Әстәр 3
[1] Пәй ван йәкарʼа, Аһʼашwерош пʼадша Һамане кӧрʼе Һамьдатʼайе Агаги мәзьн у бьльнд кьр у кʼӧрсийа wи жь кʼӧрсийед мир бәгед хwә жортьр кьр.
[2] У һʼәму хӧламед пʼадшейә ль бәр дәре пʼадше, дәвәрʼуйа дьчун у ль бәр Һаман та дьбун, чьмки пʼадше бона wи әв әʼмьр дабу, ле Мордокʼай дәвәрʼуйа нәдьчу у ль бәр wи та нәдьбу.
[3] Һьнге хӧламед пʼадшейә ль бәр дәре пʼадше готьнә Мордокʼай: «Чьма тӧ ль сәр әʼмьре пʼадшерʼа дәрбаз дьби?»
[4] Wана һәр рʼож wирʼа дьготьн, ле бәрга тьштәки нәдьгьрт, пәйрʼа әв йәк гиһандьнә Һаман, кӧ бьзаньбьн кʼа Мордокʼай ль сәр йа хwә бьминә йан на, чьмки әwи wанрʼа готьбу кӧ әw щьһу йә.
[5] Гава Һаман дит, wәки Мордокʼай дәвәрʼуйа начә у ль бәр wи та набә, әw нава хwәда гәләки qьлqьли.
[6] Ле wирʼа шәрм бу кӧ тʼәне дәсте хwә ль сәр Мордокʼай бьльнд кә, чьмки иди wирʼа готьбун Мордокʼай жь кʼижан мьләти йә. Һаман фькьри кӧ һʼәму щьһуйед мьләте Мордокʼай ль тʼәмамийа пʼадшатийа Аһʼашwерошда qьрʼ кә.
[7] У донздәһсалийа Аһʼашwерош пʼадша, мәһа йәке, аwа готи мәһа Нисанеда ль бәр Һаман бона мәрәме wи, бона рʼож у мәһ кʼьфшкьрьне пʼур, аwа готи пʼәшк дьһатә авитьне у әw кʼәтә мәһа донздәһа, кӧ дьбә мәһа Адаре .
[8] Һьнге Һаман готә Аһʼашwерош пʼадша: «Мьләтәк нава һʼәму мьләтед qәзайед пʼадшатийа тәда һәйә, нава wан мьләтада башqәбуйи бәла буйә. Qанунед wан жь qанунед һʼәму мьләта башqә нә. Әвана qанунед пʼадше наqәдиньн у дәст надә кӧ пʼадша ван аһа бьһелә.
[9] Һәгәр әв йәк ль пʼадше хwәш те, бьра әʼмьр дәркʼәвә, кӧ qьрʼа ван бе анине. Әз хwәха жи, әзе дәһә һʼәзар тәланте зив бькʼьшиньм бьдьмә дәсте qӧльхкʼара кӧ бькьнә хьзна пʼадше».
[10] Һьнге пʼадше жь тʼьлийа хwә, гӧстила хwә дәрхьст, да Һамане кӧрʼе Һамьдатʼайе Агагийе нәйаре щьһуйа, кӧ әʼмьре мьqабьли щьһуйа мор кә.
[11] Һьнге пʼадше готә Һаман: «Әз әwи зиви жи, wи мьләти жи дьдьмә тә, тӧ чаwа дьхwази ӧса жи бькә».
[12] Сездәһе мәһа йәке ньвискʼаред пʼадше һатьнә газикьрьне у wәкʼилед пʼадшерʼа, һʼәму wәлийед ль сәр qәзарʼа, һәр ахайе ль сәр һәр мьләтирʼа, һәр qәзайерʼа бь ньвисара wан у һәр мьләтирʼа бь зьмане wан, анәгори фәрмана Һаман бь наве Аһʼашwерош пʼадша һатә ньвисаре у бь гӧстила пʼадше һатә моркьрьне.
[13] Әw ньвисар бь дәсте qәwала һʼәму qәзайед пʼадшерʼа һатьнә шандьне, кӧ нава рʼожәкеда, мәһа донздәһа, аwа готи сездәһе мәһа Адаре, һʼәму щьһуйа, бьчʼук у мәзьн, жьна у зарʼа qьрʼ кьн, бькӧжьн у кʼоке ле биньн у һәбука wан тʼалан кьн бьбьн.
[14] Әв qьрара ньвисар ль нава һʼәму qәзада чаwа фәрман һатә әʼламкьрьне, wәки бона wе рʼоже һʼәму мьләт һазьр сәкьни бьн.
[15] Qәwал пе qьрара пʼадше зу рʼекʼәтьн чун у фәрмана ньвисар ль Суса qәсьрда жи данә әʼламкьрьне. Пʼадша у Һаман рʼуньштьн вәхwьн, ле бажаре Сусайе сәр һәврʼа дәрбаз дьбу.