Әстәр 6
[1] Wе шәве хәwа пʼадше тʼәqьси, әwи әʼмьр кьр, кӧ кʼьтеба биранина сәрһатийа биньн ль бәр пʼадше бьхуньн.
[2] Wеда ньвисар һатә дитьне, кӧ Мордокʼай әʼламәти дабу, кӧ чаwа дӧ нәмеред пʼадшейә дәргәһван, Бигтʼан у Тʼәрәш шеwьра хwә кьрьбун кӧ дәсте хwә ль сәр Аһʼашwерош пʼадша бьльнд кьн.
[3] Һьнге пʼадше гот: «Ле жь бәр wе qәнщийева чь qәдьр йан һӧрмәт Мордокʼайрʼа һатийә кьрьне?» Бәрдәстийед пʼадше готьне: «Тʼӧ тьшт бона wи нәһатийә кьрьне».
[4] Пʼадше гот: «Һʼәwшеда кʼи һәйә?» Wе дәме жи Һаман һатьбу һʼәwша мала пʼадшейә дәрва кӧ тʼәви пʼадше хәбәр дә, wәки Мордокʼай ль wи дари хьн, кʼижан кӧ бона wи һатьбу һазьркьрьне.
[5] Бәрдәстийед пʼадше готьнә wи: «Ва йә Һаман һʼәwшеда йә». Пʼадше гот: «Бьра бе һьндӧрʼ».
[6] Гава Һаман һатә һьндӧрʼ, пʼадше wирʼа гот: «Һаман, бона wи мәрьве кӧ пʼадша бьхwазә qәдьрәки wирʼа бькә, бь тʼәхмина тә чь бе кьрьне?» Һаман дьле хwәда фькьри хwәха хwәрʼа гот: «Пештьри мьн иди пʼадшайе кʼерʼа бьхwазә qәдьр бькә?»
[7] Һьнге Һаман ль пʼадше вәгәрʼанд у готе: «Бона wи мәрьве кӧ пʼадша дьхwазә жерʼа qәдьр бькә,
[8] бьра wирʼа кʼьнща пʼадшатийейә кӧ пʼадша ль хwә wәрдьгьрә биньн, wи һәспе кʼофийа пʼадшатийе сери биньн кʼижан кӧ пʼадша ле сийар дьбә
[9] у кʼьнщ у һәспе бьдьнә дәсте гьрә гьре миред пʼадше йәки у кʼьнща ль wи мәрьви кьн, йе кӧ пʼадша дьхwазә wирʼа qәдьр бькә, әwи ль һәспе сийар кьн, бьбьнә мәйдана бажер у пешийа wи бькьнә гази: ‹Бона wи мәрьви wе аһа бе кьрьне, кʼижанирʼа кӧ пʼадша бьхwазә qәдьр бькә!›»
[10] Һьнге пʼадше готә Һаман: «Дә ньһа ль гора wе готьна хwә зу рʼабә, кʼьнщ у һәспе һьлдә, бона Мордокʼайе щьһу кӧ ль бәр дәре пʼадше рʼудьне ӧса бькә, жь wе готьна тә, бьра тʼӧ тьшт же кем нәбә».
[11] Һаман кʼьнщ у һәсп һьлдан, кʼьнщ ль Мордокʼай кьр, әw ль һәспе сийар кьр, бьрә мәйдана бажер, пешийа wи дькьрә гази: «Бона wи мәрьви wе аһа бе кьрьне, кʼижанирʼа кӧ пʼадша бьхwазә qәдьр бькә!»
[12] Мордокʼай вәгәрʼийа ль бәр дәре пʼадше, ле Һаман мәʼдәкьри жь шәрма сәргьредайи ләзанд чу мала хwә.
[13] Һаман әв һәр тьште кӧ һатә сәре wи, жьна хwә Зәрәше у һʼәму пьсмамед хwәрʼа гьли кьр. Һьнге биланед wи у жьна wи Зәрәше wирʼа готьн: «Һәгәр Мордокʼай жь мьләте щьһу йә, рʼуйе кʼижанида тә дәстпекьр бькʼәви те зора wи нәби, ль бәр wи те әʼсә дәвәрʼуйа һәрʼи».
[14] Вана һе тʼәви wи хәбәр дьдан, нәмеред пʼадше һатьн, Һаман ләзхьстьн, кӧ һәрʼә wе мәсрәфа кӧ Әстәре һазьр кьрийә.