<Әстәр 5

[1] Рʼожа сьсийа Әстәре кʼьнще хwәйә ханьмтийе хwә кьр, һʼәwша һьндӧрʼе һәрәмеда, пешбәри мала пʼадше сәкьни. Пʼадша хана пʼадшатийеда, пешбәри дәри ль сәр тʼәхте пʼадшатийа хwә рʼуньштьбу.

[2] Гава пʼадше Әстәр ханьм дит, кӧ һʼәwшеда сәкьни йә, Әстʼәре ль бәр wи кʼәрәм дит у пʼадше шьва дәсте хwәдайә зерʼин дьрежи wе кьр. Әстʼәр незик чу ль сәре шьве кʼәт.

[3] Пʼадше готә wе: «Әстәр ханьм, әв чь һʼәwал ә? Хwәстьна тә чь йә? Һʼәта ниве пʼадшатийа хwә жи әзе бьдьмә тә».

[4] Әстәре гот: «Һәгәр wе ль пʼадше хwәш бе, бьра пʼадша иро тʼәви Һаман бе мәсрәфа кӧ әз бона пʼадше дькьм».

[5] Пʼадше гот: «Зу гази Һаман кьн, wәки хwәстьна Әстәре бинә сери». Пʼадша тʼәви Һаман чу мәсрәфа Әстәрейә дани.

[6] Гава шәрав вәдьхwарьн, пʼадше готә Әстәре: «Дә бежә, хwәстьна тә чь йә? Wе тәрʼа бе дайине, чь һиви дьки? Һʼәта ниве пʼадшатийа мьн бә жи, wе бе сери».

[7] Әстәре ле вәгәрʼанд у готе: «Әв ә хwәстьн у һивикьрьна мьн:

[8] Һәгәр мьн ль бәр пʼадше кʼәрәм дитийә у һәгәр хwәстьна мьн жи ль пʼадше хwәш те, кӧ һивикьрьна мьн бинә сери, бьра пʼадша у Һаман бенә мәсрәфа кӧ әзе бона wан дайньм у сьбе әзе бь готьна пʼадше бькьм».

[9] Wе рʼоже Һаман бь дьле әшq у ша дәркʼәт чу, ле гава Һаман Мордокʼай ль бәр дәре пʼадше рʼуньшти дит, кӧ ль бәр wи рʼанабә у жь щийе хwә жи наһʼәжә, алаве да qафе Һаман.

[10] Ле Һаман wе дәме хwә зәфт кьр у гава вәгәрʼийа мал, шанд гази жьна хwә Зәрәше у пьсмамед хwә кьрьн.

[11] Һаман wанрʼа гот бона һәбука хwәйә пʼьрʼ, бона хwәйе гәләк кӧрʼа, бона wан тьшта, бь кʼижана пʼадше әw мәзьн кьрийә у чаwа әw жь мир бәга у жь хӧламед пʼадше бьльндтьр кьрийә.

[12] Ле бәле Һаман гот: «Һʼәта Әстәр ханьме жи пештьри мьн кәсәк тʼәви пʼадше тʼәглифи мәсрәфа хwәйә дани нәкьр, бона сьбе жи әз тʼәви пʼадше тʼәглифкьрийе щәм wе мә.

[13] Ле рʼаст әв һʼәму жи бона мьн нә тʼӧ тьшт ьн, һʼәта кӧ әз Мордокʼайе щьһу ль бәр дәре пʼадше рʼуньшти бьбиньм».

[14] Һьнге Зәрәша жьна wи у һʼәму пьсмамед wи ле вәгәрʼандьн у готьнә wи: «Бьра бьльндайийа пенщи зәнди дарәк бе һазьркьрьне у сәре сьбе бежә пʼадше, бьра Мордокʼай ль сәр бе лехьстьне у паше тӧ тʼәви пʼадше бь дьле рʼьһʼәт һәрʼә мәсрәфе». Әв готьна ль Һаман хwәш һат у әw дар да һазьркьрьне.