[1] وَ اللّٰهْ حَجَّى لَيِّ وَ قَالْ:
[2] «يَا إِبْن آدَمْ، وَجِّهْ عَلَيْ بَنِي عَمُّونْ وَ أَتْنَبَّأْ ضِدُّهُمْ.
[3] وَ قُولْ لَيْهُمْ: ‹أَسْمَعَوْا كَلَامْ اللّٰهْ الرَّبّ. دَاهُو اللّٰهْ الرَّبّ قَالْ: ”إِنْتُو أَشَّمَّتَوْا وَكِتْ مَا أَحْتَرَمَوْا بَيْتِي الْمُقَدَّسْ وَ وَكِتْ بَلَدْ إِسْرَائِيلْ خِرْبَتْ وَ بَنِي يَهُوذَا وَدَّوْهُمْ فِي الْغُرْبَةْ.
[4] وَ فِي شَانْ دَا، أَنَا نِسَلِّمْكُو مِثِلْ وَرَثَةْ لِنَاسْ الصَّبَاحْ وَ هُمَّنْ يُخُطُّوا فُرْقَانْهُمْ فِي أُسُطْكُو وَ يَبْنُوا بُيُوتْهُمْ. وَ هُمَّنْ بَسْ يَاكُلُوا فَوَاكِهْكُو وَ يَشَرْبَوْا لَبَنْكُو.
[5] وَ مَدِينَةْ رَبَّةْ نِسَوِّيهَا مَرْعَى هَنَا إِبِلْ وَ بَلَدْ عَمُّونْ تَبْقَى بَكَانْ سَرْحَةْ هَنَا غَنَمْ. وَ بَيْدَا، تَعَرْفُوا كَدَرْ أَنَا بَسْ اللّٰهْ.“›»
[6] وَ دَاهُو اللّٰهْ الرَّبّ قَالْ: «وَكِتْ بَلَدْ إِسْرَائِيلْ لِقَتْ ضِيقَةْ، إِنْتُو صَفَّقْتُوا وَ نَطَّطْتُوا وَ فِرِحْتُوا مِنْ دَاخَلْ قُلُوبْكُو بِكُلَّ كَرَاهِيِّتْكُو.
[7] وَ فِي شَانْ دَا، أَكِيدْ أَنَا نَرْفَعْ إِيدِي ضِدُّكُو وَ نِسَلِّمْكُو لِلْأُمَمْ يَنْهَبَوْكُو وَ نَفْصُلْكُو مِنْ الشُّعُوبْ وَ نِدَمِّرْكُو مِنْ أُسْط الْبُلْدَانْ وَ نُقُشُّكُو مَرَّةْ وَاحِدْ. وَ بَيْدَا، تَعَرْفُوا كَدَرْ أَنَا بَسْ اللّٰهْ.»
[8] وَ دَاهُو اللّٰهْ الرَّبّ قَالْ: «نَاسْ بَلَدْ مُوَابْ وَ بَلَدْ سَعِيرْ قَالَوْا: ‹هَسَّعْ، بَنِي يَهُوذَا بِقَوْا ضَعِيفِينْ مِثِلْ الْأُمَمْ الْآخَرِينْ.›
[9] وَ فِي شَانْ دَا، دَاهُو أَنَا نِخَلِّي يَهْجُمُوا الْمُدُنْ الْيَحْمُوا بَلَدْ مُوَابْ. وَ الْعَدُو يِدَمِّرْهُمْ الْوَاحِدَةْ بَعَدْ الْآخَرَةْ حَتَّى الْمُدُنْ الْجَمِيلِينْ مِثِلْ بَيْت يَشِيمُتْ وَ بَعَلْ مَاعَوْن وَ قِرْيَتَايِمْ يِدَّمَّرَوْا خَلَاصْ.
[10] وَ لِنَاسْ الصَّبَاحْ، أَنَا نَنْطِيهُمْ بَلَدْ مُوَابْ وَرَثَةْ مِثِلْ أَنْطَيْتهُمْ بَلَدْ عَمُّونْ أَشَانْ مَا يِذَّكَّرَوْهَا بَتَّانْ فِي أُسْط الْأُمَمْ.
[11] وَ أَنَا نِعَاقِبْ مُوَابْ وَ بَيْدَا، هُمَّنْ يَعَرْفُوا كَدَرْ أَنَا بَسْ اللّٰهْ.»
[12] وَ دَاهُو اللّٰهْ الرَّبّ قَالْ: «نَاسْ بَلَدْ أَدَوْم بِقَوْا خَاطِيِّينْ وَكِتْ شَالَوْا التَّارْ فِي بَنِي يَهُوذَا.»
[13] وَ فِي شَانْ دَا، دَاهُو اللّٰهْ الرَّبّ قَالْ: «أَنَا نَرْفَعْ إِيدِي ضِدّ بَلَدْ أَدَوْم وَ نِدَمِّرْ النَّاسْ وَ الْبَهَايِمْ. وَ نَخْرِبْهَا مِنْ مَدِينَةْ تَيْمَانْ لَحَدِّي حِلَّةْ دَدَانْ وَ سُكَّانْهَا يُمُوتُوا بِالْحَرِبْ.
[14] وَ هَسَّعْ، أَنَا كُلَ نِشِيلْ تَارِي فِي أَدَوْم بِإِيدْ شَعَبِي بَنِي إِسْرَائِيلْ وَ هُمَّنْ يُقُمُّوا ضِدّ أَدَوْم حَسَبْ غَضَبِي وَ زَعَلِي. وَ خَلَاصْ بَيْدَا، يَعَرْفُوا تَارِي.» وَ دَا كَلَامْ اللّٰهْ الرَّبّ.
[15] وَ دَاهُو اللّٰهْ الرَّبّ قَالْ: «الْفِلِسْطِيِّينْ قَمَّوْا لِيِشِيلُوا التَّارْ. وَ شَالَوْا التَّارْ بِكُلَّ كَرَاهِيِّتْهُمْ مِنْ دَاخَلْ قُلُوبْهُمْ لِيِدَمُّرُوا عُدْوَانْهُمْ الْمِنْ زَمَانْ.»
[16] وَ فِي شَانْ دَا، دَاهُو اللّٰهْ الرَّبّ قَالْ: «أَنَا نَرْفَعْ إِيدِي ضِدّ الْفِلِسْطِيِّينْ. أَيْوَى، نَفْصُلْهُمْ هُمَّنْ الْمِنْ جَزِيرَةْ كِرِيتْ وَ نِدَمِّرْ الْفَضَّلَوْا مِنْ سُكَّانْ خَشُمْ الْبَحَرْ.
[17] وَ هَسَّعْ، أَنَا كُلَ نِشِيلْ فَوْقهُمْ تَارِي الْكَبِيرْ وَ نِعَاقِبْهُمْ بِغَضَبِي الشَّدِيدْ. وَ وَكِتْ نِشِيلْ فَوْقهُمْ تَارِي، خَلَاصْ هُمَّنْ يَعَرْفُوا كَدَرْ أَنَا بَسْ اللّٰهْ.»