[1] Sengko' la busen ban ontep odhi' e bume, daddi sengko' makalowara pae'na tang ate.
[2] Ya Allah, abdidalem ja' sala'agi; ngereng terrangngagi, aponapa abdidalem me' ekamoso sareng Junandalem?
[3] Ponapa kaontonganna Junandalem nyeksa abdidalem sapaneka, mowang cepta'annepon Junandalem dibi', sareng nolonge reng-oreng se juba' ate?
[4] Pamanggina Junandalem ta' padha sareng pamanggina manossa;
[5] yuswaepon Junandalem ta' pandha' akadi omorrepon manossa.
[6] Manabi sapaneka, aponapa Junandalem me' ngoros sadajana kasala'an sareng dusa abdidalem?
[7] Sanyatana Junandalem ngagali, abdidalem ta' gadhuwan sala sakale. Junandalem ngagali tadha' oreng settonga se kengeng masalamet abdidalem dhari astaepon Junandalem.
[8] Junandalem se abadhi sareng apareng ropa ka abdidalem paneka, samangken sareng Junandalem me' daddi epaancora?
[9] Kaemodi, Guste, Junandalem se abadhi abdidalem dhari lempong! Ma' samangken abdidalem ka'dhinto sareng Junandalem epadaddiya abu pole?
[10] Kobasana Junandalem saos se abanto rama madaddi abdidalem ka'dhinto, sareng se maraja abdidalem e gandhu'anna ebu.
[11] Sareng Junandalem badan ka'dhinto ebadhi dhari tolang sareng ora', eparenge daging, sareng kole' menangka bungkossa.
[12] Abdidalem eparenge odhi' sareng kataresna'an, nyaba abdidalem ejaga sareng epeyara.
[13] Namong samangken abdidalem oneng ja' ngabidi gi' dhimen Junandalem ampon kaagungan rancana, abdidalem epacalaka'a.
[14] Sareng Junandalem abdidalem etalektegi salanjangnga pola me' abadhi kasala'an, sopaja Junandalem ta' kasokan apareng sapora.
[15] Manabi abdidalem alako dusa, tanto calaka'; namong manabi abdidalem tadha' salana, gi' paggun eanggep dusa. Abdidalem ta' bangal adhanga, sabab arassa sossa sareng eya-seya.
[16] Manabi abdidalem ahasel sanare ta' saponapa, sareng Junandalem eserser akadi se nyerser macan; noduwagi pole kakobasa'anna, sopaja abdidalem tako'a.
[17] Junandalem madhateng sakse ros-terrosan se nyala'agi abdidalem salanjangnga; Junandalem sajan atamba duka, sareng madhateng kan-pasukan anyar se epanyerrang sareng epamerrange abdidalem paneka.
[18] Aponapa abdidalem me' epalahir ka bume? Langkong sae abdidalem mate sabellunna etangale'e oreng.
[19] Sopaja abdidalem eanggep ta' oneng badha, sabab dhari gandhu'anna ebu terros egiba ka koburan.
[20] Abdidalem ta' abit pole se odhi'a e dunnya, daddi dinggal abdidalem kadibi'ana, ngarassa'agiya kobassana karena odhi' se namong sakejja'.
[21] Sakejja' aggi' abdidalem ondura ban ta' kera abali pole, nojju ka nagara se petteng calemodan,
[22] nagara se petteng, salbut ta' epanggi karowanna, kennengnganna tera' se padha sareng petteng calemodan.”