[1] وَ عِيسَى أَلَّفَّتْ وَ شَافْ سِيَادْ الْمَالْ الْقَاعِدِينْ يُصُبُّوا قُرُسْ فِي صَنْدُوقْ هَنَا بَيْت اللّٰهْ.
[2] وَ شَافْ عَجُوزْ مِسْكِينَةْ الرَّاجِلْهَا مَيِّتْ. وَ هِي خَطَّتْ فِي الصَّنْدُوقْ رِيَالَيْن بَسْ.
[3] وَ عِيسَى قَالْ: نُقُولْ لَيْكُو الْحَقّ، الْعَجُوزْ الْمِسْكِينَةْ دِي خَطَّتْ فِي الصَّنْدُوقْ زِيَادَةْ مِنْ كُلَّ النَّاسْ الْآخَرِينْ دَوْل.
[4] أَشَانْ كُلُّهُمْ أَنْطَوْا لِلّٰهْ مِنْ فَضْلَةْ مَالْهُمْ لَاكِنْ هِي مِسْكِينَةْ وَ أَنْطَتْ كُلَّ شَيْء التِّعِيشْ بَيَّهْ.
[5] وَ نَاسْ وَاحِدِينْ قَاعِدِينْ يِحَجُّوا بِسَمَاحْ هَنَا بَيْت اللّٰهْ وَ حُجَارَهْ السَّمْحِينْ وَ كُلَّ شَيْء النَّاسْ أَنْطَوْه لِلْبُنَاءْ. وَ عِيسَى قَالْ:
[6] كُلَّ الْبُيُوتْ التِّشِيفُوهُمْ دَوْل، وَكِتْ وَاحِدْ يَجِي مَا يِخَلُّوا حَجَرْ يَقْعُدْ فَوْق حَجَرْ. يَرْمُوهُمْ كُلُّهُمْ كَيْ.
[7] وَ سَأَلَوْه وَ قَالَوْا: يَا سَيِّدْنَا، دَا يَبْقَى مَتَى؟ وَ شُنُو الْعَلَامَةْ التِّوَصِّفْنَا كَدَرْ دَا قَرِيبْ؟
[8] وَ قَالْ لَيْهُمْ: خُطُّوا بَالْكُو وَ مَا تِخَلُّوا نَادُمْ يَغُشُّكُو. أَشَانْ نَاسْ كَتِيرِينْ بَجُوا بِأُسْمِي الْبُقُولُوا بِنَفِسْهُمْ «أنا بَسْ الْمَسِيحْ» وَ «الْوَكِتْ تَمَّ». النَّاسْ دَوْل، مَا تِتَابُعُوهُمْ.
[9] وَ وَكِتْ تَسْمَعَوْا خَبَرْ هَنَا حُرُوبْ وَ ثَوْرَاتْ، مَا تَخَافَوْا أَشَانْ شَيْء مِثِلْ دَا لَابُدَّ يَبْقَى أَوَّلْ لَاكِنْ الْكُمَالَةْ مَا تَجِي عَجَلَةْ.
[10] وَ قَالْ لَيْهُمْ: نَاسْ هَنَا بَلَدْ وَاحِدَةْ يَهْجُمُوا نَاسْ هَنَا بَلَدْ آخَرَةْ وَ مَمْلَكَةْ تَهْجِمْ مَمْلَكَةْ.
[11] وَ فِي دِيَارْ كَتِيرِينْ يُكُونْ زِلْزَالْ وَ فِي آخَرِينْ جُوعْ شَدِيدْ وَ وَبَاءْ. وَ عَلَامَاتْ كُبَارْ يِنْشَافَوْا فِي السَّمَاءْ الْيِخَوُّفُوا النَّاسْ مَرَّةْ وَاحِدْ.
[12] وَ لَاكِنْ قُبَّالْ الْأَشْيَاءْ دَوْل مَا يَبْقَوْا، إِنْتُو يَكُرْبُوكُو وَ يِعَذُّبُوكُو. وَ يِسَلُّمُوكُو لِكُبَارَاتْ بُيُوتْ الصَّلَاةْ وَ يَزْقُلُوكُو فِي السِّجِنْ. يُسُوقُوكُو لِبَكَانْ السَّلَاطِينْ وَ الْحُكَّامْ فِي شَانْ إِنْتُو نَاسِي.
[13] وَ دَا يَبْقَى لَيْكُو الْوَكِتْ التَّشْهَدَوْا لَيِّ.
[14] أَشَانْ دَا، ثَبُّتُوا أَفْكَارْكُو أَشَانْ مَا تِهِمُّوا فِي كِكَّيْف تُرُدُّوا لَيْهُمْ.
[15] أَشَانْ أَنَا نَنْطِيكُو الْكَلَامْ وَ الْفِكِرْ الْوَاجِبْ. وَ النَّاسْ الْيَأَذُوكُو مَا يَقْدَرَوْا يَحْمَلَوْا كَلَامْكُو وَلَّا يُرُدُّوا لَيْكُو.
[16] وَ الْيِسَلُّمُوكُو لِلْكُبَارَاتْ هُمَّنْ مِنْ وَالْدَيْنكُو وَ أَخْوَانْكُو وَ مِنْ قَبِيلِتْكُو وَ رُفْقَانْكُو. وَ وَاحِدِينْ مِنْكُو يَكْتُلُوهُمْ.
[17] فِي شَانِي أَنَا، كُلَّ النَّاسْ يَكْرَهَوْكُو.
[18] لَاكِنْ صُوفَايْ وَاحِدَةْ مِنْ رَاسْكُو مَا تِوَدِّرْ.
[19] وَ أَقْعُدُوا ثَابْتِينْ فِي التَّعَبْ دَا وَ مِثِلْ دَا تِنَجُّوا نُفُوسْكُو.
[20] وَ يَوْم وَاحِدْ عَسْكَرْ كَتِيرِينْ يَجُوا يُحَوُّقُوا مَدِينَةْ الْقُدُسْ. وَ وَكِتْ تِشِيفُوهُمْ، تَعَرْفُوا كَدَرْ خَرَابْهَا قَرِيبْ.
[21] وَ فِي الْبَكَانْ دَا، خَلِّي النَّاسْ الْقَاعِدِينْ فِي دَارْ الْيَهُودِيَّةْ يَجْرُوا فِي الْحُجَارْ. وَ خَلِّي النَّاسْ الْفِي الْمَدِينَةْ يَمُرْقُوا مِنْهَا وَ خَلِّي النَّاسْ الْفِي الْكَدَادَةْ مَا يَدْخُلُوا فِي الْمَدِينَةْ.
[22] أَشَانْ فِي الْوَكِتْ دَا، اللّٰهْ يِعَاقِبْ الْيَهُودْ وَ كُلَّ الْكَلَامْ الْأَوَّلْ النُّبُوَّةْ كَتَبَوْه فَوْقهُمْ يِتِمّ.
[23] وَ فِي الْبَكَانْ دَا، يَبْقَى قَاسِي بِلْحَيْن لِلْعَوِينْ الْغَلْبَانَاتْ وَ الْعِنْدِهِنْ عِيَالْ دُقَاقْ. وَ الضِّيقَةْ تَبْقَى شَدِيدَةْ فِي كُلَّ الْبَلَدْ دِي. وَ غَضَبْ اللّٰهْ يَنْزِلْ فِي الشَّعَبْ دَا.
[24] وَ يُمُوتُوا بِالسَّيْف وَ يُسُوقُوهُمْ مَسَاجِينْ فِي أُسْط كُلَّ الْأُمَمْ. وَ نَاسْ الْأُمَمْ يَمْلُكُوا مَدِينَةْ الْقُدُسْ وَ يِفَجُّخُوْهَا لَحَدِّي زَمَنْهُمْ يِكَمِّلْ.
[25] وَ النَّاسْ يِشِيفُوا عَلَامَاتْ فِي الْحَرَّايْ وَ الْقَمَرْ وَ النُّجُومْ. وَ في الْأَرْض الْأُمَمْ يِبَرْجُلُوا وَ يَخَافَوْا مِنْ حِسّ الْبَحَرْ وَ حَرَكَتَهْ.
[26] وَ رُجَالْ يَقَعَوْا مِنْ الْخَوْف وَ يَخَافَوْا مِنْ الشَّيْء الْجَايِ فَوْق الدُّنْيَا أَشَانْ قُوَّاتْ السَّمَاوَاتْ ذَاتْهُمْ تِنْهَزَّ.
[27] وَ فِي الْوَكِتْ دَاكْ، يِشِيفُوا إِبْن الْإِنْسَانْ جَايِ رَاكِبْ فِي السَّحَابْ بِقُدْرَةْ عَظِيمَةْ وَ مَجِيدَةْ.
[28] وَ وَكِتْ الْأَشْيَاءْ دَوْل يَبْدَوْا شِدُّوا حَيْلكُو وَ أَرْفَعَوْا رُوسَيْنكُو فَوْق أَشَانْ يَوْم النَّجَاةْ قَرَّبْ.
[29] وَ عِيسَى حَجَّى لَيْهُمْ بِمَثَلْ وَ قَالْ: فَكُّرُوا فِي شَدَرْ التِّينْ وَ فِي كُلَّ الشَّدَرْ.
[30] وَكِتْ الشَّدَرْ يِسَوِّي وَرَقْ تِشِيفُوهْ وَ تَعَرْفُوا الْوَكِتْ الْيَلْدَ فَوْقَهْ قَرَّبْ خَلَاصْ.
[31] وَ سَوَا سَوَا مِثِلْ دَا، أَعَرْفُوا كَدَرْ مَمْلَكَةْ اللّٰهْ قَرَّبَتْ وَكِتْ تِشِيفُوا الْعَلَامَاتْ الْأَوْرَيْتكُو بَيْهُمْ دَوْل.
[32] وَ نُقُولْ لَيْكُو الْحَقّ. نَاسْ هَنَا الْوَكِتْ دَا مَا يِكَمُّلُوا لَحَدِّي دَا كُلَّ كَيْ يِتِمّ.
[33] السَّمَاءْ وَ الْأَرْض يَبْقَوْا مَا فِيهُمْ وَ لَاكِنْ كَلَامِي يَقْعُدْ دَايْماً.
[34] وَ خُطُّوا بَالْكُو فِي نُفُوسْكُو. أَشَانْ كَانْ تِخَلُّوا قُلُوبْكُو يِنْشَغُلُوا بِالسَّفَاهَةْ وَ السَّكَرْ وَ كَانْ تِنْشَغُلُوا بِهُمُومْ الدُّنْيَا يَوْم جَيِّتِي يَجِي فَجْأَةْ
[35] وَ يَبْقَى لَيْكُو مِثِلْ شَرَكْ. أَكِيدْ، الْيَوْم دَا يَجِي فَوْق كُلَّ النَّاسْ الْفِي كُلَّ الْأَرْض.
[36] أَبْقَوْا دَايْماً وَاعِيِين وَ أَسْأَلَوْا قُدْرَةْ مِنْ اللّٰهْ أَشَانْ تَنْجَوْا مِنْ كُلَّ الْأَشْيَاءْ الْيَبْقَوْا دَوْل. وَ مِثِلْ دَا، فِي الْأَخِيرْ تَقِيفُوا قِدَّامْ إِبْن الْإِنْسَانْ.
[37] وَ كُلَّ مَا يَوْم، عِيسَى قَاعِدْ يِعَلِّمْ النَّاسْ فِي بَيْت اللّٰهْ. وَ فِي الْمَغْرِبْ هُو مَرَقْ مِنْ الْمَدِينَةْ وَ رَقَدْ فِي الْبَكَانْ الْأُسْمَهْ جَبَلْ الزَّيْتُونْ.
[38] وَ كُلَّ يَوْم النَّاسْ يِبَكُّرُوا وَ يَمْشُوا فِي بَيْت اللّٰهْ أَشَانْ يَسْمَعَوْا كَلَامَهْ.