[1] He Ayyub, ba'na nangtang Sengko', Allah Se Mahakobasa; apa sateya ba'na ngakowa kala, otaba gi' alabana?”
[3] Atorra Ayyub ka PANGERAN, “Abdidalem acaca akadi oreng budhu, GUSTE. Daddi abdidalem dhu nyaoda ponapa pole? Ampon tadha' se eatorragiya abdidalem samangken.
[5] Se ekoca'agi abdidalem ampon lebbi dhari se samasthena.”
[6] Saellana jareya, dhari dhalem ojan derres acampor kaleng busbus, PANGERAN adhabu pole ka Ayyub, dhabuna,
[7] “Mara adhebbi Sengko' sateya, duduwagi ja' ba'na lalake', saodi kabbi se etanya'agi Sengko' reya.
[8] Apa ba'na gi' ta' endha' ngakone ja' Sengko' reya adil, gi' nyala'agi Sengko', mabendher aba'na dibi'?
[9] Apa ba'na kowat akantha Sengko' reya? Apa sowarana ba'na bisa agarudhu' akantha Tang sowara?
[10] Mon bendher kantha jareya, mara ba'na jaga, angguy rarenggan kamolja'anna, duduwagi kaangga'anna.
[11] Abas reng-oreng se angga' rowa; ca'-koca'e pamare, pangalowa peggella atena ba'na.
[12] Ongguwan, abas reng-oreng se sombong, soro asojud e adha'anna ba'na; paremmok reng-oreng jahat e kennengnganna.
[13] Kobur kabbi e dhalem bume; korong e dhalem dunnyana oreng mate.
[14] Bi' Sengko' ba'na pas ealemma polana ba'na mennang ban kakowadanna dibi'.
[15] Abassagi Behemot, keban se talebat rajana rowa; padha ban ba'na, gabayanna Sengko' keya. Rebba se daddi kakanna, akantha sape ban sabangsana.
[16] Tape abassagi kakowadanna ban badanna, sarta kakowadanna ra'-ora'na!
[17] Bunto'na epanoccer ka attas akantha bungkana aras, ra'-ora'na pokangnga koko ban merras.
[18] Lang-tolangnga kowat akantha dimbaga, bettessa koko akantha baja.
[19] E antarana sakabbinna Tang mahlok, jareya se paleng makasambu'; tadha' se bisa makala, kajabana Sengko', Panceptana!
[20] E mo'-gumo' kennengnganna burun alas amaen neng-sennengngan, rebba tombu daddi kakanna.
[21] Keban jareya dhung-tedhungan e babana ombut se adhuri, ngetek e antarana galagas e ba-raba.
[22] Ombut se adhuri anaonge keban jareya ban jang-bajanganna. Bungkana gandarusa e penggir songay ngaobi badanna.
[23] Keban jareya ta' tako' maske Songay Yordan santer gilina, paggun kalem maske aengnga alompa' mowana.
[24] Sapa se bangal mabuta matana, mega' keban jareya kalaban nyandhak congorra?