[1] وَ يَوْم وَاحِدْ، عِيسَى قَاعِدْ جَنْب بَحَرْ جِنِّسَارَتْ. وَ النَّاسْ الْيِدَوْرُوا يَسْمَعَوْا كَلَامْ اللّٰهْ بِقَوْا كَتِيرِينْ بِلْحَيْن لَحَدِّي قَاعِدِينْ يِعَصُرُوهْ.
[2] وَ شَافْ مَرَاكِبْ إِتْنَيْن قَاعِدِينْ فِي خَشُمْ الْبَحَرْ. الْحَوَّاتِينْ مَا قَاعِدِينْ فَوْقهُمْ أَشَانْ نَزَلَوْا لِيِغَسُّلُوا شَرَكْهُمْ.
[3] وَ عِيسَى رِكِبْ فِي مَرْكَبَةْ وَاحِدَةْ وَ هِي هَنَا سِمْعَانْ. وَ طَلَبْ مِنْ سِمْعَانْ يِلِزَّهَا شِيَّةْ مِنْ خَشُمْ الْبَحَرْ. وَ قَعَدْ تِحِتْ فِي الْمَرْكَبَةْ وَ بَدَأْ يِعَلِّمْ النَّاسْ الْقَاعِدِينْ فِي خَشُمْ الْبَحَرْ.
[4] وَ وَكِتْ عِيسَى كَمَّلْ كَلَامَهْ، هُو حَجَّى لِسِمْعَانْ وَ قَالْ: وَدِّي الْمَرْكَبَةْ فِي أُسْط الْبَحَرْ وَ أَوْرِي نَاسَكْ يَزْقُلُوا الشَّرَكْ فِي الْأَلْمِي لِيَكُرْبُوا حُوتْ.
[5] وَ سِمْعَانْ رَدَّ لَيَّهْ وَ قَالْ: يَا سَيِّدْنَا، تِعِبْنَا طُولْ اللَّيْل وَ مَا كَرَبْنَا شَيْء. لَاكِنْ نَزْقُلْ الشَّرَكْ كَانْ إِنْتَ تِدَوْرَهْ.
[6] وَ وَكِتْ زَقَلَوْا شَرَكْهُمْ كَرَبَوْا حُوتْ كَتِيرْ بِلْحَيْن لَحَدِّي الشَّرَكْ يِدَوْر يِنْقَطِعْ مِنْ التَّقَلَةْ.
[7] وَ سَوَّوْا إِشَارَةْ لِزُمْلَانْهُمْ الْفِي الْمَرْكَبَةْ الْآخَرَةْ أَشَانْ يِعَاوُنُوهُمْ. وَ جَوْا مَلَوْا الْمَرَاكِبْ الْإِتْنَيْن تَكْ كَيْ لَحَدِّي الْمَرَاكِبْ يِدَوْرُوا يَغْطُسُوا.
[8] وَ وَكِتْ سِمْعَانْ بُطْرُسْ شَافْ الشَّيْء الْبِقِي دَا، هُو سَجَدْ قِدَّامْ رِجِلَيْن عِيسَى. وَ قَالْ: يَا رَبّ، كِسّ مِنِّي بَعِيدْ. أَنَا نَادُمْ مُذْنِبْ.
[9] وَ حَجَّى مِثِلْ دَا أَشَانْ هُو وَ كُلَّ جَمَاعْتَهْ فِي الْمَرْكَبَةْ أَسْتَغْرَبَوْا بِلْحَيْن مِنْ الْحُوتْ الْكَتِيرْ الْكَرَبَوْه.
[10] وَ زُمْلَانَهْ لِسِمْعَانْ، يَعْقُوبْ وَ يُوحَنَّا أَوْلَادْ زَبَدِي، كُلَ أَسْتَغْرَبَوْا مَعَايَهْ. وَ عِيسَى قَالْ لِسِمْعَانْ: مَا تَخَافْ. أَوَّلْ إِنْتَ كَرَبْت الْحُوتْ وَ مِنْ الْيَوْم تِكَرِّبْ النَّاسْ لِدَرِبْ اللّٰهْ.
[11] وَ مِنْ مَرَقَوْا مَرَاكِبْهُمْ فِي خَشُمْ الْبَحَرْ، خَلَّوْا كُلَّ شَيْء وَ تَابَعَوْا عِيسَى.
[12] وَ يَوْم وَاحِدْ عِيسَى قَاعِدْ فِي حِلَّةْ وَاحِدَةْ وَ نَادُمْ عِنْدَهْ بَرَصْ جَاءْ لَيَّهْ وَ النَّادُمْ دَا عِنْدَهْ بَرَصْ شَيْن. وَ وَكِتْ هُو شَافْ عِيسَى، هُو سَجَدْ قِدَّامَهْ وَ قَالْ: يَا سَيِّدْنَا، كَانْ تِدَوْر تِدَاوِينِي أَكِيدْ إِنْتَ تَقْدَرْ وَ نَبْقَى طَاهِرْ.
[13] وَ عِيسَى مَدَّ إِيدَهْ وَ لِمِسْ الْعِنْدَهْ بَرَصْ وَ قَالْ: نِدَوْر نِدَاوِيكْ. أَبْقَى طَاهِرْ. وَ عَجَلَةْ كَيْ بِقِي طَاهِرْ مِنْ الْبَرَصْ.
[14] وَ عِيسَى أَمَرَهْ وَ قَالْ لَيَّهْ: مَا تِأَوْرِي بَيَّهْ نَادُمْ. أَمْشِي وَصِّفْ نَفْسَكْ لِرَاجِلْ الدِّينْ وَ قَدِّمْ ضَحِيَّةْ لِلّٰهْ مِثِلْ النَّبِي مُوسَى وَصَّانَا. وَ مِثِلْ دَا، النَّاسْ يَعَرْفُوا إِنْتَ لِقِيتْ الْعَافَيْ وَ بِقِيتْ طَاهِرْ.
[15] لَاكِنْ بَيْدَا، خَبَرَهْ شَتَّتْ بِزِيَادَةْ فِي النَّاسْ. وَ نَاسْ كَتِيرِينْ بِلْحَيْن لَامِّينْ فَوْقَهْ أَشَانْ يِدَوْرُوا يَسْمَعَوْا كَلَامَهْ وَ هُو يِدَاوِي لَيْهُمْ أَمْرَاضْهُمْ.
[16] لَاكِنْ عِيسَى قَمَّ وِحَيْدَهْ مِثِلْ فِي عَادْتَهْ وَ مَشَى فِي الْخَلَاءْ أَشَانْ يِصَلِّي.
[17] وَ يَوْم آخَرْ، عِيسَى قَاعِدْ يِعَلِّمْ النَّاسْ. وَ فِي الْبَكَانْ دَا، فِي نَاسْ كَتِيرِينْ قَاعِدِينْ مَعَايَهْ مِنْ طَرِيقَةْ الْفَرِيسِيَّةْ وَ مِنْ الْعُلَمَاءْ. هُمَّنْ جَوْا مِنْ أَيِّ حِلَّةْ الْفِي دَارْ الْجَلِيلْ وَ الْيَهُودِيَّةْ وَ مِنْ مَدِينَةْ الْقُدُسْ. وَ قُدْرَةْ اللّٰهْ قَاعِدَةْ فَوْقَهْ أَشَانْ يِدَاوِي الْمَرْضَانِينْ.
[18] وَ رُجَالْ وَاحِدِينْ جَوْا. وَ هُمَّنْ شَايْلِينْ نَادُمْ مُكَرْسَحْ فِي سَرِيرَهْ. وَ دَوَّرَوْا يِنْدَسَّوْا بَيَّهْ دَاخَلْ وَ يُخُطُّوهْ قِدَّامْ عِيسَى.
[19] لَاكِنْ مَا قِدْرَوْا بِسَبَبْ النَّاسْ الْكَتِيرِينْ الْقَاعِدِينْ فِي الدَّرِبْ. وَ بَيْدَا رِكْبَوْا فِي رَاسْ الْبَيْت وَ قَدَّوْه بِفَوْق. وَ دَلَّوْا الْمَعْدُورْ بِسَرِيرَهْ فِي أُسْط النَّاسْ وَ خَطَّوْه قِدَّامْ عِيسَى.
[20] وَ عِيسَى شَافْ إِيمَانْهُمْ وَ حَجَّى لِلْمَعْدُورْ وَ قَالْ: يَا رَاجِلْ، أَنَا غَفَرْت لَيْك ذُنُوبَكْ.
[21] وَ الْعُلَمَاءْ وَ الْفَرِيسِيِّينْ بَدَوْا يِحَجُّوا فِي قُلُوبْهُمْ وَ يُقُولُوا: هَايْ! دَا يَاتُو الْيِحَجِّي كَلَامْ مُشْرِكْ؟ مَا فِي إِنْسَانْ الْيَقْدَرْ يَغْفِرْ لِلنَّاسْ ذُنُوبْهُمْ إِلَّا اللّٰهْ.
[22] وَ عِيسَى عِرِفْ الْكَلَامْ الْفِي قُلُوبْهُمْ. وَ رَدَّ لَيْهُمْ وَ قَالْ: مَالَا عِنْدُكُو سُؤَالْ فِي قُلُوبْكُو؟
[23] وَيْنُو الْهَيِّنْ نُقُولَهْ؟ نُقُولْ «غَفَرْت لَيْك ذُنُوبَكْ» وَلَّا نُقُولْ «قُمّ وَ رُوغْ»؟
[24] وَ لَاكِنْ نِدَوْر إِنْتُو تَعَرْفُوا كَدَرْ أَنَا، إِبْن الْإِنْسَانْ، عِنْدِي قُدْرَةْ فِي الْأَرْض أَشَانْ نَغْفِرْ لِلنَّاسْ ذُنُوبْهُمْ. وَ قَالْ لِلْمَعْدُورْ: قُمّ. شِيلْ سَرِيرَكْ وَ أَمْشِي بَيْتَكْ.
[25] وَ عَجَلَةْ كَيْ الْمَعْدُورْ قَمَّ قِدَّامْهُمْ وَ شَالْ السَّرِيرْ الْأَوَّلْ رَاقِدْ فَوْقَهْ وَ مَشَى بَيْتَهْ. وَ فِي دَرْبَهْ، هو قَاعِدْ يَشْكُرْ اللّٰهْ.
[26] وَ كُلُّهُمْ إسْتَغْرَبَوْا مَرَّةْ وَاحِدْ وَ قَمَّوْا يَشْكُرُوا اللّٰهْ. وَ الْخَوْف كَرَبَاهُمْ وَ قَالَوْا: الْيَوْم شِفْنَا شَيْء عَجِيبْ.
[27] وَ بَعَدَيْن عِيسَى مَرَقْ. وَ شَافْ نَادُمْ هَنَا الْجَمَارِكْ أُسْمَهْ لَاوِي. وَ هُو قَاعِدْ فِي مَكْتَبْ الْجَمَارِكْ. وَ عِيسَى قَالْ لَيَّهْ: تَعَالْ تَابِعْنِي.
[28] وَ خَلَاصْ لَاوِي خَلَّى كُلَّ شَيْء وَ قَمَّ تَابَعَهْ.
[29] وَ لَاوِي سَوَّى لَيَّهْ عَازُومَةْ كَبِيرَةْ فِي بَيْتَهْ. وَ فِي نَاسْ كَتِيرِينْ هَنَا الْجَمَارِكْ وَ بَتَّانْ نَاسْ آخَرِينْ الْمِثِلْهُمْ قَاعِدِينْ يَاكُلُوا مَعَايَهْ.
[30] وَ الْفَرِيسِيِّينْ وَ عُلَمَاهُمْ هَرَجَوْا تَلَامِيذْ عِيسَى. وَ قَالَوْا: مَالَا تَاكُلُوا مَعَ نَاسْ الْجَمَارِك وَ الْمُذْنِبِينْ؟
[31] وَ عِيسَى رَدَّ لَيْهُمْ وَ قَالْ: النَّاسْ الطَّيِّبِينْ مَا حَوْجَانِينْ دَكْتَوْر، إِلَّا الْمَرْضَانِينْ بَسْ الْحَوْجَانِينْ.
[32] أَنَا مَا جِيتْ أَشَانْ نَنَادِي الصَّالِحِينْ لِلتَّوْبَةْ لَاكِنْ نِنَادِي الْمُذْنِبِينْ.
[33] وَ قَالَوْا لَيَّهْ: تَلَامِيذْ يَحْيَى بُصُومُوا وَ بِصَلُّوا بِلْحَيْن. وَ تَلَامِيذْ الْفَرِيسِيِّينْ كُلَ بِسَوُّوا نَفْس الشَّيْء. لَاكِنْ تَلَامِيذَكْ إِنْتَ بَاكُلُوا وَ بَشَرْبَوْا.
[34] وَ عِيسَى رَدَّ لَيْهُمْ وَ قَالْ: كَانْ نَاسْ قَاعِدِينْ فِي عِرِسْ وَ الْعَرِيسْ مَعَاهُمْ، تِدَوْرُوا هُمَّنْ يُصُومُوا وَلَّا؟
[35] وَ لَاكِنْ يَوْم وَاحِدْ بَجِي، الْعَرِيسْ بَشِيلُوهْ مِنْهُمْ وَ فِي الْوَكِتْ دَاكْ، بُصُومُوا.
[36] وَ بَتَّانْ هُو حَجَّى لَيْهُمْ بِمَثَلْ وَ قَالْ: مَا فِي نَادُمْ الْيَشْرُطْ قِطْعَةْ مِنْ خَلَقْ جَدِيدْ أَشَانْ يَرْقَعْ بَيْهَا خَلَقْ قَدِيمْ. وَ كَانْ يِسَوِّي مِثِلْ دَا، هُو يِتَلِّفْ الْخَلَقْ الْجَدِيدْ وَ الْقِطْعَةْ الشَّالَاهَا مِنْ الْجَدِيدْ مَا تِوَافِقْ مَعَ الْقَدِيمْ.
[37] وَ مَا فِي نَادُمْ يُصُبّ خَمَرْ جَدِيدْ فِي قِرْبَةْ قَدِيمَةْ. وَ كَانْ يِسَوِّي مِثِلْ دَا، الْخَمَرْ الْجَدِيدْ يُشُقّ الْقِرْبَةْ وَ الْخَمَرْ يِدَفِّقْ وَ الْقِرْبَةْ تَتْلَفْ.
[38] لَاكِنْ وَاجِبْ يُصُبُّوا خَمَرْ جَدِيدْ فِي قِرْبَةْ جَدِيدَةْ.
[39] وَ مَا فِي نَادُمْ الشِّرِبْ الْخَمَرْ الْقَدِيمْ يِدَوْر يَشْرَبْ الْجَدِيدْ لَاكِنْ هُو بُقُولْ الْقَدِيمْ بَسْ عَدِيلْ.