[1] Mara pasabbar, edhingngagi sakejja' aggi', gi' badha se ekoca'agiya sengko' bit asmana Se Mahatenggi.
[3] Tang pangataowan lebar; bi' sengko' eangguya abukteyagi ja' tang Pancepta reya adil.
[4] Tang caca tadha' se palsu; se badha e adha'na ba'na reya oreng se bicaksana onggu.
[5] Allah reya ce' kowadda, ta' ya-nyeya oreng; tadha' barang se ta' epahame.
[6] Oreng se dusa ta' epaabit odhi'na, kaadilan eparengngagi ka oreng se nyangsara.
[7] Oreng jujur ejaga ban epeyara, epakobasa akantha to-rato, ehormat oreng salanjangnga.
[8] Tape mon oreng ekalenthong ban rantay besse, nanggung sangsara polana kasala'anna dibi',
[9] tanto dusa ban kasombonganna ebukka' tor esengkap bi' Allah.
[10] Allah makon reng-oreng jareya ngedhingngagi parengeddanna, ban ambu dhari kajahadanna.
[11] Mon reng-oreng jareya atoro' ban abakte ka Allah, tanto odhi'na taremtem ban ma'mor sampe' matena.
[12] Tape mon ta' ngedhingngagi dhabuna, reng-oreng jareya bakal mateya e dhalem kabudhuwanna.
[13] Oreng se ta' andhi' Pangeran peggel ros-terrosan, maske eokom Pangeran ta' endha' menta bantowan.
[14] Reng-oreng jareya mate kalessowen e bakto ngodhana, polana odhi'na se juba' tengkana.
[15] Allah ngajar manossa kalaban kasangsara'an, kasossa'an epadhateng sopaja manossa enga'a.
[16] Dhari kamalaradan ba'na epabebas bi' Allah, sampe' ba'na arassa'agi kobassana kataremtemman, meja makanna possa' ban kakanan.
[17] Tape sateya ba'na narema okomanna Allah, satembang ban kajahadanna.
[18] Te-ngate, ja' sampe' tagiyur polana pesse go'-sogo'; ja' sampe' sala jalan polana dunnya.
[19] Parcoma ba'na atharat menta bantowan, tadha' gunana ngettokkagi kakowadanna.
[20] Ja' rep-ngarep malem se petteng, sa'adda sa-bangsa elang mosna.
[21] Senga' te-ngate, ja' sampe' abiluk ka kajahadan; ba'na eparenge kasangsara'an sopaja ambuwa alako jahat.
[22] Kaenga'e, Allah reya ce' rajana kobasana; Allah reya guru raja se tadha' bandhinganna.
[23] Sapa se bisa nantowagi jalanna otabana se bangal ngoca' Salerana sala?
[24] Allah reya ealem polana se elampa'agi Salerana, bariya keya ba'na kodu amolja'agi Salerana keya.
[25] Oreng nangale kabbi ka se elampa'agi Salerana; tape tadha' settonga se ngarteya.
[26] Ba'na ban sengko' ta' kera ngarte onggu parkara kamolja'anna, otabana ngetong saapa bannya'na taonna.
[27] Allah naja' aeng dhari bume epadaddi ondhem e langnge' pas eoba epadaddi aeng ojan se benneng.
[28] Aeng ojan epatoron dhari ondhem e tenggina, eserammagi ka ommat manossa.
[29] Tadha' oreng se ngarteya gulina ondhem e tenggina, ban monyena galudhuk e langnge' kalenggiyanna.
[30] Langnge' sabalattrana etera'e ban dhap-keddhap, tape dhasarra tase' paggun petteng calemodan.
[31] Kantha jareya carana Allah apareng odhi' ka sa-bangsa, ban apareng kakanan se ta' sakera-kera.
[32] Kelap epega' ban astana, epakon nappor sasaranna.
[33] Monyena galudhuk nandha'agi kaleng busbus bakal dhatengnga, ebin tao keya angen barat la para'.