[1] Bildad pas ngoca', “Sampe' bila ba'na acaca'a kantha jareya? Cacana akantha angen se agarudhu' monyena.
[3] Allah ta' tao mabilu' kaadilan; ban ta' tao kalero alampa'agi barang se bendher.
[4] Olle daddi na'-ana'na ba'na dusa ka Salerana, daddi la sapantessa narema okomanna.
[5] Tape mon ba'na nyare pangaoban ka Allah, nyo'on kabellasan ban nyo'on sapora,
[6] mon atena ba'na jujur ban tadha' calena, ba'na tanto duli etolong bi' Allah; ban menangka babales ka ba'na, roma tatanggana ba'na epabali akantha asalla.
[7] Dhi'-andhi'na ba'na se elang rowa tadha' artena mon ebandhing bi' se bakal etarema'a.
[8] Kodda' pekker odhi'na oreng penter jaman lamba'na, pekker palanjang pangalamanna bangatowa.
[9] Sengko' ban ba'na reya ta' tao pa-apa sabab odhi'na abidda ta' sabarampa; coma akantha jang-bajangan se lebat e dunnya.
[10] Edhingngagi cacana reng-oreng penter jaman lamba'na se aberri' pangajaran ka ba'na kantha reya:
[11] ‘Galagas pera' tombu e tana se bannya' aengnga; pandhan ta' kera odhi' e tana se tadha' rabana.
[12] Mon aengnga kerreng galagas pas elop dhaunna, aceppeddan dhari bu-tombuwan laenna, mangkana gi' ngodha ban gi' banne baktona se eketthoga ekala'a gunana.
[13] Kantha jareya oreng se ta' abakte ka Pangeran, loppa ka Allah, tadha' pangarebban e dhalem odhi'na.
[14] Oreng jareya ngandellagi bennang alos salambar; jaringnga ba-laba se daddi kaparcaja'anna.
[15] Ba' kokowa jaringnga ba-laba, mon egabay panyandharan? Bennangnga ba' kowadda egabay paneggudan?’
[16] Oreng jahat atamba bannya' akantha lalang se adhu'-budhu' ekenneng sonarra are mossa'e bun-kebbunan.
[17] Ramo'na abulet e to-bato se atompo' e tana, abulet ce' serredda, malarat se locoda.
[18] Tape mon lalang jareya edabu' ramo'na, katonna lalang jareya ta' tao badha e jadhiya.
[19] Oreng jahat coma kantha jareya kasennengnganna; oreng laen dhateng agante kennengnganna.
[20] Tape Allah ta' tao ajauwi oreng se esto ka Salerana, ban ta' tao nolong oreng se daraka.
[21] Colo'na ba'na gi' epagella'a, bibirra ba'na gi' epasoraga gumbira.
[22] Se baji' ka ba'na bakal malowa, ban bengkona oreng jahat bakal eparosaga epamosna'a.”