[1] Badha kennengnganna pangaleyanna salaka; badha pole kennengnganna oreng mamorne emmas.
[2] Besse ekale dhari dhalem tana, dhari bato epangalelle dimbaga.
[3] Se petteng calemodan esono'e, kennengngan se paleng dhalem etalektegi. Nyare to-bato e kennengngan se petteng e dhalem bume.
[4] E bagiyan se jau se ta' ekennengnge oreng, se ta' tao edidda' otaba elebadi manossa, oreng alako agalattong ka le-tale e dhalem tana se talebat seppena.
[5] Tana ngasellagi kakanna manossa, tape e babana tana jareya keya ekar-bungkar epasalbut ta' etemmo karowanna.
[6] Bato e dhalem tana badha mamatanna, abuna aesse emmas sokkla.
[7] Mano' ellang ta' tao jalan ka jadhiya, mano' se ngakanan babathang ta' tao ngabber e attasanna.
[8] Macan otaba burun alas laenna ta' tao lebat e lorong se ka jadhiya se talebat seppena.
[9] Oreng ngale bato maske ce' galina, gunong ebungkar sampe' ka ramo'na.
[10] E bakto agabay lorong e dhalem gunong bato, laju nemmo mamatan se ce' bagussa.
[11] Se ngale sampe' ka ber-somberra songay, sabarang se ta' etangale laju tabukka'.
[12] Tape e dhimma hekmat ekenneng sare? E dhimma kodu ajar sopaja bisa'a ngarte?
[13] Hekmat tadha' e nga'-tengnga'anna manossa; tadha' se tao ajina se saongguna.
[14] Ca'na sar-dhasarra tase' ban tase' raja, hekmat tadha' e jadhiya.
[15] Hekmat ta' ekenneng porop maske ban emmas sokkla, ta' ekenneng belli bi' pesse salaka.
[16] Emmas ban mamatan se paleng larang tadha' argana mon ebandhing ban hekmat.
[17] Hekmat ta' ekenneng bandhingngagi ban emmas otaba kaca se ce' alossa, argana alarangan dhari cemmong emmas.
[18] Hekmat alarangan argana dhari merjan, kristal otaba motteyara.
[19] Bato topas se asli ban emmas se morne, ta' saapa argana mon ebandhing ban akkal buddi.
[20] E dhimma somberra kabicaksana'an? E dhimma oreng se nemmowa pangarteyan?
[21] Tadha' mahlok odhi' se tao nangale'e, bariya keya no'-mano' se ngabber e bang-abang.
[22] Maot ban pate ngoca' keya, se ekaedhing pera' rarasan tadha' laenna.
[23] Pera' Allah se ngagali kennengnganna hekmat, ban se ngagali jalan dha' essa',
[24] sabab Allah ngoladi co'-konco'na bume, sabarang se badha e babana langnge' etalektegi.
[25] E bakto apareng kakowadan ka angen, ban neptebbagi tes-batessa tase' raja,
[26] e bakto neptebbagi kennengnganna pagaggarra ojan, sarta jalan se elebadi galudhuk ban kelap;
[27] e bakto jareya Allah ngoladi hekmat, se pas eoji argana, sarta pas eparenge berkat.
[28] Dhabuna Allah ka manossa, “Mon terro olleya hekmat, hormadi Allah. Mon terro andhi'a pangarteyan, jauwi kajahadan.”