[1] وَ الرَّاجِلْ وَدَّانِي دَاخَلْ فِي الْبَيْت الْكَبِيرْ هَنَا الْبَيْت الْمُقَدَّسْ. وَ هُو كَالْ تُخُنْ عَمَدْ الْبَابْ وَ لِقِيهْ 6 دُرَاعْ بِالنُّصّ الْوَاحِدْ وَ 6 دُرَاعْ بِالنُّصّ الْآخَرْ. وَ دَاهُو عُرْض الْبَيْت الْمُقَدَّسْ.
[2] عُرْض بَابْ الْمَدَخَلْ 10 دُرَاعْ وَ دَرَادِرَهْ جَايْ وَ جَايْ لَيَّهْ، أَيِّ وَاحِدْ عِنْدَهْ 5 دُرَاعْ. وَ الرَّاجِلْ كَالْ الْبَيْت الْكَبِيرْ هَنَا الْبَيْت الْمُقَدَّسْ وَ لِقِي طُولَهْ 40 دُرَاعْ وَ عُرْضَهْ 20 دُرَاعْ.
[3] وَ بَعَدْ دَا، هُو دَخَلْ دَاخَلْ فِي الْبَيْت الْمُقَدَّسْ. وَ هُو كَالْ تُخُنْ عَمَدْ الْبَابْ وَ لِقِيهُمْ 2 دُرَاعْ. وَ عُرْض الْبَابْ 6 دُرَاعْ وَ دَرَادِرَهْ جَايْ وَ جَايْ لَيَّهْ، أَيِّ وَاحِدْ عِنْدَهْ 7 دُرَاعْ.
[4] وَ هُو كَالْ الْبَيْت الدَّاخَلْ فِي الْبَيْت الْمُقَدَّسْ وَ لِقِي طُولَهْ 20 دُرَاعْ وَ عُرْضَهْ 20 دُرَاعْ. وَ قَالْ لَيِّ: «دَا الْبَكَانْ الْمُقَدَّسْ مَرَّةْ وَاحِدْ.»
[5] وَ بَعَدْ دَا، مَرَقْنَا بَرَّا. وَ الرَّاجِلْ كَالْ تُخُنْ الدُّرْدُرْ هَنَا الْبَيْت الْمُقَدَّسْ وَ لِقِيهْ 6 دُرَاعْ. وَ فِيَّهْ غُرَفْ جَانِبِيِّينْ الْمُحَوِّقِينْ الْبَيْت وَ أَيِّ غُرْفَةْ عُرْضَهَا 4 دُرَاعْ.
[6] وَ الْغُرَفْ الْجَانِبِيِّينْ لِلْبَيْت قَاعِدِينْ فِي قَصِرْ الْعِنْدَهْ تَلَاتَةْ دَرَجَاتْ وَ أَيِّ دَرَجَةْ عِنْدَهَا 30 غُرْفَةْ. وَ الْغُرَفْ دَوْل مَبْنِيِّينْ مَعَ طُولْ الدُّرْدُرْ الْبَرَّانِي هَنَا الْبَيْت وَ لَاكِنْ مَا مُلَصَّقِينْ فِي الدُّرْدُرْ هَنَا الْبَيْت ذَاتَهْ.
[7] وَ فِي أَيِّ دَرَجَةْ هَنَا الْقَصِرْ، الْغُرَفْ شَالَوْا بَكَانْ زِيَادَةْ وَ دَا مُحَوِّقْ كُلَّ الْبَيْت. وَ يَطْلَعَوْا فِي الْقَصِرْ دَا بِعَتَبَةْ مِنْ الدَّرَجَةْ التِّحِتْ عَلَيْ الدَّرَجَةْ الْأُسُطْ لَحَدِّي الدَّرَجَةْ الْفَوْق.
[8] وَ أَنَا دَنْقَرْت وَ شِفْت الْبَيْت الْمُقَدَّسْ عِنْدَهْ أَسَاسْ حَوَالَيَّهْ الْيِسَاوِي 6 دُرَاعْ كُبَارْ. وَ دَا، أَسَاسْ الْغُرَفْ الْجَانِبِيِّينْ كُلَ.
[9] وَ الدُّرْدُرْ الْبَرَّانِي هَنَا الْغُرَفْ الْجَانِبِيِّينْ، تُخْنَهْ 5 دُرَاعْ. وَ فِيَّهْ فَرَقَةْ بَيْن الْغُرَفْ الْجَانِبِيِّينْ
[10] وَ غُرَفْ الْبَيْت. وَ عُرْض الْفَرَقَةْ دِي 20 دُرَاعْ فِي كُلِّ جِيهَةْ مِنْ الْبَيْت الْمُقَدَّسْ.
[11] وَ بِيبَانْ الْغُرَفْ الْجَانِبِيِّينْ مُوَجِّهِينْ عَلَيْ الْفَرَقَةْ دِي. وَ فِيَّهْ مَدَخَلْ وَاحِدْ مُوَجِّهْ مُنْشَاقْ وَ آخَرْ مُوَجِّهْ وَطِي. وَ الدُّرْدُرْ الْيِحَوِّقْ الْفَرَقَةْ دِي، تُخْنَهْ 5 دُرَاعْ فِي أَيِّ جِيهَةْ.
[12] وَ فِيَّهْ بَيْت كَبِيرْ قَاعِدْ بِالنُّصّ الْغَرْبَانِي هَنَا الْفَضَايْ الدَّخْلَانِيَّةْ. وَ طُولَهْ 90 دُرَاعْ وَ عُرْضَهْ 70 دُرَاعْ وَ تُخُنْ الدُّرْدُرْ هَنَا الْبَيْت دَا 5 دُرَاعْ فِي كُلِّ جِيهَةْ.
[13] وَ الرَّاجِلْ كَالْ طُولْ الْبَيْت الْمُقَدَّسْ وَ لِقِيهْ 100 دُرَاعْ. وَ الْبَيْت الْكَبِيرْ الْفِي الْغَرِبْ وَ دَرَادِرَهْ وَ فَرَقَتَهْ كُلَ عُرْضُهُمْ 100 دُرَاعْ.
[14] وَ صَبَاحْ لِلْبَيْت الْمُقَدَّسْ، عُرْض الْفَضَايْ الدَّخْلَانِيَّةْ عِنْدَهْ 100 دُرَاعْ.
[15] وَ الرَّاجِلْ كَالْ طُولْ الْبَيْت الْكَبِيرْ الْفِي الْغَرِبْ وَ هُو وَ دُرُوبَهْ، طُولْهُمْ 100 دُرَاعْ. وَ الْبَيْت الْكَبِيرْ الْأُسُطْ هَنَا الْبَيْت الْمُقَدَّسْ وَ غُرْفَةْ الْمَدَخَلْ،
[16] دَرَادِرْهُمْ مُغَطَّيِينْ بِخَشَبْ. وَ الْعِيدَانْ الْيَرْكَبَوْا فَوْقهُمْ الْبِيبَانْ وَ الشَّبَابِيكْ الْعِنْدُهُمْ حَدِيدْ مَضْفُورْ وَ الدُّرُوبْ الْيِحَوُّقُوا الْقُصُورْ هَنَا تَلَاتَةْ دَرَجَاتْ، كُلُّهُمْ مُغَطَّيِينْ بِخَشَبْ مِنْ الْأَرْض لَحَدِّي الشَّبَابِيكْ. وَ كُلَّ الشَّبَابِيكْ مُغَطَّيِينْ.
[17] وَ مِنْ غُرْفَةْ الْمَدَخَلْ لَحَدِّي الْبَيْت الدَّاخَلْ، الْبَيْت وَ كُلَّ دَرَادِرَهْ مُجَمَّلْ فِي أَيِّ بَكَانْ، بِبَرَّا وَ دَاخَلْ كُلَ.
[18] رَسَمَوْا فَوْقَهْ صُوَرْ هَنَا مَخْلُوقِينْ سَمَاوِيِّينْ وَ شَدَرْ نَخَلْ. وَ أَمْبَيْن أَيِّ مَخْلُوقِينْ سَمَاوِيِّينْ إِتْنَيْن، فِيَّهْ نَخَلَايْ. وَ أَيِّ مَخْلُوقْ سَمَاوِي عِنْدَهْ وُجُوهْ إِتْنَيْن.
[19] وِجْهَهْ الْوَاحِدْ هَنَا إِنْسَانْ مُوَجِّهْ عَلَيْ النَّخَلَايْ بِنُصّ وَاحِدْ. وَ وِجْهَهْ الْآخَرْ هَنَا دُودْ مُوَجِّهْ عَلَيْ النَّخَلَايْ بِالنُّصّ الْآخَرْ. وَ بِالرَّسِمْ دَا، حَوَّقَوْا كُلَّ الْبَيْت الْمُقَدَّسْ.
[20] رَسَمَوْا الْمَخْلُوقِينْ السَّمَاوِيِّينْ وَ النَّخَلْ فِي الدَّرَادِرْ مِنْ تِحِتْ لَحَدِّي فَوْق مِنْ الْبِيبَانْ.
[21] وَ عِيدَانْ الْبَابْ هَنَا الْبَيْت الْكَبِيرْ الْأُسُطْ هَنَا الْبَيْت الْمُقَدَّسْ دَا، مُرَبَّعِينْ. وَ قِدَّامْ الْبَكَانْ الْمُقَدَّسْ مَرَّةْ وَاحِدْ، بِنْشَافْ شَيّءْ مِثِلْ
[22] مَدْبَحْ هَنَا حَطَبْ. عُرْضَهْ 2 دُرَاعْ وَ طُولَهْ فَوْق 3 دُرَاعْ. وَ كَوْنجَاتَهْ وَ قَعَرَهْ وَ جَوَانِبَهْ كُلَ مِنْ حَطَبْ. وَ الرَّاجِلْ قَالْ لَيِّ: «دِي الطَّرَبَيْزَةْ الْقَاعِدَةْ قِدَّامْ اللّٰهْ.»
[23] الْبَكَانْ الْمُقَدَّسْ مَرَّةْ وَاحِدْ وَ الْبَيْت الْكَبِيرْ الْأُسُطْ هَنَا الْبَيْت الْمُقَدَّسْ، كُلُّهُمْ عِنْدُهُمْ بِيبَانْ أَبْ ضَلْفِتَيْن.
[24] وَ أَيِّ بَابْ مِنْ الْبِيبَانْ الْإِتْنَيْن دَوْل عِنْدَهْ ضَلْفِتَيْن الْيِلِفُّوا.
[25] وَ رَسَمَوْا مَخْلُوقِينْ سَمَاوِيِّينْ وَ نَخَلْ فِي الْبِيبَانْ دَوْل مِثِلْ رَسَمَوْهُمْ فِي الدَّرَادِرْ. وَ فِيَّهْ خَشَبَةْ تِضَلِّلْ قِدَّامْ غُرْفَةْ الْمَدَخَلْ بَرَّا.
[26] وَ فِي دَرَادِرْ غُرْفَةْ الْمَدَخَلْ، فِيَّهْ شَبَابِيكْ الْعِنْدُهُمْ حَدِيدْ مَضْفُورْ وَ رَسَمَوْا نَخَلْ فِي أَيِّ بَكَانْ. وَ رَسَمَوْا نَخَلْ فِي الْغُرَفْ الْجَانِبِيِّينْ هَنَا الْبَيْت وَ فِي الْخَشَبَةْ التِّضَلِّلْ قِدَّامْهُمْ كُلَ.