[1] Elifas nyaot, “Dhu apa, Ayyub, me' acaca malolo! Tadha' oreng bicaksana se nyaot kantha ba'na jareya, oreng becce' ta' kera mabendherra aba'na ban caca se tadha' ma'nana.
[4] Mon cacana ba'na jareya etoro', ta' kera badha pole oreng se tako' otabana adu'a ka Allah.
[5] Cacana ba'na noduwagi ja' ba'na sala, tape ba'na ter-moter caca notobana kasala'anna.
[6] Ta' osa sengko' ngarane ban nyala'agi ba'na, sabab cacana ba'na la noduwagi salana.
[7] Apa ba'na manossa se elahirragi dha'-adha' kadibi'? Apa ba'na hadir e bakto nong-gunong ecepta'agi?
[8] Apa ba'na ngedhing rancanana Allah? Apa pera' ba'na se andhi' hekmadda manossa?
[9] Apa se ekataowe ba'na sengko' ban oreng laenna tao keya. Apa se epahame ba'na terrang keya ka oreng laenna.
[10] Sengko' ban reng-oreng laenna narema hekmat reya dhari reng-oreng se la pote obu'na; reng-oreng se la badha sabellunna eppa'na ba'na lahir e dunnya.
[11] Arapa ba'na ma' nolak pangleporra Allah? Sengko' sakanca acaca epasabbar ban epaalos bit asmana.
[12] Tape ba'na peggel, matana mera;
[13] ba'na peggel ka Allah ban alaban ka Salerana.
[14] Ba' bisa'a manossa tadha' salana? Ba' bisa'a manossa jareya bendher e ajunanna Allah?
[15] La'-mala' ka malaekadda Allah ta' parcaja; kabbi eanggep ta' socce e dhalem pangoladanna.
[16] Apa pole manossa se juba' tengkana, se ngalakone kajahadan akantha oreng ngenom aeng biyasa.
[17] Edhingngagi, Ayyub, bi' sengko' ba'na ela'-bala'ana,
[18] parkara barang se eajarragi oreng penter ka sengko'. Pangajaran jareya etarema dhari bangatowana, ban epaterros ka na' potona.
[19] E bakto jareya tadha' oreng manca e nagarana; tadha' se manyalethong reng-oreng jareya dhari Allah.
[20] Oreng jahat se nendhes sasamana bakal arassa'a tako' salanjangnga e dhalem odhi'na.
[21] Nye-monye se nako'e makopok kopengnga, e jaman taremtem bigal dhateng nyerrang aba'na.
[22] Tadha' pangarebban e dhalem odhi'na se kalowara dhari pettengnga, sabab peddhangnga oreng se mateyana aba'na terros nyerser e saneyap kasempadan.
[23] No'-mano' se ngakanan babathang anante' matena, padha ngakana mayyidda. Oreng jareya pas apangrasa odhi'na se bakal dhateng orem tadha' tera'na.
[24] Balai akantha rato se parjuga, la asadhiya se nyargebba.
[25] Kantha jareya papasthenna oreng se nangtang Allah bangal alaban ka Se Mahakobasa.
[26] Oreng jareya noduwagi kasombonganna, nyerbu ban alaban ka Allah; ngangka' tamengnga ta' endha' kala.
[28] Oreng jareya enneng e tha-kottha se ta' etemmo karowanna, ban e ko-bengko se tadha' orengnga, tape tha-kottha ban ko-bengko jareya la epastheyagi ancora polana perrang.
[29] Dhi'-andhi'na bakal elanga ta' alampat; dunnyana bakal tompessa tadha' karena.
[30] Oreng jareya ta' kera lopot dhari papetteng se calemodan; apoy bakal mapotthona bi'-selbi'na. Oreng jareya bakal mosna'a ekenneng serrop lesanna Allah.
[31] Mon oreng jareya parcaja ka barang se tadha' gunana, tanto aba'na kare angar, sabab ganjaran se etarema'a, barang se ta' aguna keya.
[32] Sabellunna baktona oreng jareya la mate, akantha ranca' se elop se ta' bisa biru pole.
[33] Oreng jareya akantha anggur se ngalotor buwana, akantha bungkana jaitun se ronto kembangnga.
[34] Oreng jahat ta' kera andhi' toronan; bakal katonona bengkona se epaddek dhari pesse ollena go'-sogo'.
[35] Kantha jareya oreng se amaksod jahat ban se alako juba'; se possa' ban tepowan e dhalem atena.”