Әстәр 8
[1] Wе рʼоже Аһʼашwерош пʼадш мала Һамане нәйаре щьһуйа пʼешкʼеши Әстәр ханьме кьр, Мордокʼай жи һат рʼуйе пʼадше кʼәт, чьмки Әстәре готьбу кӧ әw чи wе йә.
[2] Һьнге пʼадше гӧстила дәсте хwә дәрхьст, кʼижан кӧ жь Һаман стандьбу у әw да Мордокʼай, Әстәре жи Мордокʼай ль сәр мала Һаманрʼа кʼьфш кьр.
[3] Әстәре хәбәрдана хwә диса ль бәр пʼадше дьреж кьр, хwә авитә ньгед wи у бь гьри лава жь wи кьр, wәки wе хьраби у шеwьра Һамане Агаги бона qьрʼа щьһуйа һазьркьри бьдә бәталкьрьне.
[4] Пʼадше шьва зерʼин дьрежи Әстәре кьр, Әстәр рʼабу сәр хwә ль бәр пʼадше сәкьни
[5] у гот: «Һәгәр ль пʼадше хwәш те у мьн ль бәр wи кʼәрәм дитийә у һәгәр әв йәк ль бәр чʼәʼве пʼадше рʼаст ә у әw мьн бәгәм дькә, бьра бе ньвисаре кӧ әw шеwьра Һамане кӧрʼе Һамьдатʼайе Агаги бе бәталкьрьне, кʼижан кӧ әwи нәʼмә ньвисин кӧ һʼәму qәзайед пʼадшеда qьрʼа щьһуйа биньн.
[6] Ньһа әзе чаwа бькарьбьм бьбиньм хәзәба кӧ wе бе сәре мьләте мьн, йан чаwа бькарьбьм бьбиньм мьрьна пьсмамед хwә?»
[7] Аһʼашwерош пʼадша готә Әстәр ханьме у Мордокʼайе щьһу: «Һаман кӧ дәсте хwә һьлдабу ль сәр щьһуйа, мьн мала wи пʼешкеши Әстәре кьрийә у әw жи дайә дархьстьне.
[8] Ньһа һун бь наве пʼадше бона щьһуйа чаwа дьле wә дьхwазә бьньвисьн у бь гӧстилка пʼадше мор кьн, чьмки ньвисара бь наве пʼадше у бь гӧстила пʼадше моркьри найе бәталкьрьне».
[9] У һьнге бист сьсейе мәһа Сиwане , аwа готи мәһа сьсийа ньвискʼаред пʼадше һатьнә газикьрьне, һәр тьшт ль гора готьна Мордокʼай, щьһуйа, wәкʼила, wәлийа у сәрwеред qәзарʼа, һәр сәд бист һʼәфт qәзарʼа һатә ньвисаре, жь Һьндьстане гьрти һʼәта Әтйупийайе, һәр qәзайерʼа бь ньвисара wан, һәр мьләтирʼа бь зьмане wан, ӧса жи щьһуйарʼа бь ньвисара wан у бь зьмане wан.
[10] Бь наве Аһʼашwерош пʼадша ньвиси у бь гӧстила пʼадше мор кьр, да дәсте qәwала у әw ль мәһʼинед тәwла пʼадше сийар кьрьн у шандьн,
[11] бь ве йәке да кʼьфше кӧ пʼадше сәрбәсти дайә щьһуйед һʼәму бажарада, кӧ пьшт бьдьнә пьшта һәв, әʼмьре хwә хwәй кьн у һʼәму чʼәкдаред нәйаред хwәйә нава мьләта у qәзада, qьрʼ кьн, бькӧжьн, жьн у зарʼава кʼоке ле биньн у һәбука wан тʼалан бьбьн,
[12] бона wе йәке һʼәму qәзайед Аһʼашwерош пʼадшада, сездәһе мәһа донздәһа, аwа готи сездәһе мәһа Адаре һатә кʼьфшкьрьне.
[13] Әw фәрмана ньвисар һәр qәзайеда бона һʼәму мьләта чаwа qанун һатә әʼламкьрьне, wәки щьһу бона wе рʼоже һазьр бьн, кӧ һʼәйфа хwә жь нәйаред хwә һьлдьн.
[14] Qәwал ль мәһʼинед пʼадше сийар бун, бь фәрмана пʼадше зу рʼе кʼәтьн чун. Әв йәк ль Суса qәсьрда жи һатә әʼламкьрьне.
[15] Мордокʼай бь кʼьнще пʼадшатийейә рʼәнге ширк у сьпи, тʼаще зерʼини мәзьнва, сәрмьлке кʼьтанийи сьпи у соре гәвәз wәргьрти дәркʼәтә ль бәр пʼадше. Бажаре Сусайе жь әшqа һʼәжийа у ша бу.
[16] Һьнге щьһуйа рʼонайи, әшq, шабун у qәдьр дитьн.
[17] Һәр qәза у һәр бажаре дәра кӧ фәрман у готьна пʼадше дьгьһиште, әшq у шабун дькʼәтә нава щьһуйа, рʼожа кʼефе у щәжьне бу. Гәләк жь мьләтед wәлата дьбунә щьһу, чьмки саwа щьһуйа кʼәтьбу ль сәр wан.