[1] Tang ajal la para' napa'a, tang nyaba la para' pegga'a; kabbi la padha tadha', pera' kare koburan.
[2] Sengko' egabay co-kocowan, sengko' nangale saapa oreng amon-semmonan.
[3] Abdidalem ka'dhinto jujur, Guste Allah. Moga Junandalem parcaja'a. Pasera pole se bisa nyokong oca' abdidalem?
[4] Junandalem notobi atena reng-oreng gapaneka kantos tadha' se ngarteya; ja' kantos samangken abdidalem epakala reng-oreng gapaneka.
[5] Menorot parebasan, se eparkara'agi kancana sopaja olleya kaontongan, babales bakal teba'a ka na'-ana'na.
[6] Sateya sengko' etondhung ban parebasan jareya; tang ca-kanca nyander pera' nyopa'ana tang mowa.
[7] Tang mata rabeng polana ce' sossana; tang badan talebat korossa.
[8] Oreng se tako' ka Allah, takerjat ban heran, oreng se ta' andhi' sala nganggep sengko' ta' andhi' Pangeran.
[9] Oreng se becce' ban ta' andhi' sala, sajan yakin odhi'na ekasokane bi' Allah.
[10] Tape saompamana ba'na kabbi entar dha' enna', ta' kera sengko' nemmo oreng se bicaksana maske settonga e antarana.
[11] Tang omor la lebat, tang rancana kabbi la buddhu; elang keya sakabbinna tang pangaterro.
[12] Tape bi' tang ca-kanca malem ekoca' seyang, ca'na la para' tera'a. Tape sengko' tao tang kabadha'an paggun petteng tadha' obana.
[13] Pera' dunnyana oreng mate se bi' sengko' enante'a, e dhissa' sengko' tedhunga e pettengnga.
[14] Tang makam bi' sengko' ekoca'a “Tang eppa'” ban ceng-caceng se ngakan tang badan reya ekoca'a “Ebu” ban “Embuk”.
[15] E dhimma pangarebban monggu ka sengko' reya? Sapa se nangale sengko' badha sennengnga?
[16] Mon sengko' la toron ka dunnyana oreng mate, sengko' ta' andhi' pangarebban pole.”