<Әстәр 7

[1] Пʼадша тʼәви Һаман чу мәсрәфе щәм Әстәре.

[2] Рʼожа дӧда жи кӧ дьхwарьн у шәрав вәдьхwарьн пʼадше готә Әстәре: «Әстәр ханьм, дә бежә хwәстьна тә чь йә? Wе тәрʼа бе дайине. Чь һиви дьки? Һʼәта ниве пʼадшатийа мьн бә жи, wе бе сери».

[3] Әстәр ханьме ле вәгәрʼанд: «Һәгәр мьн ль бәр чʼәʼве тә кʼәрәм дитийә, пʼадшайи хwәш бә у һәгәр хwәстьна мьн ль пʼадше хwәш те, бьра әʼмьре мьн ль мьн бе пʼешкʼешкьрьне у жь бәр һивикьрьна мьнва жи, мьләте мьн!

[4] Чьмки әз мьләте хwәва qьрʼкьрьн, кӧштьн у ӧндакьрьнерʼа һатьнә фьротане. Һәгәр әм чаwа хӧлам у хӧламок һатьбуна фьротане, мьне qәт дәнг нәкьра, ле бәле нәйар нькарә зийана пʼадше ле вәгәрʼинә ».

[5] Һьнге Аһʼашwерош пʼадша ль Әстәр ханьме вәгәрʼанд у готе: «Әw кʼи йә, йан кʼа әw кʼӧ йә, йе кӧ жь сәре хwә дәрбаз буйә ван йәка дькә?»

[6] Әстәре гот: «Әwи мьхәнәт у нәйар, әw Һамане һани хьраб ә». Һаман ль бәр пʼадше у Әстәре qӧрьфи һәв.

[7] Пʼадша бь һерс кʼаса хwә дани, рʼабу чу бахче кʼочʼьксәре. Ле Һаман ль wьр ма, wәки бона әʼмьре хwә лава жь Әстәр ханьме бькә, чьмки әwи те дәрхьст кӧ пʼадше тьштәки хьраб бона wи qьрар кьрийә.

[8] Гава пʼадша жь бахче кʼочʼьксәре вәгәрʼийа ода мәсрәфе, дина хwә дайе ва Һаман ль сәр тʼәхт пʼала Әстәре кʼәти йә. Һьнге пʼадше гот: «Әве мала мьнда дәст бавежә ханьма пʼадше жи!» Гава әв йәк жь дәве пʼадше дәркʼәт, рʼуйе Һаман кʼәфән кьрьн ньхамтьн.

[9] Һьнге Һʼарбонайе, йәк жь нәмере бәрдәстийе пʼадше гот: «Ле нә тʼәне әв, ва йә дарәки бьльндайийа пенщи зәнди жи Һаман бона Мордокʼай, йе кӧ пʼадша хьлаз кьр, һазьр кьрийә, wе ль бәр дәре Һаман ә». Пʼадше гот: «Дә әwи һәма ль wи дари хьн».

[10] Һаман ль wи дари хьстьн кӧ әwи бона Мордокʼай һазьр кьрьбу. У паше һерса пʼадше дани.