Рʼутʼ 4
[1] Боwаз чу ль бәр дәргәһе бажер рʼуньшт. У аwа әw пьсмаме кӧ Боwаз бәʼса wи кьрьбу дәрбаз дьбу. Боwаз наве wи һьлда гази кьре у готе: «Кʼәрәм кә хеләке ль вьр рʼуни». Әw жи вәгәрʼийа рʼуньшт.
[2] Паше Боwаз гази дәһә рʼусьпийед бажер кьр у готә wан: «Кʼәрәм кьн ль вьр рʼунен». Әw жи рʼуньштьн.
[3] Һьнге Боwаз готә wи пьсмами: «Наһомийа кӧ жь әʼрде Моwабе вәгәрʼийайә һатийә, дьхwазә wи әʼрде пʼара бьре мә Әлимәләх бьфьрошә.
[4] Әз фькьрим кӧ ве йәке бьгьһиньмә гӧһе тә у тәрʼа жи бежьм, wәки тӧ пеш һазьред рʼуньшти у рʼусьпийед щьмәʼта мьнва ве пʼаре бькʼьрʼи. Һәгәр тӧ дьхwази бь изьна пьсмамтийе ве пʼаре бькʼьрʼи, бькʼьрʼә. Ле һәгәр нахwази, мьнрʼа бәжә кӧ әз заньбьм, чьмки пештьри тә иди тʼӧ кәс тʼӧнә кӧ борще пьсмамтийе бьqәдинә. Пәй тәрʼа ль мьн дькʼәвә». Әwи гот: «Бәле әзе борще пьсмамтийе бьqәдиньм»
[5] Һьнге Боwаз ль сәр ве йәкеда зедәкьр у готә wи пьсмами: «Ве жи заньбә, гава wе рʼожа тӧ жь Наһомийе wи әʼрди бькʼьрʼи, гәрәке жьна йе мьри, Рʼутʼа Моwаби жи бьстини, wәки wаре йе мьри шин ки, кӧ наве wи ӧнда нәбә ».
[6] Һьнге wи пьсмами гот: «Әз ви борще пьсмамтийе нькарьм бьqәдиньм, нәбә кӧ әз wаре хwә рʼәш кьм. Ви борще пьсмамтийа мьн тӧ бьqәдинә, чьмки жь qәwата мьн дәр ә».
[7] (Бәре нава Исраелда әв йәк һәбу, кʼьрʼин йан фьротанәкеда кӧ һәр тьшт бь шәʼдәти у избати бьбуйа, һьнге мерьв сола ньге хwә дехьст у дьда һәвале хwә. У әв йәк Исраелда дьбу шәʼдәти.)
[8] Паше wи пьсмами готә Боwаз: «Тӧ хwәрʼа бькʼьрʼә». У сола ньге хwә ехьст да wи.
[9] Wи чахи Боwаз готә wан рʼусьпийа у тʼәмамийа щьмәʼте: «Һун иро шәʼдә нә, кӧ мьн һʼәму һәбука Әлимәләх, Кʼилйон у Маһʼлон жь Наһомийе кʼьрʼи.
[10] У жьна Маһʼлон, Рʼутʼа Моwаби жи мьн хwәрʼа жьн станд, wәки наве йе мьри жь нава бьратийа wи у щи wаред wи ӧнда набә. Бона рʼожа иройин һун шәʼдә нә».
[11] Һьнге һʼәму щьмәʼта бәр дәргәһ, рʼусьпийава тʼәвайи готьн: «Әм шәʼдә нә. Бьра Хӧдан wе кʼӧлфәта кӧ wе бькʼәвә мала тә, бькә мина Рʼаһеле у Леайе, кʼижана кӧ мала Исраел ава кьрьн. Тӧ нава Әфратʼеда qәwат би у Бәйтләһʼмеда жи навәки qазьнщ ки.
[12] Бьра мала тә бьбә мина мала Перес, чаwа кӧ Тʼамаре жь wе мале зӧрʼәт ль пәй Щьһуда хьст, ӧса жи Хӧдане жь ве кʼӧлфәта щаһьл бьдә тә».
[13] Боwаз Рʼутʼ станд, әw бунә һʼәлале һәв. Бь рʼәʼма Хwәде әw һʼәмлә дәркʼәт у кӧрʼәк ани.
[14] Һьнге кʼӧлфәта готә Наһомийе: «Шькьр жь Хӧдан, кӧ әwи иро тӧ бе зӧрʼәт бе пьсмаме незик нәһьшти, wәки наве ве рʼькʼьнйате Исраелда нәйе биркьрьне!
[15] Бьра әва тʼьфала бьбә бина ль бәр тә у шьва дәсте тә, әʼмьре мәзьнайийеда, чьмки әва жь wе бука кӧ тә һʼьз дькә дьне кʼәтийә, йа кӧ тәрʼа жь һʼәфт кӧрʼа четьр ә».
[16] Пәй ве готьнерʼа Наһомийе кӧрʼьк һьлда да һʼәмеза хwә у жерʼа бу бәрдәргуш.
[17] Кʼӧлфәтед щинара нав ле кьрьн у готьн: «Наһомийерʼа кӧрʼәк бу» У наве wи Овед данин. Әва баве Йешайе баве Даwьд бу.
[18] У зӧрʼәтед Перес әв ьн: Жь Перес Һәсрун бу,
[19] жь Һәсрун Рʼам бу, жь Рʼам Аминадав бу,
[20] жь Аминадав Нәһшон бу, жь Нәһшон Салмон бу,
[21] жь Салмон Боwаз бу, жь Боwаз Овед бу,
[22] жь Овед Йеша бу, жь Йеша жи Даwьд бу.