ལྡན་པར་གྱུར་ཞིག་ཅེས་གཙོ་བོ་ཡ་ཝཱེས་གསུངས་པ་དང་། ཀྱེ་ཡེ་ཧོ་ཙ་དག་གི་བུ་སྟེ་མཆོད་དཔོན་ཆེན་པོ་ཡོ་ཤུ་ཨ་ཁྱོད་ཀྱང་སྟོབས་དང་ལྡན་པར་གྱུར་ཞིག ཀྱེ་ས་འདིའི་མི་སྡེ་ཐམས་ཅད་ཁྱོད་རྣམས་ལའང་སྟོབས་དང་ལྡན་པར་གྱུར་ནས་ལས་བྱོས་ཤིག་ཅེས་གཙོ་བོ་ཡ་ཝཱེས་གསུངས་པ་དང་། དེ་ཅིའི་ཕྱིར་ཞེ་ན། ང་ཁྱོད་དང་མཉམ་དུ་ཡོད་པའི་ཕྱིར་ཞེས་དཔུང་ཚོགས་ཀྱི་ཡ་ཝཱེས་གསུངས་སོ།།
[5] འདི་ནི་ཁྱོད་རྣམས་ཨེ་ཅིབ་ཡུལ་ནས་ཡོང་བའི་དུས་སུ་ངས་ཁྱོད་རྣམས་དང་བཞག་པའི་ཞལ་ཆད་དེ། ད་ལྟ་ངའི་ཐུགས་ཉིད་ཁྱོད་ཀྱི་ཁྲོད་ན་བཞུགས་པས་ཁྱོད་རྣམས་མ་འཇིགས་ཤིག
[6] དེ་ཅིའི་ཕྱིར་ཞེ་ན། དཔུང་ཚོགས་ཀྱི་ཡ་ཝཱེས་འདི་སྐད་དུ། དུས་མི་འགྱངས་བར་ངས་ནམ་མཁའ་དང་། ས་གཞི་དང་།རྒྱ་མཚོ་དང་སྐམ་ས་རྣམས་གཡོ་བར་འཇུག་གོ་ཅེས་གསུངས་ཤིང་།
[7] ངས་མི་སྡེ་ཐམས་ཅད་སྒུལ་ཞིང་། མི་སྡེ་ཀུན་གྱི་ནོར་བུ་རྣམས་དྲང་སྟེ། ངས་ཕོ་བྲང་འདི་ལ་གཟི་བརྗིད་ཀྱིས་དགང་བར་བྱའོ་ཞེས་དཔུང་ཚོགས་ཀྱི་ཡ་ཝཱེས་གསུངས་སོ།།
[8] དངུལ་རྣམས་ངའི་ཡིན་ཞིང་། གསེར་རྣམས་ངའི་ཡིན་ནོ་ཞེས་དཔུང་ཚོགས་ཀྱི་ཡ་ཝཱེས་གསུངས་པ་དང་།
[9] ཕོ་བྲང་ཕྱི་མའི་གཟི་བརྗིད་ཕོ་བྲང་སྔ་མ་ལས་ཆེ་བར་འགྱུར་རོ་ཞེས་དཔུང་ཚོགས་ཀྱི་ཡ་ཝཱེས་གསུངས་ཤིང་། ཕོ་བྲང་འདི་ནང་ངས་ཞི་བདེ་གནང་བར་འགྱུར་ཞེས་དཔུང་ཚོགས་ཀྱི་ཡ་ཝཱེས་གསུངས་སོ།།
[10] དེའང་རྒྱལ་པོ་དར་ཡཱས་སྲིད་སྐྱོང་བའི་ལོ་གཉིས་པའི་ཟླ་དགུ་པ་ཡི་ཚེས་ཉེར་བཞི་ལ་གཙོ་བོ་ཡ་ཝཱེའི་བཀའ་ནི་ལུང་སྟོན་པ་ཧག་གཱ་ཨི་ལ་བྱུང་སྟེ་འདི་སྐད་དུ།
[11] དཔུང་ཚོགས་ཀྱི་ཡ་ཝཱེས་འདི་སྐད་དུ། ཁྱོད་ཀྱིས་མཆོད་དཔོན་རྣམས་ལ་བཀའ་ཁྲིམས་ཕྱོགས་ཀྱི་དོན་རྣམས་འདི་ལྟར་དུ།
[12] གལ་ཏེ་མི་ཞིག་གིས་རང་གི་གོས་ཐུ་ཡིས་དམ་པའི་ཤ་འཁྱེར་རྗེས་ཡང་ཐུ་བ་དེ་བག་ལེབ་བམ། ཁུ་བའམ། རྒུན་ཆང་ངམ། སྣུམ་མམ་ཡང་ན་གང་རུང་གི་ཟས་ལ་ཐུག་ན། དེ་དམ་པར་བརྩིས་སམ་ཞེས་དྲིས་པ་ན། མཆོད་དཔོན་དག་གིས་ལན་དུ་དམ་པར་མི་བརྩིས་ཞེས་སྨྲས།
[13] ཡང་ཧག་གཱ་ཨི་ཡིས་འདི་ལྟར་དུ། གལ་ཏེ་རོ་ལ་རེག་པས་མི་གཙང་བ་གྱུར་བའི་མི་ཞིག་གིས་དངོས་པོ་འདི་དག་ལས་གཅིག་ལ་རེག་ན། དེ་མི་གཙང་བར་བརྩིས་སམ་ཞེས་དྲིས་པ་ན། མཆོད་དཔོན་རྣམས་ཀྱིས་ལན་དུ་མི་གཙང་བར་བརྩིས་སོ་ཞེས་སྨྲས་པ་དང་།
[14] དེ་ནས་ཧག་གཱ་ཨིས་ལན་དུ་ན་རེ། གཙོ་བོ་ཡ་ཝཱེས་འདི་སྐད་དུ་གསུངས་པ་དང་། དེ་བཞིན་དུ་མི་སྡེ་འདི་དང་། ཡུལ་ཁམས་འདི་དང་། དེ་དག་ལག་གི་ལས་ཐམས་ཅད་དང་། ཁོ་ཚོས་གནས་དེར་ཕུལ་བ་ཐམས་ཅད་མི་གཙང་བ་ཡིན་ཞེས་སྨྲས་སོ།།
[15] གཙོ་བོ་ཡ་ཝཱེའི་མཆོད་ཁང་གི་རྡོ་གཅིག་ཐོག་གཅིག་ལ་མ་བརྩེགས་སྔོན་དུ། ད་ལྟ་ཁྱོད་ཚོས་རང་སྐྱོན་རང་གིས་བརྟག་སྟེ་དེ་རིང་ནས་བཟུང་སྔོན་གྱི་དུས་དྲོན་ཞིག
[16] དུས་དེར་ཁྱོད་རྣམས་ཅི་འདྲ་ཡིན་ནམ། མི་ཞིག་འབྲུ་རིགས་མང་སར་འོངས་ཏེ། འབྲུ་རིགས་རྒྱ་མ་བཞི་བརྒྱ་ཐོབ་འདོད་ཀྱང་རྒྱ་མ་ཉེར་བརྒྱ་མ་གཏོགས་མ་ཐོབ་ལ། མི་ཞིག་ཆང་བཙགས་སར་ཕྱིན་ནས། ཆང་རྫ་ལས་ཆང་སྤྱི་བྲེ་བརྒྱ་ཐོབ་འདོད་ཀྱང་སྤྱི་བྲེ་བཞི་བཅུ་མ་གཏོགས་མ་ཐོབ་པ་ཡིན།
[17] གཙོ་བོ་ཡ་ཝཱེས་འདི་སྐད་དུ། ངས་སྐེམ་རླུང་དང་བམ་པ། སེར་བས་ཁྱོད་རྣམས་དང་། ཁྱོད་ཀྱི་ལག་པའི་ལས་ཐམས་ཅད་ལ་རྒོལ་ཡང་། ཁྱོད་རྣམས་ངའི་ཕྱོགས་སུ་མ་ལོག་གོ །
[18] ཟླ་དགུ་པའི་ཚེས་ཉེར་དགུ་སྟེ་གཙོ་བོ་ཡ་ཝཱེའི་མཆོད་ཁང་གི་རྨང་གཞི་བཏིངས་པའི་ཉིན་མོ་ནས་བཟུང་ཁྱོད་ཚོས་རང་སྐྱོན་རང་གིས་རྟོགས་ཤིག ཁྱོད་ཚོས་རང་སྐྱོན་རང་གིས་བརྟག་སྟེ་དེ་རིང་ནས་བཟུང་སྔོན་གྱི་དུས་དྲོན་ཞིག
[19] འབྲུ་མཛོད་དུ་ད་དུང་ས་བོན་ཡོད་དམ། རྒུན་འབྲུམ་ཤིང་དང་། སེ་ཡབ་ཤིང་དང་། སེ་འབྲུ་ཤིང་དང་། སྐྱུ་རུ་ཤིང་ལ་ད་དུང་འབྲས་བུ་ཐོགས་མེད་པ་མ་ཡིན་ནམ། དུས་དེ་རིང་ནས་བཟུང་ངས་བྱིན་རླབས་གནང་བར་འགྱུར།
[20] ཟླ་དེའི་ཚེས་ཉེར་བཞི་ལ་གཙོ་བོ་ཡ་ཝཱེའི་བཀའ་ནི་ཡང་བསྐྱར་ཧག་གཱ་ཨིར་བྱུང་སྟེ་འདི་སྐད་དུ།
[21] ཁྱོད་ཀྱིས་ཡ་ཧུ་དཱའི་མགོ་དཔོན་ཟེ་རུ་པཱ་པེལ་འདི་ལྟར་དུ་སྦྲོན་ཞིག ངས་གནམ་ས་གཉིས་གཡོ་བར་འགྱུར་ཞིང་།
[22] ངས་ཡུལ་ཁམས་ཀུན་གྱི་གསེར་ཁྲི་ལོག་པར་འཇུག་ཅིང་། ཕྱི་རོལ་པའི་རྒྱལ་ཁམས་ཀུན་གྱི་སྟོབས་ཤུགས་མེད་པར་བྱ་སྟེ། ཡང་ངས་འཐབ་འཁོར་དང་དེའི་ཁ་ལོ་པ་རྣམས་ལོག་པར་འཇུག་ཅིང་། དེ་ནས་རྟ་དང་རྟ་པ་རྣམས་སར་འགྱེལ་བར་འགྱུར་ཏེ། མི་རེ་རེ་རང་གི་སྤུན་གྱི་རལ་གྲི་འོག་ཏུ་སྲོག་ཤོག་བར་འགྱུར་ཞེས་གསུངས་སོ།།
[23] དཔུང་ཚོགས་ཀྱི་ཡ་ཝཱེས་འདི་སྐད་དུ། ཀྱེ་ཞིད་ཨལ་ཐེ་ཨེལ་གྱི་བུ་སྟེ་ངའི་བྲན་པོ་ཟེ་རུ་པཱ་པེལ་ལགས། ཉིན་དེར་ངས་ཁྱོད་ནི་མཐོ་སར་དྲངས་ཏེ་ཁྱོད་ནི་དཔེ་ལེགས་སུ་འཇོག་གོ་ཅེས་གཙོ་བོ་ཡ་ཝཱེས་གསུངས་པ་དང་། ཡང་དཔུང་ཚོགས་ཀྱི་ཡ་ཝཱེས་འདི་སྐད་དུ། དེ་ཅིའི་ཕྱིར་ཞེ་ན། ངས་ཁྱོད་རང་བདམས་པའི་ཕྱིར་ཞེས་གསུངས་སོ།།