Әстәр 1
[1] Рʼожед Аһʼашwерош пʼадшада, кʼижани кӧ жь Һьндьстане гьрти һʼәта Әтйупийайе ль сәр сәд у бист һʼәфт qәза пʼадшати дькьр.
[2] Wе һьнге, гава Аһʼашwерош пʼадша ль Суса qәсьрда ль сәр тʼәхте пʼадшатийа хwә рʼуньштьбу,
[3] әwи сала пʼадшатийа хwәйә сьсийа, мәсрәфәк бона һʼәму wәзир wәкʼилед хwә дани, сәрәкәскәред Фарьстане у Мәдйа, ӧса жи әʼсьлзадә у сәрwеред qәзайед бьн дәстийа wида тʼәгльфкьри бун.
[4] Әwи һьнге гәләки дьреж, аwа готи сәдһʼәйште рʼожи дәwләмәндтийа пʼадшатийа хwә у рʼумәта мәзьнайийа хwә да кʼьфше.
[5] Гава әw рʼож дәрбаз бун, ве щаре жи әwи гази һʼәму мәрьвед Суса qәсьр кьр, жь мәзьна гьрти һʼәта бьчʼука, бона wан һʼәфт рʼожа мәсрәф һʼәwша бахче һәрәма пʼадшеда дани.
[6] Пʼәрʼдед сьпийә жь пәмбу, qәдәке жь рʼисе ширк, бь бәне соре гәвәз у кʼьтане вәгьрти һәввакьри авити хәлаqед зив у стунед мәрмәрва дардакьри бун. У тʼәхт бәрпʼалед зерʼ у зив жи данибунә һʼәwша кӧ бь сәлед кәвьрийә кʼәск, мәрмәре сьпи, сәдәфи у мәрмәре рʼәнг рʼәнгива нәqьшанди бу.
[7] Дәрданед зерʼда у щурʼә щурʼә дәрданада тьшт дьданә вәхwарьне. Шәрава пʼадше пьрʼ бу, wәкә мәрʼданийа wи.
[8] Һәр кәс аза бу вәхwарьнеда у тʼӧ кәс һʼәwще вәхwарьне нәдьма, чьмки пʼадше әʼмьри һʼәму бәрпьрсийаред мала хwә кьрьбу, кӧ әw дьле һәр кәсирʼа һәрʼьн.
[9] Wаштʼи ханьме жи бона кʼӧлфәта мәсрәф мала Аһʼашwерош пʼадшада дани.
[10] Рʼожа һʼәфта, гава дьле пʼадше бь шәраве кʼефхwәш бьбу, готә һәр һʼәфт нәмеред бәрдәстийед хwә Мьһуман, Бизтʼа, Һʼарбона, Бигтʼа, Авагтʼа, Зетʼар у Кʼаркʼас,
[11] кӧ әwана Wаштʼи ханьме тʼаще пʼадшатийева биньнә ль бәр пʼадше, wәки бәдәwәтийа wе нишани мьләта, мир у бәга кә, чьмки әw гәләки бәдәw бу.
[12] Ле Wаштʼи ханьме нәхwәст кӧ тʼәви нәмера бьчуйа у әʼмьре пʼадше бьqәданда, пʼадша qьлqьли у жь һерса алаве да сәре wи.
[13] Һьнге пʼадше готә биланед зәмана (чьмки пʼадше шеwьра хwә wан һʼәмуйа дькьр, йед кӧ qанун у рʼасти заньбун,
[14] ӧса жи һʼәфт миред Фарьстан у Мәдийа ль щәм wи бун, Кʼаршьна, Шетʼар, Адаматʼа, Тʼаршиш, Мәрәс, Марсьна у Мьмукʼан, әвана рʼуйе пʼадше дьдитьн у ширәткʼаред пʼадшейә пешьн бун):
[15] «Әм ль гора qануне чь гәрәке һьндава Wаштʼи ханьмеда бькьн, кӧ әwе әʼмьре Аһʼашwерош пʼадша кӧ бь нәмера ль wе һатьбу әʼмьркьрьне нәqәданд?»
[16] Һьнге Мьмукʼан ль бәр пʼадше у мира гот: «Wаштʼи ханьме нә кӧ тʼәне ль бәр пʼадше шашити те бәрʼда йә, ле ль бәр мир бәга у тʼәмамийа wан мьләтед qәзайед Аһʼашwерош пʼадшада.
[17] Чьмки кьра ханьме wе ль нава һʼәму кʼӧлфәтда бәла бә, әwе жи гӧрʼа мере хwә нәкьн у бежьн: ‹Аһʼашwерош пʼадша әʼмьр кьр кӧ Wаштʼи ханьме биньнә ль щәм wи, ле әw нә чу›.
[18] Иро кьре ханьме кӧ бьгьһижә гӧһе кʼӧлфәтед Фарьсийа у Мәдйанийа, әwе жи ӧса щаба пʼадше у мира бьдьн у һьнге wе гәләк рʼурʼәши у бетʼьфаqи бьбә.
[19] Һәгәр әв йәк ль пʼадше хwәш те, бьра жь wи qьрарәк дәре, ль нава qанунед Фарьс у Мәдйанийада бе ньвисаре, бона кӧ әw нәйе гӧһастьне, кӧ Wаштʼи иди тʼӧ щар нәйе ль бәр Аһʼашwерош пʼадша нәсәкьнә у пʼадша ханьмтийа wе бьдә кʼӧлфәтәкә жь wе qәнщтьр.
[20] У гава әв әʼмьре пʼадше ль нава һʼәму пʼадшатийа wида бе бьһистьне, кӧ пʼьрʼ мәзьнә, һьнге һʼәму кʼӧлфәте жи qәдьре мере хwә бьгьрьн һәгәр әw фәqир бә йан дәwләмәнд бә».
[21] Әв готьна ль пʼадше у мира хwәш һат у пʼадше ль гора готьна Мьмукʼан кьр.
[22] У һьнге нәʼмә тʼәмамийа qәзайед пʼадшерʼа һатьнә шандьне, ль гора ньвисара һәр qәзайе у ль гора зьмане һәр щьмәʼте, кӧ һәр кәс малхе мала хwә бә у бь зьмане мьләте хwә хәбәрдә .