[1] وَ عِيسَى دَخَلْ فِي حِلَّةْ أَرِيحَا وَ قَاعِدْ يُشُقَّهَا.
[2] وَ فِي نَادُمْ وَاحِدْ أُسْمَهْ زَكَّا. وَ هُو كَبِيرْ هَنَا نَاسْ الْجَمَارِكْ وَ هُو غَنِي بِلْحَيْن.
[3] وَ هُو دَوَّرْ يِشِيفْ عِيسَى لَاكِنْ مَا قِدِرْ أَشَانْ عِيسَى قَاعِدْ فِي أُسُطْ نَاسْ كَتِيرِينْ وَ زَكَّا نَادُمْ قِصَيَّرْ.
[4] وَ أَشَانْ دَا، هُو جَرَى قِدَّامْ فِي الدَّرِبْ الْعِيسَى مَاشِي فَوْقَهْ وَ رِكِبْ فَوْق فِي جِمَّيْزَايْ أَشَانْ يِشِيفْ عِيسَى كَانْ هُو يَلْحَقْ الْبَكَانْ دَا.
[5] وَ عِيسَى جَاءْ فِي الْبَكَانْ دَا وَ رَفَعْ رَاسَهْ وَ حَجَّى لِزَكَّا. وَ قَالْ: يَا زَكَّا، يَلَّا عَجَلَةْ دَلِّي تِحِتْ. الْيَوْم لَازِمْ نِضَّيَّفْ فِي بَيْتَكْ.
[6] وَ عَجَلَةْ كَيْ هُو دَلَّى تِحِتْ وَ فَضَّلَهْ لِعِيسَى فِي بَيْتَهْ بِفَرَحْ.
[7] وَ كُلَّ النَّاسْ الشَّافَوْا الشَّيْء الْبِقِي دَا، بِقَوْا زَعْلَانِينْ وَ حَجَّوْا أَمْبَيْنَاتْهُمْ وَ قَالَوْا: هَايْ! هُو مَشَى بِقِي ضَيْف فِي بَيْت هَنَا نَادُمْ مُذْنِبْ.
[8] وَ زَكَّا قَمَّ فَوْق وَ قَالْ لِلرَّبّ عِيسَى: يَا سَيِّدْنَا، نَنْطِي نُصّ مَالِي لِلْمَسَاكِينْ. وَ كَانْ شِلْت شَيْء مِنْ أَيِّ نَادُمْ بِظُلُمْ، نِقَبِّلَهْ لَيَّهْ أَرْبَعْ مَرَّاتْ.
[9] وَ عِيسَى رَدَّ وَ قَالْ: خَلَاصْ، الْيَوْم النَّجَاةْ جَاتْ فِي الْبَيْت دَا أَشَانْ زَكَّا كُلَّ مِنْ عِيَالْ إِبْرَاهِيمْ.
[10] وَ أَنَا إِبْن الْإِنْسَانْ جِيتْ أَشَانْ نِفَتِّشْ الْمُوَدِّرِينْ وَ نِنَجِّيهُمْ.
[11] وَ النَّاسْ قَاعِدِينْ يَسْمَعَوْا كَلَامْ عِيسَى. وَ فِي فِكِرْهُمْ، مَمْلَكَةْ اللّٰهْ تِدَوْر تِبِينْ عَجَلَةْ أَشَانْ هُو قَرِيبْ يَلْحَقْ مَدِينَةْ الْقُدُسْ. وَ أَشَانْ دَا، هُو حَجَّى لَيْهُمْ بِمَثَلْ.
[12] وَ قَالْ: يَوْم مِنْ الْأَيَّامْ، فِي نَادُمْ مِنْ عِيَالْ الْمُلُوكْ. وَ هُو سَافَرْ فِي بَكَانْ بَعِيدْ أَشَانْ هِنَاكْ يِدَرُّجُوهْ مَلِكْ وَ يِقَبِّلْ يَحْكِمْ بَلَدَهْ.
[13] وَ قُبَّالْ مَا يِسَافِرْ، هُو نَادَى عَشَرَةْ مِنْ عَبِيدَهْ وَ أَنْطَى لِأَيِّ وَاحِدْ دَهَبَايْ قِيمِتْهَا مِيَةْ دِينَارْ. وَ قَالْ لَيْهُمْ: تَاجُرُوا بَيْهَا لَحَدِّي نِقَبِّلْ.
[14] وَ شَعَبْ بَلَدَهْ كِرْهَوْه وَ رَسَّلَوْا وَرَايَهْ مُمَثِّلِينْ أَشَانْ يُقُولُوا: مَا نِدَوْرُوا النَّادُمْ دَا يَبْقَى فَوْقنَا مَلِكْ.
[15] وَ خَلَاصْ بَعَدَيْن هُو دَرَّجَوْه مَلِكْ وَ قَبَّلْ فِي بَلَدَهْ. وَ عَجَلَةْ أَمَرَاهُمْ لِلْعَبِيدْ الْأَنْطَاهُمْ الْقُرُسْ أَشَانْ يَجُوا لَيَّهْ. وَ دَوَّرْ يَعَرِفْ كَمْ رِبْحَوْا لَيَّهْ فِي التِّجَارَةْ.
[16] وَ الْأَوَّلْ جَاءْ قِدَّامَهْ وَ قَالْ: يَا مَلِكْ، مِنْ دَهَبَايْتَكْ أَنَا كِسِبْت بَتَّانْ عَشَرَةْ دَهَبَاتْ.
[17] وَ الْمَلِكْ قَالْ لَيَّهْ: دَا سَمَحْ. إِنْتَ عَبِدْ عَدِيلْ. أَوَّلْ أَنَا أَنْطَيْتَكْ مَسْؤُولِيَّةْ شِيَّةْ وَ إِنْتَ سَوَّيْت بَيْهَا خِدْمَةْ عَدِيلَةْ. وَ أَشَانْ دَا، نَنْطِيكْ مَسْؤُولِيَّةْ فَوْق عَشَرَةْ حِلَّةْ.
[18] وَ الْعَبِدْ التَّانِي جَاءْ لَيَّهْ وَ قَالْ: يَا مَلِكْ، مِنْ دَهَبَايْتَكْ كِسِبْت خَمْسَةْ دَهَبَاتْ.
[19] وَ الْمَلِكْ قَالْ، نُخُطَّكْ فَوْق خَمْسَةْ حِلَّةْ.
[20] وَ عَبِدْ آخَرْ جَاءْ وَ قَالْ: يَا مَلِكْ، دِيهِي دَهَبَايْتَكْ. أَنَا حَفَضْتَهْ وَ لَبَّدْتَهْ فِي مِنْدِيلْ.
[21] أَنَا خُفْت مِنَّكْ أَشَانْ إِنْتَ نَادُمْ قَوِي. إِنْتَ تِشِيلْ الْخُمَامْ النَّادُمْ آخَرْ خَطَّهْ وَ تَقْطَعْ الْغَلَّةْ الْمَا تَيْرَبْتَهَا.
[22] وَ الْمَلِكْ قَالْ لَيَّهْ: نِحَاسِبَكْ حَسَبْ الْكَلَامْ الْإِنْتَ قُلْتَهْ. إِنْتَ عَبِدْ فَسِلْ. عِرِفْت كَدَرْ أَنَا نَادُمْ قَوِي وَ نِشِيلْ الْخُمَامْ النَّادُمْ آخَرْ خَطَّهْ وَ نَقْطَعْ الْغَلَّةْ الْمَا تَيْرَبْتَهَا.
[23] وَ كَانْ أَنَا مِثِلْ دَا، مَالَا مَا خَطَّيْت قُرْسِي فِي الْبَنْكِي؟ وَ مِثِلْ دَا، وَكِتْ نِقَبِّلْ فِي الْبَلَدْ نِشِيلَهْ بِفَايْدِتَهْ.
[24] وَ قَالْ لِلنَّاسْ الْمَعَايَهْ: شِيلُوا مِنَّهْ الدَّهَبَايْ وَ أَنْطُوهَا لِلْعَبِدْ الْعِنْدَهْ عَشَرَةْ.
[25] وَ قَالَوْا لَيَّهْ: يَا مَلِكْ، هُو عِنْدَهْ عَشَرَةْ خَلَاصْ.
[26] وَ الْمَلِكْ قَالْ: نُقُولْ لَيْكُو كُلَّ نَادُمْ الْعِنْدَهْ شَيْء يَلْقَى زِيَادَةْ. لَاكِنْ النَّادُمْ الْمَا عِنْدَهْ شَيْء، الشَّيْء الْعِنْدَهْ يِنْرَفِعْ مِنَّهْ كُلَ.
[27] وَ خَلَاصْ وَيْن عُدْوَانِي دَوْل الْمَا دَوَّرَوْا أَنَا نَبْقَى فَوْقهُمْ مَلِكْ؟ جِيبُوهُمْ هِنِي وَ أَكْتُلُوهُمْ فِي قِدَّامِي.
[28] وَ وَكِتْ عِيسَى كَمَّلْ الْكَلَامْ دَا، هُو مَشَى قِدَّامْ فِي دَرِبْ هَنَا مَدِينَةْ الْقُدُسْ.
[29] وَ عِيسَى قَرَّبْ لِلْحِلَّالْ الْأَسَامَيْهُمْ بَيْت فَاجِي وَ بَيْت عَنْيَا وَ جَاءْ فِي الْبَكَانْ الْأُسْمَهْ جَبَلْ الزَّيْتُونْ. وَ عِيسَى رَسَّلْ قِدَّامَهْ تَلَامِيذْ إِتْنَيْن.
[30] وَ قَالْ لَيْهُمْ: أَمْشُوا فِي الْحِلَّةْ الْقِدَّامْنَا دِي. وَ فِي خَشُمْ الْحِلَّةْ تَلْقَوْا دَحَشْ مَرْبُوطْ. وَ نَادُمْ لِسَّاعْ مَا رِكِبْ فَوْقَهْ. وَ حِلُّوهْ وَ جِيبُوهْ لَيِّ هِنِي.
[31] وَ كَانْ نَادُمْ يَسْأَلْكُو وَ يُقُولْ «مَالَا تِحِلُّوا الدَّحَشْ؟» قُولُوا لَيَّهْ «الرَّبّ يِدَوْرَهْ».
[32] وَ التَّلَامِيذْ الْإِتْنَيْن الرَّسَّلَوْهُمْ مَشَوْا وَ لِقَوْا الدَّحَشْ مِثِلْ هُو أَوْرَاهُمْ بَيَّهْ.
[33] وَ وَكِتْ قَاعِدِينْ يِحِلُّوهْ، سِيَادَهْ سَأَلَوْهُمْ وَ قَالَوْا: مَالَا تِحِلُّوا الدَّحَشْ؟
[34] وَ رَدَّوْا لَيْهُمْ وَ قَالَوْا: الرَّبّ يِدَوْرَهْ.
[35] وَ جَابَوْه لِعِيسَى. وَ فَرَّشَوْا خُلْقَانْهُمْ فَوْق الدَّحَشْ وَ رَكَّبَوْا عِيسَى فَوْقَهْ.
[36] وَ خَلَاصْ قَمَّ مَاشِي قِدَّامْ رَاكِبْ فِي الدَّحَشْ وَ النَّاسْ قَمَّوْا سَوَّوْا زِينَةْ لِلشَّارِعْ وَ فَرَّشَوْا خُلْقَانْهُمْ فِي دَرْبَهْ.
[37] وَ قَرَّبْ لِلْمَدِينَةْ بِالدَّرِبْ النَّازِلْ مِنْ جَبَلْ الزَّيْتُونْ وَ كُلَّ تَلَامِيذَهْ بَدَوْا يَفْرَحَوْا وَ يَشْكُرُوا اللّٰهْ بِحِسّ عَالِي فِي شَانْ كُلَّ الْعَجَايِبْ الْكُبَارْ الشَّافَوْهُمْ.
[38] وَ قَالَوْا: مَبْرُوكْ لِلْمَلِكْ الْجَايِ بِأُسُمْ اللّٰهْ. سَلَامْ فِي السَّمَاءْ وَ الْحَمْدُ لِلّٰهْ وَ سُبْحَانَهْ فِي الْبَكَانْ العَالِي.
[39] وَ فَرِيسِيِّينْ وَاحِدِينْ فِي أُسْط النَّاسْ حَجَّوْا لَيَّهْ وَ قَالَوْا: يَا السَّيِّدْ، سَكِّتْ تَلَامِيذَكْ.
[40] وَ عِيسَى رَدَّ لَيْهُمْ وَ قَالْ: نُقُولْ لَيْكُو كَانْ النَّاسْ دَوْل سَكَتَوْا كُلَ، الْحُجَارْ يِعِيطُوا بِنَفْس الْكَلَامْ.
[41] وَ عِيسَى قَرَّبْ لِلْمَدِينَةْ وَ شَافَاهَا وَ بَكَى فِي شَانْهَا.
[42] وَ قَالْ: أَنَا نِتْمَنَّى كَدَرْ الْيَوْم إِنْتِ تَعَرْفِي الشَّيْء الْيِجِيبْ لَيْكِ السَّلَامْ لَاكِنْ هَسَّعْ دَا، مَا فِهِمْتِهْ.
[43] وَكِتْ وَاحِدْ يَجِي لَيْكِ وَ عَسْكَرْ عَدُوكِ يَجُوا وَ يَنْكُتُوا خَنَادِيقْهُمْ وَ يِحَوُّقُوكِ وَ يِسِدُّوا كُلَّ دُرُوبْكِ.
[44] وَ يِدَمُّرُوكِ مَعَ نَاسْكِ الْفِي لُبِّكِ. وَ مَا يِخَلُّوا حَجَرْ يَقْعُدْ فَوْق حَجَرْ. وَ دَا يَبْقَى أَشَانْ مَا عِرِفْتِ الْوَكِتْ الْاللّٰهْ جَاءْ يِنَجِّيكِ.
[45] وَ عِيسَى دَخَلْ فِي حَوْش بَيْت اللّٰهْ وَ قَمَّ يَطْرُدْ مِنَّهْ التُّجَّارْ الْيِسَاوُقُوا فَوْقَهْ.
[46] وَ قَالْ لَيْهُمْ: اللّٰهْ قَالْ فِي الْكِتَابْ <بَيْتِي يَبْقَى بَيْت هَنَا الصَّلَاةْ> وَ لَاكِنْ إِنْتُو <سَوَّيْتُوهْ بَيْت هَنَا سَرَارِيقْ>.
[47] وَ كُلَّ مَا يَوْم عِيسَى يِعَلِّمْ النَّاسْ فِي حَوْش بَيْت اللّٰهْ. وَ كُبَارَاتْ رُجَالْ الدِّينْ وَ الْعُلَمَاءْ وَ كُبَارَاتْ النَّاسْ دَوَّرَوْا فُرْصَةْ أَشَانْ يَكْتُلُوهْ.
[48] لَاكِنْ فُرْصَةْ مَا لِقَوْهَا أَشَانْ كُلَّ الشَّعَبْ قَاعِدِينْ مَعَايَهْ وَ يَسْمَعَوْا كَلَامَهْ بِنِيَّةْ وَاحِدَةْ.