[1] وَ اللّٰهْ قَالْ لَيِّ بَتَّانْ: «أَسْمَعْ، يَا إِبْن آدَمْ، شِيلْ دِرِنْقَيْلَايْ وَ خُطَّهَا قِدَّامَكْ وَ أَرْسِمْ فَوْقهَا صُورَةْ مَدِينَةْ الْقُدُسْ.
[2] وَ فِي الدِّرِنْقَيْلَايْ دِي، وَصِّفْ حِصَارْ الْمَدِينَةْ وَ أَبْنِي ضِدَّهَا خَنَادِقْ وَ رَدْمِيَّةْ وَ خُطّ مُعَسْكَرْ قِدَّامْهَا وَ حَوِّقْهَا بِمَرَادِيسْ الْيُدُقُّوا بَيْهُمْ بِيبَانْ الْمَدِينَةْ.
[3] وَ شِيلْ سَاجَةْ هِنْت حَدِيدْ وَ خُطَّهَا بَيْنَكْ وَ بَيْن الْمَدِينَةْ مِثِلْ دُرْدُرْ. وَ وَجِّهْ عَلَيْ الْمَدِينَةْ وَ شِيفْهَا. خَلَاصْ هِي تِلْحَاصَرْ أَشَانْ إِنْتَ خَطَّيْت الْحِصَارْ قِدَّامْهَا. وَ دِي عَلَامَةْ لِبَنِي إِسْرَائِيلْ.
[4] «وَ أَرْقُدْ بِالْإِسْرَةْ وَ شِيلْ فَوْقَكْ خَطَا بَنِي إِسْرَائِيلْ. وَ تِشِيلْ خَطَاهُمْ طُولْ الْأَيَّامْ الْإِنْتَ رَاقِدْ فَوْقهُمْ بِنُصَّكْ دَا.
[5] وَ أَنَا نَقْطَعْ لَيْك عَدَدْ الْأَيَّامْ الْمُوَافِقْ لِعَدَدْ السِّنِينْ هَنَا خَطَاهُمْ. وَ بَيْدَا، تِشِيلْ خَطَا بَنِي إِسْرَائِيلْ لِمُدَّةْ 390 يَوْم.
[6] وَ بَعَدْ تِكَمِّلْ الْأَيَّامْ دَوْل، بَتَّانْ تَرْقُدْ بِالزَّيْنَةْ وَ تِشِيلْ فَوْقَكْ خَطَا بَنِي يَهُوذَا لِمُدَّةْ 40 يَوْم. وَ بَيْدَا، نَقْطَعْ لَيْك يَوْم وَاحِدْ لِأَيِّ سَنَةْ هَنَا خَطَاهُمْ.
[7] وَ وَجِّهْ عَلَيْ صُورَةْ مَدِينَةْ الْقُدُسْ الْمُحَاصَرَةْ وَ مِدّ دُرَاعَكْ مُكْشُوفْ وَ أَتْنَبَّأْ ضِدَّهَا.
[8] وَ دَاهُو أَنَا نِرَبِّطَكْ بِحُبَالْ أَشَانْ مَا تَقْدَرْ تِشَّقْلَبْ مِنْ نُصَّكْ الْوَاحِدْ عَلَيْ الْآخَرْ لَحَدِّي تِكَمِّلْ أَيَّامْ الْحِصَارْ.
[9] «وَ شِيلْ قَمَحْ أَحْمَرْ وَ قَمَحْ أَبْيَضْ وَ لُبْيَى وَ عَدَسْ وَ دُرَةْ وَ قَمَحْ هَنَا الْكَدَادَةْ وَ خُطُّهُمْ فِي مَاعُونْ وَاحِدْ. وَ سَوِّي مِنْهُمْ خُبْزَةْ التَّاكُلْهَا فِي مُدَّةْ الْأَيَّامْ الْإِنْتَ رَاقِدْ فَوْقهُمْ بِنُصَّكْ وَ دَا لِمُدَّةْ 390 يَوْم.
[10] وَ أَكْلَكْ التَّاكُلَهْ دَا بِمِيزْ مِثِلْ مَلْيَةْ إِيدْ إِتْنَيْن فِي الْيَوْم وَ دَا بَسْ يَبْقَى أَكْلَكْ فِي أَيِّ يَوْم.
[11] وَ أَلْمِي شَرَابَكْ كُلَ بِمِيزْ وَ دَا مِثِلْ رُبُعْ كَوْرَوْ فِي الْيَوْم وَ دَا بَسْ يَبْقَى شَرَابَكْ فِي أَيِّ يَوْم.
[12] إِنْتَ تِسَوِّي كِسَارْ هَنَا قَمَحْ أَبْيَضْ التِّسَلِّلَهْ قِدَّامْ كُلَّ النَّاسْ فِي نَارْ الْمُقَبَّضَةْ بِهُرَارْ هَنَا نَاسْ.»
[13] وَ اللّٰهْ قَالْ بَتَّانْ: «أَيْوَى، مِثِلْ دَا بَنِي إِسْرَائِيلْ يَاكُلُوا خُبْزِتْهُمْ الْمُنَجَّسَةْ وَكِتْ أَنَا نَطْرُدْهُمْ وَ يَمْشُوا فِي الْغُرْبَةْ فِي أُسْط الْأُمَمْ.»
[14] وَ أَنَا رَدَّيْت وَ قُلْت: «يَا اللّٰهْ الرَّبّ، بِهُرَارْ هَنَا نَاسْ! أَبَداً أَنَا مَا نَجَّسْت نَفْسِي مِنْ أَنَا صَغَيَّرْ. وَ لَحَدِّي الْيَوْم، أَنَا وَ لَا أَكَلْت رِمَّةْ وَ لَا جِيفَةْ هَنَا حَيْوَانْ مَيِّتْ. وَ فِي خَشْمِي، مَا دَخَّلْت لَحَمْ فَطِيسْ.»
[15] وَ هُو قَالْ لَيِّ: «كَنْ كَيْ دَا، خَلَاصْ قَبِّضْ نَارَكْ بِبَعَرْ الْبَقَرْ فِي بَدَلْ هُرَارْ النَّاسْ وَ إِنْتَ سَوِّي بَيَّهْ أَكْلَكْ.»
[16] وَ قَالْ لَيِّ بَتَّانْ: «يَا إِبْن آدَمْ، أَنَا نِقَلِّلْ الْمَعَاشْ فِي مَدِينَةْ الْقُدُسْ. وَ هُمَّنْ يَاكُلُوا الْخُبْزَةْ بِمِيزْ وَ هَمّ وَ يَشَرْبَوْا أَلْمِي كُلَ بِمِيزْ وَ خَوْف.
[17] وَ بَيْدَا، الْخُبْزَةْ وَ الْأَلْمِي يَبْقَوْا مَا فِيهُمْ. وَ أَيِّ وَاحِدْ يَحْزَنْ وَ يَبْطُلْ بِسَبَبْ خَطَاهُمْ.»