[1] Tape sateya sengko' eco-koco reng-oreng se angodha'an. Lamba' eppa'na reng-oreng jareya bi' sengko' eanggep talebat nespana, ta' pantes ajaga tang dumba apolong ban pate' panjaga.
[2] Ka sengko' reng-oreng jareya tadha' gunana lantaran la tadha' kakowadanna.
[3] Reng-oreng jareya lapar ban ce' nyangsarana, sampe' ngakan mo'-ramo' kerreng e ra-ara se ce' seppena.
[4] Reng-oreng jareya adabu' but-ombut e ra-ara, laju ekakan dhaun sarta ramo'na.
[5] Kabbi padha ngojuk oreng jareya sambi areng-cerreng, ta' kala ka oreng se ngojuk maleng.
[6] Wa-guwa daddi kennengnganna, bang-lobang e ke'-lekke'na gunong daddi bengkona.
[7] E dhalem alas reng-oreng jareya wat-thowadan akantha keban se agaung, akompol e babana but-ombut.
[8] Reng-oreng jareya ta' andhi' nyama ban tadha' argana, etondhung eojuk dhari nagarana.
[9] Sateya reng-oreng jareya dhateng, sengko' ekala'-gella', eanggep akantha con-locon se ta' arga.
[10] Reng-oreng jareya nganggep sengko' tadha' argana, sarta padha nyopae tang mowa.
[11] Sabab bi' Allah sengko' epata'andhi' kakowadan sakone'a, daddi oreng padha ya-nyeya sengko' sakarebba atena.
[12] Garombolan jareya nyerrang sengko' dhari adha', sengko' buru, eserser epalabuwa.
[13] Tang jalan eaddhang, sengko' epateyana; bakto reng-oreng jareya nyerbu, tadha' oreng settonga se ngalang.
[14] Akantha banjir reng-oreng jareya abeddhul tang partahanan, anyo-ronyo nyecce'e tang badan.
[15] Sengko' arassa ce' tako'na; akantha se ekebbat angen, mosna ajina tang aba'; sennengnga tang ate elang akantha ondhem se lebat.
[16] Sateya sengko' para' mateya; tang kasossa'an tadha' korangnga.
[17] E baja malem tang tolang ngaronyo; tadha' ambuna se nyo'nyo'.
[18] Allah nyangkarem guluna tang kalambi sampe' tang kalambi agalambir.
[19] Sengko' epelpallagi ka dhalem cellot, tadha' bidana ban bu-rombu se bucco'.
[20] Abdidalem aserro ka Junandalem, Guste, namong Junandalem ta' meyarsa'agi; manabi abdidalem adu'a, Junandalem ta' marduli.
[21] Junandalem kejjem ka abdidalem, abdidalem ececce' salar-kellarra sareng Junandalem.
[22] Abdidalem eabber angen, sareng Junandalem epanneng; sareng Junandalem abdidalem epabang-ngala'bang e dhalem angen barat.
[23] Abdidalem oneng Junandalem abakta abdidalem ka alam maot, kennengngannepon sadajana oreng se odhi' epakompol.
[24] Aponapa Junandalem me' nyerrang oreng se calaka', se ta' bisa apa-ponapa kajabana aserro nyo'on partolongan?
[25] Abdidalem noro' nanges sareng oreng se kasossa'an, bellas ka oreng se kakorangan.
[26] Abdidalem ngarep terrang sareng senneng, namong kasossa'an sareng papetteng se dhateng.
[27] Abdidalem akadi se eporak lantaran sossa sareng nespa; sajan abit atamba bannya' nanggung sangsara.
[28] Abdidalem leng-ngaleleng e pettengnga se tadha' sonarra; manjeng e adha'na oreng bannya' nyo'on partolongan.
[29] Sowara abdidalem ngennes sareng mellas, akadi tangessa mano' onta sareng pate' alas.
[30] Kole' abdidalem taker celleng, badan potthon ekenneng panas.
[31] Gi' dhimen abdidalem mereng monyena mosik se gumbira, samangken namong mereng tanges malolo.