[1] ఇస్రాయేల్ ప్రజల అన్ని గోత్రాలవారు హెబ్రోనులో దావీదు దగ్గరికి వచ్చి ఇలా అన్నారు: “మేము మీకు సన్నిహిత బంధువులం.
[2] మునుపు సౌలు ఇంకా మమ్మల్ని పరిపాలిస్తున్నప్పుడు దండయాత్రలలో ఇస్రాయేల్ వారిని నడిపించినది మీరే. యెహోవా నా ఇస్రాయేల్ ప్రజలకు నీవు కాపరిగా ఉంటావు, వారి మీద పరిపాలకుడుగా ఉంటావు అని మీతో చెప్పాడు గదా.”
[3] ఇస్రాయేల్ ప్రజల పెద్దలందరూ హెబ్రోనులో దావీదురాజు దగ్గరకు వచ్చిన తరువాత అక్కడ యెహోవా సన్నిధానంలో రాజు వారితో ఒడంబడిక చేశాడు. అప్పుడు వారు దావీదును ఇస్రాయేల్ ప్రజల మీద రాజుగా అభిషేకించారు.
[4] దావీదు రాజైనప్పుడు అతని వయసు ముప్ఫయి సంవత్సరాలు. అతడు నలభై సంవత్సరాలు పరిపాలించాడు.
[5] హెబ్రోనులో అతడు యూదావారిమీద ఏడు సంవత్సరాలు ఆరు నెలలు పరిపాలించాడు. జెరుసలంలో ఇస్రాయేల్, యూదాల ప్రజలందరిమీదా ముప్ఫయి మూడు సంవత్సరాలు పరిపాలించాడు.
[6] యోబూసిజాతి వాళ్ళు జెరుసలంలో కాపురం ఉన్నప్పుడు వాళ్ళ పై పడడానికి దావీదు, అతని మనుషులు అక్కడికి వెళ్ళారు. యెబూసివాళ్ళు “దావీదు లోపలికి రాలేడు” అను కొని దావీదుతో “నీవు లోపలికి రాలేవు. ఇక్కడి గుడ్డివాళ్ళూ కుంటివాళ్ళూ కూడా నిన్ను తోలివేయగలరు” అన్నారు.
[7] అయినా దావీదు, కోట ఉన్న సీయోనును స్వాధీనం చేసుకొన్నాడు. అది దావీదు నగరం.
[8] ఆ రోజు దావీదు “దావీదుకు అసహ్యంగా ఉన్న ఆ ‘గుడ్డివాళ్ళ’ పై ‘కుంటివాళ్ళ’ పై పడి యెబూసివాళ్ళను ఎవరైనా ఓడించాలంటే నీటి కాలువగుండా పైకి వెళ్ళాలి” అన్నాడు. అందుచేత ‘గుడ్డివాళ్ళు’, ‘కుంటివాళ్ళు’ భవనంలో అడుగు పెట్టకూడదంటారు.
[9] దావీదు కోట ఉన్న ఆ స్థలంలో కాపురమేర్పరచుకొని దానికి ‘దావీదు నగరం’ అనే పేరు పెట్టాడు. కోటనుంచి లోపలికి, చుట్టూరా ఉన్న స్థలమంతటిలో నగరాన్ని కట్టించాడు.
[10] సేనలప్రభువు యెహోవా అతనికి తోడుగా ఉన్నాడు, గనుక దావీదు గొప్ప అభివృద్ధి పొందుతూ వచ్చాడు.
[11] తూరు నగరం రాజైన హీరాం రాయబారులను దావీదు దగ్గరికి పంపాడు. వాళ్ళతోకూడా దేవదారు మ్రానులనూ వడ్రంగులనూ తాపీ పనివాళ్ళనూ పంపాడు. వాళ్ళు దావీదుకోసం భవనాన్ని కట్టారు.
[12] ఇస్రాయేల్ ప్రజలమీద యెహోవా తనను రాజుగా స్థిరపరచాడనీ దావీదు గ్రహించాడు.
[13] దావీదు హెబ్రోనునుంచి వచ్చిన తరువాత జెరుసలంలో ఇంకా కొంతమంది ఉంపుడుకత్తెలనూ భార్యలనూ చేసు కొన్నాడు. అతనికి ఇంకా కొంతమంది కొడుకులూ కూతుళ్ళూ జన్మించారు.
[14] జెరుసలంలో అతనికి జన్మించినవాళ్ళ పేర్లు ఇవి: షమ్మూవ, శోబాబు, నాతాను, సొలొమోను,
[15] ఇభారు, ఎలీషూవ, నెపెగు, యాఫీయ,
[16] ఎలీషామా, ఎల్యాదా, ఎలీపెలెటు.
[17] ప్రజలు ఇస్రాయేల్ మీద దావీదును రాజుగా అభిషేకం చేశారని ఫిలిష్తీయవాళ్ళు విన్నప్పుడు అతణ్ణి పట్టుకోవడానికి వాళ్ళంతా దండెత్తి వచ్చారు. అది విని దావీదు తన భద్రమైన స్థలానికి వెళ్ళాడు.
[18] ఫిలిష్తీయవాళ్ళు వచ్చి రెఫాయిం లోయలో వ్యాపించారు.
[19] దావీదు “నేను వెళ్ళి ఫిలిష్తీయవాళ్ళ పై పడాలా? నీవు వాళ్ళను నా వశం చేస్తావా?” అని యెహోవాను ప్రార్థించాడు. అందుకు యెహోవా “వెళ్ళు. నేను వాళ్ళను నీ వశం చేసితీరుతాను” అని జవాబిచ్చాడు.
[20] అందుచేత దావీదు బయల్ పెరాజీంకు వెళ్ళి వాళ్ళను ఓడించాడు. అప్పుడు దావీదు “వరదలు కొట్టుకుపోయే విధంగా యెహోవా నా శత్రువులను నా ఎదుట నాశనం చేశాడు” అని చెప్పాడు. కనుకనే ఆ స్థలాన్ని ‘బయల్ పెరాజీం’ అంటారు.
[21] అక్కడ ఫిలిష్తీయవాళ్ళు తమ విగ్రహాలను విడిచిపెట్టి పారిపోయారు. దావీదు, అతని మనుషులు వాటిని తీసుకువెళ్ళారు.
[22] మరోసారి ఫిలిష్తీయవాళ్ళు వచ్చి రెఫాయిం లోయలో వ్యాపించారు.
[23] దావీదు యెహోవాను సంప్రదించినప్పుడు యెహోవా “నీవు తిన్నగా వెళ్ళవద్దు. చుట్టు తిరిగి వాళ్ళ వెనక్కు వెళ్ళి కంబళి చెట్లకు ఎదురుగా వాళ్ళ పైబడు.
[24] కంబళి చెట్ల కొనలలో అడుగుల చప్పుడు వినగానే త్వరగా ముందుకు సాగు. ఫిలిష్తీయ సైన్యాన్ని హతం చేయడానికి యెహోవా నీ ముందు బయలు దేరుతున్నాడన్నమాట” అని జవాబిచ్చాడు.
[25] యెహోవా ఆజ్ఞాపించినట్టే దావీదు చేసి గెబనుంచి గెజెరు వరకు ఫిలిష్తీయవాళ్ళను తరుముతూ హతం చేశాడు.