<Әстәр 4

[1] Мордокʼай гава ве йәке гьшки пе һʼәсийа, кʼьнще хwә qәлаштьн, кʼӧрх ль хwә кьр, хwәли ль сәр хwә кьр. Паше чу нава бажер бь дәнге шина гьран дькьрә qарʼин,

[2] гьһиштә һʼәта ль бәр дәргәһе пʼадше сәкьни, чьмки мәрьве кʼӧрххwәкьри нькарьбу дәргәһе пʼадшерʼа дәрбаз буйа.

[3] Һʼәму qәзада, кʼидәре кӧ әw фәрмана пʼадшейә ньвисар дьгьһиште, нава щьһуйада шинәкә гьран бь рʼожи, гьри у зарә заре дәстпедьбу. Һьнәка жи ль сәр кʼӧрх у кʼӧзийе пʼал дьдан.

[4] Щарийед Әстәре у нәмеред wе һатьн у бона Мордокʼай wерʼа готьн, ханьм гәләки тʼәвиһәв бу у кʼьнщ шандьн, кӧ Мордокʼай кьн у кʼӧрх жь сәр wи бехьн, ле wи qәбул нәкьр.

[5] Һьнге Әстәре жь нәмеред пʼадше гази Һатʼакʼ кьр, кʼижан кӧ пʼадше кʼьфш кьрьбу кӧ бәрдәстийа wе бькә у шандә щәм Мордокʼай кӧ бьзаньбә, кʼа әw чь һʼәwал ә у чьма ӧса дькә?

[6] Һатʼакʼ чу щәм Мордокʼай ль мәйдана бәр дәре пʼадше.

[7] Мордокʼай һәр тьшт wирʼа гот, чь кӧ ль wи qәwьми бу, ӧса жи әw готьна Һаман готе, кӧ әwи бона щьһуйа зив жи соз дайә бькә хьзна пʼадше, кӧ кʼока wан биньн.

[8] Бона qьрʼкьрьна wан жи, Мордокʼай кʼахаза Сусайеда ль бәр фәрмана ньвисар гьрти да wи, кӧ нишани Әстәре кә, wерʼа жи шьровәкә у бежеда кӧ бькʼәвә щәм пʼадше, лава жь wи бькә у бона мьләте хwә дәлиләке же бьхwазә.

[9] Һатʼакʼ чу готьнед Мордокʼай Әстәрерʼа готьн.

[10] Әстәр Һатʼакʼ ль сәр Мордокʼайда вәгәрʼанд у готеда кӧ аһа бежейи:

[11] «Һʼәму бәрдәстийед пʼадше у мьләтед qәзайед пʼадше qәнщ заньн, кӧ һәр мер, йан жьна кӧ бе газикьрьн бькʼәвә һʼәwша пʼадшейә һьндӧрʼ, бона wан qанунәкә кӧштьне һәйә, тʼәне әwе сах бьминә, кʼижан кӧ пʼадша шьва хwәйә зерʼин бәрбьрʼи кә. Ле әва иди си рʼоже мьнә кӧ пʼадше гази мьн нәкьрийә».

[12] Готьнед Әстәре гиһандьнә Мордокʼай.

[13] Мордокʼай щаб ль сәр Әстәреда шанд у готе: «Нәфькьрә кӧ тӧ мала пʼадшеда йи, жь һʼәму щьһуйа те тʼәне хьлаз би.

[14] Аwа һәгәр тӧ ви wәхтида хwә кәрʼ ки, wе жь щики дьн кʼомәк у азади бьгьһижә щьһуйа, ле тӧ у мала баве хwәва һуне ӧнда бьн, кʼи занә кӧ тӧ бона рʼожа иройин нәбуйи ханьма пʼадше».

[15] Һьнге Әстәре щаб сәр Мордокʼайда шанд у готе:

[16] «Һәрʼә һʼәму щьһуйед кӧ Сусайеда дьминьн тʼоп кә у бона мьн рʼожи бьгьрьн, се рʼожа нә шәв нә рʼож, нә бьхwьн нә вәхwьн. Әзе жи ӧса тʼәви щарийед хwә рʼожи бьгьрьм у сәр qанунерʼа дәрбаз бьм, бькʼәвьмә щәм пʼадше, һәгәр бьмьрьм жи бьра бьмьрьм».

[17] Һьнге Мордокʼай чу ӧса кьр, чаwа кӧ Әстәре wирʼа гот.